Los Hechos 16

Kuaꞌan ra Timoteo xiꞌin ra Pablo tin ra Silas

1Ndi̱xaa ra Pablo xiꞌin ra Silas ñuu Derbe xiꞌin ñuu Listra. Ikán ndi̱taꞌan nda iin ra kándixa Jesús, náni ra Timoteo, seꞌe iin yá judío yá kándixa Jesús ku ra, ta iva ra ku ra griego. 2Ta vaꞌa ni káꞌan ndiꞌi na ndíkun Jesús ndóo ñuu Listra xiꞌin ñuu Iconio xaꞌa ra Timoteo. 3Saa kúni ra Pablo kuꞌun ra Timoteo xiꞌin nda. Ñaa xa̱ꞌnda ra chiñu ya ná ndikunuu tuni Ndioxi ra takua ná ndikiꞌin vaꞌa na judío ra ñuu nuu kuꞌun ra xiꞌin nda, chi xíni na ya kúu iva ra griego. 4Yáꞌa nda iin iin ñuu káꞌan nda xiꞌin na köo kúu judío, na ndíkun Jesús. Ndítuꞌun nda xiꞌin na xaꞌa ya ndi̱kaꞌan nda apóstol tin na xikuaꞌa ndóo ñuu Jerusalén, káꞌan nda xiꞌin na ndá ñaꞌa kua xíniñuꞌu na xaa súvi na. 5Ta ndúndee ka na veꞌe ñuꞌu ndáa ni ini na xíni na Jesús, saa ndúkuaꞌa ka na ndíkundikun ichí ra iin iin kivi.

Ya ku̱u nuu si̱tuvi ya nuu ra Pablo ñuu Macedonia

6Saa ku̱ni ra Pablo kuꞌun ra chí Asia ta köo ndi̱xiin Tachi I̱í Ndioxi taxi ya kuꞌun nda ndituꞌun nda tuꞌun Ndioxi ikán. Xaꞌa ya ikán kua ndi̱kiꞌin nda kuaꞌan chí Frigia xiꞌin Galacia. 7Saa ndi̱xaa nda estado Misia ta kúni nda kuꞌun nda estado Bitinia, ta köo ndi̱xiin Tachi I̱í Ndioxi taxi ya kuꞌun nda. 8Yakan ndi̱yaꞌa ndaku nda estado Misia, ta ndi̱kiꞌin nda kuaꞌan nda ñuu Troas ya ndíkaa yuꞌu nduta ñûꞌu. 9Ta ñǔu tá ndi̱xaa nda, saa ndi̱xani ra Pablo, xi̱ni ra iin ra estado Macedonia ndíchi ra nuu ra xáku ndaꞌvi ra nuu ra káꞌan ra xiꞌin ra, káchi ra saa: “Ikan ndo ya mani, yaꞌa ndo ñuu nde chindee ndo ndeꞌe”, káchi ra xiꞌin ra, túvi ra ndi̱xani ra. 10Tá ndi̱xani ra Pablo ta ndikun saa xa̱a súvi nde ñaꞌa nde, ta ndi̱kiꞌin nde kuaꞌan nde estado Macedonia, chi ku̱ndaa ini nde Ndioxi ku ra kúni kuꞌun nde kaꞌan ndoso nde tuꞌun vaꞌa xaꞌa Jesús xiꞌin na ñuu ikán.

Chi̱kaa na ra Pablo xiꞌin ra Silas veꞌe kàà ñuu Filipos

11Saa ke̱e nde ñuu Troas ta ndi̱kiꞌin nde kuaꞌan ndaku nde xiꞌin barco nda maꞌñu nduta ñûꞌu nuu ñuꞌú íchi ndíkaa ñuu Samotracia, ta inka kivi ndi̱xaa nde ñuu Neápolis. 12Ta ikán nu̱u nde barco. Ñaa ke̱e nde kuaꞌan nde ñuu Filipos ya ndíkun ndaa Roma. Ta ñuu ndee ni ndee kua ikán yakan mani ni ya nuu na chiñu ñuu Roma, ta ndíkaa ya nuu ñuꞌú ñuu Macedonia, uvi ndaa kivi xi̱ndoo nde ikán. 13Ta iin kivi ndíkundee na judío ke̱e nde kuaꞌan nde nuu ñuu nuu yáꞌa ita, nuu ndíkitaꞌan na judío káꞌan na xiꞌin Ndioxi. Saa ndi̱xaa nde ndi̱kundoo nde ikán, ta ndi̱kitaꞌan nde xiꞌin sava ná síꞌi ná ndíkitaꞌan ikán. Ñaa xa̱á nde káꞌan nde tuꞌun vaꞌa xaꞌa Jesús xiꞌin ná. 14Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra. 15Ta saa chi̱chi yá xiꞌin ndiꞌi na veꞌe yá. Ñaa ndi̱xikan yá ya mani nuu nde, káchi yá saa:

―Tá tu kándixa ndo ndinuꞌu ini i ndi̱kundikun i Jesús, ta naꞌa ndo koꞌyo veꞌe i kundoo ndo ―káchi yá xiꞌin nde.

Ndakua sa̱xinu ya ini nde kuaꞌan nde xiꞌin yá.

16Saa ke̱e tuku nde kuaꞌan nde inka kivi nuu káꞌan na xiꞌin Ndioxi. Ñaa ndi̱kitaꞌan nde xiꞌin iin yá loꞌo, kúu mií tachi nduvaꞌa, ta sa̱ta ñaꞌa xitoꞌo yá xáa chiñu yá nuu na. Ta kuaꞌa ni xuꞌun táva na xiꞌin yá xaꞌa ya ndáku yá. 17Saa ndi̱kundikun yá sata nde ta xa̱á yá ndáꞌi koꞌo yá, káchi yá saa:

―Nda xáa chiñu nuu Ndioxi, ra chee, ku nda yóꞌó, ta ndítuꞌun nda xiꞌin ndo ichí xaꞌa Ndioxi nuu kaku ndo ―káchi yá xiꞌin na.

18Kuaꞌa ka kivi íkan yá saa xiꞌin nde. Ñaa xa̱á sáa ra Pablo xiꞌin yá ta ndi̱ko koo ra ndi̱kaꞌan ra xiꞌin tachi nduvaꞌa kúu mií yá, káchi ra saa:

―Xiꞌin ndee Jesucristo xáꞌnda chiñu i nuu un, vaꞌa keta kuaꞌan ―káchi ra xiꞌin ya.

Ta saa ndikun si̱ndoo ñaꞌa ya.

19Saa tá xi̱ni xitoꞌo yá ya köo ndi̱ki̱chiñu ka yá tava yá xuꞌun nuu na, ñaa ndi̱saa na xiꞌin ra Pablo tin ra Silas. Saa ti̱in na nda kuaꞌan nda xiꞌin na veꞌe chiñu nuu ndóo na chiñu. 20Ikán xa̱á na táxi na kuachi xaꞌa nda ndaꞌa na chiñu, káchi na saa:

―Taa nda judío ku nda yóꞌó ta xíka nda táva nda kuachi xiꞌin na taꞌan yo. 21Ta síin ichí kua sínaꞌa nda, ta küvi kandixa yo ya chi ley na chiñu ñuu Roma kua kándixa yo ―káchi na ikán xiꞌin na chiñu.

22Ñaa iin ndi̱tavi ndiꞌi na sata nda, ta xa̱ꞌnda na chiñu ya tava na toto nda, ta saa kani na nda xiꞌin itun. 23Ndi̱nuni loꞌo ka̱ni ñaꞌa na, sindiꞌi ki̱ꞌin na nda ta̱an na veꞌe kàà, ta ndi̱taꞌnda chiñu nuu ra ndáa yeꞌe veꞌe kàà ya ná kundaa ni ñaꞌa ra. 24Saa tá ndi̱taꞌnda chiñu nuu ra ta ki̱ꞌin ra nda ta̱an ra nda maa. Ti̱in ra xaꞌa uvi saa nda ta̱an ra yavi ini itun íyo mií veꞌe kàà ikán.

25Ta sava ñǔu xa̱á ra Pablo xiꞌin ra Silas káꞌan nda xiꞌin Ndioxi ta xíta nda yaa nuu ra. Saa xíni soꞌo inka nda ñúꞌu veꞌe kàà ikán ndóo nda. 26Ta iin ku̱u soꞌva xaá táan, yáꞌa ni ndee táan. Ñaa iin ndi̱ndata ndiꞌi xaꞌa veꞌe kàà. Saa ndi̱xuna ndiꞌi yeꞌe, ta ndi̱ndaxin ndiꞌi kàà ya núꞌni xaꞌa nda ñúꞌu veꞌe kàà ikán. 27Saa ndi̱kaxin ini ra ndáa yeꞌe veꞌe kàà ikán, ta xi̱ni ra ndi̱xuna ndiꞌi yeꞌe ya. Ñaa ti̱in ra i̱chi ya kaꞌni ra mií ra, saa chi va sana ka̱na koo ndiꞌi nda, káꞌán ra. 28Saa ndi̱kaꞌan ra Pablo xiꞌin ra, ndee ka vi ndi̱kaꞌan ra, káchi ra saa:

―Käꞌni un mií un chi yóꞌó ñúꞌu ndiꞌi va nde ―káchi ra xiꞌin ra.

29Ñaa ndu̱ku ra ñu̱ꞌu̱ ta xínu ra ndi̱kiꞌvi ra ini veꞌe kàà. Íꞌvi ka vi ra ndakua kísi ya ra, ndi̱kiꞌvi ra si̱kusiti ra nuu ra Pablo xiꞌin ra Silas. 30Saa ta̱va ra nda ta ndi̱ndakan tuꞌun ñaꞌa ra, káchi ra saa:

―Tata, kaꞌan ndo xiꞌin i unkua xíniñuꞌu i ikan i ya kuchiñu i kaku i ―káchi ra xiꞌin nda.

31Saa ndi̱kuiin ra Pablo káꞌan ra:

―Xíniñuꞌu un kandixa un Tata yo Jesucristo, saa kuchiñu un kaku un, ta saa tu na veꞌe va un ―káchi ra xiꞌin ra.

32Saa ndi̱kaꞌan nda tuꞌun xaꞌa Jesús xiꞌin ra, saa tu ndiꞌi na veꞌe va ra. 33Ta mí ñǔu ikán ndi̱kata ndiꞌi ra ñaꞌñu nda nuu ti̱kueꞌe. Saa si̱kuchi nda ra, saa tu na veꞌe va ra. 34Sindiꞌi ndi̱kuiso ra nda ndi̱xaa nda xíxi nda veꞌe ra, ta kúsini ka vi ra, saa tu na veꞌe va ra. Kúsini ni na xaꞌa ya ndi̱kundikun na Ndioxi.

35Saa ndi̱tuvi naꞌa ta ti̱ꞌvi na chiñu kuaꞌan nuu ra ndáa yeꞌe veꞌe káá xiꞌin nda policía, káchi nda saa xiꞌin ra: Vaꞌa tava un nda kuꞌun nda, káchi na. 36Saa ndi̱kaꞌan ra xiꞌin ra Pablo tin ra Silas, káchi ra saa:

―Ndi̱kaꞌan na chiñu xiꞌin i tava i ndóꞌo̱ kuꞌun ndo. Ta vaꞌa kee ndo kuꞌun ndo ―káchi ra xiꞌin nda.

37Saa ndi̱kuiin ra Pablo káꞌan ra xiꞌin nda policía, káchi ra saa:

―Küvi ikan nde saa, chi köo ndi̱xaa ndaa na kuachi xiꞌin nde. Ndi̱yaꞌa na nuu ley ya káꞌan küvi sitixuꞌvi ndo na kúu mií tutu ñuu Roma tá tu täꞌan kuꞌun na nuu juez kunani kuachi na. Ta ndeꞌe, kúu mií nde tutu ñuu Roma. Ta ¿ndachu ka̱ni ni na ndeꞌe nuu chútu ndaa naꞌa, ta saa ta̱an na ndeꞌe veꞌe kàà? Ta vitin kúni na saña sěꞌe na ndeꞌe kuꞌun nde. Sundi ndeꞌe, ta küꞌun nde, ndakua ná kixi mií na tava na ndeꞌe, saa kana koo nde kuꞌun nde ―káchi ra Pablo xiꞌin nda policía ikán.

38Saa ndi̱ko koo nda ndi̱tuꞌun nda xiꞌin na chiñu ya ndi̱kaꞌan ra Pablo. Ta ndi̱ndiꞌvi ni na chiñu, tá ku̱ndaa ini na ya kúu mií nda tutu ñuu Roma. 39Saa ndi̱xaꞌan na chiñu ikán ndi̱xikan na ya mani nuu ra Pablo xiꞌin ra Silas. Ñaa ndi̱xikan na ya mani nuu nda ya ná kee nda ñuu ikán. 40Saa tá ke̱e nda veꞌe kàà ta ndi̱xaꞌan nda veꞌe yá Lidia yá íyo mi ñuu ikán. Ta ikán ndi̱kitaꞌan ndiꞌi na ndíkun Jesús ndóo na. Ñaa ndi̱kaꞌan nda xiꞌin na ndi̱xaꞌa ka nda ndee xiꞌin na. Saa ka̱na koo nda kuaꞌan nda.

Currently Selected:

Los Hechos 16: xta

Highlight

Copy