SAN JUAN 8

Cazarashca jahua shuc-huan huaclliric huarmimanta

1[Jesusca Olivos urcumanmi rirca. 2Chai cayandic punzha ña pacarimucucpimi, Diosman mañana huasiman cutirca. Chaimanmi gentecunaca chayamurcacuna. Shina chayamucpimi, Jesusca tiyarishpa yachachi callarirca. 3Chaimanmi shuc huarmi cazarashca jahua shuc-huan chayarinacucta japishpa, mandashcacunata yachachiccunapish, fariseocunapish*f** apamurcacuna. Chashna apamushpa, tucui chaipi caccunapac ñaupapi churashpami:

4—Yachachic, cai huarmitaca cazarashca jahua shuc-huan cashcatami japimunchic. 5Ñucanchic taitacunaman Moisés mandashcapica, cai shina mana allita ruhuac huarmicunata japishpaca, rumicunahuan shitashpa huañuchichunmi nin. Canca, ¿imatatac ningui?— nircacuna.

6Paicunaca Jesús mana allita nicpica, juchanchishun nishpami, chashnaca tapurcacuna. Shina tapucpica, Jesusca pambapi cumurishpami, maqui dedohuan quillcacurcalla. 7Chashna tapushpa c'aticpimi, Jesús paicunata ricushpaca:

—Maijan cancunamanta mana juchayuc cashpaca, pairac rumihuan shitachun— nirca.

8Shina nishpaca, cutinllatacmi pambapi cumurishpa quillcashpa c'atirca. 9Chaita uyashpaca, shucllancaman shucllancamanmi, yuyaccunamanta pacha callarishpa llucshishpa rircacunalla. Shina chai huarmita apamuc runacuna tucui ricpica, huarmillami Jesushuanca saquirirca. 10Shina saquiricpimi, chai huarmita Jesús ricushpaca:

—Uyai. Chai juchanchiccunaca, ¿maitatac rincuna? ¿Manachu maijan cantaca juchanchirca?— nirca.

11Shina nicpi chai huarmica:

—Mana, amito. Pi mana imata juchanchircachu— nirca.

Shina nicpi Jesusca:

—Ñucapish mana imata juchanchinichu. Rilla, cutinca ama juchallinguichu— nirca.]#8.11 Maijan quillcacunaca versículo 1 manta versículo 11 camanca mana nincunachu.

Jesusca cai pachapi causaccunata achicyachic luz cashcamanta

12Jesusca israelcunaman*f** cutin huillashpaca:

—Ñucaca cai pachapi causaccunata achicyachic luzmi cani. Maijanpish ñucata c'aticca mana amsapi puringachu, ashtahuanpish causaita cuc luztami charinga— nirca.

13Shina nicpi fariseocunaca:*f**

—Can ima nishcacunaca canllamantami. Chaimanta can huillashcapish yangallami— nircacuna.

14Shina nicpi, Jesusca cashnami nirca:

—Ñucaca maimanta shamushcatapish, maiman ricushcatapish yachanimi. Shina cashcamanta ñucallamanta huillacushcapish, mana yangallachu. Ashtahuanpish cancunaca ñuca maimanta shamushcatapish, maiman ricushcatapish mana yachanguichicchu. 15Cancunaca gentecuna yuyashca shinami, pitapish juchanchinguichic. Ñucaca pitapish mana juchanchinichu. 16Ñucaca mana ñucallachu juchanchini, ashtahuanpish ñucata cachac Taitahuanmi juchanchini. Shina cashpami, ñuca maijanta juchanchishpaca, juchanchina cacpitac juchanchini. 17Cancunaman Moisés mandashcacunapica: ‘Ishcai huillaccuna imatapish chashnallatac huillacpica, chai huillashcaca mana yangallachu’ nishcami quillcashca tiyacun. 18Shina cashcamantami, ñucapish ñucallamantatac huillacuni. Shinallatac ñucata cachac Taitapish ñucallamantatacmi huillan— nirca.

19Shina nicpi paicunaca:

—¿Maipitac cambac taitaca?— nircacuna.

Chaimanta Jesusca:

—Cancunaca ñucatapish, ñuca Taitatapish mana ricsinguichicchu. Cancuna ñuca pi cashcata ricsishpaca, ñuca Taitatapish ricsinguichicmanmi— nirca.

20Diosman mañana huasi ucupi tiyacuc cullquita Diosman cushpa churana cuchupimi, Jesusca caicunataca yachachirca. Shina cacpipish paita japina pacha manarac chayamucpimi, paitaca pi mana japircacuna.

“Ñuca maiman ricushcamanca cancunaca mana rinataca

pudinguichicchu” nishcamanta

21Jesusca cutinllatacmi paicunamanca:

—Ñucaca rigrinimi. Ñuca rishca q'uipaca mashcanguichicmi. Shina mashcashpapish, cancunaca juchallapitacmi huañunguichic. Ñuca maiman ricushcamanca mana rinata pudinguichicchu— nirca.

22Chaita uyashpami mandac israelcunaca:*f**

—¿Paillatac huañuchirinamantachu nicun, imashi? ¿Chaimantachu ñucanchictaca pai ricushcamanca mana rinata pudinguichicchu nicun, imashi?— ninacurcacuna.

23Shina nicpica, Jesusca cashnami nirca:

—Cancunaca caimantami canguichic. Ñucaca jahuamantami cani. Cancunaca cai pachamantami canguichic. Ñucaca mana cai pachamantachu cani. 24Chaimantami ‘cancunapac juchallapitac huañunguichic’ nircani. Ñuca pi cashcata cancuna mana crishpaca, cancunapac juchallapitacmi huañunguichic— nirca.

25Chaimanta Jesusman tapushpaca:

—Canca, ¿pitac cangui?— nircacuna.

Shina tapucpi Jesusca:

—Ñuca pi cashcataca callarillapitacmi cancunamanca huillarcani. 26Cancunataca tauca ninacunatapish, juchanchinacunatapish charinimi. Shina cashpapish ñuca cai pachapi causaccunata imata nishpapish, ñucata Cachac imata nishcata uyashpallami nini. Paica cashcata nicmi— nirca.

27Jesús chashna huillashpaca Taita Diosmantami huillacurca, ashtahuanpish paicunaca chaitaca mana entendircacunachu. 28Chaimantami Jesusca cashna nirca:

—Runa Tucungapac shamushca*f** ñucata cancuna jahuaman churashpami, ñuca pi cashcataca yachanguichic. Shinallatac ñuca munaimanta imatapish mana ruhuac cashcata, ashtahuanpish ñuca Taita yachachishcata nic cashcatapish yachanguichicmi. 29Ñucata Cachacca ñucahuanmi. Ñucaca pai munashcallatami ruhuani. Chaimantami paica mana ñucallata saquin— nirca.

30Jesús chashna nicpica, achcacunami paitaca crircacuna.

Diospac huahuacunamantapish, juchapi huatashca shina causaccunamantapish

31Jesusca paita cric israelcunataca:*f**

—Cancunaca ñuca rimashca shimicunata cazushpa c'atishpaca, ñuca yachacuccunatacmi canguichic. 32Chai rimashcaca cashcata nic cashcatapish ricsinguichicmi. Chai cashcata nic rimashcami huatashca shina caccunataca cacharichinga— nirca.

33Shina nicpi paicunaca:

—Ñucanchicca ñaupa taita Abrahampac huahua huahuacunami canchic. Jaicapi pipac huatashca mana canchicchu. ¿Ima nishpatac canca cacharichingami ninguiyari?— nircacuna.

34Shina nicpimi Jesusca cashna nirca:

—Maijanpish juchata ruhuaccunaca juchapi huatashca shinami cancuna. Chaica chashnatacmi can. 35Amota servic runaca amopac huasipica mana causacungallachu, ashtahuanpish churimi taitahuanca causacungalla. 36Shina cacpica, Diospac Churi cancunata huatashca shina cashcamanta cacharichicpica, ña cacharishcatacmi canguichic. 37Cancuna Abrahampac huahua huahuacuna cashcataca yachanimi. Chashna cacpipish, ñuca yachachishcata mana crishpami, ñucataca huañuchishun nicunguichic. 38Ñucaca ñuca Taitahuan cashpa, imalla ricushcallatami huillani. Cancunaca cancunapac taita ima nishcallatami ruhuanguichic— nirca.

39Shina nicpi paicunaca:

—Ñucanchic taitaca Abrahammi— nircacuna.

Shina nicpi, Jesusca cashnami nirca:

—Cancuna Abrahampac huahuacunatac cashpaca, Abraham ruhuashca shinallatacmi ruhuanguichicman. 40Ñucaca Diosmantatac yachacushcatami huillani. Shina cacpipish cancunaca ñucata huañuchishun ninguichicmi. Abrahamca jaicapi mana chashna ruhuashcachu. 41Cancunaca cancunapac taita ruhuac shinallatacmi ruhuanguichic— nirca.

Shina nicpi paicunaca:

—Ñucanchicca mana huainapac huahuacunachu canchic, ashtahuanpish shuc taitallatami charinchic. Chaica Taita Diosmi— nircacuna.

42Shina nicpimi, Jesusca cashna nirca:

—Taita Dios cancunapac taita cacpica, c'uyanguichicmanmi. Ñucaca Diosmanta shamushpami caipi cani. Mana ñuca munaimantachu shamurcani, ashtahuanpish Taita Diosmi cacharca. 43¿Ima nishpatac ñuca rimashcataca mana entendinguichic? Cancunaca ñuca rimashcata mana uyashun nishpami, mana entendinguichic. 44Cancunapac taitaca diablomi. Cancunaca pai shinami canguichic. Pai shina cashpami, pai munashcata ruhuashun ninguichic. Callarimanta pachami diabloca huañuchic cashca. Paica imapish cashcata ruhuana munaitaca jaicapi mana charishcachu. Shina cashpami, paica cai pachapipish llullacunlla. Paica llullanata callarichic cashcamantami, llullapac taitaca can. Pai llullashpaca, pai ima shina cashca shinallatacmi llullan. 45Shina cashcamantami ñuca imapish cashcallata nicpica, mana cringuichic. 46¿Cancunapuramanta maijantac ñuca juchayuc cashcataca ricuchinguichic? Diosmantatac ñuca huillacpica, ¿ima nishpatac mana cringuichic? 47Maijanpish Diospac cashpaca, pai rimashcatami uyasha nin, ashtahuanpish cancunaca mana Diospac cashpami, pai rimashcataca mana uyashun ninguichic— nirca.

Ñaupa taita Abraham manarac tiyacpi, Jesucristo ña tiyashcamanta

48Chaimantami mandac israelcuna*f** Jesustaca:

—‘Canca Samaria llactamantami cangui, shinallatac supaihuanmi cangui’ nishpaca, allillatacmi nishcanchic— nircacuna.

49Shina nicpi Jesusca:

—Ñucaca ima supaihuan mana canichu. Ñuca imata ruhuashpapish, Taitata allipi llucchingapacmi ruhuani, ashtahuanpish cancunaca ñucataca mana allipimi llucchinguichic. 50Gentecuna ñucata alli nichunca mana munanichu, ashtahuanpish ñuca Taitami ñucata alli nichun munan. Shina ñucata mana alli nicpica, paillatacmi taripanga. 51Maijanpish ñuca nishcata cazucca mana huañungachu. Chaica chashnatacmi canga— nirca.

52Shina nicpi, mandac israelcunaca:

—Cunancarin supaihuan cashcata yachanchictacmi. Taita Abrahampish, Diosmanta ñaupa huillaccunapish huañurcami. Shina cacpica, ¿ima shinatac cutin canca ‘maijanpish ñuca nishcata cazuccunaca mana huañungachu’ ninguiyari? 53¿Canca ñucanchic taita Abrahamta yallichari canguiyari? Paipish, Diosmanta ñaupa huillaccunapish huañurcami. Canca, ¿imata yuyashpatac chashnaca nicunguiyari?— nircacuna.

54Shina nicpimi, Jesusca cashna nirca:

—Ñucallatac ‘allimi cani’ nirishpaca, imapish mana canmanchu. Ñucata alli nicca ñuca Taitami. Paillatatacmi cancunaca ‘ñucanchic Dios’ ninguichic. 55Cancunaca paitaca mana ricsinguichicchu. Shina cacpipish ñucaca ricsinimi. ‘Ñuca mana ricsinichu’ nishpaca, cancuna shinallatac llullacmi caiman. Ñucaca ricsinitacmi. Chaimantami pai ima nishcataca cazuni. 56Cancunapac ñaupa taita Abrahamca ñucata ricuna punzha chayana cashcata yachashpami cushicurca. Ña ricushpaca, ashtahuanmi cushicurca— nirca.

57Shina nicpi, mandac israelcuna Jesustaca:

—Manarac pichca chunga huatatapish charinguica. ¿Shinachu ‘taita Abrahamta ricurcanimi’ ningui?— nircacuna.

58Shina nicpi Jesusca:

—Manarac taita Abraham tiyacpimi, ñucaca ña tiyarcani. Chaica chashnatacmi can— nirca.

59Shina nicpimi, paicunaca rumihuan shitangapac rumicunata japircacuna. Ashtahuanpish Jesusca miticushpami, Diosman mañana huasimanta llucshishpa rirca.

Currently Selected:

SAN JUAN 8: QXR96

Highlight

Copy