Luk 14
14
Jisɔs ɔgbanɔ odumini wunɛ reyi Kɛlam ka Ɛbɨrɔkpabi
1Reyi Kɛfuɛkpa dinɛ, ndi Jisɔs odulɔ ɔka jɛ kɔjɛ ra ɛtɔa oniretu Farɛsi, oniranwunɛ ɔbagala mɔ ebiebi. 2Odumini nwu ɛkpaju ɛyɛn itɨnɔtɨn ɔbarɔ mɔ afɛ ɛkparoisɔ. 3Jisɔs ɔbɨbɔ Farɛsi ra Akɔga Ibina na, “Efuufu na anyɛ ɛgbanɛlɛ Reyi Kɛfuɛkpa, din ebiliwɔ?” 4Gbɔ ndi wa bi fini, Jisɔs ɔdɨma odumini nwɛn, ɔgbanɔ mɔ, ɔkani mɔ odulɔ. 5Kadi Jisɔs ɔbɨbɔ bɛ na, “Abɔ oni wunɛ ra kɛdɔŋ kewun ɔfɔnɔ nwɔn din ɛfɔm, gbɔ wɛ tɔ ra rɛma mani Reyi Kɛfuɛkpa, ara saŋa bɛ ɔmɔmɛ?” 6Gbɔ wa bi fɔnɔ bumbu wa nɨŋɔ yɛ wa lamɔ.
Jisɔs ɔkɔgɛ ɔbaŋa kɛtɔlɛkpa
7Ndi Jisɔs ɔkɨlɔ chɛ kɛmanchi ani mba wa lagɔlag wa raŋɔ akɨmkɨm otuu ra okpokoro kɔjɛ, ɔkani bɛ rɛkanɔ ndifa, 8“Abɔ oni ɔlagɔ wu kɛtɔmɔ rɛbalɔ, ka timɔ kum reju, kum kɛgbɔ kedudu wa lagɔ oni nwu ɔfɔnɔ reju osiŋe wu. 9Abɔ ɛra ɛduayi, ɔkɔ kɛtɔmɔ nwu ɔlago wun, kɨn ɔwa kani wu na, ‘Nyɛɛ ɔchɛmɔ nwu keti kechi.’ Kadi ra gbɔu, kɨn aka tumɛ ntɔlantɔla. 10Gbɔ wa bɔ lag wu kɛtɔmɔ, tumɛ ntɔlantɔla, fɛɛ oni nwu ɔlagɔ wu ɔbɔ wɔ, ɔta kana wu na, ‘Ɔchɛmɔ, tɨmɔnɛ wɔ mbira, chɛ rɛmɔlɛ bɨrika nkum rɛlowu.’ Awu kadi kɨn afɔnɔ reju ra roisɔ rani mba wa tumɛ ra okpokoro rawu. 11Kum oniranwunɛ nwu ɔlɛ ɛkpaju ɛyɛn mbira, kɨn wa tɔlɛ mɔ, gbɔ oni nwu ɔtɔlɛnɛ ɛkpa, kɨn wa lɛɛ mɔ mbira.”
12Kadi Jisɔs ɔkani oni nwu oyinɔ mɔ kɔjɛ na, “Abo yin ani wawa jɛ kɔjɛ, ka lagɔ achɛmɔ aba, amalɔ aba, afunɔ aba, akɨla ifaŋanɛ nyi ituma ikulawu; ɛduayi fɛ, kɨn wayɛ wa lagowu reyi redudu wa kɔro wu mɨnɛ. 13Gbɔ abo yin ani wawa jɛ kɔjɛ, lagɔ rikpag, ɔkpɔg, ani mba wa gbɛgɛrɛ-gbɛgɛrɛ, asɨla-jɛnɔ. 14Mɨnɛ kɨn afɔnɔ ɛmɔlɛmɔlɛ. Tum ndi wa biyaa wa muni wu, kɨn afɔnɔ emunimuni reyi ndi Ɛbɨrɔkpabi enɨŋo si efilefilɛ ra rɔbɔ aniabɛn mba wa wanɛwanɛ.”
Rɛkanɔ ndi Jisɔs ɔkani ɔbaŋa ɔkɨmkɨm kɛtɔmɔ
(Mat 22:1-10)
15Ndi oni wunɛ afɛ kɛdɔŋ ra okpokoro ra Jisɔs odimɔ bumbufa, ɔkani Jisɔs na, “Ɛmɔlɛmɔlɛ ɛfɔnɔ oni nwu ɔnɨŋɔ jɛ ra kɛtɔmɔ nchi kɛnɨŋɔ tumɛ ra rɛkɨm ra Ɛbɨrɔkpabi!”
16Gbɔ Jisɔs ofini mɔ na, “Odumini wunɛ ɔra ɔmɔlanɛ ɛkpa ɔkɨmkɨm kɛtɔmɔ, mɨnɛ ɔlagɔ ani esii. 17Kɛgbɔ kɛtɔmɔ kɛkɨlɔ jag, otigɛ orin ɔwɛn ɔka kani ani mba ɔlagɔ na, ‘Riwɔ, chɛ kɔjɛ kɔmɛm.’ 18Gbɔ abɛ fɛb wa bi taa, wanyɛ rabiga nda esii bɛ wa bitaa. Nwu kɛrɨŋɛtɨma ɔkani na, ‘Ndɛwɔdɛu alɛ ɔchɛn rɔchɛ, mɨnɛ ɛlɔmɛnyɛ na nka chɛ dɛ, otutu nyɛ mɛ kɛfɔŋ.’ 19Odudu ɔkani na, ‘Ndɛwɔdɛu alɛ ifɔm juu, lɔɔ mɛ nka gumi yɛ, otutu nyɛ mɛ kɛfɔŋ.’ 20Odudu mɨnɛ ɔkani na, ‘Ntimotim alɛ ɔchɛn ɔwani, mbiyaa nwɔ.’ 21Orin nwɛn omulɛnɛ ɔka kani ɔkɔkɔ ɔwɛn birɛ mbi fɛb. Kadi ɔkɔ ɛtɔ nwɛn etimɔ ɛra mɔ mɨnɛ otigɛ orin ɔwɛn na, ‘Dɔŋ samana akɛ ra mifa arigɛ ɔkpɛna kɛfɨrɔ nchi, ka tim rikpag, ɔkpɔg, asɨlajɛnɔ akɨla ani mba wa gbɛgɛrɛ gbɛgɛrɛ.’ 22Orin awu ɔkani ɔkɔkɔ ɔwɛn na, ‘Tata, nwɔ ra ani kɛmanchi atigɛ mɛ, gbɔ otuu odudu wɔ bɛlɛ ɔkpaga.’ 23Kadi ɔkɔkɔ ɔkani orin ɔwɛn na, ‘Dɔŋ akɛ ra itɨma akɨla ɔkpɛna kɛfɨrɔ nchi, ka yin ani wawɔ, fɛɛ esi ɛtɔ ɛyɨm eyugɔ. 24Nkani wun, oni tum wunɛ ra kɛdɔŋ ka ani mbalɛkɨlɛ mba rɛlagɔ wa fumɔ ɛwɔɛlɛ ɔda nwu ɔnɨŋɔ jɛ kɔjɛ kokum.’ ”
Birɛ mbi wɛ tɔra atɔra Jisɔs
(Mat 10:37-38)
25Reyi dinɛ, ndi rɛkau ra ani esii rɛra rɛchɛŋa ra Jisɔs, ɔfɛ irɨmɔ ɔnɨŋɔ bɛ, kadi ɔlamɔ na, 26“Ani rambanɛ mba wa wɔwa yimɔ mɛ, gbɔ wa bi kpugɔ mitɛ ra mika abɛ, awaa bɛ ra bɔna abɛ, amalɔ adumini ra amalɔ awani abɛ, inyii, tum rikpin ribɛ, wa wabiyaa wa tumɛ atɔramɛ. 27Mɨnɛ ani rambanɛ mba wabi timɔ keti-rɔbɔ kɛbɛ wa tɔrɛ mɛ, wa wabiyaa wa tumɛ atɔramɛ.”
28“Abɔ oni wunɛ ra kɛdɔŋ kewun ɔnɨŋo ri ɛnyɔŋ, ɔra rɨŋɛtɨma otumetumɛ ogumi bumbu ɛbaa, fɛɛ ɔchɛ abɔ ɔfɔnɔfɔn agbuga mba wa nɨŋɔ tuni mɔ ɔyagɛlɛ yɛ-ɛ? 29Kum abɔ ɔtɛlɛ yɛ ra rɛta gbɔ obiya ori yɛ ɛwɛ, oniranwunɛ nwu ɔchɛ yɛ kɨn ɔmamɛ mɔ. 30Wa lamɔ na, ‘Ɔchɛmɔ nwu ɔbɨnɛ eriɛlɛ gbɔ obi yɛ ɔyagɛlɛ.’
31“Din abɔ ɔkɨm mɔ oduga ɔka rɨŋ reku ra ɔkɨm odudu, ɔra rɨŋɛtɨma otumetumɛ ogumi abɔ kɨn ɔyɛ ɔyɨba adumini igot juu (2,000), okema ɔchɛmɔ nwu ɔyɨba adumini igot kɛtɨn-ɛ (4,000)? 32Abɔ obi yaa, kɨn otigɛ ani, ndi ɔchɛmɔ nwuka ɔbɛlɛ ɔfɨrɛtɨma, na wa kpɛmɔ kɛmanchi wa nɨŋɔ si kumkafuɛɛ. 33Irigirigɔ dɛ ɛra rawun, ani mba wa bi gbɛ mbum rambunɛ mbu wa fɔnɔ, wa wabi yaa wa tumɛ atɔramɛ.”
Minɨŋɔ mmi mi tawɔ ɔdɔm
(Mat 5:13; Mak 9:50)
34Jisɔs odulɔ ɛkparoisɔ ɔlamɔ na, “Minɨŋɔ miliwoliu, gbɔ ɔdɔm wɔbɔ wɛ, nnan dɛ mi nɨŋɔ fɔn ɔdɔm mikɨla? 35Mibi fuu ra mbum tum bunɛ, abiyaa ayɨba mɛ arɔ kɔjɛ ra rɔchɛ, afumafuma mɛ. Oni nwu ɔfɔnɔ ratuŋ nda odima kɔtag, lɔɔ mɔ odimɔ.”
Currently Selected:
Luk 14: Olulumo-Ikom
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
