Luqaasi 20

Yesuusi hupna ukkumeeta a maanaatin akka koda koono kaassuma a ishi dehaadee

Maati 21:23-27; Maari 11:27-33

1Kuyyaata takkaayye a Yesuusi tika qulqulloota kela co ka samaytase kollinno ka otootase a fayya torrinooyye, saarra qeesewwa ka kollissampaya a seera isho qimoota piita, isha kapopa de'en. 2Ka isha kaassaden ka kidene, “Intoonno, ino' leleey wossen a koonitta hupna ukkumeeta a maanaatinni kooni? Taaki akka wossen kooto'e a hupna a ukkumeeta ke' daashe ayno?” 3Yesuusi ka ishootta kide, “Anti nefo kaassuma takkanen ishin kaassadaaw, intoonno ana oorshaay: 4Sede a Yohaannisi pishaan orra jaqno, hela Waaqa kapa deetem, moon nama kapa deete?”

5Ishootta ka olli oorsaden ka kidene, “Oton in kiina ‘Waaqa kapa deeteeyye’ i'ino kida, ‘maana malla isha a amannin?’ 6Oton in kiinaawwe ‘Nama kapa deeteeyye’ qoota samayta piisa akkima Yohaannisi xuumampayta kodde amanno malla, samayta dakaanne ino dakka” 7Ka semmalla ishi orshen ka kidene, “Pora ishi deete ino an upno” 8Yesuusi ka ishootta kideewwe, “Anti nefo hupna a ukkumeeta a maanaatin akkiman kodaddoosen koono, ishina an lelo.”

Pahanasene a qotampaya dula wayneeta

Maati 21:33-46; Maari 12:1-12

9Kamma desa Yesuusi pahanoosene samayta haasawatta paayye ka kide, “Nama takka, dishima wayneeta'e dishade ka olturatta daashe ka, piita pila opa aane ka a in tiitaawnin mali a kuttaati a jare #Issa 5:1 10Ete wayneetase paliteeyye; aappaase a dula wayneeta, akka qeeraytaadi ishi qeedo'e, orxayta takka qotampayasene kapopa erke. Qotampayasene xoori orxaytase oppa qiden ka a we ishi in daannin maliiyyi harka lulen kalshen. 11Ete orxayta pila erkeew, ikka oppa qideneew ka jeershen ka a we ishi in daannin maliiyyi, harka lulen kalsheenew 12Ikka orxayta a sessatta erkeew. Ikka qideneew ka matayshen ka alle lakopa katen. 13Se kammaayye aappaase a dula ka kide, ‘Amma oori maanan kodaaw? Innaayyo an jaalanna'en erka; takka punu i'isha ulfeessane kodditaay!’ 14Qotampayasene xoori, ete isha akkeneeyye, i'olli kidene, ‘Ini lehampaytase ishaay, xooya ka ikanna; lehandaadi ka xanno kodden!’ 15Ka semmalla dulase a wayneeta oppaayye innasene lakopa titen ka ishshen. Ka kuliyya, aappoose a dula wayneeta, maana qotampayosen qara koda ishina pahata? 16Aappaase a dula wayneeta isha mattaadi de'a ka qotampayasene leysha; ka dulase a wayneeta qotampaya pilaati daasha.” Orrase ete sede dakayeeyye, ikide, “Sede pakkanna in koddinin.”

17Yesuusi xoori ishoottopa desa tooyyade ka kide, “Ka kuli sede taafamte ka kiinitto, ‘Dakase a orra qupeeta qupno puyade, isha qeppeelitta qara' kale;’ ka matta tika kodde, maana akkinni?#mas 118:22 18Nama dakose qara pi'o, piisa qeqqepa; nama a dakose isha qara pi'o xoori inyalxattaawa.” #20:18 “inyalxattaawa” xolmeeta “inyalxattaawa” kideetae “imarjajjaawa” kiin

Kaassuma qoota kipira daassatati desa dehaade

Maati 22:15-22; Maari 12:13-17

19Kollissampaya a seera isho saarra qeesewwa, akkima pahanoosen ishootta qara haasawade upnaaden ka saateta oppaayye isha qapan faden. Ma xoori samayta fuuren. 20Ka semmalla Yesuusi qapa'e, eta a ishootta ettana faddanni ka qaaleta wanjala a ishin hupna ukkumeeta isho firteeta a mukissampayta turopa isha dehayshan faddanni. Ka lettissampaya a orra taanteta pahanaada ka afa talafan isha qapa isha kapopa erken. 21Lettissampayasene ka Yesuusi kapopa dehaaden ka kiini, “Kollissampayto, wa atti haasawannitta ka orra kollinnitta akkiman dukaata in upna. Atti dukaatanne saanta Waaqa kollinni; umma nama takka nefo olqaran a jaalinni a kitto. 22intoonno ino' leleey hela seerinno oppaayye nuqusase kutta a piita Roomiti kipira daassata ifaqqatamem mon, in faqqatamme?”

23Yesuusi xoori falqaaysho'e upnaade ka ishootta kide, 24“Intoonno, shilinka takka ana akkishaay, pahanoosen are qara pojame isho maxxose are qara' taafame, a ayno?” Ishootta ka ishi oorshen ka kidene, “Anuqusase kutta a piita Roomiti.”

25Yesuusi ka kide, “Asseeyye, a nuqusa nuqusa daasha ka a Waaqa Waaqa daasha.”

26Ishootta oori, fuula samayta tura haasaan isha qapsiissa in ettaninnine; Ka semmalla afa ishootta oorshe oppa qawwaawen ka jaw kiden.

Kaassuma qoota tootoppa xaanaati desa dehaade

Maati 22:23-33; Maari 12:18-27

27Saatuqaata a kiinitto, “Tootoppa xaana in caan” Ka Yesuusi kapopa dete ka isha kaassatte ka kiite. #koda 23:8 28“Kollissampayto, Muuse i'ino taafe ka kide, ‘Nama takka oton a inna in xaayannin mali iskatteetaadi qara to'ayye, innaasso a iskatteetaadi quda' ooren ka oppaayye ishi hellaa xaayen’ #ooreta 25:5 29Hellaa toola takkati tappa ka caan; qaarta a ishootta piisa tura qatte ka heme ka a inna in xaaynin mali to'e. 30kussitta a isha kamma qato ka iskatteetase quda' oore. 31Asessatta ka asseew isheetta quda ooreew. Ka piisanti tappantiiyyi asse iskatteese quda' ooren ka a hella in xaaynin mali le'en. 32Ishootta piisa kammaayye iskatteese ka toote. 33Ishootta tappa piisa taran isheetta hemeneey, awta orra a le'e tootoppa xaanooyye, iskatteese a ayno koddita?”

34Yesuusi ka ishootta oorshe ka kide, “Orra piisseti ihemini ka hemammi, 35orra tootoppa xaana ka piita itturopa deeto oppa kallaatta ishootta daasamte, xoori in heman umma in hemaman. 36Qoota a erkampattowwa Waaqa mina koddan malla, in le'an, qoota tootoppaayye xa'an malla, ishootta hellaa a Waaqa. 37Qoota tootoppa xaanaati desa xoori, Muuse, torraasene xaadi a qoota apittase a hujjittoppatidesa haasawade oppaayye, iPoqalla hale ka kide, ‘Waaqa Aprihaami! Waaqa Hisaaqi! Waaqa Yayqoopi!’ #sooka 3:6 38Sene piisa qoota Waaqan qoota sene piisa caatta qapan malla, Waaqa a orra co diisheey, Waaqa orra le'eti'in.”

39Kollissampaya a seera oppaayye a demo ka kidene, “Kollissampayto, a paxaara'e haasawatte” 40Se kammaayye oori, nama Yesuusi kaassuma dehassa maxanyume in co.

Kaassuma qoota Kiristoosi desa kaassatame

Maati 22:41-46; Maari 12:35-37

41Se kammaayye Yesuusi i'ishootta kide, “Ata orra atta Kiristoosi kiini ‘Inna Taawwiti?’ #20:41 “Kiristoosi” are qaraayye Kiristoosi kideeta “dinshampaytase awaaqa daatade” kideeta. 42-43Ha Taawwiti mataafa masmuureta kara mattaadi i kide, ‘Ha Waaqa iPoqallaayyoo kide: hakan nyaapaayti hupnaayti a ukkumeeta kelopa ke oorinno kara'e, harkiyyo a akkittaati kuti'e’ #mas 110:1 44Ka kuli oto Taawwiti mattaadi'i Kiristoosi ‘Poqalla’ kiinooyye, ayshanne isha inna Taawwiti koddaaw?”

Yesuusi akka kide kollissampaya a seera kapa sekaada

Maati 23:1-36; Maari 12:38-40

45A samaytase piisa isha dakkaysattaappa cooyye, Yesuusi itamaarewwaadi kide, 46“Kollissampayasene a seera, mehadda deddera kalsanna ka arepa ka arepa pora tittiitaawna ka urmaladdaappa akka orra kaareeta ishootta oorshoow heena ka tikase a qinseeta a orra Yihuta tikka a sankultatiyyi, pora kutiitta a ulfeena'ew faana kapa isi tooytaada. 47Ka isi akkissa malla qinseetaaysho deranni, ishootta tikka a hiyyettewwa a diirraasso qara le'eneti saranni. Ka isi akkissa malla qinseetaaysho deranni. Semmalla ishootta firteeta a kutta'e ishootta qara kaya.”

Currently Selected:

Luqaasi 20: MaQu

Highlight

Copy