Los Hechos 14

Ndi̱xaa ra Pablo xiꞌin ra Bernabé ñuu Iconio

1Saa ku̱u ndi̱xaa ra Pablo xiꞌin ra Bernabé ñuu Iconio, ñaa ndi̱kiꞌvi nda veꞌe ñuꞌu sinagoga na judío, saa ndi̱kaꞌan ndoso nda tuꞌun Ndioxi xaꞌa Jesucristo xiꞌin na. Ta kuaꞌa ni ka na judío xiꞌin na köo kúu judío ka̱ndixa ya ndi̱kaꞌan nda. 2Ta na judío, na xïin kandixa tuꞌun xaꞌa Jesús ta si̱saa na ini sava na köo kúu judío, ñaa ndi̱saa na xiꞌin na ndíkun ichí Jesús. 3Xaꞌa ya ikán kua ndi̱ndoo naꞌá ka ra Pablo xiꞌin ra Bernabé xiꞌin na, ta ndi̱nuni loꞌo káꞌan ndoso nda tuꞌun Tata yo. Xaꞌa ya kúꞌvi ini ra xíni ra yoo, yakan ta̱xi ra ndee ra ndaꞌa nda íkan nda yatuꞌun ra. 4Ñaa ndi̱taꞌvi mií na ñuu ikán, sava na ki̱ꞌin sata na judío, na xïin kandixa Jesús ta sava na ki̱ꞌin sata ra Pablo xiꞌin ra Bernabé. 5Ta saa chi̱taꞌan tuꞌun na judío xiꞌin na köo kúu judío, chi̱taꞌan tuꞌun na xiꞌin na chiñu ya kuꞌun na kani na yu̱ú sata nda, ndakua kaꞌni ñaꞌa nda káchi nda. 6Saa tá ku̱ndaa ini nda, saa xi̱nu nda kuaꞌan nda ñuu Listra xiꞌin ñuu Derbe ya kíndoo estado Licaonia. Ta kuaꞌan ndiꞌi nda iin iin ñuu ya ñúꞌu ikán. 7Saa káꞌan ndoso nda tuꞌun vaꞌa xaꞌa Jesús xiꞌin naꞌa.

Káni na ra Pablo xiꞌin yu̱ú ñuu Listra

8Saa índuꞌu iin ra küvi kaka ñuu Listra, ra ndu̱chiꞌña xaꞌa ku ra, saa káa ra tá ka̱ku ra, ta nda iin ichí köo ndi̱kuvi kaka ra. 9Ta saa índuꞌu ra xíni soꞌo ra ya káꞌan ra Pablo. Ñaa ndi̱koto vaꞌa ra Pablo nuu ra, saa xi̱ni ra ya kándixa ñaꞌa ra kuchiñu ndaꞌa ra. 10Ta saa ndee ni ndi̱kaꞌan ra Pablo xiꞌin ra, káchi ra saa:

―Vaꞌa ndikundichi ndaku un ―káchi ra xiꞌin ra.

Saa iin ndendee nda̱va ra ndi̱kundichi ra, xa̱á xíka ra. 11Tá xi̱ni na ñuu ikán ya i̱kan ra Pablo, ta xa̱á ndee ni káꞌan na tuꞌun mií na, káchi na saa:

―Koto ndo yóꞌó xa̱a uvi ndioxi nuu yo, tá íin mií yo ivi yóꞌó saa íin nda xa̱a nuu yo ―káchi na.

12Saa káꞌan na xaꞌa ra Bernabé kúu ra ndioxi náni Jupiter. Ta ra Pablo ku inka ndioxi ra náni Mercurio, káchi na, chi ra ikán ku ra káꞌan ndoso tuꞌun xiꞌin na. 13Íyo iin veꞌe ñuꞌu xíto ndaa ya nuu ñuu ikán, ta veꞌe ñuꞌu ndioxi Jupiter ku ya. Ta saa ke̱ta ra sutu xáa chiñu veꞌe ñuꞌu ikán kuaꞌan ra xiꞌin sindiki ñúꞌu ita ndi̱kini na sukun ri kuaꞌan xiꞌin ra, ya kaꞌni na ri soko na nuu ra Pablo xiꞌin ra Bernabé, káchi na. Ta yáꞌa ni kuaꞌa ku naꞌa kuaꞌan xiꞌin ra. 14Ñaa tá xi̱ni nda ya kúni na xaa toꞌo ñaꞌa na, saa xa̱ꞌnda sáa ini nda tikoto nda. Ta saa chi̱nii nda kuaꞌan nda tañu na, ndáꞌi koꞌo nda, káchi nda saa:

15―¡Tata!, ¿ndachu kua íkan ndo saa? Ta süvi ndioxi ku nde, taꞌan mií ndo ku tu ndeꞌe va. Xaꞌa ya íkan ndo saa yakan vaxi nde ndikani nde tuꞌun vaꞌa xaꞌa Ndioxi nuu ndo, ya ná kundaa ini ndo xäa toꞌo ka ndo inka ñaꞌa ya köo kúu Ndioxi, ta ndiko koo ini ndo xaꞌa ya íkan ndo. Saa ndikundikun ndo Ndioxi, ra táku, ra si̱kuaꞌa ndivi xiꞌin ñuꞌú tin nduta ñûꞌu xiꞌin ndiꞌi ka ñaꞌa ya íyo ñuu ivi yóꞌó. 16Xinaꞌa ta̱xi Ndioxi ndi̱xika ndiꞌi naꞌa ichí kúni mií na. 17Vani ndiꞌi saa ichí si̱naꞌa ra mií ra nuu naꞌa xaꞌa ya vaꞌa i̱kan ra. Chi suvi ra síkuun savi yakan vaꞌa kána ñaꞌa chíꞌi yo, saa táxi ra xíxi yo xiꞌin ya kúsini yo ―káchi ra Pablo xiꞌin na.

18Vani saa káꞌan nda xiꞌin na, ta tuvi ndioxi ndi̱xinu ini na köo ndi̱xaꞌni na sindiki ya xaa toꞌo ñaꞌa na.

19Ta saa ndi̱xaa sava nda judío ndóo ñuu Antioquía xiꞌin nda ndóo ñuu Iconio, síxinu nda ini na ñuu Listra ikán ya ná kaꞌni na ra Pablo. Saa ndi̱xinu ini na, ñaa xa̱á káni na ra xiꞌin yu̱ú. Xa ndi̱xiꞌi va ra, káꞌán na, saa ndi̱kuñuu ndai na ra ndi̱xaꞌan na si̱kana na ra nda nuu ñuu. 20Ta saa ndi̱xaa na ndíkun Jesús nuu índuꞌu ra, iin ndi̱kava nduu na sata ra. Ta saa ndi̱kiꞌin ra ini ra ndi̱koo ra kuaꞌan tuku ra xiꞌin na ñuu. Ta inka kivi ke̱ta ra kuaꞌan ra ñuu Derbe xiꞌin ra Bernabé.

21Ta ndi̱kaꞌan ndoso nda tuꞌun vaꞌa xaꞌa Ndioxi xiꞌin na ñuu ikán, saa kuaꞌa ni na ndi̱kundikun ichí Jesús. Sindiꞌi ikán ta ndi̱ko koo tuku ra Pablo xiꞌin ra Bernabé kuaꞌan nda ñuu Listra xiꞌin ñuu Iconio tin ñuu Antioquía. 22Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa:

―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

23Ta iin iin ñuu nuu ndi̱yaꞌa ra Pablo xiꞌin ra Bernabé ta xi̱xi suꞌun nda saa ndi̱kaꞌan ni nda xiꞌin Ndioxi xaꞌa na xikuaꞌa ndi̱kaxin nda ya kundaa chiñu na xiꞌin na ndíkun Jesús. Ñaa ndi̱kaꞌan nda xaꞌa na xikuaꞌa ikán xiꞌin Iva yo, ra chee, ra káñuꞌu na.

Ndi̱ko koo ra Pablo xiꞌin ra Bernabé ñuu Antioquía ya ndíkaa Siria

24Sindiꞌi ke̱e ra Bernabé xiꞌin ra Pablo kuaꞌan nda ta ndi̱yaꞌa nda maꞌñu estado Pisidia, ta saa ndi̱xaa nda estado Panfilia. 25Ta ikán ndíkaa ñuu Perge ñaa ndi̱kaꞌan ndoso nda tuꞌun Ndioxi xiꞌin na ñuu ikán. Sindiꞌi ikán ke̱e nda kuaꞌan nda ñuu Atalia. 26Ta ñuu ikán nda̱a nda tun barco kuanuꞌu nda ñuu Antioquía ya ndíkaa estado Siria. Ikán ku nuu ndi̱kaꞌan na ndíkun Jesús xaꞌa nda xiꞌin Ndioxi, tá xa̱á nda xíka nda káꞌan ndoso nda tuꞌun ra. Ta ndi̱xaꞌan nda si̱xinu nda chiñu ra. 27Tá ndi̱xaa nda saa si̱kitaꞌan ndiꞌi nda na kándixa Jesús. Iin ndi̱kitaꞌan ndiꞌi na, ta saa ndi̱tuꞌun ndiꞌi nda xaꞌa ya vaꞌa ni i̱kan Ndioxi xiꞌin nda, ta ndi̱kaꞌan nda xiꞌin na ndá kuꞌva xu̱na Ndioxi ichí nuu na köo kúu judío ya kandixa na Jesús. 28Saa ndi̱ndoo ra Pablo xiꞌin ra Bernabé, ndi̱xiyo nda kuaꞌa ni kivi xiꞌin na kándixa Jesús ndóo ñuu ikán.

Currently Selected:

Los Hechos 14: xta

Highlight

Copy