Luqaasi 5
5
Yesuusi akkima tamaarewwaadi a paayyota halaade
Maati 4:18-22; Maari 1:16-20
1Kuyyaata takkaayye Yesuusi pakateeta Kensaareti kapa'e qa'ade. Orra lekayta ka isha kapopa ollopa sooke ka qaaletase a Waaqa dakkaysatta'e, oli tuukni. #Maati 13:1-2; Maari 3:9-10 2Isha ka koonkada lakki, a pakateeteeyye qinda quda qaatishene akke. Orra murkuja qapanno xoori koonkadasene kara lelekkade ka nyupuraasso diipanni. 3Yesuusi ka koonkadasene oppaayye koonka takkan a Simooni karopa fayyade ka Simooni kide, “Koonkosen piita kapa desa, shakkayteeta pakateeta karopa desa ana heeqqishe.” Ka sekammaayye koonkasene kara kuti'e, ka orra kollissa paayye.
4Ka ete haasaadi dikkishe kammaayye, Simooni kide, “Koonkasene pakateeteeyye, otantoppopa desa heeqqishe ka murkuja qapa'e nyupuraassin pakateetoppopa kata.”
5Simooni ka ishi kide, “Ha Poqallaay, halkeesse kumman ekkanni rafne ka kakkafanne; umma murkuja takka nefo an qapne. Ma xoori oto atti asse kiiteeyye, nyupurasene pakateetoppopa in kata.” #Yoha 21:3 6Ete nyupurasene kateneeyye, haka nyupurasene kaamannaane'e murkuja dikke leka qapen. #Yoha 21:6 7Ka, akka xeliyaasso a koonka pila kara ca de'an ka ishootta qaarqaarane'e, harkaan hamshen ka ishootta halen. Ishootta ka de'en ka haka koonkasene lakki pisha karopa tawa foolsannaane'e, murkujan immaken. 8Simooni Peetiroosi, ete sede akkeeyye, Yesuusi tura'e kilpiippade ka kide, “Poqallaay, anti an juppoolaytay, ana kapopa in dehaadan.”
9Wa malla asse kide nefo, isha isho xeliyyaadi a isha quda ca piisa, lekuma murkuja a qapen minanne qoota harmo oppa qawwaawen malla. 10Xeliyyasene a Simooni, hellaasene a Septiyoosi Yayqoopi isho Yohaannisi ka asseew oppa qawwaawen. Yesuusi ka Simooni kide, “in fuuran, arepa desa a orra qindiyyopa haleeno kodditaay.”
11Ishootta ete koonkadaasso kamkama qudopa heeqqishen kammaayye, we piisa diishen ka a Yesuusi kammaa anna kodden.
Yesuusi akkima qoosholayta takka dinshe
Maati 8:1-4; Maari 1:40-45
12Yesuusi kuyyaata takkaayye katama takkan karaayye ca. Nama takka a dakintaadi piisa tupa qooshootte ka isha kapopa de'e; ka ete Yesuusi akkeeyye, isha tura kilpiippade ka fuula piitan kaye ka isha qinsade ka kide, “Poqallaay, oton iheentaayye, ana dinissa i'ettanissa.”
13Yesuusi ka harkaadi desa derayshe ka isha quda qappade ka kide, “In heenaay dine ka ajaqqame kodde.” Qooshase ka eennow isha quda tawe. 14Se kamma Yesuusi ka isha ajaje ka kide, “Nama takka nefo sede an lelan ma, aane ka qeesitta isi akkishe ka akka samayta maakkuma koddito'e, qoota dinaaytiti desa kalisootase a Muuse ajaje dehayshe.” #Lewi 14:1-32
15Kurra Yesuusi xoori, a deyyo qaran qapto'e dakaade. Orra lekayta ka isha dakkaysatta ka paaqaaysho kela dina faani ka ollopa deeni. 16Isha xoori kuyyaata piisa xawwaati koommaytoppopa anni. Ka Waaqa qinsanni.
Yesuusi akkima toonnayta takka dinshe
Maati 9:1-8; Maari 2:1-12
17Kuyyaata takkaayye Yesuusi a kollinnooyye, Feresaata isho kollissampaya a seera ka eeyye kuti'en. Ishootta palewwa Kelila isho a Yihuta pisoppa ka katama Yursaalami karaayye ollopa de'en; Yesuusi hupnase a Poqalla, a paaqolayaan dininno qapa. 18Tin orra toonnayta takka shabbaan haano ka isha kapopa de'e. Ka tikase a Yesuusi kela co kelopa kullissa ka fuulaadi turan kayeeta faani.
19Ma xoori qoota samayta koope malla, toonnaytase tika kelopa kullissa imalaalen. Ka, se malla toonnaytasetin tika qaropa fayyaden ka qaala pooten ka karaxata toonnaytase shabbaan fuula Yesuusi turopa lekkishen. 20Yesuusi ka amanteetaaysho akke ka toonnayseti kide, “Namo, juppootaayti ike hasse.”
21Kollissampaya a seera isho Feresaata ka oppa dikanni ka kiini, “Namoose Waaqa onno ayno? Waaqa takkayta maliiyyi a juppoota orra diinno a pila ayno?”
22Yesuusi ka dikattaaysho upnaade ka ishootta kide, “Maana malla isi karan xata sede dikannittan?
23“Hela amma ‘Juppootaayti ike hasse’ kideeta ka ‘Xe ka aane’ kideetoppaayye a xaame nukkulli? 24Ma xoori inna a nama, akkima piita qara juppoota nama diissata hupna ukkumeeta qapan, akka upnaattane'e” Ka toonnaytaseti kide “Namo! xe ka shaabbaatti xaysado ka tikaaytipa kale.”
25Toonnaytase ka fuula orra tura'e eennow xa'e, ka shabbasene a deyyo qara ca qapade ka Waaqa kalataysattaan tikaadipa kale. 26Orra eyyeppa co piisa ka oppa qawwaawe ka fuuran kiini, “Ha awwe daxxootan akkine” Ka Waaqa kalataysaden.
Yesuusi akka Lewise Maatiyoosi kidammo hale
Maati 9:9-13; Maari 2:13-17
27Sekkammayye Yesuusi ete porositi sooke ka annooyye, nama takka Lewwi kidammo ka qarata qaratino a pora qarata oppa kuti'e akke ka ishi kide, “Ana kamma xooye.” 28Lewwi ka eennow xa'e ka we piisa diishe ka isha kamma aane.
29Se kammaayye ulfeena Yesuusi'i, lewi sankulta kuttayteeta tikaadippa harmishe. Orra qarata qaratino isho orra pila lekayta ka sankultase oppa akkaade. 30Feresaata isho kollissampayasene a seera Feresaata quda kodde, tamaarewwa Yesuusi qara moomooni ka ishootta kiini, “Maana malla orra qarata qaratino isho juppoolaya olli dammittan ka ikkinittan?” #Luqa 15:1-2
31Yesuusi ka ishootta oorshe ka kide, “Ha orra paaqno'e akimitta parpaaccisni diisheey, orra fayya qapo parpaaccisni in co. 32Anti akka juppoolaya juppootaaysho oppa oorane'en hala de'e diisheey, hanqeellaya hala'e an deene.”
Kaassuma qoota damta musattaati desa dehaade
Maati 9:14-17; Maari 2:18-22
33Orra demo ka Yesuusi kaassade ka kide, “Tamaarewwa a Yohaannisi isho Feresata lekayteetanne damta musanni ka Waaqa qinsanniiy, tamaarewwaatti maana malla kuyyaata piisa damtaaw dammi ka ikkayta ikni?”
34Yesuusi ka ishootta oorshe ka kide, “Hela idikannittan ka kiinittane oto hemampayta hemattota olli cooyye, hemattoose damta musatta isheetta faani? 35Ma xoori eta a hemampayta ishootta kapa qeedamo de'ay, awse damta musadan.”
36Kamma desaaw Yesuusi pahana takkane ishootta leleew ka kide, “Nama japara haaraya qeenno ka ohaata a kerite qara heddino in co. otoon asse kodaayye, haarayase a japara'e ohaatase kerite xonyolli ka kaa'ini, semmalla qara ettanni in cooy, namase patta'e haarayase a ohaata kaa'ini. 37Akkimose mina'ew, nama maaddota taadeta wayneeta shawwa #5:37 “shawwa” piita Isira'eeli oppaayye shawwa kollattoppa kooni. xattayta kara qa'anno in co. Oton oppe qa'ayye, maaddotase a taadeta wayneeta shawwase pokkini, taadetase a wayneeta ka alle kara urqini; Shawwase ka patta panni. 38Semmalla maaddota taadeta wayneeta, shawwa ammaytoppa qa'etta parpaaccisni. 39Nama a taadeta wayneeta a palite ikke, ‘Taadeta wayneeta a paliteew wayyi’ kiini, umma maaddota taadeta wayneeta ikkeeta in heeno.”
Currently Selected:
Luqaasi 5: MaQu
Highlight
Share
Copy
Want to have your highlights saved across all your devices? Sign up or sign in
