Luk 11

Ekɔang abangang nsɔm

(Mat 6:9-13; 7:7-11)

1Epo yid yi Jisɔs ali soag nsɔm wa ekpen. Nteni we amaning nsɔm osoi owubɔ wud wa ba anyedag we atɔ we arɔ, “Minfɔni, kɔi sɔ nkeri esoag nsɔm ala nkeri Jɔn akɔng ba ali nyedag we.”

2Jisɔs atɔ bɔ arɔ, “Ebu we ɔnɔngɔ osoi nsɔm, tɔ ɔrɔ:

“ ‘Nsi,

nungi mpi ɔya afɔn ejeg,

nungi bɔlen ɔgwa bɔba.

3Ke sɔ beliang bi bekɔnag sɔ epo-epo.

4Lo cha bobe obuda,

ala nkeri sɔ elon echa kpeicha mine wu aleming sɔ bobe.

Kan kam sɔ ewei wa nkan.’ ”

5Nyining Jisɔs atɔ bɔ arɔ, “Ebu owuna wud akwe nnum, ka alo aka kpɔgi we yi etengante boru atɔ we arɔ, ‘Nten, fɔ me bekpug bi bred bera, 6wantagi nnum asibi me wu arun eken era abag ka me nkwei kpeyum wa nju yi nkerag we.’ 7Ka we abɔri awa eteng arɔ, ‘Kan ke me oboreri. Me mgbarɔ fen minyɔfu, me yi mbɔn agama enɛmi. Me nkɔngɔman nlo belag nke we yi we ɔken.’ 8Me nsidi nyɔ, kpe yi we ahɔ lo belag ake we bred ayun, wantag yu we ale nnum, we aloag belag ake we kpeye yi we aken wantag yu we aren nsɔn acha abebag.

9“Me nsidi nyɔ: Beb da ating ake we; kei ka we ting ɔrɔ; kwud da ting arɛbi minyɔfu ake we. 10Wantag kpeicha mine wu abebing, aramag. Kpewun wu akeng, arɔag. Kpewun wu akwuding, ting arebi Minyɔfu.

11“Nyɔ bansi, ebu mmɔn ɔwa abebing arɔ oke we nnsi, we ting oke we nnyɔ a? 12Lale ebu we abebing we arɔ oke we eke, we ting oke we nnang a? 13Ebu nyɔ bane ba mbe nyɔ ɔmai nkeri nyɔ okerag mbɔn abina betingi bi nggom, nyɔ ɔkering ɔrɔ Nsi eyina wu ale esɔ ahɔ ke bɔ ba abebing we Nyɔganyɔ yu Ɔsɔwɔ a?”

Jisɔs yi Minen Ejiri

(Mat 12:22-30; Mak 3:20-27)

14Epo yid, Jisɔs ali kebag ebe nyɔganyɔ wa beke bi mine wu chang amanag achɔd minchɔd, yi ebe nyɔganyɔ ahɔ tɛb we beke we ato minchɔd ɔchɔd. Beke beman ekakab yi bane. 15Ka ebe eyibɔ arɔ, “Wa ɔsa wu Besebul mmɔn wu minen ejiri we ali kebag bebe bi bɔnyɔganyɔ.” 16Ka ebe bane akan we wa ebebang we atɔngi bɔ ndeng yu arun esɔ. 17Jisɔs amai yi bɔ ali kerag wa boted, we atɔ bɔ arɔ: “Kpeicha mpam yu ale bera yi lɔ ahɔ lami erɔng enudi nju kpeyin yi enɔgag yi bolom ehɔlami. 18Ebu bane ba ali nyedag Setan ali nɔgag yi bolom, elemag lan ka bɔlen obu bɔlami? Me nchɔdag lafa wantagi nyɔ ɔrɔ me nli kebag bebe bi bɔnyɔganyɔ wa ɔsa wu Besebul. 19Fafa ebu nyɔ ɔrɔ me nlikebag bebe bi bɔnyɔganyɔ wa ɔsa wu Besebul, ka ɔsa wun ba ali nyedag nyɔ ali kebag bebe bi bɔnyɔganyɔ betɛbag? Etɛbarɔ bɔ akɛmag barebag ba mpem eyina. 20Ka ebu me nli kebag bebe bi bɔnyɔganyɔ wa ɔsa wu Ɔsɔwɔ, yifa etɔngi arɔ Bɔlen bu Ɔsɔwɔ bɔsi nyɔ.

21“Ebu Mingban, yi nggom bi bera ebi feb, ababag nju oyu, nyum eyi kpeyid ehɔlɛm. 22Ka ebu mine wu akoring aking we arobing we ɔnɔg aga we, we aramag we nggom bi bera ebi bi we ali chorag ekpo aloag yi bi aka keni bi we ajibing.

23“Kpewun wu akansid yi me ale mine ojing ama, kpewun wu chang atɔbag me achoag ali chadagɔchad.

24“Ebu ebe nyɔganyɔ elatɛb mine beke, echag bekpen bi mmamai chang ekeag ekpen yi eweaglɔ. Ka ebu ekan rɔn, enɔngɔ tɔ erɔ, ‘Me nting tisɛm nju yu me ntɛbing.’ 25Ebu elatisɛm erɔ nju ayun apag abad aloni yu anungi. 26Nyining we anungɔ olo aka lag bolom bebe bi bɔnyɔganyɔ benebera bi bechabing botɛd beking we aba wei akɛmi afa. Wa nkurikuri beke bi mine wufa bechabag beking nkeri bele botog bu enud.”

27Yi Jisɔs ali chɔdag nggom bifa, minkani wud wa ekakab yi bane abeg elem esɔesɔ arɔ, “Erienɔ ele yi nyen yi egwen we elei we.”

28Ka Jisɔs abɔri arɔ, “Otoke erienɔ ele yi bɔ ba awoging elem yi Ɔsɔwɔ alem nkeri elem echɔding.”

Bane atɔn Jisɔs arɔ alem nyum yi ɔkwɔgbeke

(Mat 12:38-42)

29Yi ekakab ehɔ tɔ ebodi, Jisɔs arɔ, “Bane ba nggon yufa nyɔ obebobeb, nyɔ obebag atɔngi nyɔ ndeng. Ka ahɔtɔngi nyɔ ndeng kpeyud yu akinging ndeng yu Jona. 30Nkeri Jona akɛming ndeng ake bane ba Ninife, wa nkeri Mmɔn wu Mine akɛmag ndeng ake nggon yu fafa. 31Wa epo yi mpem erebang, Mineni minkani wu arun Seba ating alo belag ake bane ba nggon yu fafa bobe. Wantagi we achan mpam oyu yu arabing eken aba abawog balem ma ɔmanyum wu Sɔlɔmɔn afɔning. Ekonekon ele arɔ mine wu atɔn aking Sɔlɔmɔn ale fa yi nyɔ. 32Bane ba Ninife ting alami wa epo yi mpem yi bane ba nggon yu fafa ake bɔ bobe, wantagi bɔ agɔn bobe olem yi Jona akwɔring balem ma Ɔsɔwɔ asidi bɔ. Ka fafa mine wu atɔn aking Jona ale fa.

Ewereng yi Beke

(Mat 5:15; 6:22-23)

33“Mine chang wu anwɔag enwɔi akun anungi wa ekpen yi ewobi lale akunag ɔkpeda afoi. Otoke, akunag achori wa esɔ erere yi enwɔi eke ewereng enung eruafa bane ba aweag nju arɔ ewereng. 34Elid eya ale enwɔi yi beke egwa. Ebu mmɛd anwa anɔbɔnɔb, etɛbarɔ beke egwa feb besoag yi ewereng. Ka ebu mmɛd anwa akan nɔbing, beke egwa erɔng besoag yi ejiri. 35Mɔnag, kan kam ɔrɔ ewereng yi ele yi we eba kpedi ejiri. 36Etɛbarɔ ebu beke egwa feb bele yi ewereng, ebad kpeyid chang yi ejin, yi ebadag kpɔkpɔg ala nkeri ewereng yi enwɔi ebadag we wa beke.”

Jisɔs asigi bane ba Farisi yi Bakɔag ba eben

(Mat 23:1-36; Mak 12:38-40)

37Nkeri Jisɔs amaning minchɔd, wud wu Farisi alag we arɔ aka li yi we, we awei eteng aka kɛmi ali beliang. 38Ka mine Farisi wu alaging Jisɔs ahɔrɔ arɔ aran nnen aso babɔ ka ato oli beliang, beke beman we.

39Ka Minfɔni atɔ we arɔ, “Nyɔ Farisi nyɔ osog bɔsɛm bu nkonag yi ɔkpeda, ka eteng eyina nyɔ ɔkwe mmɛd yi bobe bu nted. 40Nyɔ bachi! Ɔsɔwɔ wu aleming eteng asid aleming efi erɔng a? 41Ka yi ele wa eteng nted ɔya keni yi bakpak ka nggom feb bebad beke we.

42“Ebeb yi nyɔ Farisi, wantagi nyɔ ɔlangang eri wa ekerang Ɔsɔwɔ ebad yid wa bebad ɔfɔ yi erun wa mbɔn ba begwigwe bi ekwɔ yi nju eyina ala ɔdemdem yi ru yi bintad, ka nyɔ kpak ɔchai erebag mpem jai yi efɔnang enun yi Ɔsɔwɔ. Nyɔ ka nyɔ oleming bifa nyɔ obodi biwag erɔng.

43“Ebeb yi nyɔ Farisi, wantagi nyɔ ɔkwe bakung nyɔ ɔkeag nyɔ ɔkɛmi wa betingi bi boged wa boju bu efugi bu bane ba Ju. Enunag nyɔ bane akobag nyɔ yi ejeg bekpen bi efɛn.

44“Ebeb yi nyɔ, wantagi nyɔ ole ala bayo ma akan kwei ndeng ma bane akenag esɔ ka aji arɔ bayo ala.”

45Wud owubɔ wu minkɔag eben yi Mosis abɔri Jisɔs arɔ, “Minkɔkɔi, ebu we ɔla chɔd lafa mmai ɔrɔ oli chibag ala sɔ erɔng.”

46Jisɔs abɔri arɔ, “Ebeb yi nyɔ bakɔag ba eben! Nyɔ otonag bane yi baka ma asɔngɔman akari, ka nyɔ bafɔni nyɔ ɔhɔlang bɔ kpe benini bid nyɔ ɔtop bɔ akari.

47“Ebeb yi nyɔ, wantagi nyɔ ɔtɛb betingi bi bayo ma barɔag ba eyammɛd yi Ɔsɔwɔ ba bansi abina awon. 48Yi nyɔ oleming la etɔngi arɔ nyɔ ɔkam nyɔ ɔrɔ yi bansi abina aleming enɔbɔnɔb. Bɔ awoi barɔag ba eyammɛd yi Ɔsɔwɔ, nyɔ ɔtɛb bayo amibɔ. 49Wantagi yifa, Ɔsɔwɔ wa ɔmanyum owu arɔ, ‘Me ting mfong bɔ barɔag ba eyammɛd yi Ɔsɔwɔ yi bane ba alag ɔbɔ wu Jisɔs Krais. Ebe abibɔ bɔ ting awoi ka ebe ting aseni bɔ.’ 50Eruafa akɔri bane ba nggon yufa wa nnung yi feb barɔag ba eyammɛd yi Ɔsɔwɔ yi bɔ amarɔ apog, to wa botog bu enud bu nggon, 51to wa nnung yi Ebel ta osi wa nnung yi Sekaria, wu awon wa etengante yi nchori yu esingi yi nju Ɔsɔwɔ. Me nsidi nyɔ, bane ba nggon yufa akɔrag nyɔ wa bane bafa feb ba nyɔ ɔmarɔ owoi.

52“Ebeb yi nyɔ bakɔag ba beben bi Mosis, wantagi nyɔ okun ɔgbɔgɔrɔ wu ɔkɔanyum wu emang Ɔsɔwɔ. Nyɔ bafɔni nyɔ ɔkan wei ka nyɔ ɔkpanag bane bantad ba ali anɔgag awei eteng.”

53Yi Jisɔs achan nju ayua, bɔ Farisi yi bakɔag ba eben ato nted ɔsang gbɔg yi we abebag we bebeb jugijugi, 54aworag akɔ we wa nyum yi ebe yi we amanag achɔd.

Currently Selected:

Luk 11: NBB

Highlight

Copy