Yowani 2

Yesu áira echisomerano chai chibere-bere

1Ábere kwàrenga suku ebiri, kwera kuba buya mwa musi we'Kana, mwa chio che'Kalilaya. Nyina wa Yesu, ábaa àli eyera, 2Yesu ne'banafunzi* bai nabo, bábaa bàlalikirwe kwo'bu buya.

3Ábere etifai yera yàwaa, nyina wa Yesu era kwire ámubura mbu: «Bàtachete inji tifai!»

4Yesu ômvire bacha, era kumwǎkula mbu: «E mama, oyu mwasi àtanyêrekere. Si ebihangi byanyi bìtasa kuika!» 5Unao-unao, nyina wa Yesu era kubura ebakosi be'buya ba bábaa bátanza etifai mbu: «Choshi cha angábabura, chi munáiraa!»

6Aola, ábaa àli mareya ndatu manenene, ma mábaa makúnganyisibwe mwa makoi. Rero emareya ma màli nga'ma mwe'Bayuta béndee bábika mwe'meshi me'kuchikomya* era muhondo sa Ongo. Na mu chira ereya mwábaa mùngaya milangi eyana ya meshi.

7Yesu era kubura abu bakosi mbu: «Mano mareya moshi, mwěhusaa mwe'meshi.» Bera kunêhusa mwe'meshi kuikira kwana meno.

8Chasinda, Yesu era kwire ábabura mbu: «Mwiree mwáfoma kwa'mu meshi, mwěkere'mo ola wèmangirire ebuya.» Bera kunámwekera'mo. 9Ábere era àtomaa kumo, era kuchichinga màbindukire tifai mira, si chiro ákamenya era màtengeraa. Ebakosi ba báfomaa kwa'mu meshi, beine bu bábaa bànêshi era màtengeraa.

Oyu wábaa wèmangirire ebuya, unao-unao kuna kutumisa muya mulume. 10Era kumubura mbu: «Era! Si wìshi kwa ebandu boshi, etifai era ìlokire i'bénde bátanzisa tanga ba bàlalikwaa. Na mango abu bàlalikwaa bénde bába bamwére busese, bánere bátanza emvenya. Si weke, unáchiri ulángire etifai era ìlokire kuikira mano mango!»

11Ei myasi Yesu áiraa eKana, mwa chio che'Kalilaya, chi chábaa chisomerano chai chibere-bere. Mwo'lu, era kulosa ebuashi bwai. Bushi no'ku, ebanafunzi* bai bera kumwemerera mwa michima yabo.

12Era nyuma se'bi, Yesu era kwândaalira mwa musi we'Kaperinaumu àli na nyina, na banyakabo, ala'uma ne'banafunzi* bai. Bera kubera'yi suku sieke.

Yesu ákolokanya ebachimbusi mwa chibuwa che'Luhu lwa Ongo

(Mat 21:12-13; Mar 11:15-17; Luk 19:45-46)

13Elusuku lukulu lwe'Pasaka* ye'Bayuta, mango lwábaa lwáhonda kuika, Yesu era kwérukira eYerusalemu. 14Áikire mwa chibuwa che'Luhu lwa Ongo*, era kubuana bandu bauma báusisa'mo engaafu, ne'mbuli, ne'biruka. Ne'banji bábaa békese báinganyanga ebuteya kwa mesa.

15Yesu kukwera kutola-tola emirisi, na áunga mwe'lukoba. Ba bandu boshi, ala'uma ne'ngaafu sabo, ne'mbuli sabo, kuna kutangirisa ákolokanya'bo mwe'chi chibuwa che'Luhu lwa Ongo*. Chasinda, ba bábaa báinganyanga ebuteya nabo, era kusheshanga obu buteya bwabo na kubindulanga emesa ma bábaa bábuínganyisisa'ko. 16Ba bábaa báusa ebiruka nabo, era kubabura mbu: «Mukulaa bine byoshi anola! Si mùtanachiereresaa mwáhubya enyumba ya Tata kuba esoko!»

17Mwo'lu, ebanafunzi* bai bera kukengera emyasi era itúla yǎnjikirwe mwa Maanjiko Mabuya-buya mbu: «Ongo Tata! Enzii era nyitúsa kwa nyumba yao, ikányimala.» #2:17 Somaa Saburi 69:10.

18eBayuta bera kwire bábusa Yesu mbu: «Bine wera kuira, chisomerano chichiye cha ùngaira cha chìngatulosa kanangana kwa wéte eloso lwe'kubiira?»

19Yesu nai mbu: «Luno Luhu lwa Ongo*, muhándulaa'lo, na mu suku ehatu mungálola kwa náhuba kuimba'lo.» 20Nabo mbu: «Si luno Luhu lwa Ongo*, ku myaka mane na ndatu ku lwêhuliraa! Rero, weke mbu ùngahuba kuimba'lo ku suku ehatu oshâo?»

21Si eLuhu lwa Yesu ábaa âmaana, ábaa áteta era luulu se'mubiri wai. 22Na mango Yesu ábaa era ômwokaa, abu banafunzi* bai bera kwire bákengera kwa átetaa era luulu so'yu mwasi. Bushi no'ku, bera kwêmerera eMaanjiko Mabuya-buya mwa michima yabo, ne'myasi era Yesu átetaa.

Yesu atúla eshi byoshi bya bìri mwa muchima we'mundu

23Mango Yesu ábaa àli eYerusalemu mwa suku sikulu se'Pasaka*, era kunde áira bisomerano binene. Mwa kulola kwe'bi bisomerano, bandu banene busese bera kumwemerera mwa michima yabo.

24Si chiro bacha, Yesu aténdee ábalángalira bushi ábaa atúla àbêshi boshi kubuya-buya. 25Kanji ábaa atáhonda mbu bamúfuliraa mwasi era luulu sa mundu murebe, bushi byoshi bya bìri mwa michima ye'bandu, ábaa anábishi.

Currently Selected:

Yowani 2: tbt

Highlight

Copy