San Juan 14

Jesús ku ichí ya kuaꞌan nuu Ndioxi

1Saa ndi̱kaꞌan Jesús xiꞌin nda ítaꞌan xiꞌin ra káchi ra saa:

―Kündiꞌi ini ndo. Kandixa ndo Ndioxi ta kandixa ndo yeꞌe. 2Veꞌe Iva i, ta íyo kuaꞌa ni nuu koo ndo. Tá tu süvi ya ndaa kua ta käꞌan i saa xiꞌin ndo, ndikuu. Ta vitin kuꞌun i xaa vií i nuu koo ndo. 3Tá tu ná kuꞌun i xa̱a vií i nuu koo ndo saa ndiko koo i ndikuiso i ndóꞌo̱, kuꞌun ndo koo ndo xiꞌin i nuu koo i. 4Xa xíni ndo nuu kuꞌun i, ta xa xíni tu ndo ichí va ―káchi Jesús xiꞌin nda.

5Saa ndi̱kuiin ra Tomás káꞌan ra xiꞌin Jesús, káchi ra saa:

―Tata, köo xíni nde nuu kuꞌun un, ta ¿unkua ikan nde kundaa ini nde ichí nuu kuꞌun un? ―káchi ra xiꞌin ra.

6Saa ndi̱kuiin Jesús ndi̱kaꞌan ra xiꞌin ra, káchi ra saa:

―Yeꞌe ku ra ku ichí, ta yeꞌe ku mií ya ndaa, yeꞌe ku ra táxi kutaku na. Nda iin na küvi kuꞌun nuu Iva i, tá tu süvi xiꞌna nuu yeꞌe vaxi na. 7Tá tu xíni vaꞌa ndo yeꞌe, ta xa xíni vaꞌa tu ndo Iva va i. Ta nda kivi vitin ta xa xíni ndo ra, chi xíto xiꞌin nuu ndo ra ―káchi Jesús xiꞌin nda.

8Saa ndi̱kuiin ra Felipe, káꞌan ra:

―Tata, vaꞌa sinaꞌa un Iva yo Ndioxi nuu nde ta xa vaꞌa va ―káchi ra xiꞌin Jesús.

9Saa ndi̱kuiin Jesús káꞌan ra:

―Felipe, xa naꞌá ni íyo i xiꞌin ndo ta, ¿án täꞌan kundaa ini un unku i? Na xíto xiꞌin nuu yeꞌe, ta xíto xiꞌin nuu tu na Iva va i. ¿Ta ndachu káꞌan un xiꞌin i sinaꞌa i ra nuu ndo? 10¿Án köo kándixa un yeꞌe ya íyo i xiꞌin Iva i, ta Iva i íyo ra xiꞌin i? Ndiꞌi ya káꞌan i xiꞌin ndo ta süvi xiní mií i kána ya káꞌan i xiꞌin ndo. Tuꞌun mií ra kua káꞌan i xiꞌin ndo, ta íkan ra chiñu kúni mií ra tixin yeꞌe. 11Vaꞌa kandixa ndo ya káꞌan i xiꞌin ndo íyo i xiꞌin Iva i, ta Iva i íyo ra xiꞌin i, tá tu köo kúni tu ndo kandixa ndo ya yóꞌó, ta vaꞌa kandixa ndo yeꞌe xaꞌa ñaꞌa ya xi̱ni ndo íkan i.

12Ya ndaa káꞌan i xiꞌin ndo, na kándixa ya káꞌan i, ta kuchiñu tu na ikán va xaa súvi na taꞌan ya íkan i. Ta nda ndee ka koo chiñu ikan na, saa chi yeꞌe ta ndiko koo i kuꞌun i nuu Iva i. 13Ta ndiꞌi ya ndúku ndo nuu Iva i Ndioxi xiꞌin kivi i, ta xaa súvi i ya xiꞌin ndo. Xaꞌa ya ikan i xiꞌin ndo kua ndikunuu vaꞌa ni ya toꞌo Iva i Ndioxi tixin yeꞌe kúu Seꞌe ra. 14Tá ndá ya ndúku ndo xiꞌin kivi i, ta xaa súvi i ya xiꞌin ndo.

Ndikaꞌan Jesús ya taxi ra Tachi I̱í ra ndaꞌa na ndíkun ra

15’Tá tu kúꞌvi ini ndo xíni ndo yeꞌe, ta xaa súvi ndo ya káꞌan i xiꞌin ndo. 16Ta yeꞌe nduku i ya mani nuu Iva i, ya ná tiꞌvi ra Tachi ra koo ya xiꞌin ndo Sindiko ya ini ndo, ta koo ya xiꞌin ndo ndiꞌi saa ichí. 17Ta ya ikán ku Tachi Ndioxi ya sinaꞌa ndóꞌo̱ xaꞌa ya ndaa. Ta na köo ndíkun yeꞌe ta küvi ndikiꞌin na ya koo ya xiꞌin na, chi köo xíni na ya, ta ni küchiñu na kuni xiꞌin nuu na ya. Sundi ndóꞌo̱ ndíkun yeꞌe ta xíni ndo ya, ta íyo ya xiꞌin ndo, saa koo ya xiꞌin ndo ndiꞌi saa ichí. 18Sïndoo ndaꞌi i ndóꞌo̱ chi ndiko koo tuku i koo i xiꞌin ndo. 19Tixin soo uvi ndaa kivi ta küni ka na ñuu ivi yóꞌó yeꞌe, sundi ndóꞌo̱ ta kuni ndo yeꞌe, saa chi yeꞌe ta táku i, yakan vaꞌa kutaku ndo xiꞌin i. 20Tá ná tindaa kivi nuu ndixa kutaku ndo, ta saa kuni ndo ya ndixa iin kuu i xiꞌin Iva i, ta saa ndóꞌo̱ iin ku ndo xiꞌin i, ta yeꞌe iin ku i xiꞌin ndo. 21Na xíni soꞌo ya xáꞌnda chiñu i ta xáa súvi na ya káꞌan i, na ikán ku na ndixa kúꞌvi ini xíni yeꞌe. Ndiꞌi na kúꞌvi ini xíni yeꞌe ta kuꞌvi ini Iva i kuni ra na, ta saa tu yeꞌe va kuꞌvi ini i kuni i na, ta situvi i mií i nuu na ―káchi Jesús xiꞌin nda.

22Saa ndi̱kaꞌan inka ra Judas, süvi ra Judas Iscariote ku ra ikán, ndi̱kaꞌan ra xiꞌin ra, káchi ra saa:

―Tata, ¿ta ndá xaꞌa kua ndisaa ndeꞌe sinaꞌa un mií un nuu, ta sïnaꞌa un mií un nuu na ñuu ivi? ―káchi ra xiꞌin ra.

23Saa ndi̱kuiin Jesús, káꞌan ra:

―Na kúꞌvi ini xíni yeꞌe, ta xáa súvi na ya káꞌan i xiꞌin na ta kuꞌvi ini Iva i kuni ra na, ta saa kixi Iva i tin yeꞌe, kixi nde koo nde xiꞌin na. 24Ta na köo kúꞌvi ini xíni yeꞌe, ta köo xáa súvi na ya káꞌan i. Chi tuꞌun ya xíni soꞌo ndo káꞌan i ta süvi tuꞌun mií i kua, tuꞌun Iva i ra ti̱ꞌvi yeꞌe vaxi i kua.

25’Ya yóꞌó káꞌan i xiꞌin ndo tá íyo i xiꞌin ndo vitin. 26Sundi Tachi I̱í ya tiꞌvi Iva i kixi Sindiko ya ini ndo, ta tixin kivi yeꞌe kua kixi ya chindee ya ndóꞌo. Saa sinaꞌa ndiꞌi ya ndóꞌo̱, ta sindikaꞌán ya ini ndo xaꞌa ndiꞌi tuꞌun ya ndi̱kaꞌan i xiꞌin ndo.

27’Táxi i tuꞌun vaꞌa ndaꞌa ndo ya koo vaꞌa ni ini ndo, ta köo táxi i ya tá kuꞌva táxi na ñuu ivi yoꞌo ya, síndoo i tuꞌun vaꞌa yóꞌó ya koo ya xiꞌin ndo. Ta ya táxi i koo vaꞌa ini ndo, ta süvi taꞌan ya táxi na ñuu ivi yóꞌó kua. Ta ku ïꞌvi ndo, ni kündiꞌi ini ndo. 28Xa xi̱ni soꞌo ndo ya ndi̱kaꞌan i xiꞌin ndo: Kuꞌun i, ta sindiꞌi saa ndiko koo tuku i koo i xiꞌin ndo. Tá tu kúꞌvi ni ini ndo xíni ndo yeꞌe, ta kusini ni ndo chi ndi̱kaꞌan i xiꞌin ndo kuꞌun i nuu Iva i, chi Iva i ta chee ni ka ra ikán nuu yeꞌe. 29Káꞌan kuee i xiꞌin ndo vitin, tá ndi̱xinu ndiꞌi ya ndi̱kaꞌan i xiꞌin ndo ta saa kandixa ndo yeꞌe.

30’Ta soo uvi ndaa tuꞌun káꞌan i xiꞌin ndo, chi xa vaxi kiti nǎꞌa, kiti xáꞌnda chiñu nuu na ñuu ivi yóꞌó. Ta nda loꞌo köo xáꞌnda chiñu ri nuu yeꞌe. 31Sundi ya ná kundaa ini na ñuu ivi, ya ndixa kua kúꞌvi ini i xíni i Iva i Ndioxi, yakan xáa súvi i chiñu ya xa̱ꞌnda chiñu ra nuu i. Ta vitin ndikuita ndo, koꞌo yo ―káchi Jesús xiꞌin nda ítaꞌan xiꞌin ra.

Currently Selected:

San Juan 14: xta

Highlight

Copy