Mariqoosi 13
13
Yesuusi akka tika qulqulloota qitqitto xuuma haasawade
Maati 24:1-14; Luqa 21:5-19
1Yesuusi ete tika qulqulloota kela sooknooyye, tamaarewwaadippa takka ka ishi kide, “Kollissampayto, dakaddosen isho qupeese tooye, orra qawwanniiy!”
2Yesuusi ka ishi orshe ka kide, “Qupeese kutta i'akkini? Dakaddosen piisa qitqita; umma daka daka qara in haso!”
Milikkitadda a eta piraampira
3Yesuusi ete tika qulqulloota mina desa irroota Taprasayti qara kuti'eyye, Peetiroosi ka Yayqoopi ka Yohaannisi isho intiriyaasi ka xawwi desa isha kapopa dehaaden ka isha kaassaden 4ka kidene, “Intoonno ino leleey, wossen aytami koddan? Oto sepisa kodda kela foolsannittooyye, milikkitaadi kan maana?”
5Yesuusi ka ishootta orshe ka kide, “Akka nama takka nefo ishin in sassapannini tooytaada. 6Orra lekayta maxxiyyon de'a ka kida, ‘Anti an Kiristoosi.’ Ka orra lekayta sassapadaay. 7Pora a oppa kittan kapa oto orana qitooyye, ka pora sekaayye otoota oranna oto dakaynittaneeyye, in tammaqan. Sede piisa kitteetanne kodditaay. Ma xoori piraampira in dehan. 8Samayta samayta qara'e oranna xa'a; mankisteeta ka mankisteeta qara oranna xaata, piita ka porra lekaya oppan lellehta. Porra lekaya oppa loota ka deeta; sede piisa kan rakkoota paayyota a yatatta paayyota mina pahanaatta.
9“Ishina mattaayshina isi tooytaada. Orra firti shoonkota turopa ishin tuukka; ka tikkasene a qinseeta a orra a Yihuta kela ishin karafa, akka maakkiyyaayyo kodditanexe ishina ka ana minan mukissampaya isho nuqussa tura'e, firteeta qa'attan#Maati 10:17-20; Luqa 12:11-12. 10Asede piisa in koddinin turan xoori, otoose a fayya samayta piita piisa qara kayeeta isheetta faani. 11Oto orra ishin qapo ka firteeta turopa ishin dehannooyye, ‘Maanan mina oorsanna?’ In kidan ka turan in qaapan. A haasawado Hapura Qulqulloota diishe ishinanneey; semmalla wa saatese oppa ishina daasama pattaaw haasawda. 12Hellaa toola oli tarpishaan ka toota oli daashan; aappa ka innaadi toota tarpisha ka daasha. Hellaa ka toollaasso qara paarkaalummaatan xa'an ka ishootta leyshan. 13Maxxiyyo minan akka orra piisa kapa needdatamtan; ma xoori, a haka piraampirati duupattan kokkonnanno, isha paha.” #Maati 10:22
Rakkootase akata neeqa
Maati 24:15-28; Luqa 21:20-24
14Akkima xuumampaytase Taani'eli haasawade mina'e, oto “nyala pateetta pora a oppa kinnaatta ishootta faani in kinnini oppa akkitaneeyye. Nama nappapno a sede matte qapnaado! Sitiiyyi a piita Yihuta oppa ca, a alle irroowwa qaropa qahen#Taani 9:27; 11:31; 12:11. 15Nama pafteyye tula qara co, wa paftose kela ca takka nefo teyyatta in lekkannin ka etaadi in pirrin. #Luqa 17:31 16Umma a duloppa co, ohaataadi teyyatta isi kammandesa in oorrin. 17Sitiiyyi iskatta a karittoppo inna qapo isho a xaaye ka luukinno, oo ishootta kido! 18Akka sede piisa sorooroppe in koddinini'i, Waaqa qinsada. 19Etoosenetiiyyi, haka a Waaqa piita uume paayyatte haka ammaati'i, rakkoota apari in koddinini kodda. Umma itturopa rakkoota asse pahato in koddito#Taani 12:1; koda 7:14 . 20Katin Waaqa kuyyawwosene in kumma'annini kiiteeyye, nama takka nefo helani paha in ettansho; ma xoori orrase reexxame malla, kuyyawwosen kumma'adan.”
21“Semalla oton nama ishina kiini ‘Tin Kiristoosi are cayye!’ Taakki ‘Tin disi cayye!’ Takka nefo in dukaysadan. 22kiristoosewwa darta isho xuumampaya darta ixa'an ka oton i'ishootta koddiniiyyi a reexame kuli akka kamma dapane koda'e daxxowwa isho wa orra qawwanna kodan. 23Anti we piisan turanneew ishina leleey, semalla tooytaada.”
Kiristoosi akkima lammata ooro
Maati 24:29-31; Luqa 21:25-28
24“Sitiiyyi rakkoose piisa kammaayye, piirtota itukkanta, umma leyaa in la'ayo#Issa 13:10; His 32:7; Iyyu 2:10, 31; 3:15; kele 6:12 ; 25hikka ka moonte seehan, hupnada moonta quda ca kuli ka lelleehan#Issa 13:10; His 32:7; Iyyu 2:10, 31; 3:15; kele 6:12 . Isa 34:4; Iyyu 2:10; koda 6:13 26Sekkammaayye inna a nama a oraaraappa hupna kutta ka ulfeenan deeno ka akkaada#Taani 7:13; kele 1:7. 27Ka erkampattowwaadi erka; ishootta ka qindadda afurin desa aanan ka pora a oppa piita oorto pisa oppa, orra reexxame ollopa ishi tiitayshan.”
Pahana a qoyra hilteeta a deena Poqalla akkinna
Maati 24:32-35; Luqa 21:29-33
28“Qoyrase a hilteeta qara pahana kollada. Oto taammaadi fujuqnaaneyye, haashshaadi ka japarraaneeyye, sitiiyyi akkima katana dehaade i'upnaannittan. 29Akkimose mina'ew, ishina oto wessen piisa koddinaan akka akkitaneeyye, eta oppa inna nama de'an akka kayte ikka xarroppa co upnaada. 30Anti dukaatannen ishina kiini, haka sede piisa koddinitto kara'e, xeltose in tarpito. 31Piita ka moonta itarpan ma, qaaletiyyo tarpa in qapto.”
Kuyyaata isho saateta a oppa Poqalla de'an, nama takka nefo in upo
Maati 24:36-44
32“Ma xoori qoota kuyyaatoseti isho saateseti desa Waaqa Aappa mali nama takka nefo in upo. Umma erkampattowwa moonta nefo in upan; umma inna nefo in upan#Maati 24:36. 33Etosen aytam akkima koddan a uptaneey, japada ka isi qara tooyya. 34Ha sede nama tikaadippa xa'e ka piita seka opa aane pahata; ka orxayaadi matta mina kodadda ika lekaya qara kite ka a xarra tooytino nefo akka japaado ka tooyto ajaje. #Luqa 12:36-38 35Semmalla aappa a tika eta oppa kalo a uptaneey, tooytaada; takka punu kalaakala taakki olli qootta halkeetta, taaki a lukkala iyyinaane taaki teykante parappanne kala koddita. 36Akka ishina a isiqara in upnini qara in kallini'i ka ishina a muke in akkinnini'i impasa;
37“Akkiman ishina lele mina'ewwen a ata hase piisa kiini impasa.”
Currently Selected:
Mariqoosi 13: MaQu
Highlight
Share
Copy
Want to have your highlights saved across all your devices? Sign up or sign in
