Yowani 13

Yesu ôsa ebanafunzi bai ebihando

1Elusuku lukulu lwe'Pasaka*, lwábaa lwáhonda kuika. Yesu ábaa aményire mira kwe'bihangi byai bye'kutenga muno butala áya era mwa Tata byaíkire. Rero, bushi ábaa atúla asímire ebandu bai bo'muno butala, ánaendekeraa ábasima kuikira kwana businda.

2Yesu ne'banafunzi* bai bábaa bera bálya ebiryo bye'luolo-olo. Mwe'chi chihangi, Wamusimu* ábaa àbikire mira emianyisa ibi mwa muchima wa Yuta, mwenyi Simoni Isikariyota, mbu arénganyaa Yesu. 3Yesu ábaa anêshi kwa Ongo Tata ámweresise mira ebuashi kwa bindu byoshi. Kanji ábaa anêshi kwa era mwa Ongo Tata yátengaa, kanji yi angánahuba.

4Yesu era kubatuka ala ábaa álira, na ákongola eluchimba lwa ábaa àchihukire. Era kutola ebwamve na áchimina'bo mwa mbinji. 5Chasinda, era kubika emeshi mwa mbare, na átangirisa ôsa ebanafunzi* bai ebihando. Obu bwamve ábaa àchiminyire mwa mbinji, bu ábaa énjire ábahangula mwe'meshi.

6Ábere àika ku Simoni Petero, Petero yeke mbu: «Enawetu! Woyo u'ùnganyôsa kwa maulu?» 7Yesu nai mbu: «Bine náira, ùtangaala kubimenyerera mwe'bine bihangi, si ungábimenyerera era nyuma.» 8Petero nai mbu: «Nânga Waliya! Woyo ùtanganyôsa kwa maulu chiro na hicha!»

Yesu mbu: «Rero akaba ndàkwôsise kwa maulu, kukuteta mbu ndéte cha nyihángire nao.» 9Simoni Petero kukwera kumubura mbu: «Enawetu! Akaba kubiri bacha, ùtachinyôsaa kwa maulu meine, si wíree wányosa no'kwa mino, unyôse no'mwe'twe.» 10Yesu nai mbu: «Ola wòwire emubiri woshi mira, àtangachihuba kwôwa. Si kwa maulu kwémire kunôwa oshâo, bushi énde ába atákachire mira. Rero, mwabo mwátakachire mira, chiro àngaba mbu atá muboshi.»

11Cha chátumaa Yesu áteta mbu atá boshi bu bàtakachire, bushi ábaa àmenyire mira ola ungámurenganya.

12Mango Yesu ábaa era àmalaa kwôsa abu banafunzi* bai kwa maulu, era kuhuba kwémbala lwa luchimba lwai, na áhuba kwékala ala ábaa álira. Chasinda, era kubabusa mbu: «Ebi nera nàbairiraa, mwàbimenyerere? 13Si mwabo mwénjire mwányěrika mbu: ‹Mukangirisi›, kanji mbu: ‹Enawenyu*.› Kwe'chi munásinganyire, bushi kanangana nyìri Mukangirisi, kanji Enawenyu*. 14Rero, akaba nyono nyi Enawenyu* kanji Mukangirisi wenyu nàbôsise kwa maulu, nenyu ku munémire kunde mwôsanya kwa maulu bacha. 15Nàbalosise mira kwa mungénde mwáira, chasiya nenyu múnde mwáirirana ngo'kwa nàbairirire. 16Kubinali, nábabura kwa ekaungu* kàtatula kàrenzise enawabo, no'la wátumwa nai àtatula àrenzise ola wámutuma. 17Rero ene myasi mwera muîshi. Na akaba mùngende mwáikulikira, kuika munáahanyirwe.»

Yesu áteta kwa Yuta angámurenganya

(Mat 26:20-25; Mar 14:17-21; Luk 22:21-23)

18Yesu era kuendekera áteta mbu: «Ene myasi yanyi, ndáteta'i bushi nenyu muboshi. Nyeine nyìshi bánachilondoreraa. Si byémire oyu mwasi àike. Bushi bitúla byǎnjikirwe mwa Maanjiko Mabuya-buya mbu: ‹Ola náhangiraa ebiryo byanyi ku mbare nguma nai, iwáhubaa murenda wanyi.›#13:18 Somaa Saburi 41:9.

19«Ei myasi yoshi, nàbabwirire'i lwarero, era muhondo iíke, chasiya mango ingáika muményerere kwa Nyono Nyitúla'o.#13:19 Nyono Nyitúla'o: Lìri esina liuma mwa masina ma Ongo. Somaa Kutenga 3:14.

20«Kubinali, nábabura kwa ola wahúukasise emundu ola nàtumire, eri nyono nyi anáhuukasise. Nanyi kuno'ku, ola wànyihuukasise, eri ahúukasise no'la wányitumaa.»

21Mango Yesu ámalaa kuteta ei myasi, ebwenge bwera kumusungulira busese, na ábabura changanama mbu: «Kubinali, nábabura kanangana kwa muuma mu mwabo angányirenganya.» 22Ebanafunzi* bai, na bera bátangirisa básinderana, bushi batámenyaa nde i'Yesu ábaa áteta era luulu sai.

23Muuma mubo, ola Yesu ábaa atúla asímire busese, iwábaa wěkese ala musike sai. 24Simoni Petero, kukwera kumusimira, àbuse Yesu mbu nde yáteta era luulu sai. 25Oyola nai kukwera kwêrekera era Yesu ábaa àli. Na ámubusa mbu: «Enawetu, nde iwáteta era luulu sai kasi?»

26Yesu nai mbu: «Nyingátobesa chimbi cha mukati mwa mbare, no'la nyìngêresa'chi, i'yôyu.»

Chasinda, Yesu kutola chimbi cha mukati, era kutobesa'chi mwa mbare, na ángirisa'chi Yuta, mwenyi Simoni Isikariyota. 27Mango Yuta ábaa era ǎngiriraa'chi, unao-unao Wamusimu* kuna kwêngirira mwa muchima wai.

Yesu era kwire ámubura mbu: «Cha wáhonda kuira, uíraa'chi fuba!»

28Oyu mwasi Yesu áburaa Yuta, kutábaa chiro na muuma mu balikabo ba bábaa bálya ebi biryo, ola wámenyereraa cha chátumaa Yesu ámubura'o. 29Bauma mubo báchichingaa mbu abunya Yesu àmubwirire mbu àyaa kuula ebindu bya bangákoresa kwo'lu lusuku lukulu lwe'Pasaka*, nesi mbu àyaa kuasa ebakene, bushi iwéndee wálanga ehao.

30Mango Yuta ábaa era àtolaa cha chimbi che'mukati, unao-unao kuna kuuluka era butala. Ne'butufu bwábaa bweríre mira.

Yesu âna emuomba muyayaya

31Mango Yuta ábaa àulukire mira, Yesu era kuteta mbu: «Rero, nyi Mwana we'Mundu* nerésibwe etunda. Ongo nai, èresibwe'li mwa kunyirengera'ko. 32Na akaba Ongo èresibwe etunda kunyirengera'ko, echera chi chitúmire nanyi nyi Mwana, Ongo nai ámberesa'li. Kanji atánêmange kumberesa'li.

33«Rero bana banyi, nyichíri ala'uma nenyu ku bihangi bieke oshâo. Mungányihonda, si nábabura lwarero kwa nanáburaa eBayuta nabo: mùtangaala kuika era náya.

34«Bushi no'ku, nàbêresise muomba* muyayaya, na i'yôno: Mundaa mwásimana. Kwa nyitúla nyibasimire, ku nenyu mundaa mwánasimana. 35Oku kusimana kwenyu ku kungénde kwátuma ebandu boshi bámenyerera kanangana kwa munátula banafunzi* banyi.»

Yesu áteta mbu Petero àngáchǎkana'i

(Mat 26:31-35; Mar 14:27-31; Luk 22:31-34)

36Simoni Petero kukwera kubusa Yesu mbu: «Enawetu, ngai i'ungáya kasi?»

Yesu nai mbu: «Era nyingáya, ùtangafura kunyikulikira'yi, si era nyuma ukánanyikulikira.» 37Petero era kumubusa kanji mbu: «Enawetu, chi chìngatuma ndakúkulikira mwe'chine chihangi? Nèmerere kwâna ekalamo kanyi bushi nao!»

38Chasinjire, Yesu era kumwǎkula mbu: «Wàchikunganyise mira kwa ungâna ekalamo kao bushi nanyi? Rero kubinali, nákubura kwa eluasi lungábika eri woyo wàchǎkana nyono kahatu!»

Currently Selected:

Yowani 13: tbt

Highlight

Copy