San Lucas 10
10
Tíꞌvi Jesús uni xiko uxi nda kuaꞌan nda kaꞌan nda xiꞌin naꞌa ichí xaꞌa Ndioxi
1Sindiꞌi ikán ta ndi̱kaxin Jesús uni xiko uxi nda taa nda ndíkun sata ra. Tá uvi, tá uvi nda ti̱ꞌvi ra kuaꞌan nda ñuu nuu kuꞌun ra. Xiꞌna nda ikán ti̱ꞌvi ra kuaꞌan, saa kuꞌun mií ra.
2Ñaa ndi̱kaꞌan ra xiꞌin nda, káchi ra saa:
―Ya ndixa kua íyo ni naꞌa, na kúmani kuni soꞌo tuꞌun Ndioxi. Tá íyo i̱tu̱n ya xa vaꞌa sikee yo, saa íyo na. Yakan kua xíniñuꞌu ndo kuaku ndaꞌvi ndo nuu Ndioxi ya ná tiꞌvi ka ra naꞌa ya chindee taꞌan na xiꞌin ndo ya sikee ndo ñaꞌa.
3’Kuáꞌan ndo vitin, tíꞌvi i ndóꞌo̱ kuꞌun ndo xaa chiñu ndo xaꞌa Ndioxi. Tá kuaꞌan kiti levo vali maꞌñu kiti ndivaꞌi saa kuꞌun ndo, chi ìyo ni kuꞌun ndo. 4Ta küniꞌi ndo leka ndo kuꞌun xiꞌin ndo, ni xuꞌun küꞌun xiꞌin ndo, ni nduxan küꞌun xiꞌin ndo. Ta ni kündita ndo ichí ya kaꞌan ndioxi ndo xiꞌin nda iin naꞌa. 5Tá ndi̱xaa ndo ndá veꞌe nuu kuaꞌan ndo, ta chindee ndo na kaꞌan ndo xiꞌin na: “Ná koo vaꞌa ni ini ndóꞌo̱ ndóo veꞌe yóꞌó”, kachi ndo xiꞌin na. 6Chi tá íyo na kaꞌnu ini, ta koo vaꞌa ka ini na xiꞌin ya vaꞌa ndíso ndóꞌo̱. Sundi tá tu köo kaꞌnu ini na, ta tuꞌun vaꞌa ya ndi̱kaꞌan ndo xiꞌin na ndöꞌo ya xiꞌin na, ndiko koo ya kuꞌun ya xiꞌin ndo. 7Tá ndi̱kiꞌin vaꞌa na ndóꞌo̱, ta kundoo ndo veꞌe na ñuu nuu ndi̱xaa ndo ikán. Ta vaꞌa kuxi ndo tin koꞌo ndo ndiꞌi ñaꞌa ya táxi na ndaꞌa ndo. Chi ndiꞌi na xáa chiñu ta kúu mií na ichí kiꞌin yaꞌvi na. Ta küniꞌni ndo kaka ndo tutuku veꞌe. 8Tá xáa ndo iin ñuu ndíkiꞌin vaꞌa na ndóꞌo̱ tin táxi na ñaꞌa kuxi ndo, ta kuxi ndo ndá ka mií ñaꞌa táxi ndaꞌa ndo. 9Tá íyo na kúꞌvi ñuu nuu ndi̱xaa ndo, ta sindaꞌa ndo na, saa kaꞌan ndo xiꞌin na: “Xa ku̱yati ichí nuu xáꞌnda chiñu Ndioxi nuu ndo”, kachi ndo xiꞌin ndiꞌi na. 10Sundi tá ndi̱xaa ndo iin ñuu köo xíin na ndi̱kiꞌin vaꞌa na ndóꞌo̱, ta kana koo ndo ichí ñuu na kaꞌan ndo xiꞌin na: 11“Nda yaa ñuu ndo ya chi̱chi sata nduxan nde kísiniꞌni nde ya kóyo ya, ya ná kundaa ini ndo ndíso ndo kuachi chi ku̱ndasi ndo tuꞌun Ndioxi. Sundi kuni soꞌo vaꞌa ndo, kivi vitin kua ku̱yati nuu xáꞌnda chiñu Ndioxi nuu ndo”, kachi ndo xiꞌin na ―káchi ra xiꞌin nda.
12Saa ndi̱kaꞌan ka ra xiꞌin nda, káchi ra saa:
―Ndinuꞌu ni ini i káꞌan i xiꞌin ndo, ndiꞌi na köo xíin ndikiꞌin vaꞌa tuꞌun Ndioxi ta ndoꞌo ni na ná ndiꞌi xaꞌa ñuu ivi. Ndee ni ka kundoꞌo na ikán nuu na ñuu Sodoma ―káchi Jesús xiꞌin nda.
Ñuu nuu íyo na köo xíin kuni soꞌo ya káꞌan Jesús ta ndoꞌo ni na
(Mt. 11:20-24)
13Saa xa̱á ra káꞌan ra, káchi ra saa:
―¡Ndaꞌvi ni ndóꞌo̱ ñuu Corazín xiꞌin ndóꞌo̱ ñuu Betsaida! Saa chi kuaꞌa ni ka ya vaꞌa i̱kan i ñuu ndóꞌo̱ ta köo ndi̱ndiko koo ini ndo. Na ñuu Tiro xiꞌin na ñuu Sidón kini ni ivi ku tu na ikán va, tá tu ndi̱kan i taꞌan ya íkan i ñuu ndo yóꞌó nuu na ikán, ta xa yachi vi ndi̱ko koo na nuu Ndioxi. Xa ndi̱kundixi na tikoto ndai ni nuu, ndi̱kundoo na nuu yaa ñu̱ꞌu̱, ya sínaꞌa na mií na ndi̱ko koo na nuu Ndioxi, ndikuu. 14Saa ndóꞌo̱, na ñuu Corazín xiꞌin ndóꞌo̱ na ñuu Betsaida, ndoꞌo ni ka ndóꞌo̱ nuu na ñuu Tiro xiꞌin na ñuu Sidón kivi sindiꞌi tá ná xaa nani Ndioxi kuachi na ñuu ivi. 15Ta ndóꞌo̱ ndóo ñuu Capernaum, ínuu vaꞌa ni tuꞌun ndo nda nuu ndivi, ta ¡ndaꞌvi ni ndo! chi nda ni̱nu̱ koyo ndo kuꞌun ndo ndaya ―káchi ra xiꞌin na.
16Ta saa ndi̱kaꞌan ra xiꞌin uni xiko uxi saa nda ikán, káchi ra saa:
―Ndiꞌi na ndíkiꞌin tuꞌun ya káꞌan ndóꞌo̱, tuꞌun yeꞌe kua ndíkiꞌin na. Ta ndiꞌi na kúndasi ndóꞌo̱, yeꞌe ku i kúndasi na. Ndiꞌi na kúndasi yeꞌe, Ndioxi ku ra kúndasi na ikán, saa chi Ndioxi ku ra ti̱ꞌvi yeꞌe vaxi i ñuu ivi yóꞌó ―káchi Jesús xiꞌin nda.
Ndi̱ko koo uni xiko uxi saa nda
17Tá ndi̱ko koo uni xiko uxi saa nda ndi̱xaꞌan nda ndi̱kaꞌan nda tuꞌun Ndioxi xiꞌin naꞌa, ta kúsini ni nda xa̱á káꞌan nda xiꞌin Jesús, káchi nda saa:
―Tata, nda tachi nduvaꞌa xíni soꞌo tuꞌun káꞌan nde xiꞌin ya chi ndee ni ndee kúu mií un ―káchi nda xiꞌin ra.
18Saa ndi̱kaꞌan ra xiꞌin nda, káchi ra saa:
―Yeꞌe ta xi̱ni va i kiti nǎꞌa, kiti Satanás, ke̱ta ri nuu ndivi. Tá káa iin taxan, saa káa ri ndi̱kava ri nuu ñuꞌú. 19Ta yeꞌe táxi i ndee ndaꞌa ndo ya kuañu ndoso ndo sata kiti ko̱ó kueꞌe xiꞌin kiti tisoꞌma, ta kuchiñu ndo nuu ndiꞌi tachi nduvaꞌa ya káni taꞌan xiꞌin ndo ta nda iin ya kündoꞌo ndo. 20Ta küsini ndo xaꞌa ya xíni soꞌo kiti nǎꞌa tuꞌun xáꞌnda chiñu ndo nuu ri. Sundi kusini ni ndo chi xa ndi̱kunuu kivi ndo nuu ndivi ―káchi Jesús xiꞌin nda.
Kúsini ni Jesús
(Mt. 11:25-27; 13:16-17)
21Saa chútu ndaa Tachi I̱í Ndioxi Jesús mi hora ikán. Ñaa xa̱á ra káꞌan ra xiꞌin Ndioxi, káchi ra saa:
―Tata, xáa kaꞌnu ni i yóꞌo̱, chi yóꞌo̱ ku ra ku xitoꞌo ndiꞌi ñaꞌa ya íyo nuu ndivi tin ya íyo ñuu ivi yóꞌó. Kúsini ni i xiꞌin un chi ti̱seꞌe un ya yóꞌó nuu na ndíchi ni, na xíni ni, ta si̱naꞌa un ya nuu na köo xíni, na íin tá íin na vali, saa i̱kan un Tata, chi saa ku̱ni mií un ikan un ―káchi Jesús xiꞌin Ndioxi.
22Ta saa ndi̱kaꞌan ka ra káchi ra saa:
―Iva i Ndioxi ta ta̱xi ra ichí ndaꞌa i xaꞌa ndiꞌi ñaꞌa. Ta nda iin naꞌa köo xíni ini yeꞌe ra kúu Seꞌe Ndioxi, iindaa mií Iva i Ndioxi ku ra xíni ini i, ta ni ini Iva i Ndioxi köo xíni na, iindaa yeꞌe ku Seꞌe ra ku i xíni ini ra, saa sínaꞌa i ra nuu na kúni mií i kuni taꞌan xiꞌin ra ―káchi Jesús.
23Saa ndi̱ko koo ra ndi̱kaꞌan ra xiꞌin ndisaa mií nda ítaꞌan xiꞌin ra káchi ra saa:
―Vaꞌa ni kée na xíto ndiꞌi ñaꞌa íkan i taꞌan ya xíto ndóꞌo̱ íkan i. 24Ndisaa vi nda ndi̱kaꞌan ndoso tuꞌun yuꞌu Ndioxi xiꞌin nda rey nda ku̱u mií chiñu ndee xinaꞌa, ku̱ni nda kuni nda ya xíto ndo xiꞌin ya xíni soꞌo ndo tiempo vitin, sundi köo ndi̱xini nda ya, ni köo ndi̱xini soꞌo nda ya ―káchi Jesús xiꞌin nda.
Ya vaꞌa i̱kan iin ra ke̱e ñuu Samaria
25Ta saa ke̱e iin ra sínaꞌa ley Ndioxi ya ta̱a ra Moisés, kuaꞌan ra koto ndoso ra Jesús, ndi̱ndakan tuꞌun ñaꞌa ra, káchi ra saa:
―Tata Maestro, kúni i ndakan tuꞌun i yóꞌo̱, ¿unkua vaꞌa ikan i ya kuchiñu i kutaku i xiꞌin Ndioxi ndiꞌi saa kivi ya vaxi? ―káchi ra xiꞌin ra.
26Ñaa ndi̱kuiin Jesús ndi̱kaꞌan ra xiꞌin ra, káchi ra saa:
―¿Unkua káꞌan ley Ndioxi ya ta̱a ra Moisés xinaꞌa tá káꞌvi ndo ya? ―káchi ra xiꞌin ra.
27Saa ndi̱kuiin ra ikán káꞌan ra saa:
―Soꞌva káchi ya: “Ná kuꞌvi ini yo kuni yo Ndioxi xiꞌin ndinuꞌu nima yo tin ya vaꞌa yo xiꞌin ndiꞌi ndee yo xiꞌin ya ndíkani ini yo. Ta saa ná kuꞌvi ini yo kuni yo na taꞌan yo tá kuꞌva kúꞌvi ini yo xíni xiꞌin mií yo”. Soꞌva káchi ya ta̱a ra Moisés ―káchi ra ikán xiꞌin Jesús.
28Saa ndi̱kuiin Jesús káꞌan ra:
―Ya ndaa ni ku ndixa va ya ndi̱kaꞌan un. Xaa súvi ya ñaa, ta kuchiñu un koo un xiꞌin Ndioxi ―káchi Jesús xiꞌin ra.
29Ta ku̱ni ra maestro ikán kindoo vaꞌa ra, xaꞌa ya ndi̱kaꞌan ra xiꞌin Jesús yakan kua ndi̱ndakan tuꞌun ñaꞌa ra káchi ra saa:
―¿Ta unku na ku taꞌan i, Tata? ―káchi ra xiꞌin Jesús.
30Saa ndi̱kuiin Jesús ndítuꞌun ra iin tuꞌun ndíchi ya sínaꞌa ñaꞌa ra, káchi ra saa:
―Iin ra taa ke̱e ra ñuu Jerusalén kuaꞌan ra chí ichí ya kuaꞌan ñuu Jericó. Tá kuaꞌan ra ikán ta ka̱na koo nda kuiꞌna ichí ki̱ndaa ndiꞌi nda ñaꞌa ndaꞌa ra, saa xa̱a nduvaꞌa ni nda xiꞌin ra, si̱tikueꞌe ñaꞌa nda, siloꞌo kuvi ra. 31Saa ndi̱yaꞌa iin sutu kuaꞌan ra ichí ikán. Tá xi̱ni ñaꞌa ra ta iin xixiyo ndi̱yaꞌa ra kuaꞌan ra, köo ndi̱kaꞌan ra chindee ñaꞌa ra. 32Saa ndi̱yaꞌa tu inka ra ndíso chiñu xiꞌin veꞌe ñuꞌu, seꞌe sikua ra Leví kuaꞌan ra. Tá xi̱ni ra, ra ti̱kueꞌe ikán kánduꞌu ra ta iin xiyo xiyo ndi̱yaꞌa tu ra ikán va kuaꞌan ra. 33Saa ku̱u ta ndi̱yaꞌa tu iin ra ke̱e chí estado Samaria va, ndi̱yaꞌa ra nuu índuꞌu ra ti̱kueꞌe ikán. Ñaa ku̱ndaꞌvi ni ini ra xi̱ni ñaꞌa ra. 34Saa ku̱yati ra nuu ra xa̱a tatan ñaꞌa ra, ki̱ꞌin ra ceite tin vinu ndi̱yakun ra nuu ti̱kueꞌe ra ikán. Saa ka̱tun ra tikoto ndiꞌi nuu ti̱kueꞌe ra. Sindiꞌi ikán ta ndi̱kiꞌin ñaꞌa ra si̱ndaa ra sata kiti sana ra, ñaa ndi̱kiꞌin ñaꞌa ra kuaꞌan ra xiꞌin ra veꞌe nuu kíxi na yáꞌa ichí ikán, saa xi̱ndaa ñaꞌa ra. 35Ñaa ndi̱tuvi inka kivi ta̱va ra uvi xuꞌun ya denario ta̱xi ra ndaꞌa ra xíin veꞌe nuu chi̱nduꞌu ñaꞌa ra. Ta saa ndi̱kaꞌan ra xiꞌin ra, káchi ra saa: “Kundaa loꞌo un ra yóꞌó, ná ndoo loꞌo ra veꞌe un. Tá tu ti̱in un xuꞌun un xiꞌin ra ná ndiko koo i ta chaꞌvi i yóꞌo̱”, káchi ra. Soꞌva káchi tuꞌun ndíchi yóꞌó ―káchi Jesús xiꞌin ra sínaꞌa ya ta̱a ra Moisés.
36Ñaa ndi̱ndakan tuꞌun Jesús ra, káchi ra saa:
―¿Unku uni saa nda taa nda ndi̱yaꞌa nuu kánduꞌu ra ti̱kueꞌe ikán xaa taꞌan ñaꞌa, túvi yóꞌo̱? ―káchi ra xiꞌin ra.
37Saa ndi̱kuiin ra, káchi ra saa:
―Túvi yeꞌe ra ku̱ndaꞌvi ini xi̱ni ñaꞌa, ra ikan ku ra xaa taꞌan ñaꞌa ―káchi ra ikán xiꞌin Jesús.
Ta saa ndi̱kaꞌan Jesús xiꞌin ra, káchi ra saa:
―Kuáꞌan, ikan tá i̱kan ra ku̱ndaꞌvi ini xi̱ni ra ti̱kueꞌe ikán xiꞌin inka naꞌa ―káchi Jesús xiꞌin ra.
Ndi̱xaa Jesús veꞌe yá Marta xiꞌin yá María.
38Saa ke̱e Jesús kuaꞌan ra xiꞌin nda ítaꞌan xiꞌin ra, ndi̱xaa ra iin ñuu loꞌo. Ta ikán ke̱ta iin yá náni Marta ndi̱kiꞌin yá ra kuaꞌan ra xiꞌin yá veꞌe yá. 39Ta íyo iin kuꞌvi yá náni María. Tá ndi̱xaa Jesús veꞌe ná ta ndi̱kunduꞌu koo yá María xaꞌa ra xíni soꞌo yá káꞌan ra. 40Saa íyo ni chiñu nuu yá Marta, ndíꞌi ni ini yá xáa chiñu yá. Ñaa ku̱yati yá nuu Jesús káꞌan yá xiꞌin ra, káchi yá saa:
―Tata, ¿án köo ndíꞌi ini un xiꞌin i xáa chiñu ni i? Án väꞌa ná kaꞌan loꞌo un xiꞌin yá María kuꞌvi i, chindee taꞌan loꞌo yá xiꞌin i chi si̱ndoo yaa yá chiñu ndaꞌa i, ta ndi̱kunduꞌu yá xíni soꞌo yá tuꞌun káꞌan un? ―káchi yá xiꞌin ra.
41Saa ndi̱kuiin Jesús káꞌan ra xiꞌin yá:
―Marta, Marta, ya ndaa ndixa kua ndíꞌi ni ini un xáa chiñu un chi íyo ni chiñu nuu un ya síndiꞌi ni yóꞌó. 42Sundi íyo iindaa chiñu ya xíniñuꞌu ni un ikan un. Yá María kuꞌvi un, ta ndee ni ka vaꞌa ya ndi̱kaxin yá yóꞌó, ta nda iin naꞌa küchiñu kindaa ya ndaꞌa yá ―káchi Jesús xiꞌin yá Marta.
Currently Selected:
San Lucas 10: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
