Mariko 16

Ekwômoka kwa Yesu

(Mat 28:1-8; Luk 24:1-12; Yow 20:1-10)

1Mango elusuku lwe'Sabato* lwábaa lwera lwàrengaa, Mariya we'Makatala, na Salome, na Mariya nyina wa Yakobo, bera kuula marashi, báye kumakaba echirunda cha Yesu. 2Ábere lwe'inga lumbuli-mbuli, esuba lichíri lyáuluka, abu bakasi bera kulamukira kwa shinda. 3Bábaa báenda bábusanya mbu: «Lye'koi lya lìri kwa chiso che'shinda, nde i'ungátukunungulira'li?» 4Bátetaa bacha, bushi eri koi lyábaa linene busese. Si ábere bêmusa emeho, kuna kulola kwa lyàsiikirwe mira.

5Abu bakasi mango bêngiraa mwa shinda, bera kubuana'mo mutabana muuma ékese kwa lunda lwe'malyo, ěmbese eropo lyálangala «Pe-pe-pe!» Bámulolire'ko, kuna kuchihalima.

6Oyu mutabana, era kubabura mbu: «Mùtobaa! Nyìshi kwa mwáhonda Yesu we'Nasareti ola bàmanyikaa kwa musalaba. Àtachiri anola, omókire mira. Muchiloreraa mu beine ala babáa bàmubikire. 7Rero muyáa kubura Petero ne'banji banafunzi* mbu àbahóndorere eKalilaya. Eyera, yi mungámulorera'ko, kukulikana no'kwa anábaburaa.»

8Unao-unao, ba bakasi kuna kutenga kwa shinda malibita. Bábaa bákukumana na kusanwa busese. Rero bushi ne'kufa buba bunene, chiro bákabura mundu mwasi asibya.

Yesu ápamukira ku Mariya we'Makatala

(Mat 28:9-10; Yow 20:11-18)

[ 9Ábere lweinga lumbuli-mbuli, Yesu era omwókaa, era kupamukira tanga ku Mariya we'Makatala ola âmbulaa ku bihwasi birinda. 10Oyu Mariya, era kuya kubalira ebanafunzi* ba Yesu kwo'yu mwasi. Abu banafunzi*, bábaa banáchiri bálirira Yesu na businane bunene. 11Na mango bômvaa kwa Mariya ábabura mbu Yesu àli muuma-uma, anámulolire'ko, chiro bákamwemerera.

Yesu ápamukira ku banafunzi bai babiri

(Luk 24:13-35)

12Era nyuma se'bi, banafunzi* babiri ba Yesu bábaa báya mwa kambara. Yesu era kupamukira'ko mu linji ehuhe. 13Bera kufuluka báya kubalira balikabo kwo'yu mwasi. Si nabo chiro bákabemerera.

Yesu ápamukira kwa ndumwa sai ekumi na nguma

(Mat 28:16-20; Luk 24:36-49; Yow 20:19-23; Mar 1:6-8)

14Chasinda, Yesu era kupamukira endumwa* sai ekumi na nguma mango bábaa bálya. Era kubakaliira busese bushi ne'kutaata ebwemeresi, kanji bushi ne'kuira emichima yabo kuba isibu. Ábakaliira bacha, bushi bàtêmereraa emyasi ya ba bámulolaa'ko era nyuma se'kwômoka kwai.

15Chasinjire, Yesu era kwire ábabura mbu: «Muyáa mwa butala boshi, muhúbanganyise ebandu boshi eMwasi Mubuya-buya. 16Chira mundu ola ùngêmerera na kubatisibwa angánunulibwa. Si ola ùtemerere, yeke angáchinjibusibwa.

17«Na ba bangêmerera, bangénde báira bine bisomerano: bangénde bâmbula ebihwasi kwe'sina lyanyi na kunde báteta mu manji mateta. 18Kanji akaba bàngasimba enjoka, nesi bámwa cha chìngeta emundu, batáfe kandu. Bangénde bálamya ne'balwala mwa kubabika kwe'mino.»

Yesu érusibwa kwa nguba

(Luk 24:50-53; Mar 1:9-11)

19Mango Enawetu Yesu ábaa era amálaa kubura ebanafunzi* bai ei myasi, era kwérusibwa kwa nguba. Era kuya kwíkala kwa lunda lwe'malyo ma Ongo. 20Ebanafunzi*, bera kuya kuhubanganya eMwasi Mubuya-buya mwa bisiki byoshi. Enawetu Yesu era kunde ákola ala'uma nabo na kuberesa ebuashi bwe'kunde báira ebisomerano, kwa kulosa kwa emyasi era bénjire báhubanganyisa ebandu ináli ya kanangana.]

Currently Selected:

Mariko 16: tbt

Highlight

Copy