Kodampaya 2

Akka Hapura Qulqulloota tamaarewwa Yesuusi qara' lekkade

1Ete xayso nessuma kundda kenatta' kayteeyye, tamaarewwa piisa takka'e pora takka opopa ollopa aanen. #Lewi 23:15-21; ooreta 16:9-11 2A isiqara in upnin mali nessa a puppeeta kokkoka paho ka moonte xata de'e ka tikase a kela caan immake. 3Arrapadda a hapulpula apitta' paha ka ishootta akkaaden. Ka olkela qootamen ka ishootta takka takka qara' kuti'en. 4Ikka piisanti Hapura Qulqullootatin immakaaden. Ka akka Hapura Qulqulloota akka haasawadane, ishootta ettanissa daashe qara'e, afadda pilaatin haasawatta paayyen.

5Sitiiyyi, Yihutaata a qinseetan japaannitto ka piitadda pisa oppaayye deete ka Yursaalami kara kitta. 6Ete nessoose dakayeneeyye, orra lekayta ka ollopa de'e. Ka qoota tamaarewwasene afadda a orroose ollopa de'e' haasawannaan, ikka dakayen malla oppa' qawwaawen. 7Ka oppa daxxa ka oppa qawwaawaan kidene, “Sene asse haasawanna piisa orra Kelila'enne? 8Ka kuli ino takka takkaayye attan ishootta afadda piitinno an kara dalanne' haasawanna, dakayninna? 9Ino piita Baarte ka a Meedi ka a Elaami ka a Mosoppotaamiya ka a Yihuta ka a Qebbedooqiya ka a Baantoosi ka a Issiya 10ka a Firkiya ka a Binfiliya ka a Kipsi ka a awrajjadda Liipiya a piita Qereena kapan desa ca oppan kalla; ino Yihutaata a Roome deete isho ino a amanteeta Yihuta oppopa oore areen kinna. 11Ka akkamose mina'ew orra piita Qerteesi isho a Arapa ka caaw, tin ino piisanti anka ishootta kodaase a Waaqa kutta afaaddannon torrina dakayninna!” 12Semmalla ikka piisanti oppa' qawwaawen ka wa kidane' dapen ka olli' kidene, “Ata wessen maana koddan!”

13A demo xoori ishootta qara seesen ka kidene, “Ha maaddota taadeta wayneeta'e iken ka maashshooden.”

Haasa Peetiroosi' haasawade

14Sitiiyyi Peetiroosi ka kudanka takkasene olli qa'ade ka nessaadi kuttishe ka samaytaseti' haasawade ka kide, “Ishina a orra piita Yihuta isho ishina a Yursaalami kara kala piisaayye, wessen kodde upnaatta'e; waan haasawanna dakkaysada! 15Amma teykante saateta sessaawweey akka dikatten mina'e orroose in maashshoonne. 16Ma sede wa malla koddite, qaaletase a xuumampaytase Iyyu'eli haasawade ka kide,

17‘Ha Waaqa ikiini,

Kuyyaata piraampiratiiyyi, asse koddita;

anti hapuriyyon nama piisa qara' tuqa.

Hellaassin a diira isho a tuparra ka xuuma haasawadan,

xayyoolaytaayshin keleshaata akka,

qimayaassin nefo ka olsa olsootta.

18Asseew kuyyawwosen karaayye,

orxayaayyo a diira ka a iskatta qara'en

hapuriyyo tuqa;

ishootta ka xuuma haasawadan.

19Illi moonta quda'e daxxowwan koda.

Ka xati piita qara'e wa orra qawwanna akkisha,

Diika ka apitta isho qayanqayoota qayya ka akkaatta.

20Kuyyaatase a Poqalla' kutta ka orra qawwannitto

a in kaynin turan,

Piirtota itukkanta,

Leya ka diika pahanaada.

21A maxxa Poqalla haleeno pisa ka dina.’ Akka dikkatto malla.

22“Ishina orra Isira'eelitiiyyi, qaalese dakkaysada! Akka ishina mattaayshina uptan mina'e, aynuma a Yesuusise a Naasireti qudanne Waaqa otantaayshin oppa' kodaddaasene kukutta ka orra qawwanna isho milikkitadda a kodeetin akkishe. 23Isha' nefo mattaadi'i, akkima Waaqa xattaaw turan koda' qapade ka upnaade qara'e ishina' tarpe ka daasame. Ishina ka akka harka tiyyoolaya oppa' fannisamo ka to'o' kooten. 24Waaqa xoori toota isha qapeeta ka isha hattissa in ettaninne. Waaqa hupna toota'e pashshe ka tootoppa isha xaashe. #Maati 28:5-6; Maari 16:6; Luqa 24:5 25Taawwiti qootaadi desa ikiini,

‘Awta piisan Poqalla ittura' tooyni,

Akkan an yaaqyaaqnini'i, isha akkittiiyyooyye ca. #mas 16:8-11

26Semmalla karittiyyo ixasoode.

Afaayyo ka xasoottaan immakaaden,

To'ampayteetase xayyo a dakinta' nefo kippeetanne kallaatta.

27Atti Si'ooli kara a ana a' diisso,

umma qulqullittaayti akka hawla kara' japo a' kooto.

28Pora caatta'e ana' upnasse.

Qoota' ana olli kitto malla, xasoottiyyo immakkoota kodda.’”

29“Hellaanno, Taawwitise a aappadaanno a xatta oppa takka kodde akkima to'e ka hawlame, hawlaadi nefo ka amma ikki are ino oppaayye co, ana la'aysho ka ishina' lelo. 30Taawwiti malla sede haasawade, qoota xuumampayta kodde ka kippeetase a Waaqa xaxaan ishi' kale ka kide, ‘Sanynyeetaayti oppan nama takka sufaanaayti qara' kutiisha’ a upo malla. #Maati 28:5-6; Maari 16:6; Luqa 24:5 31Se minanne Kiristoosi akka Si'ooli kara in hasnini'i, dakintaadi ka hawla kara in japnin ka in hasnini' qoota turan akke malla qoota tootoppa xaanaaditi desa xuuma haasawade. 32Waaqa Yesuusise tootoppa xaashe. Ino piisanti anka an sedeeti maakkiyya. 33Ete harka Waaqa a akkittati kutiitta' opeela kideeyye ka kippeetase a Hapura Qulqulloota Waaqa Aappa qara teyyadeeyye, sede a akkinittan ka dakaynittane tupa xata tuqe. 34-35Semmalla a moontopa fayyade qoota Taawwiti in koddinin malla, ihaasawade ka kide,

‘Ha Waaqa iPoqallaayyo' kide:

Hakan paarkaaladdaatti hupnaayti a ukkumeeta' kelopa ke oorinno kara'e,’”

Harkiyyo a akkittati' kuti'e.’ #mas 110:1

36“Semalla Yesuusise a ishina fannisten Waaqa akkima Poqalla ka Kiristoosi kode, samayta Isira'eeli piisa a dukaatan sede upnaado.”

37Orrase ete sede dakayeeyye, ikka a kuttati karittaaysho karanxata ishootta' dakaatte, ika Peetiroosi isho erkamampayasene ata haseeti' kidene, “Hellaanno! Ka kuli maanan koona?”

38Peetiroosi ka ishootta' kide, “Juppootaayshin oppa oora ka akka juppootaayshin ishina' hasto'e, ishina takka takkaayye maxxa Yesuusi Kiristoosin jaqqama, Hapurase a Qulqulloota daassata Waaqa' kodde' teyyattaneey. 39Qaalese a kippeeta ishin ka hellaassin, isho isasene pora sekaayye ca a Waaqa Poqallaanno issipa halaada piisati'iiy.”

40Ka qaaleta pila lekayteeta ishootta' maakkume ka turadesaaw ishootta dehaame ka kide, “Qitaateta quumarose a xelta qara' kaynitto kelaayye issin paha!” 41Ishootta oppa lekaya ka qaalese' teyyaden ka jaqqamen. Kuyyaasetiiyyi, nama amane a kuma sessa mina co ka padaawame. 42Ishootta' nefo kollissa a erkamampaya' dakayeetan ka takkumtan kallaattaan ka damta ollin dameeta isho qinseetanne japaanni.

Takkumta hellaa Kiristaana ka ollin kallaattaaysho

43Sitiiyyi harka erkamampaya Yesuusi oppa'e qoota wa orra qawwanna ka daxxowwa lekaya kodammaan malla, orra piisa fuuraan immakaade. 44Orra amanno piisa takkumtan ollin kallaanni; wa qapane pisa kan a olturatta'ew#koda 4:32-35 . 45Dullaasso ka teyantaaysho'e kanni ka nama piisa akkima parpaaccisnitto mina olli' qoonni. 46Ka awta piisa tika qulqlloota' kelopa ollopa anni ka tikkaassotiiyyi oltura laaqqota moossanni ka xasootta ka karitta fayyaatin dammi. 47Ka Waaqa kalataysanni. Nama piisa ka ishootta ulfeessini. Waaqa ka orra dinno awta piisa ishootta oppopa padaawni.

Currently Selected:

Kodampaya 2: MaQu

Highlight

Copy