San Lucas 4

Xíto ndoso kiti nǎꞌa Jesús

(Mt. 4:1-11; Mr. 1:12-13)

1Ta ndee ni íyo Tachi Ií Ndioxi xiꞌin Jesús, saa ke̱e ra chí ita Jordán ta ndi̱kiꞌin Tachi I̱í Ndioxi ra kuaꞌan ra iku yuyu. 2Ndi̱xika ra iku yuyu uvi xiko ñǔu tin nduvi, ta ñaa ndi̱xaa kiti nǎꞌa xíto ndoso ri ra ya ná ikan ra ya väꞌa. Ta sindiꞌi tixin uvi xiko kivi ikán ndi̱kaꞌun ini Jesús, ku̱ni kuxi ra chi nda loꞌo ñaꞌa köo ndi̱xixi ra. 3Ta saa ndi̱kaꞌan kiti nǎꞌa xiꞌin ra ya xíto ndoso ri ra, káchi ri saa:

―Tá tu ndixa Seꞌe Ndioxi ku yóꞌo̱, ta kaꞌan xiꞌin yu̱ú yóꞌó ná nduu ya xita vaꞌa ―káchi ri xiꞌin ra.

4Saa ndi̱kuiin Jesús, káꞌan ra:

―Tuꞌun Ndioxi káchi ya saa: “Süvi iindaa ya kuxi yo saa kutaku yo. Kandixa yo ndiꞌi tuꞌun Ndioxi ta saa kutaku yo”, káchi tuꞌun ra ―káchi Jesús xiꞌin ri.

5Ta saa ndi̱kiꞌin ri ra kuaꞌan ra xiꞌin ri iin iku sukun, ta ndikun si̱naꞌa ndiꞌi ri ñuu ya íyo ñuu ivi yóꞌó nuu ra.

6Saa ndi̱kaꞌan kiti nǎꞌa xiꞌin ra, káchi ri saa:

―Tá tu ná kusiti un nuu i xaa kaꞌnu un yeꞌe, ta taxi i ichí ndaꞌa un ya koo un ra kaꞌnu nuu ndiꞌi ñuu ya íyo ñuu ivi yóꞌó, taxi i ya kuika tin ndiꞌi ka ñaꞌa taxi i ndaꞌa un, saa chi ndaꞌa mií i íyo ndiꞌi ya, ta kúu mií i ichí taxi i ya ndaꞌa na kúni mií i ―káchi ri xiꞌin ra. 7Tá tu ná xaa kaꞌnu un yeꞌe, ta taxi ndiꞌi i ñaꞌa ndaꞌa un, ñaꞌa mií un nduu ndiꞌi ya ―káchi ri xiꞌin ra.

8Saa ndi̱kuiin Jesús, káchi ra saa:

―Kuáketa kuáꞌan, saa chi tuꞌun Ndioxi káchi ya saa: “Iindaa mituꞌun mií Ndioxi xaa kaꞌnu i, ta xäa kaꞌnu i inka naꞌa”, káchi tuꞌun ra ―káchi Jesús xiꞌin ri.

9Ta saa xi̱ndaka ri ra kuaꞌan ra xiꞌin ri nda ñuu Jerusalén, tá ndi̱xaa ra ikán ta ka̱ndichi ri ra xiní torre veꞌe ñuꞌu kaꞌnu ñuu ikán, ta saa ndi̱kaꞌan ri xiꞌin ra káchi ri saa:

―Tá tu ndixa Seꞌe Ndioxi ku yóꞌo̱, ta kuaketa yóꞌó ta iin saa ndikava un nda nuu ñuꞌú. 10Saa chi saa káꞌan tuꞌun Ndioxi, káchi ya saa:

Tiꞌvi ra na tatun ra ya chindee na yóꞌo̱, ta kundaa na yóꞌo̱.

11Ndaniꞌi na yóꞌo̱ kunuu un nuu ndaꞌa na

ya ná ndïkava un nuu yu̱ú ―káchi ri xiꞌin ra.

12Ta saa ndi̱kuiin tuku Jesús káꞌan ra:

―Saa káꞌan tuku tuꞌun Ndioxi: “Köto ndoso i Ndioxi”, káchi tuꞌun ra ―káchi Jesús xiꞌin ri.

13Tá sindiꞌi köo ndi̱kuchiñu ri sindaꞌvi ri ra, ta saa ku̱xika ri nuu ra, ta ndátun ri ndiko koo tuku ri koto ndoso ñaꞌa ri.

Xa̱á Jesús íkan ra chiñu ya ta̱xi Ndioxi ndaꞌa ra

(Mt. 4:12-17; Mr. 1:14-15)

14Ta kúu mií Jesús ndee Tachi I̱í Ndioxi, ta saa ndiko koo ra kuaꞌan ra chí Galilea, ta ndi̱xita ndiꞌi tuꞌun xaꞌa ra ndiꞌi ni kúu ñuu. 15Ta saa kuaꞌa ni veꞌe ñuꞌu sinagoga ndi̱xika ra sínaꞌa ra naꞌa, ndi̱xika ra ndiꞌi ñuu ya ñúꞌu estado Galilea, ta ndiꞌi na xíni soꞌo ya káꞌan ra, vaꞌa ni káꞌan na xaꞌa ra.

Ndi̱ko koo Jesús kuanuꞌu ra ñuu Nazaret

(Mt. 13:53-58; Mr. 6:1-6)

16Saa ndi̱ko koo Jesús ndi̱xaa ra ñuu Nazaret nuu xa̱ꞌnu ra. Ta ke̱e ra kuaꞌan ra veꞌe ñuꞌu kivi i̱í ndíkundee na, saa chi saa ini ra. Tá ndi̱xaa ra ini veꞌe ñuꞌu sinagoga ikán, ta ndi̱kundichi ra kaꞌvi ra tuꞌun Ndioxi. 17Saa ta̱xi na tutu ya ta̱a ra Isaías ra ndi̱kaꞌan ndoso tuꞌun yuꞌu Ndioxi xinaꞌa ndaꞌa ra. Ñaa ndi̱ndika ra ya, ta ndi̱taꞌan ra nuu káꞌan ya, káchi ya saa:

18Íyo Tachi I̱í Ndioxi xiꞌin i,

saa ndi̱kaxin ya yeꞌe vaxi i ndituꞌun i tuꞌun vaꞌa xiꞌin na ndaꞌvi.

Saa ti̱ꞌvi ya yeꞌe vaxi i sindaꞌa i na ndee ni taꞌvi nima.

Ta ti̱ꞌvi ya yeꞌe vaxi i saña i na núꞌni xaꞌa kuachi na.

Saa vaxi i kuna i nuu na kuáa̱,

ta vaxi i chindee i na tíxuꞌvi.

19Ti̱ꞌvi Tachi I̱í Ndioxi yeꞌe vaxi i kaꞌan ndoso i tuꞌun ra xiꞌin na ivi, saa chi vitin ndi̱xinu tiempo ya chindee Ndioxi na,

káchi ya ta̱a ra Isaías ya ka̱ꞌvi Jesús.

20Ta saa ndi̱kasi ra nuu tutu ikán, ta̱xi ra ya ndaꞌa ra ndíso chiñu xiꞌin veꞌe ñuꞌu sinagoga ikán. Saa ndi̱kunduꞌu ra ta iin kuaꞌan ini ndiꞌi ni kúu na ñúꞌu ini veꞌe ñuꞌu ikán xíto na nuu ra.

21Ta saa xa̱á ra káꞌan ra xiꞌin na, káchi ra saa:

―Vitin nuu ndiꞌi ndo si̱xinu Ndioxi ya ta̱a ra Isaías xinaꞌa, tá xi̱ni soꞌo ndo ya ka̱ꞌvi i kua ku̱u saa ―káchi ra xiꞌin na.

22Ta ndiꞌi na xi̱ni soꞌo ya ndi̱kaꞌan ra vaꞌa ka vi káꞌan na xaꞌa ra. Saa ndi̱kanda ni ini na ndóo na, chi vaꞌa ni káꞌan ra. Ñaa ndi̱ndakan tuꞌun taꞌan na, káchi na saa:

―¿Án süvi seꞌe ra José ku ra yóꞌó? Ta ¿ndachu vaꞌa xíni ni ra? ―káchi na.

23Ta saa ndi̱kaꞌan Jesús xiꞌin na, káchi ra saa:

―Xa ku̱ndaa va ini i chi vaxi kivi ta kaꞌan ndo xiꞌin i tá káchi na káꞌan: “Ndotor, xaa tatan un mií un”, kachi ndo. Ta saa kaꞌan ka ndo: “Án su yóꞌó ku ra i̱kan kuaꞌa ni ya vaꞌa ñuu Capernaum, ta vaꞌa ná ikan tu un taꞌan ya i̱kan un ñuu ikán ñuu un yóꞌó va”, kachi ndo xiꞌin i ―káchi Jesús xiꞌin na.

24Ta ndi̱kaꞌan ka ra xiꞌin na, káchi ra saa:

―Ya ndaa káꞌan i xiꞌin ndo, nda iin ra káꞌan ndoso tuꞌun yuꞌu Ndioxi köo ndíkiꞌin vaꞌa na ra ñuu mií ra. 25Ta ya ndixa kua káꞌan i xiꞌin ndo, tiempo ndi̱xika ra Elías ñuu ivi yóꞌó ta ndi̱xiyo kuaꞌa ni ná ndi̱ndoo ndaa ñuu Israel, ta köo ndi̱sikuun Ndioxi savi uni kuiya sava, ta ndi̱xiꞌi ni na soko, 26sundi nda iin ñuu ya íyo Israel köo ndi̱tiꞌvi Ndioxi ra Elías kuꞌun ra. Iindaa ñuu Sarepta ya ndíkaa estado Sidón. Ikán ti̱ꞌvi Ndioxi ra kuaꞌan ra koo ra veꞌe iin yá ndi̱ndoo ndaa, yá köo kúu judío.

27’Saa ku̱u tu xinaꞌa va, tiempo ndi̱kaꞌan ndoso ra Eliseo tuꞌun Ndioxi. Ta ndi̱xiyo ni na táꞌi ñuu Israel xiꞌin kueꞌe ya náni lepra. Ta Ndioxi köo ndi̱sindaꞌa ra nda iin na ñuu Israel. Iindaa ra Naamán, ra köo kúu judío, ra ke̱e nda estado Siria, ra ikán ku ra si̱ndaꞌa Ndioxi ―káchi Jesús xiꞌin na.

28Ñaa tá xi̱ni soꞌo na ndóo veꞌe ñuꞌu sinagoga ikán ya ndi̱kaꞌan ra, ta yáꞌa ni ndi̱saa na, chi ku̱ndaa ini na xiꞌin ya ndi̱kaꞌan ra xiꞌin na. 29Saa ndi̱kundita ndiꞌi nda ta ti̱in nda ra kuaꞌan ra xiꞌin nda nuu ñuu nda. Ta nuu xiki súkun nuu íin ñuu nda ikán ku̱ni nda kiꞌin nda ra sikana nda. 30Ta köo ndi̱kuchiñu nda sikana ñaꞌa nda, saa chi iin ndi̱yaꞌa sava ra maꞌñu nda, ta ndi̱kiꞌin ra kuaꞌan ra.

Iin taa, ra ku̱u mií tachi nduvaꞌa

(Mr. 1:21-28)

31Saa ndi̱kiꞌin tuku Jesús kuaꞌan ra ñuu Capernaum ya ndíkaa estado Galilea, ñaa xa̱á ra sínaꞌa ra ini veꞌe ñuꞌu ikán kivi ndíkundee na. 32Ta ndi̱kanda ni ini ndiꞌi na xíni soꞌo ya sínaꞌa ra. Saa chi ndee ni ndee kúu mií tuꞌun káꞌan ra.

33Ta saa íyo iin ra kúu mií tachi nduvaꞌa, ini veꞌe ñuꞌu sinagoga ikán ta ndee ni ndi̱ndaꞌi koꞌo ra nuu Jesús, káchi ra saa:

34―¿Unkua kúni un ikan un xiꞌin nde Jesús ra ñuu Nazaret? ¿Án vaxi un sindiꞌi xaꞌa un ndeꞌe? Saa chi xíni va i yóꞌó. Yóꞌo̱ ku ra i̱í, ra ke̱e nuu Ndioxi ―káchi ri xiꞌin Jesús.

35Ta saa ndi̱ndaꞌi ra xiꞌin ri, kachi ra saa:

―Kasi yuꞌu un, ta saña ra, tïin ka un ra ―káchi Jesús xiꞌin ri.

Ñaa chi̱ndaꞌa ri ra ndi̱kava ra nda nuu ñuꞌú. Ta saa ke̱e tachi nduvaꞌa kuaꞌan ya, nda iin ka ya köo ndi̱ndoꞌo ra. 36Ta ndiꞌi na xi̱ni ya ndo̱ꞌo ra ikán ndi̱kanda ni ini na. Ñaa ndindakan tuꞌun taꞌan na, káchi na saa:

―¿Ndá ndee kua kúu mií ra yóꞌó yakan vaꞌa kúu mií ra ichí xáꞌnda chiñu ra nuu tachi nduvaꞌa ta kándixa ñaꞌa ya ―káchi na.

37Ta ndiꞌi kúu ñuu ya ñúꞌu yati ndi̱xita tuꞌun xaꞌa ndiꞌi ñaꞌa ya íkan Jesús.

Jesús síndaꞌa ra yá siso ra Simón Pedro

(Mt. 8:14-15; Mr. 1:29-31)

38Saa ke̱e Jesús ini veꞌe ñuꞌu sinagoga ta ndi̱kiꞌin ra kuaꞌan ra veꞌe ra Simón, ra ítaꞌan xiꞌin ra. Tá ndi̱xaa ra ikán, ta ndi̱taꞌan ra yá siso ra Simón, ndee ni ndóꞌo yá ndítuvi ya xiꞌin yá. Ta saa ndi̱xikan na ya mani nuu Jesús ya sindaꞌa ñaꞌa ra. 39Saa ndi̱xaa ra ndi̱kuita ndee ra yuꞌu xito yá ñaa xa̱ꞌnda ra chiñu nuu kueꞌe ikán ya ná kee ya kuꞌun ya, ta ndikun si̱yaa ya xiꞌin yá, ndu̱vaꞌa yá. Saa ndi̱koo yá, xa̱á yá xáa ndúvi yá kuxi na.

Síndaꞌa Jesús kuaꞌa ni na kúꞌvi

(Mt. 8:16-17; Mr. 1:32-34)

40Saa ku̱u ndi̱keta ñu̱ꞌu ta kuaꞌa ni na ndáka na taꞌan na, na kúꞌvi xiꞌin kuaꞌa ni nuu kueꞌe, ndáka ñaꞌa na ndixaa na nuu Jesús, saa ti̱in ndaa ra iin iin na, ta si̱nduvaꞌa ra na. 41Ta kuaꞌa ni na kúu mií tachi nduvaꞌa ta̱va ra ya kúu mií na ndi̱ndaꞌi koꞌo ya, káchi ya saa:

―¡Yóꞌo̱ ku Seꞌe Ndioxi! ―káchi ya xiꞌin ra.

Ta xa̱ꞌnda Jesús chiñu nuu ya ná kutaxin yuꞌu ya, köo ndi̱taxi ra kaꞌan ya, saa chi xíni ya, ya ti̱ꞌvi Ndioxi ra vaxi ra ñuu ivi yóꞌó ya sikaku ra na ivi.

Xíka Jesús káꞌan ndoso ra ini veꞌe ñuꞌu iin iin ñuu ya ñúꞌu estado Galilea

(Mr. 1:35-39)

42Tá ndi̱tuvi inka kivi, ta ke̱e Jesús kuaꞌan ra iku yuyu. Saa tá xi̱ni na ndíkun sata ra ya köo ra, ta xa̱á na ndúku ñaꞌa na. Saa ndi̱taꞌan na ra, ta ndi̱kaꞌan na xiꞌin ra ya ná sïndoo ra na. 43Saa ndi̱kaꞌan ra xiꞌin na, káchi ra saa:

―Xíniñuꞌu i kuꞌun i inka ñuu ndi̱tuꞌun i tuꞌun vaꞌa xiꞌin inka naꞌa ndá kuꞌva kua kuchiñu kaꞌnda chiñu Ndioxi nima na, saa chi xaꞌa ya ikán kua ti̱ꞌvi ra yeꞌe vaxi i ñuu ivi yóꞌó ―káchi ra xiꞌin na.

44Saa ndi̱xika ra veꞌe ñuꞌu sinagoga iin iin ñuu ya ñúꞌu estado Galilea, sínaꞌa ra na ichí xaꞌa Ndioxi.

Currently Selected:

San Lucas 4: xta

Highlight

Copy