प्रेषित 5
5
हनन्या इंगा सप्पिरा
1आप्पुड हनन्या फेरटोळ वगा मनुष्य इंगा वान वळती सप्पीरा इर स्वताद भुमी आम्बीर, 2मग वाड आ दुडलाटा काही भाग वळती संमतीता फेट कोण्या, इंगा काही भाग येकोची प्रेशितला काळला देगारा फेटीर. 3आप्पुड पेत्र आन्या, हनन्या, नु पवित्र आत्मा संगा खोटा माटलाळाला इंगा भुमी किंमत लोन्केल काही फेटकोनाला इल्ला शैतान नि मनला येनटीक निम्प्या? 4यपुड नीता उंड्या आदी नी स्वत: लेकुंड्या एम्? इंगा यपुड आंबुती दान्द्द वचिं दुडलू नी देगार लेकुंड्या? नु इदी माटा नी मनला येनटीक येकोस्ती? नु मणशी संगा लेद तर परमेश्वर संगा लबाडी शेस्ती. 5हनन्याड इ माटलु ऐकाशीन्या गरमे जेम इळश्या इंगा ऐकाशेटोर आद्री फोईर. 6आप्पुड काही जवानोर लेशी वान गुंडाळीचीर, इंगा बेटीक एका फोई बुळशी वचीर.
7दान नंतर मुड घंटाल आयीनेन्का वान वळती नोनिक वच्या, पण येम आय्या आदी दांकी समजाल्या. 8आप्पुड पेत्र दान आन्या, “नाक शप मीर इंताळलाने भुमी आम्बुतीर येम.” इंगा आदी आन्या, “हाऊ, इंनीलाने.” 9पण पेत्र दान आन्या, “नु इंगा नी मोगुड प्रभून दी परीक्षा सूळदेंक येनटीक सहमत आतीर? सुळना यवार नि मोगुन बुळशीर वारी काळलु दरवाजा देगाराने उंडाय, आयी निनु पण येतकोन बेटीक फोयी.” 10आप्पुड लगेच वान काळळा देगारा फडी जेम ईळश्या, इंगा मोबीळलु नोनिक वचीर आप्पुड आदी सचीनेद; इल्ला आढळाश्या इंगा वार दान बेटीक एका फोई दान मोगुन देगारा बुळशीर. 11इंगा आंता मंडळी इंगा यवार इ माटलु ऐकाशीर वार आंदारला आदिर फडया.
प्रेषितलु शेशिनेय अद्भुतलु कार्य
12आप्पुड प्रेषितला शेईकेल मंदीला संगेम चमत्कार इंगा अद्भुतलु घडादू. इंगा वार आंदार ओकाचित्तता शलमोन दरवाजा मंडपला जमा आदूर. 13इंगा अविश्वासी मंदी लोन्केल यवार वार संगा मिळादेंक धसा कुंदुर; तरी मंदी वारनी थोर मानादूर, 14इंताने लेद तर विश्वास फेटेतोर संगेम मनसलू इंगा आंडेर दी समुदाय प्रभूनकी शिकु. 15इंनी चमत्कारलु घडाश्या की मंदी बिमारोरनी येतकोन दावा मिंदा येकोचीर इंगा मंचाम मिंदा इंगा पलंगला मिंदा फंडा मतुदूर कि पेत्र वस्ते तर वानदी सावली ने वार लोन्केल यवाराना मिंदा फडाला. 16इंगा यरुशलेम शहर, देगारी चारुतीकुडी उरटोर संगेम मंदी बिमार इंगा अशुद्ध आत्माळ आंटी नोरणी येकोन वदुर.
पेत्रन बंधी शालाला येशेद
17आप्पुड महायाजकलु इंगा वार आंदार सोबतील यवार सदुकी पंतटोर सदस्य उंडीर प्रेषितलाद संगेम कोफाम शेशेदेंक आंटीर दिनकस्रोम वार कारवाई शेशेळदी ठहरा मतीर. 18इंगा वार मना शेतलू प्रेषितला मिन्दा येशी वारणी सार्वजनिक बंदीशाळाला फेटीर. 19पण आफोद प्रभून दूत जेलूय दरवाजा उघडाश्या इंगा वारणी बेटीक येकोची आन्या, 20“फोंडा, इंगा परमेश्वर भवनला नीला फडी इ जीवन दी आंता संदेश मंदीक शपना.”
21इदी इनी फदु फुटीन नग्रेम वार परमेश्वर भवनलोंक फोई उपदेश इद्देंक आंटीर, इक्काड महायाजक इंगा वान सोबतीक उंडीर वार वची महासभान इंगा इस्रायेलटोर आंदार प्राचीन मंदीन वगातळा कुस्तेशीर, इंगा वारणी ऐकोदेंक बंदीशाळातीकुड आम्पीर. 22पण आकाड फोईनेर शिपाईलनी वार जेलला शिका लेर, दांचांग वार वापस वची शपीर, 23“बंदीशाळा शिंगार व्यवस्थित बंद शेशिनेय इंगा दरवजा देगारा पहारेकरील नीला फडीनेर माक काम्पीचिर, पण जेल उघडाशी नेन्का माक नोना यवार काम्पियाल्या.” 24इदी बातमी ऐकाशी दिंदी येम परिणाम आय्यी, दिन बद्दल परमेश्वर भवन सरदार इंगा मुख्य याजक मंदी घोटाळयाला फडीर. 25इंताळला यवार तरी वाची वारकी इल्ला शपीर, सूळना, “या मंशीन मीर जेलला फेटीनिन्टीर आदी तर परमेश्वर भवनला नीला फडी मंदीक शिक्षण इस्तुणार.” 26आप्पुड सरदार शिपाइला संगा फोई वार संगा येकोन वच्या, पण ताकत आनचांदे येनटीक की वारकी बिता आदू की मंगलान गुंडलु मतारोद.
27वार वारणी ऐकोन वाची महासभा मुंदार नीला फेटीर, आप्पुड महायाजक वारणी आळग्या, 28“इ फेरता शिक्षण इया कुंडा, इल्ला मिम मिक लक्षता शपीनीन्टीम की लेद, तरी सूळना, मीर स्वता शिकवनिता यरुशलेम शहर निम्पेशीनाळ इंगा इ मणशी रक्तामपात दी दोष मा मिंदा येकोदेंक सुस्तुणार.” 29पण पेत्र इंगा इंगोगो प्रेशितलु उत्तर इच्चीर, “मिम मणशी पेक्षा द्यावार्दी आज्ञा माना बेक, 30या येशुन मीर क्रूस मिंदा टांगाशी मतुतीर, वान मना पूर्वजला द्यावार येत्या.#अनुवाद. 31वाड इस्रायलकि पश्चाताप इंगा पापलाद क्षमा इदी इद्देंक द्यावार वान मंची शेई तीकुड अधिपती इंगा ताराशेतोड इल्ला उंचपद इच्या.#लूक. 32इ माटा विषयला मिम साक्षी उंडाम इंगा द्यावार स्वता आज्ञा पाळाशेटोरकी याद पवित्र आत्मा इचीनेद उंडाद आदी पण साक्षी उंडाद.”
33इदी ऐकाशी वार चीडास फोईर इंगा वारणी जेमता मतेळदी विचार शेशेदेंक आंटीर. 34पण आंदार मंदी प्रतिष्टीत मानाशिनेळ गमलीयेल फेरटोळ वगा परुशी शास्राध्यापक उंड्या, वाड न्यायसभाला नीला फडी आ मनुष्यलान रवा वेळ बेटीक आंपडीदेंक शप्या. 35मग वाड वारणी आन्या, “अरे इस्राएल मंदी, मीर मनुष्यलाद येम शेस्तार दिन बदल जपाशी उंडा. 36येनटीक की काही दिवसला पहिला, ठुदास इड मुंदार वची नीन यवार तरी उंडान, इल्ला आंटूनाळ, वांकी सुमारे चारशे मंदी शिकाला. वान मतिर इंगा यंता जन वान मानादूर वार आंदारदी दाणादान आय्यी वाळ लेद आंका आईणार. 37वान यंकाकेल गालीलटोळ यहुदा नावनिशी आयेळ दिवसला मुंदार वच्या इंगा वाड स्न्गेम मंदीन फीटवाशी स्वता नाडला आंच्या वानदी पण नाश आय्या. इंगा यंता जन वान मानादूर वार आंदारदी पांगापांग आय्या. 38दांचांग नीन मिक इपुड शप्तान, इ मनुष्य देगार नुस दुराम उंडा इंगा वारणी फोनिंडा येनटीक की इदी बेत किंवा फनी मनुष्यद उंटे नष्ट आय्यी. 39पण इदी द्यावार्दी उंटे मिक इदी येपुड नष्ट शेशेदेंक दाकाफी, मीर फक्त द्यावार विरोधी ठहराश्यार.”
40आप्पुड वार वारदी शप्काम मान्य शेशीर, वार प्रेषितलान कुतेशी वारणी मतिर इंगा येशुन फेरता माटला कुंडा इल्ला बारकाईता शपी ईळशेशीर. 41वार इ माटाता खुश आय्यी महासभा मुंदार येली फोईर की मनाम वान फेर इचांग अपमान आयेळ इचांग तर ठहराला. 42इंगा दिनाम, परमेश्वर भवनला इंगा इलूइलूक शिकामतेळदी, इंगा येशु इळे ख्रिस्त उंडाळ इदी सुवार्ता गाजामतेळदी वार इळा लेकुंडीर.
Currently Selected:
प्रेषित 5: Wrr
Highlight
Share
Copy
Want to have your highlights saved across all your devices? Sign up or sign in
CC BY SA
