Mariqoosi 16

Akka Yesuusi tootopa xa'e

Maati 28:1-8; Luqa 24:1-12; Yoha 20:1-10

1Ete kuyyaata sampata a orra Yihuta tarpiteeyye, Mekdelitteetase Maariyaami ka Maariyaamise Yayqoopi xaayte isho Seloome pukka Yesuusi quda daateta'e shittoota a qimaameta paxaara oppa kodamte pidden. 2Ka sampateeyye torpaappa kuyyaatase a paayyotati teykantan a letta piirritooyye, hawla kapopa aanen. 3Ka a annaaneeyye, porandesa haasawanni ka kiini, “Ayno shilase hawla tura suksha ka ino pana?” 4Wa malla asse kidene nefo, shilase hawla tura dufame qoota akata kutti malla. Xoori ete opeela tooyyadeneeyye, shilase qindopa sukume ikka aken. 5Ete hawlase karopa kulleneeyye, xayyoolayse takka ohaata ata uwwisade ka qinda akkittain kute'e akken ka qara tammaqen.

6Isha xoori i'ishootta kide, “In fuuran! ishina akka Yesuusise a Naasirati fannisame faanittan in upaay. Isha tootoppa ixa'e, umma are in co. Pora oppa hawlame nefo, are tooyya. 7Amma aana ka tamaarewwaadi isho Peetiroosi kida, ‘Akkima turanneew ishina lele mina'e Yesuusi piita Kelila opa ishina' qattaay; eyye isha akkitan#Maati 26:32; Maari 14:28 .’”

8Iskattase ka fuuraan xarri ka porase a hawla oppa alle sooke ka qahe; qoota akata fuuren malla umma we takka nefo nama kapa in lelle#16:8 mataaffa axatta demo qaraayye qajeeltose qaraayye dikoota sette kammaayye qaaleta arekammopaxata kitto ca. iskatta ka Peetiroosi isho moottadaadi kapopa aane ka wa erkampattootase ishootta lelte piisa torren, sekkammaayye Yesuusi ka mattaadi otootase a fayya qulqullaawte pursammi in kinnini ka haka a parapara dina koddite piirtote paayyatte haka dumaatetati tamaarewwaadi qudan erke. .

Yesuusi akka Mekdelitteetase Maariyaami tura akkaade

Maati 28:9-10; Yoha 20:11-18

9 # 16:9 mtaaffa a taafame demo ka turkumewwa xatta 9-20 kitto padaawni in caan. Yesuusi ete torpaappa kuyyaata paayyotati sampate teykantan, tootoppa xa'e kammaayye, paayyota qaraayye, Mekdelitteetase Maariyaami a karaa orriyya tappa sookshe tura'e akkaade. #16:9 mataafa xatta qara in taafamme. 10Isheetta ka ante ka isasene turan isha olli ca ka nyarrahana ka pooynaati lelte, 11ka kiite “Yesuusi icaade ka tootopa xa'e ! Anti ka ildaayyon akke!” Ishootta xoori isheetta in dukaysanne.

Yesuusi akka tamaarewwaadi lakki akkaade

Luqa 24:13-35

12Sekamma Yesuusi tamaarewwaadi lakki a kantadaapa kallaati'i pissa pilaatin akkaadew. 13Ishootta ka tiitaawen ka tamaarewwaadi a pilaati lelen, tamaarewwasene xoori ishootta in dukayysanne.

Yesuusi akka erkamampayasene kudanka takka tura akkaade

Maati 28:16-20; Luqa 24:36-49; Yoha 20:19-23; koda 1:6-8

14Sekamma Yesuusi kudanka takkasene damta kutexe ka dammta qara ca tura'e akkaadew. Ka qoota isaasene ishootta lele ka kide'e, “Yesuusi tootoppa ixa'e ka caade an ka ildaannon akkine” amana diishen ka, karittaaysho kokkonnayshen malla, ishootta fuke. 15Ka ishootta kide, “Piita pisa oppa aana ka otootose a fayya uumata piisa kollisha#koda 1:8 . 16Nama amane ka jaqame idina, a amanni in kinnin xoori qara'e faratamta. #koda 1:9-11 17Orra ana amanno piisa milikkitaddosene kamma akkaada; maxxiyyon orriyya sookshan ka afa haarayan haasawadan 18kadipunu maakadda harkan qapnaaneeyye taaki qorsa a nama ikanno nefo ikkaneeyye, ishoottan miiddo; oton paaqolaya qara'e harkaaysho qapadaneeyye, paaqolaya idinan.”

Yesuusi akka moontopa fayyade

Luqa 24:50-53; koda 1:9-11

19Poqalla Yesuusi ete sede piisa ishootta haasawade kammaayye, moontopa fayyade ka harka Waaqati qinda akkittaati kute'e#koda 1:9-11. 20Tamaarewwaadi ka pora pisopa aanen ka kollishen. Poqalla ka ishootta olli kodaa kooni ka ishootta qudan daxxoowwa kooni ka, kollissaysho akka dukaata kodde sede akkinni.

Currently Selected:

Mariqoosi 16: MaQu

Highlight

Copy