Luka 19
19
Yesu ábika ehumbi mwa mwa Sakayo
1Mango Yesu áikaa mwa musi we'Yeriko, ábaa áulukana. 2Mwo'yu musi, mwábaa mutúla mulume muuma mbu i'Sakayo. Oyu Sakayo, ábaa mukulu-kulu we'bafuchisi be'mbarata. Kanji ábaa muare. 3Ábaa áhonda àlole Yesu i'nde. Rero bushi ábaa mundu mufu, chiro ákaala kumulóla'ko bushi ne'luamba lwe'bandu. 4Era kulibichira era muhondo. Era kwérukira kwa muchi chasiya alóle ku Yesu, bushi mwe'i njira mu Yesu ábaa angárenga. 5Mango Yesu áikaa mwe'chi chisiki, era kubatula emeho, na ábura Sakayo mbu: «Sakayo, ândaalaa fuba, bushi binyěmire nyibíke ehumbi mwa mwao lwarero.»
6Sakayo kuna kwândaala fuba-fuba, era kwángirira Yesu na lumoo lunene. 7Ebandu boshi ba bálolaa kwe'i myasi, bera kutangirisa báchitetembya mbu: «Aaye! Aíre kuonjira mwa mwe'mukosi we'bibi!»
8Si Sakayo era kwêmanga era muhondo sa Yesu na áteta mbu: «Enawetu, ǔmvaa! Nyingêresa ebakene chimbi che'bikulo byanyi. No'la nányaa kandu kai mwa kumwengeera, nyingámualulira'ko kane.» 9Yesu kukwera kubura ba bábaa bàli aola mbu: «Lwarero, Ongo anúnwire besha mwe'ne nyumba, bushi ono mundu nai análi wo'mwa lubuto lwa Aburahamu. 10Bushi nyono nyi Mwana we'Mundu náikire kuhonda ba báerire na kubanunula.»
Emuanyi we'bakosi ekumi
(Mat 25:14-30)
11Ebandu bábaa banáchiri bômvirisa emyasi era Yesu ábaa áteta. Rero ábaa áhonda kuika ofu ne'musi we'Yerusalemu, ebandu bera kuanyisa mbu eBwami bwa Ongo* bwáhonda kuika mwe'chi chihangi chine'chi. Yesu kukwera kubaishira ono unji muanyi mbu: 12«Kwábaa mulusi muuma ola wábaa wáhonda kubalamira mu chio cha burerere ěmikirwe'mo. Ne'ra nyuma se'kwîmikibwa, ahúbe kufuluka kwîma mwa chio chai. 13Era muhondo se'kubalama, era kubarangira bandu ekumi mwa bakosi bai. Era kuberesa chira mundu luteya luuma-luuma,#19:13 Luteya luuma: Byábaa bikulo bya bìngakorerwa mibisi eyana. na kubabura mbu: ‹Muchimbulaa no'buno buteya buínguke, kuikira mango nyingáfuluka.› 14Si ebandu bo'mwa chio chai bábaa bamúhombire. Bushi no'ku, bera kumukulikisa ebandu báye kumubura mbu batáhonda mbu ábe mwami wabo.
15«Si oyu mulusi era kunêmikibwa kuba mwami na áfuluka mwa chio chai. Ábere áfuluka, era kuteta mbu bamwâmaaliraa ba bakosi bai ekumi, bushi ábaa áhonda aményerere emutoloke bàbonyire mwa buchimbusi báiraa. 16Emukosi mubere era kuika na áteta mbu: ‹Enawetu, eluteya wámbaa, lwàbuchire sinji ekumi.› 17Enawabo nai mbu: ‹Wàkolire! Uli mukosi mubuya. Kuno walósaa kwa ùli muanda ola ùngachinyiirwa mu bindu bieke, ungére wêmangira misi ekumi.› 18Emukosi wakabiri nai era kuika na áteta mbu: ‹Enawetu, lwa luteya wámbaa lwáingukire sinji etano.› 19Enawabo nai mbu: ‹Nao nàkuirire mukulu-kulu wa kwêmangira misi etano.› 20Chasinda, eunji nai era kuika na áteta mbu: ‹Enawetu, nàkuretere lwa luteya wámbaa. Olu luteya, nábishaa'lo mwa chiramba. 21Nabáa nákwobaa busese, bushi utúla mulume musibu. Woyo wénde wátola bya ùtabikaa, kanji wénde wáshebula bya ùtaingaa.› 22Enawabo era kumubura mbu: ‹Woyo ùli mukosi mubi! Nyingákuchinjibusa kukulikana ne'i mitetere yao. Wábaa wìshi kwa nyitúla mulume musibu, nénde nátola bya ndàbikaa, na kushebula bya ndàingaa. 23Rero chi chatúmaa útabika ebuteya bwanyi mwa nyumba era bénde bálanga mwe'bikulo? Mwa kufuluka, nyìngabonyire ebikulo byanyi na mutoloke!› 24Oyu mulusi kukwera kubura ebandu ba bábaa bàli aola mbu: ‹Oyu mukosi mumunyáaa olu luteya, mwěrese'lo ola wète buteya ekumi.› 25Nabo mbu: ‹Enawetu, oyola era éte buteya ekumi!› 26Oyu enawabo nai mbu: ‹Nábabura kanangana kwa ola wète kandu i'ukêresibwa na kanji. Si ola utéte kandu, akányaibwa ne'kaeke kéte.› 27Kanji oyu enawabo era kuteta mbu: ‹Ebarenda banyi, ba babáa batáhonda mbu nyibáa mwami wabo, mubáretaa anola, mukére'bo mwa meho manyi.›»
Yesu êngirira eYerusalemu ne'tunda
(Mat 21:1-11; Mar 11:1-11; Yow 12:12-19)
28Mango Yesu ábaa era amálaa kuteta ei myasi, era kuendekera ne'lubalamo lwe'kuya eYerusalemu ahóndorere eluamba lwe'bandu. 29Era kuika ofu ne'musi we'Betefake ne'we'Betaniya, kwa lunda lwe'ndulungu ye'Miseituni. Era kutuma banafunzi* bai babiri mbu: 30«Muyáa kwa musi ola ulí era muhondo senyu. Mango mungáika'ko, mungábuana chana cha ndokomu chìminyirwe, kanji chìtafuraa kwíkalibwa'ko na mundu asibya. Mubóola'chi, mwánanyireteraa'chi. 31Na akaba kungába mundu ola wábabusa mbu chi chátuma mwáboola'chi, mumwákulaa mbu: ‹Enawetu éte bwera bwachi.› »
32Ebanafunzi* ba bátumwaa bera kunáenda. Bera kunabuana byoshi ngo'kwa Yesu anátetaa. 33Mango bábaa bera báboola echi chana che'ndokomu, ena'chi era kubabusa mbu: «Chi chátuma mwáboola echi chana che'ndokomu?» 34Nabo mbu: «Enawetu éte bwera bwachi.»
35Chasinjire, bera kuretera Yesu echi chana che'ndokomu. Bera kuhashika kwe'makochi mabo, chasinda, bera kwérusisa'ku Yesu. 36Mango ábaa anáchiri mwa luendo, ebandu bera kuendekera báhashika emakochi mabo mwa njira.#19:36 eBayuta, mwa kuhuukasa emukulu-kulu béndee bámuhashikira enjimba mwa njira kwa kumweresa etunda. 37Ábere Yesu áhonda kuika eYerusalemu, ândaala kwa ndulungu ye'Miseituni, ebanafunzi* boshi bábaa báenda bámowa busese. Bábaa bátonga Ongo na murenge munene, bushi ne'bisomerano byoshi bya bálolaa'ko. 38Bábaa báenda báteta mbu:
«Aáhane eMwami ola wěshire kwe'sina lya Enawetu!
Ebôlo bubáa kwa nguba,
na Ongo atóngwe!»#19:38 Somaa Saburi 118:26.
39Bafarisayo* bauma ba bábaa bàli mwa luamba lwe'bandu, bera kubura Yesu mbu: «Mukangirisi, ukáliiraa ebanfunzi bao basíre.» 40Yesu era kubǎkula mbu: «Nábabura kwa akaba abola bàngasira, emakoi mu mangálakanga!»
Yesu álirira emusi we'Yerusalemu
41Mango Yesu ábaa era àli ofu ne'musi we'Yerusalemu, áulolire'ko, era kuulirira. 42Era kuteta mbu: «Akaba nao lwarero ùngamenyire cha chìngakuretera ebôlo! Si chìbishirwe mwe'chine chihangi, ùtangaala kulola ku'chi. 43Bushi esuku singáika sa ebarenda bao bangákusungula kwa kukulwisa. Mango bangába baímbire elusito lwe'kuchilanga ofu nao, bangákusimekeresa kwa nyinda soshi. 44Bangákuhanda ala'uma ne'bandu bao. Batáreke chiro ne'koi lya lìri ku linji mwa musi, bushi ùtamenyereraa ebihangi bya Ongo àbahaa kukununula.»
Yesu ákolokanya ebachimbusi mwa chibuwa che'Luhu lwa Ongo
(Mat 21:1-17; Mar 11:15-19; Yow 2:13-22)
45Yesu era kwîngirira mwa chibuwa che'Luhu lwa Ongo*. Áikire'mo, era kutangirisa ákolokanya ebachimbusi. 46Era kubabura mbu: «Bitúla byǎnjikirwe mwa Maanjiko Mabuya-buya mbu: ‹Enyumba yanyi ikába nyumba ya kwémera mu Ongo.› Si mwabo, mwàihubise kuba chisiki cha bihumusi byénde byáchibisha'mo!»#19:46 Somaa Isaya 56:7; Yeremiya 7:11. 47Chira lusuku, Yesu ábaa énjire ákangirisa ebandu mwa Luhu lwa Ongo*. Ebakulu-kulu be'bakuhanyi* ne'bakangirisi be'Mwaso*, ala'uma ne'bashamuka, bábaa bénjire báhonda bàmwîte. 48Si báinaa enjira ye'kumwita, bushi ebandu boshi bábaa bénjire bámwomvirisa kubuya-buya.
Currently Selected:
Luka 19: tbt
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc.
Luka 19
19
Yesu ábika ehumbi mwa mwa Sakayo
1Mango Yesu áikaa mwa musi we'Yeriko, ábaa áulukana. 2Mwo'yu musi, mwábaa mutúla mulume muuma mbu i'Sakayo. Oyu Sakayo, ábaa mukulu-kulu we'bafuchisi be'mbarata. Kanji ábaa muare. 3Ábaa áhonda àlole Yesu i'nde. Rero bushi ábaa mundu mufu, chiro ákaala kumulóla'ko bushi ne'luamba lwe'bandu. 4Era kulibichira era muhondo. Era kwérukira kwa muchi chasiya alóle ku Yesu, bushi mwe'i njira mu Yesu ábaa angárenga. 5Mango Yesu áikaa mwe'chi chisiki, era kubatula emeho, na ábura Sakayo mbu: «Sakayo, ândaalaa fuba, bushi binyěmire nyibíke ehumbi mwa mwao lwarero.»
6Sakayo kuna kwândaala fuba-fuba, era kwángirira Yesu na lumoo lunene. 7Ebandu boshi ba bálolaa kwe'i myasi, bera kutangirisa báchitetembya mbu: «Aaye! Aíre kuonjira mwa mwe'mukosi we'bibi!»
8Si Sakayo era kwêmanga era muhondo sa Yesu na áteta mbu: «Enawetu, ǔmvaa! Nyingêresa ebakene chimbi che'bikulo byanyi. No'la nányaa kandu kai mwa kumwengeera, nyingámualulira'ko kane.» 9Yesu kukwera kubura ba bábaa bàli aola mbu: «Lwarero, Ongo anúnwire besha mwe'ne nyumba, bushi ono mundu nai análi wo'mwa lubuto lwa Aburahamu. 10Bushi nyono nyi Mwana we'Mundu náikire kuhonda ba báerire na kubanunula.»
Emuanyi we'bakosi ekumi
(Mat 25:14-30)
11Ebandu bábaa banáchiri bômvirisa emyasi era Yesu ábaa áteta. Rero ábaa áhonda kuika ofu ne'musi we'Yerusalemu, ebandu bera kuanyisa mbu eBwami bwa Ongo* bwáhonda kuika mwe'chi chihangi chine'chi. Yesu kukwera kubaishira ono unji muanyi mbu: 12«Kwábaa mulusi muuma ola wábaa wáhonda kubalamira mu chio cha burerere ěmikirwe'mo. Ne'ra nyuma se'kwîmikibwa, ahúbe kufuluka kwîma mwa chio chai. 13Era muhondo se'kubalama, era kubarangira bandu ekumi mwa bakosi bai. Era kuberesa chira mundu luteya luuma-luuma,#19:13 Luteya luuma: Byábaa bikulo bya bìngakorerwa mibisi eyana. na kubabura mbu: ‹Muchimbulaa no'buno buteya buínguke, kuikira mango nyingáfuluka.› 14Si ebandu bo'mwa chio chai bábaa bamúhombire. Bushi no'ku, bera kumukulikisa ebandu báye kumubura mbu batáhonda mbu ábe mwami wabo.
15«Si oyu mulusi era kunêmikibwa kuba mwami na áfuluka mwa chio chai. Ábere áfuluka, era kuteta mbu bamwâmaaliraa ba bakosi bai ekumi, bushi ábaa áhonda aményerere emutoloke bàbonyire mwa buchimbusi báiraa. 16Emukosi mubere era kuika na áteta mbu: ‹Enawetu, eluteya wámbaa, lwàbuchire sinji ekumi.› 17Enawabo nai mbu: ‹Wàkolire! Uli mukosi mubuya. Kuno walósaa kwa ùli muanda ola ùngachinyiirwa mu bindu bieke, ungére wêmangira misi ekumi.› 18Emukosi wakabiri nai era kuika na áteta mbu: ‹Enawetu, lwa luteya wámbaa lwáingukire sinji etano.› 19Enawabo nai mbu: ‹Nao nàkuirire mukulu-kulu wa kwêmangira misi etano.› 20Chasinda, eunji nai era kuika na áteta mbu: ‹Enawetu, nàkuretere lwa luteya wámbaa. Olu luteya, nábishaa'lo mwa chiramba. 21Nabáa nákwobaa busese, bushi utúla mulume musibu. Woyo wénde wátola bya ùtabikaa, kanji wénde wáshebula bya ùtaingaa.› 22Enawabo era kumubura mbu: ‹Woyo ùli mukosi mubi! Nyingákuchinjibusa kukulikana ne'i mitetere yao. Wábaa wìshi kwa nyitúla mulume musibu, nénde nátola bya ndàbikaa, na kushebula bya ndàingaa. 23Rero chi chatúmaa útabika ebuteya bwanyi mwa nyumba era bénde bálanga mwe'bikulo? Mwa kufuluka, nyìngabonyire ebikulo byanyi na mutoloke!› 24Oyu mulusi kukwera kubura ebandu ba bábaa bàli aola mbu: ‹Oyu mukosi mumunyáaa olu luteya, mwěrese'lo ola wète buteya ekumi.› 25Nabo mbu: ‹Enawetu, oyola era éte buteya ekumi!› 26Oyu enawabo nai mbu: ‹Nábabura kanangana kwa ola wète kandu i'ukêresibwa na kanji. Si ola utéte kandu, akányaibwa ne'kaeke kéte.› 27Kanji oyu enawabo era kuteta mbu: ‹Ebarenda banyi, ba babáa batáhonda mbu nyibáa mwami wabo, mubáretaa anola, mukére'bo mwa meho manyi.›»
Yesu êngirira eYerusalemu ne'tunda
(Mat 21:1-11; Mar 11:1-11; Yow 12:12-19)
28Mango Yesu ábaa era amálaa kuteta ei myasi, era kuendekera ne'lubalamo lwe'kuya eYerusalemu ahóndorere eluamba lwe'bandu. 29Era kuika ofu ne'musi we'Betefake ne'we'Betaniya, kwa lunda lwe'ndulungu ye'Miseituni. Era kutuma banafunzi* bai babiri mbu: 30«Muyáa kwa musi ola ulí era muhondo senyu. Mango mungáika'ko, mungábuana chana cha ndokomu chìminyirwe, kanji chìtafuraa kwíkalibwa'ko na mundu asibya. Mubóola'chi, mwánanyireteraa'chi. 31Na akaba kungába mundu ola wábabusa mbu chi chátuma mwáboola'chi, mumwákulaa mbu: ‹Enawetu éte bwera bwachi.› »
32Ebanafunzi* ba bátumwaa bera kunáenda. Bera kunabuana byoshi ngo'kwa Yesu anátetaa. 33Mango bábaa bera báboola echi chana che'ndokomu, ena'chi era kubabusa mbu: «Chi chátuma mwáboola echi chana che'ndokomu?» 34Nabo mbu: «Enawetu éte bwera bwachi.»
35Chasinjire, bera kuretera Yesu echi chana che'ndokomu. Bera kuhashika kwe'makochi mabo, chasinda, bera kwérusisa'ku Yesu. 36Mango ábaa anáchiri mwa luendo, ebandu bera kuendekera báhashika emakochi mabo mwa njira.#19:36 eBayuta, mwa kuhuukasa emukulu-kulu béndee bámuhashikira enjimba mwa njira kwa kumweresa etunda. 37Ábere Yesu áhonda kuika eYerusalemu, ândaala kwa ndulungu ye'Miseituni, ebanafunzi* boshi bábaa báenda bámowa busese. Bábaa bátonga Ongo na murenge munene, bushi ne'bisomerano byoshi bya bálolaa'ko. 38Bábaa báenda báteta mbu:
«Aáhane eMwami ola wěshire kwe'sina lya Enawetu!
Ebôlo bubáa kwa nguba,
na Ongo atóngwe!»#19:38 Somaa Saburi 118:26.
39Bafarisayo* bauma ba bábaa bàli mwa luamba lwe'bandu, bera kubura Yesu mbu: «Mukangirisi, ukáliiraa ebanfunzi bao basíre.» 40Yesu era kubǎkula mbu: «Nábabura kwa akaba abola bàngasira, emakoi mu mangálakanga!»
Yesu álirira emusi we'Yerusalemu
41Mango Yesu ábaa era àli ofu ne'musi we'Yerusalemu, áulolire'ko, era kuulirira. 42Era kuteta mbu: «Akaba nao lwarero ùngamenyire cha chìngakuretera ebôlo! Si chìbishirwe mwe'chine chihangi, ùtangaala kulola ku'chi. 43Bushi esuku singáika sa ebarenda bao bangákusungula kwa kukulwisa. Mango bangába baímbire elusito lwe'kuchilanga ofu nao, bangákusimekeresa kwa nyinda soshi. 44Bangákuhanda ala'uma ne'bandu bao. Batáreke chiro ne'koi lya lìri ku linji mwa musi, bushi ùtamenyereraa ebihangi bya Ongo àbahaa kukununula.»
Yesu ákolokanya ebachimbusi mwa chibuwa che'Luhu lwa Ongo
(Mat 21:1-17; Mar 11:15-19; Yow 2:13-22)
45Yesu era kwîngirira mwa chibuwa che'Luhu lwa Ongo*. Áikire'mo, era kutangirisa ákolokanya ebachimbusi. 46Era kubabura mbu: «Bitúla byǎnjikirwe mwa Maanjiko Mabuya-buya mbu: ‹Enyumba yanyi ikába nyumba ya kwémera mu Ongo.› Si mwabo, mwàihubise kuba chisiki cha bihumusi byénde byáchibisha'mo!»#19:46 Somaa Isaya 56:7; Yeremiya 7:11. 47Chira lusuku, Yesu ábaa énjire ákangirisa ebandu mwa Luhu lwa Ongo*. Ebakulu-kulu be'bakuhanyi* ne'bakangirisi be'Mwaso*, ala'uma ne'bashamuka, bábaa bénjire báhonda bàmwîte. 48Si báinaa enjira ye'kumwita, bushi ebandu boshi bábaa bénjire bámwomvirisa kubuya-buya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc.