SAN LUCAS 22
22
Jesusta huañuchingapac yuyarinacushcamanta
(Mt 26.1-5,14-16; Mr 14.1-2,10-11; Jn 11.45-53)
1Levadura illac tandata micuna punzhami ña chayamucurca. Chaimi pascua*f** punzha carca. 2Israel*f** curacunata mandac curacunapish, mandashcacunata yachachiccunapish gentecunata manchashcamantami, Jesustaca ima shina pacalla japishpa huañuchinata parlanacurcacuna.
3Chashna cacpimi, Judas Iscariote runapac shungupi Satanasca*f** yaicurca. Chai runaca Jesuspac chunga ishcai yachacuccunapuramanta shucmi carca. 4Paimi curacunata mandac curacunapacmanpish, Diosman mañana huasita cuidaccunapacmanpish Jesusta ima shina japichinata parlangapac rirca. 5Chashna parlacpimi, paicunaca cushicushpa, Judasmanca cullquita cushun nircacuna. 6Paicuna cullquita cushun nicpica, Judasca ari nishpami, Jesusta pi mana yachacpi ima shina pacalla japichinata yuyarishpa puricurca.
Apunchic Jesús pai huañunata yuyarishpa micushcamanta
(Mt 26.17-29; Mr 14.12-25; Jn 13.21-30; 1 Co 11.23-26)
7Diosman cushca pactalla ovejata*f** huañuchishpa micunapish, shinallatac levadura illac tandatapish micuna pascua*f** punzhami ña chayamurca. 8Chaimantami Pedrotapish, Juantapish Jesusca:
—Richic, ñucanchic pascuata yuyarishpa, micunata micungapac allichigrichic— nirca.
9Shina nicpica:
—¿Maipitac allichigrichun ninguiyari?— nircacuna.
10Shina nicpi Jesusca:
—Cancuna ña puebloman yaicugricushpaca, yacu puñu aparishca shuc runatami ricunguichic. Paita ricushpaca, mai huasiman pai yaicungacaman c'atishpa ringuichiclla. 11Chaipi causac huasiyuctaca: ‘Ñucanchic Yachachicca: “¿Maijan ucupitac ñuca yachacuccunahuanca pascuata yuyarishpa micusha?” ninmi’ ninguichic. 12Cancuna chashna nicpica, chai huasiyucca sumacta allichishca jatun ucutami altopi ricuchinga. Chai ucupi ñucanchic micungapac allichinguichic— nirca.
13Yachacuccuna rishpaca, Jesús nishca shinallatacmi ricurca. Chaipimi pascuata yuyarishpa, micunata allichircacuna.
14Ña micuna horas chayamucpica, Jesusca paipac yachacuccunandicmi mizapi micungapac tiyarirca. 15Ña tiyacushpa Jesusca:
—Ñucaca manarac llaquita apashpami, cancunahuan pascuata yuyarishpa micunataca mai munacurcani. 16Cancunaman ninimi: Cai micunataca Taita Dios mandana punzhapi micungacaman cutinca manatac micushachu— nirca.
17Chashna nishpami, Jesusca vaso vinota japishpa, Taita Diosta pagui nishpaca:
—Caicachic, tucuilla asha ashata ubiaichic. 18Cancunaman ninimi: Cunanmanta pacha cai uvas vinotaca, Taita Dios mandana punzhapi ubiangacaman cutinca manatac ubiashachu— nirca.
19Shinallatac Jesús tandata japishpapish Taita Diosta pagui nishpami, chaupishpa chaupishpa yachacuccunaman cushpaca:
—Caica, cancunamanta llaquichishca cana ñuca aichami. Ñucata yuyarishpa, cashna ruhuacunguichiclla— nirca.
20Shinallatac pascua micuita micushca q'uipaca, vaso vinota japishpami, Jesusca:
—Cai vaso vinoca, cancunata quishpichingapac jichana ñuca yahuarmi. Chaihuanmi Taita Diosca shuc mushuc ari ninacuita pactachigrin. 21Chashna cacpipish ñucata japichic runaca, ñucallahuantacmi cai mizapi micucun. 22Runa Tucungapac shamushca*f** ñucataca, Taita Dios ima shinami tucuchun nishca shinallatacmi ruhuangacuna, ashtahuanpish ñucata japichic runalla, ¡aij, imachari tucunga!— nirca.
23Jesús chashna nicpica:
—¿Maijantac paita japichicca canchic?— nishpami, caishuc chaishuc tapunacurcacuna.
“Mandangapacca, ¿maijantac ashtahuan alli canchic?” ninacushcamanta
24Chai q'uipami Jesuspac yachacuccunaca:
—Mandangapacca, ¿maijantac ashtahuan alli canchic?— nishpa, caishuc chaishuc rimanacurcacuna.
25Chashna rimanacucucpimi, Jesusca:
—Cai pacha llactacunata mandaccunallami, imatapish mandashpa paicuna munashcata ruhuachincuna. Shinallatac mandaccunallami: ‘Allita mandacun’ nichun munancuna. 26Cancunaca mana chashnachu cana canguichic. Chaipac randica, cancunapurapi maijan alli nishca casha nishpaca, q'uipa huiñaicuna shinami imatapish ruhuana canguichic. Shinallatac maijan mandac cashpapish, servic runa shinami cana canguichic. 27¿Maijantac punta alli nishcaca canga? ¿Mizapi micungapac tiyaricchu canga? Mana cashpaca, ¿micunata servicchu canga? Micungapac tiyaricmari, ashtahuan punta alli nishcaca can. Chashna cacpipish ñucaca servic shinallami cancunahuanca cani.
28Ima llaquicunahuan cacpipish, ñucahuanmi cancunaca carcanguichic. 29Chaimantami ñuca Taita ñucata Mandacta ruhuashca shinallatac, cancunatapish mandacta ruhuasha. 30Chashna ruhuacpimi, cancunaca maipi ñuca mandacucpica ñucahuan micunguichic, ubianguichic. Shinallatac mandashpa tiyarinapi tiyarishpami, Israelpac*f** chunga ishcai aillucunata mandanguichic— nirca.
“Ñucataca mana ricsinichu ninguimi” nishpa,
Pedrota Jesús nishcamanta
(Mt 26.31-35; Mr 14.27-31; Jn 13.36-38)
31Apunchic Jesusca caitapish nircami:
—Simón, Simón. Cancunataca trigota shushuc shina, alli cacta, mana alli cacta ricungapacmi, Satanasca*f** mañashca. 32Chashna cacpipish ‘ña mana c'atishachu’ ama nichunca, ñucaca canmanta Taita Diosman mañarcanimi. Can llaquirishpa, Taita Diosman cutirishpaca, caishuc ñucata c'aticcunamanpish ñucata c'atichun alli yuyaita cungui— nirca.
33Jesús chashna nicpi Pedroca:
—Apunchic Jesús, canta carcelpi churacpipish, canhuanmi casha. Shinallatac huañuna cacpipish, canhuanmi huañusha— nirca.
34Chashna nicpipish Jesusca:
—Pedro, canca cunan tutallatacmi gallo manarac cantacpi, quimsa cutin ñucata ‘mana ricsinichu’ ningui— nirca.
Jesús llaquita apanaca ña chayamushcamanta
35Shinallatac Jesusca paicunaman tapushpami:
—Ñuca cancunata cucayu illacllatac, cullqui illacllatac, shinallatac ushuta illacllatac cachacpica, ¿ima illac carcanguichicchu?— nicpi yachacuccunaca:
—Mana ima illarcachu— nircacuna.
36Shina nicpi Jesusca:
—Shinashpaca, cunanca maijanpish muchilatapish, cullquitapish charicca, apaichiclla. Shinallatac maijanpish espadata mana charicca, churanata c'atushpa randichic. 37Cancunaman ninimi: Taita Dios ñaupaman ñuca ima tucuna cashcata quillcachishpaca: ‘Millai runacunata shinami llaquichishca canga’ nishcaca, pactanatacmi can. Shinallatac ñucamanta Taita Dios tucui quillcachishcaca pactangami— nirca.
38Chashna nicpimi yachacuccunaca:
—Apunchic Jesús, riqui. Ishcai espadacunatami charinchic— nicpi:
—Chaitaca, ña upalla caichic— nirca.
Getsemaní huertapi Taita Diosman Jesús mañashcamanta
(Mt 26.36-46; Mr 14.32-42)
39Chai q'uipaca Jesusca chaimanta llucshishpaca, Olivos urcuman ric cashca shinallatacmi rirca. Pai ricpica, yachacuccunapish c'atishpami rircacuna. 40Ña chaiman chayashpaca:
—Ima millai yuyaicuna ama urmachichunca, Taita Diosman mañaichic— nirca.
41Chashna nishpa yachacuccunapacmanta ashata caruyashpaca, Taita Diosman mañangapacmi cungurirca. 42Chashna cungurishpaca:
—Ñuca Taitalla. Can munashpaca, cai jayac ubiana shina llaquita ñuca apanataca jarcaiyari. Ñuca cashna munacpipish, ama ñuca munashcata ruhuaichu, ashtahuanpish can munashcata ruhuai— nishpami mañarca.
43Chashna mañacucpimi, jahua pachamanta ángel shamushpa llaquita apachunlla sinchiyachirca. 44Jesús munai llaquihuan cashpami, ashtahuan Taita Diosman mañarca. Chashna mañacucpica, jumbipish yahuar shinami pambaman shuturca.
45Ña Taita Diosman mañashca q'uipaca, yachacuccunapacman cutishpaca, paicuna llaquihuan cashcamanta suiñucucpimi tuparirca. 46Chaita ricushpaca:
—¿Ima nishpatac suiñucunguichic? Ima millai yuyaicuna ama urmachichunca, jatarishpa Taita Diosman mañaichic— nirca.
Jesusta japishcamanta
(Mt 26.47-56; Mr 14.43-50; Jn 18.2-11)
47Jesús chashna nicucpiracmi, achca runacuna paipacman shamurca. Chai runacunapac ñaupataca, Jesuspac chunga ishcai yachacuccunapuramanta Judas runami shamucurca. Judas ña chayamushpaca: “Allillachu cangui” nishpami, Jesusta muchangapac cuchuyarca. 48Chashna cuchuyacpica Jesusca:
—Judas, canca Runa Tucungapac shamushca*f** ñucataca, ¿muchashpachu japichingui?— nirca.
49Paihuan cac yachacuccuna Jesusta ña japicucta ricushpaca:
—Apunchic Jesús, ¿espadahuan macanacushunchu?— nishpami tapurcacuna.
50Chashna nishcahuanmi, Jesushuan caccunamanta shuc runaca curacunata jatun mandac curapac servicta espadahuan alli lado rinrita p'itirca. 51Chashna p'iticpimi Jesusca:
—Ña chailla, saquichic— nirca.
Chaimantaca chai runapac rinri p'itishca chugripi tuparishpaca, alliyachircallami.
52Chashna alliyachishpaca, japingapac shamuc curacunata mandac curacunatapish, Diosman mañana huasita cuidaccunata mandaccunatapish, cunac yuyaccunatapish Jesusca:
—¿Ñucataca shuhuata shinachu cancunaca espadacunahuan, caspicunahuan japingapac shamunguichic? 53Punzhantami Diosman mañana huasipi cancunahuanca carcani. Chashna cacpipish cancunaca mana japircanguichicchu. Cunanca ñucata japina horas chayamucpimi, amsapi mandacuc supai yuyaita cushcamanta ñucataca japinguichic— nirca.
Pedroca Jesusta “mana ricsinichu” nishcamanta
(Mt 26.57-58,69-75; Mr 14.53-54,66-72; Jn 18.12-18,25-27)
54Chai q'uipami Jesustaca ña japishpa, curacunata jatun mandac curapac huasiman aparircacuna. Pedroca caru carullatami c'aticurca. 55Jesusta apashca q'uipaca, huasi pungu pambapimi ninata japichishpa, muyundicta tiyarishpa masharicurcacuna. Pedropish paicunahuanmi masharicurca. 56Pedro chashna masharicucpi, shuc servic huarmi paita alli ricsishpaca:
—Riqui, cai runapish Jesushuan puricmi carca— nirca.
57Chashna nicpi, Pedroca chai huarmitaca:
—¿Pichari? Ñucaca mana ricsinichu— nirca.
58Chai q'uipallami shuc runapish Pedrota ricushpaca:
—Canpish chai runacunapurami cangui— nicpi Pedroca:
—¿Ima nishpatac shina ningui? Ñucaca mana chaipurachu cani ninica— nirca.
59Shinallatac shuc hora caipac shinapimi, shuc runapish Pedrotaca:
—Cai runapish Jesushuan puricllatatacmi carca. Paipish Galilea llactallamantatacmi— nirca.
60Chashna nicpipish, Pedroca chai runataca:
—Imamantapish nicunguichari, mana entendinichu— nirca.
Pedro chashna nicucpica, ñapish galloca cantarcallami. 61Chashna cantacpimi, Apunchic Jesusca Pedrota tigrarishpa ricurca. Chashna ricucpimi: “Manarac gallo cantacpimi, quimsa cutin ñucataca ‘mana ricsinichu’ ningui” nishpa, Apunchic Jesús nishcata Pedroca yuyarirca. 62Chaita yuyarishpami, Pedroca chaimanta canzhaman llucshishpaca, munai huacarca.
Jesusta burlashpa asishcamanta
(Mt 26.67-68; Mr 14.65)
63Jesusta cuidac runacunaca pucllashpa paita huactashpami, 64ñahuita pañuhuan huatashpaca:
—¿Maijantac cantaca huactanchic? ¡Huillai!— nircacuna.
65Shinallatac Jesustaca munai c'amishpami rimarcacuna.
Mandaccunapuralla tandanacushcapacman Jesusta apashcamanta
(Mt 26.59-66; Mr 14.55-64; Jn 18.19-24)
66Ña pacaricpimi, Israel*f** curacunata mandac curacunapish, cunac yuyaccunapish, mandashcacunata yachachiccunapish tandanacushpa, mandaccunapuralla tandanacushcapacman Jesustaca aparcacuna. Chaiman apacpica:
67—¿Canca Taita Dios cachashca Quishpichic Cristochu cangui? Huillai— nishpami tapurcacuna.
Chashna nicpi Jesusca:
—Ari nicpipish, cancunaca mana cringuichicchu. 68Cancunaman ñuca tapucpipish, cancunaca mana huillanguichicchu, shinallatac mana cacharinguichicchu. 69Shina cacpipish cunanmanta pachami, Runa Tucungapac shamushca*f** ñucaca imatapish ruhuaclla Taita Diospac alli maquiman tiyacugrisha— nirca.
70Chashna nicpica:
—Shinashpaca, ¿canca Diospac Churichu cangui?— nishpa, tucui chaipi caccuna huaicashpa tapucpimi, paica:
—Ari, cancuna nishca shinallatacmi cani— nirca.
71Shina nicpimi paicunaca:
—Pai imalla nishcata uyaccunamanca, ña mana tapunachu canchic. Pai ima nicushcataca, paipac shimillamantatacmi yachanchic— nircacuna.
Currently Selected:
SAN LUCAS 22: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
