Luka 9

Yesu átuma endumwa sai mwa mulimo

(Mat 10:5-15; Mar 6:7-13)

1Lusuku luuma, Yesu ábuanyanyaa endumwa* sai ekumi ne'biri. Era kwêresa'si ebuashi ne'misi ye'kwâmbula ebihwasi ne'kulamya ebalwala. 2Era kusituma kuhubanganya emyasi ye'Bwami bwa Ongo* na kulamya ebalwala. 3Era kusibura mbu: «Mwa lubalamo lwenyu, mùtekaa chiro na kandu kasibya. Mùtekaa kachi, nesi hao, nesi kalyo, nesi buteya. Chira muuma ànêkaaa luchimba luuma oshâo. 4Chira nyumba era mungénde mwábika mwe'humbi, mwánabera'mo, kuikira elusuku lwa mungátenga mwo'yu musi. 5Na chira musi woshi ola ebandu bangénde bánana kubahúukasa'mo, mwánachitengera'mo. Si mwa kutenga'mo, mwánabakunguchira emukungu ola ulí kwa bihando byenyu. Obola bungába bubeyi kwa'bu bandu.»#9:5 Kukunguta emukungu kutenga kwa bihando: kuli kuteta mbu emundu ola wàtumwaa àtachéte mwinda we'bandu ba àtumwaa'ko akaba banányire emwasi abáreteraa. 6Esi ndumwa* sera kwire sáchiuma, sátenga mu musi sáya mu unji. Sábaa sáenda sáhubanganya eMwasi Mubuya-buya na kulamya ebalwala mu chira chisiki.

Emyasi ya Yesu yásungulisa Heroti ebwenge

7Heroti, mukulu-kulu we'chio che'Kalilaya era kûmva kwe'i myasi yoshi. Ebwenge bwera kumusungulira, bushi bandu bauma bábaa bénjire báteta mbu Yowani Mubatisayi iwòmokire. 8Ne'banji mbu murebi* Eliya iwàhubire kuulukira. Ne'banji mbu muuma mwa barebi* bo'kwa mira iwòmokire.

9Si Heroti era kuteta mbu: «Nyeine, nyínatetaa mbu baíshaa Yowani etwe. Rero, ono mundu nénjire nômva emyasi yai, iwera nde?» Bushi no'ku, Heroti era kuhonda alóle ku Yesu.

Yesu êucha bandu byumbi bitano

(Mat 14:13-21; Mar 6:30-44; Yow 6:1-14)

10Endumwa* sera kufuluka, na sátangirisa sábalikisisa Yesu emyasi yoshi era sáiraa. Chasinda, Yesu era kweka'si bure ne'bandu. Bera kuya kwa lunda lwe'musi we'Betesaita.

11Si ebikembe bye'bandu byera kumenya kwa Yesu aíre eyera, bera kumwimisa'yi. Era kuhuukasa'bo kubuya na átangirisa ábahambalira era luulu se'myasi ye'Bwami bwa Ongo*. Na ba bábaa bàli balwala mubo, era kubalamya.

12Ábere esuba lyera lyáhonda kusoka, endumwa* ekumi ne'biri sa Yesu sera kumuíkira na sámubura mbu: «Waliya, anola tùli bure ne'bandu. Bushi no'ku, kungakomire ubúre ebandu báye mwa misi era iri ofu, no'mwa tumbara, chasiya bahónde ala bàngaonjira na bya bàngalya.»

13Yesu nai mbu: «Mubeine mubêresaa ebiryo.» Nabo mbu: «Tutéte kalyo, kureka ene mikati etano ne'sine efi ebiri. Wáhonda túye kuúlira bano bandu boshi ebiryo?» 14Ebandu ba bábaa bàli aola, bábaa bàngaika ku byumbi bitano bya balume.

Yesu era kubura ebanafunzi* bai mbu: «Mwíkasaa ebandu bikembe-bikembe bya bandu matano-matano.» 15Ebanafunzi* bera kunaira ngo'kwa Yesu áburaa'bo, bera kwékasa ebandu boshi. 16Yesu era kutola era mikati etano na se'fi ebiri, era kutumbikisa kwa nguba na átonga Ongo. Chasinda, era kubiishanganga'mo na ábyeresa ebanafunzi* bai bàbiabire ebandu. 17Abu bandu boshi bera kulya na kwêuta. Ebanafunzi* bera kulunda-lunda bya byáshibaa, bera kwîhusa bitonga ekumi na bibiri.

Petero áteta mbu Yesu i'Kirisito

(Mat 16:13-19; Mar 8:27-29)

18Lusuku luuma, Yesu ábaa éma Ongo mu chisiki chai yeine, ne'banafunzi* bai bábaa bàli ala musike sai. Era kubabusa mbu: «Ebandu bénjire báteta mbu nyono nyinde?» 19Bera kumwǎkula mbu: «Bauma bénjire báteta mbu u'Yowani Mubatisayi, ne'banji mbu u'Eliya, ne'banji nabo mbu ùli muuma mwa barebi* bo'kwa mira ola wòmokire.» 20Yesu kukwera kubabusa mbu: «Nenyu kasi, mwénjire mwáteta mbu nyi nde?» Petero era kumwǎkula mbu: «Woyo u'Kirisito* ola wàtumirwe na Ongo.»

Yesu áteta era luulu se'kufa ne'kwômoka kwai

(Mat 16:20-28; Mar 8:30–9:1)

21Yesu era kuchichika ebanafunzi* bai mbu bàtaereresaa bábura chiro na mundu asibya kwo'yu mwasi. 22Kanji era kubura'bo mbu: «Kwěmire nyono nyi Mwana we'Mundu nyiríbusibwe busese ne'kuláirwa ne'bashamuka, ne'bakulu-kulu be'bakuhanyi* ne'bakangirisi be'Mwaso*. Nyingêchibwa, no'kwa lusuku lwa kahatu nyingômoka.»

23Chasinjire, era kubabura boshi mbu: «Akaba emundu áhonda kunyikulikira, àrekaa kunde áanyisa era luulu sai yeine. Êmereraa kwéka emusalaba wai chira lusuku, anányikulikire. 24Bushi emundu ola wáhonda kulamya ekalamo kai, angákaesa. Si ola ungáesa ekalamo kai bushi nanyi, angánunula'ko. 25Kanji akaba mundu àngabona ebuare boshi bwe'butala, si ábe àchiesise nesi kuchikumbya yeine, mutoloke muchiye àngatola? 26Bushi no'ku, chira mundu woshi ola ukénde wányifira honyi, na kufira'si ebinwa byanyi, nanyi nyi Mwana we'Mundu nyikámufira'si. Bíkaba bacha, mango nyikábaha mwe'tunda lyanyi, line'tunda lya Tata, kanji lina lye'bamalaika* babuya-buya. 27Kubinali, nábabura kwa bandu bauma mwa ba bàli anola bàtakafe bàtasa kulola kwa Bwami bwa Ongo*.»

Yesu ábindulwa ehuhe

(Mat 17:1-8; Mar 9:2-8)

28Ábere kwàrenga suku munane Yesu àhambere ei myasi, era kutola Petero, na Yowani na Yakobo, era kwérukira nabo kwa ndulungu áye kwéma Ongo. 29Mango ábaa era éma Ongo, ebuso bwai bwera kubinduka, ne'njimba sai sera kulangala na kwêngengenya busese. 30-31Mwo'bu bulangare mwera kupamukira balume babiri, Musa na Eliya. Abu balume, bábaa báhambala na Yesu kute ku angámalirisa emulimo wai, mwa kufira eYerusalemu.

32Mwe'chi chihangi, Petero na balikabo bábaa bóndobere ne'tulo. Si bera kusuka na bálola kwo'bu bulangare bwa Yesu, na'bu balume babiri bèmenze ofu nai. 33Ábere abu balume babiri bera bàlikana na Yesu, Petero era kumubura mbu: «Enawetu, kukomire tubére anola. Tuímbe'o na bitala bihatu: Chiuma chingába chao, ne'chinji chingába cha Musa, ne'chinji chingába cha Eliya.» Petero ábaa áteta bya àteshi. 34Ábere Petero anáchiri áteta bacha, elumbumbu lwera kuulukira na lwábahukira. Abu banafunzi* bera kwôbaa mwa kulola kwa olu lumbumbu lwabáhukire. 35Mwo'lu lumbumbu mwera kûmvikala murenge ola wábaa wáteta mbu: «Onola i'Muala wanyi ola nálondwere. Mundaa mwámuteya ematwi!»

36Ábere oyu murenge era òmvikalaa, abu banafunzi* bai bera kulola kwa Yesu era àli yeine. Ei myasi yoshi bálolaa'ko aola, bera kuisirira'ko. Nesi kutáli chiro na mundu asibya ola báiburaa mwe'si suku.

Yesu âmbula echihwasi kwa mwana

(Mat 17:14-18; Mar 9:14-27)

37Mwe'i mishangya, Yesu na'bu banafunzi* bai bahatu bera kwândaala bátenga kwa ndulungu. Luamba lunene lwa bandu bera kumuikira. 38Mwo'lu luamba, mundu muuma era kuteta na murenge munene mbu: «Mukangirisi, nákwěma busese, ùnyiloreraa kwo'no mwana wanyi. Bushi ono muuma i'nyinéte! 39Echihwasi chénjire chámusimba, unao-unao chánamulakangya, chánamukukumanya, ne'fula lyánamutumba kwa bunu. Echi chihwasi, chiténjire chámutenga'ko fuba, kanji chénjire chámulibusa busese. 40Nàburaa ebanafunzi* bao mbu bǎmbula'chi, si ‹pyo›!»

41Yesu era kwire ǎkula mbu: «Mwabo mu bandu be'sine suku mutéte bwemeresi, kanji mùli babi busese. Nyikáéndekera kuba nenyu na kunde nômva emyasi yenyu kuikira mango'chi? Nyíreteraa oyu mwana anola.»

42Ábere oyu mwana anáchiri ábaha era Yesu àli, cha chihwasi kunakumuhunda kwa chitaka na chamukukumanya busese. Si Yesu era kukaliira'chi. Era kulamya oyu mwana na ámufulusisa eshe. 43Ebandu boshi bera kusanwa busese mwa kulola kwa buashi bunene bwa Ongo.

Yesu áteta kanji era luulu se'kufa kwai

(Mat 17:22-23; Mar 9:30-32)

Mango abu bandu boshi bábaa bachíri básanwa na byoshi bya Yesu éndaa ákola, Yesu era kubura ebanafunzi* bai mbu: 44«Mutéyaa ematwi mǔmve kwe'ne'myasi náhonda kubabura: Nyono nyi Mwana we'Mundu nyingânyibwa mwa maboko me'bandu.» 45Si ei myasi Yesu áburaa'bo, batámenyerera kute ìtechire. Yábaa ìbishirwe kubo, chasiya bàtaimenyereraa. Bera kufa ne'buba bwe'kumubusa mbu kute ìtechire.

Nde i'mukulu-kulu?

(Mat 18:1-5; Mar 9:33-37)

46Ebanafunzi* ba Yesu báyaa bwaka bwa kuhonda kumenya nde i'mukulu-kulu mwa kachi-kachi kabo. 47Yesu ábaa aményire emianyisa yabo mira. Bushi no'ku, era kutola mwana mutoto, era kumubika ofu nai. 48Era kubura'bo mbu: «Ola wǎngirire ono mwana mutoto kwe'sina lyanyi eri nyono nyǎngirire. No'la wànyǎngirire, eri ǎngirire no'la wányitumaa. Kubinali, ola ulí mueke mu muboshi i'mukulu-kulu.»

Ola utá murenda wenyu eri àli kwa lunda lwenyu

(Mar 9:38-40)

49Yowani kukwera kuteta mbu: «Enawetu, twalólaa ku mundu muuma âmbula ebihwasi kwe'sina lyao. Si twera kumwanga, bushi atá wo'mwa chikembe chetu.» 50Yesu era kumubura mbu: «Mùtamwângaa, bushi ola utá murenda wenyu eri àli kwa lunda lwenyu.»

Basamariya bauma bánana kuhuukasa Yesu mwa musi wabo

51Esuku sa Yesu se'kwérusibwa kwa nguba sábaa siri ofu kuika. Bushi no'ku, era kulola kwa bimwemire áye eYerusalemu. 52Era kutuma bandu bauma bàmuhondorere. Abu bandu, bera kuchiuma na bêngira mu musi muuma we'Basamariya*, chasiya bàmukunganyise ehumbi. 53Si besha mwo'yu musi bera kunana kumuhuukasa bushi ábaa àli mwa luendo lwe'kuya eYerusalemu.#9:53 Kutengera mira eBayuta ne'Basamariya bábaa bàtomvana. Bushi no'ku, eBasamariya bábaa bàtomva mbu eBayuta bàrengaa mwa chio chabo báya kwémera Ongo eYerusalemu. 54Ebanafunzi* bai, Yakobo na Yowani, bálolire bacha, bera kuteta mbu: «Enawetu, wáhonda twěme mbu muliro àtengaa kwa nguba asíkye'bo?» 55Yesu era kubinduka na ábakaliira. #9:55 Kuli binji bitabo bya byánjikwaa kwa mira bya byátalikaa unji muhambare kwo'yu mubere-bere mbu: «Kanji Yesu era kuteta: ‹Mwabo mùteshi kwa mutúla be'Muchima wa Ongo? Muményereraa kwa nyono nyi Mwana we'Mundu, ndàbahire kusikya ebandu, si nàbahire kubanunula.›» 56Chasinjire, Yesu ne'banafunzi* bai bera kuya ku unji musi.

Eáno era luulu se'kwêmisa Yesu

(Mat 8:19-22)

57Ábere Yesu ne'banafunzi* bai bera bàli mwa njira, mundu muuma era kumubura mbu: «Nyikénde nákwemisa era ukénde wáya yoshi.» 58Yesu era kumubura mbu: «Emitereri itúsa nyikunda, ne'milonge itúsa matu. Si nyi Mwana we'Mundu nyeke, ndatúsa chiro na chisiki cha kuonjira'mo.»

59Yesu era kubura unji mundu muuma mbu: «Unyêmisaa.» Oyu mundu era kuteta mbu: «Waliya, ùnyirekaa tanga nyíye kutaba tata.»

60Yesu era kumwǎkula mbu: «Rékaa ebafu beine bénde bátaba ebafu babo. Si woyo uyáa kubalira ebandu emyasi ye'Bwami bwa Ongo*.»

61Unji mundu muuma era kubura Yesu mbu: «Enawetu, nyikénde nákwemisa, si ùnyirekaa tanga nyíye kulaa engumo yanyi.» 62Yesu era kumubura mbu: «Emundu ola wátangirisa kuchika àtangachíba wa kulola era nyuma. Ola wáira bacha, àtangaba wakúkorera eBwami bwa Ongo*.»

Currently Selected:

Luka 9: tbt

Highlight

Copy