San Lucas 7
7
Síndaꞌa Jesús taa ra xáa chiñu xiꞌin ra xáꞌnda chiñu nuu nda lapa ñuu Roma
(Mt. 8:5-13)
1Saa ku̱u tá si̱ndiꞌi Jesús ndi̱kaꞌan ra xiꞌin na ikán, ta saa ndi̱kiꞌvi ra ñuu Capernaum. 2Tá ndi̱xaa ra ñuu Capernaum, ta ikán íyo iin ra ndíso chiñu nuu iin ciento nda lapa ñuu Roma. Saa ki̱ꞌin kueꞌe moso ra, ra ndee ni kúꞌvi ini ra xíni ra, ta xa siloꞌo kuvi ra, yáꞌa ni ndee ndóꞌo ra. 3Saa ku̱ndaa ini patrón ra tuꞌun xaꞌa Jesús, saa ka̱na ra na xikuaꞌa na ínuu nuu na judío, ta ndi̱kaꞌan ra xiꞌin na kuꞌun na nduku na ya mani nuu Jesús kixi ra sindaꞌa ra moso ra. 4Ta saa ke̱e na kuaꞌan na nuu Jesús. Tá ndi̱xaa na nuu ra, xa̱á na xáku ndaꞌvi na nuu ra káchi na saa xiꞌin ra:
―Tata, vaxi nde xíkan nde ya mani nuu un kuꞌun loꞌo un xiꞌin nde sindaꞌa un moso ra ndíso chiñu nuu iin ciento nda lapa chi vaꞌa ni taa kúu mií ra. 5Suvi ra si̱kuaꞌa veꞌe ñuꞌu sinagoga ya íin ñuu nde yóꞌó, ta kúꞌvi ni ini ra xíni ra na ñuu yo Israel ―káchi na xiꞌin Jesús.
6Ta saa ke̱e Jesús kuaꞌan ra xiꞌin na. Tá xa kúyati na xaa na veꞌe ra, saa xi̱ni ra ikán xaa Jesús veꞌe ra. Ta saa ti̱ꞌvi ra nda migo ra kuaꞌan nda kaꞌan nda tuꞌun yóꞌó xiꞌin Jesús:
―Tata, sïndiꞌi ka un mií un ya kixi un veꞌe ra, saa chi ndíkani ini ra yóꞌo̱ chee ni kúu un nuu ra yakan ni köo kúu mií ra ichí ya kiꞌvi un veꞌe ra, chi ra ni̱nu̱ ni kúni ku ra, che. 7Ta xaꞌa ya ñaa kua, köo ndi̱xaꞌa ndee ini i xaa i nuu un kaꞌan i xiꞌin un kixi un sindaꞌa un moso i. Sundi kándixa i yóꞌo̱ ya kúu mií un ndee sindaꞌa ñaꞌa un. Vaꞌa rá iin tuꞌun ná kaꞌan un ta nduvaꞌa moso i. 8Saa chi saa tu yeꞌe va. Íyo na xáꞌnda chiñu nuu i, ta saa tu yeꞌe va xáꞌnda chiñu i nuu inka nda lapa. Tá káꞌan i xiꞌin nda kuꞌun nda, ta kuaꞌan nda. Saa tá kána i nda kixi nda, ta vaxi nda. Saa tu ra xáa chiñu nuu va i, xáꞌnda i chiñu nuu ra ikan ra ndá ka ñaꞌa káꞌan i xiꞌin ra, ta íkan ra ya, káchi ra xiꞌin chiñu vaxi nuu un ―káchi nda xiꞌin Jesús.
9Ñaa tá xi̱ni soꞌo Jesús ya̱ ndi̱kaꞌan nda ikán ta ndi̱kanda ni ini ra. Saa ndi̱ko koo ra ndi̱koto ra nuu na ndíkun kuaꞌan sata ra, ta saa ndi̱kaꞌan ra xiꞌin na, káchi ra saa:
―Ya ndaa káꞌan i xiꞌin ndo, ra yóꞌó ta ni süvi ra ñuu yo Israel ku ra ta ndinuꞌu ni ini ra kándixa ra yeꞌe. Nda iin ndóꞌo̱ ñuu yo Israel yóꞌó köo ndáa ni ini xíni yeꞌe tá kuꞌva kándixa ni ra yóꞌó tuꞌun káꞌan i ―káchi Jesús xiꞌin na.
10Ta saa tá ndi̱ko koo nda ndi̱xaꞌan nuu Jesús ndi̱xaa nda veꞌe ra, ta ndi̱taꞌan nda moso ra íyo vaꞌa ra, xa ndu̱vaꞌa ra i̱kan Jesús.
Jesús sítaku ra seꞌe iin yá ndi̱ndoo ndaa
11Tá ndi̱ꞌi ikán, ta ke̱e Jesús kuaꞌan ra xiꞌin nda ítaꞌan xiꞌin ra, kuaꞌan nda iin ñuu náni Naín. Saa kuaꞌan kuaꞌa ni naꞌa xiꞌin ra. 12Tá ku̱yati ra ndi̱xaa ra ñuu ikán, ta xi̱ni ra kuaꞌan na sinduxin na iin ndìì, seꞌe iin yá ndi̱ndoo ndaa ku ya. Ta kuaꞌa ni naꞌa kuaꞌan xiꞌin yá sinduxin na seꞌe yá. Iindaa mituꞌun ku seꞌe yá, ta ndi̱xiꞌi ra. 13Ta saa ndi̱taꞌvi ni ini ra xi̱ni ra yá. Ñaa ndi̱kaꞌan ra xiꞌin yá káchi ra saa:
―Nana, kuäku un xaꞌa seꞌe un ―káchi ra xiꞌin yá.
14Saa ku̱yati ra ndi̱xaa ra ti̱in ndaa ra xito nuu ínuu ndìì ikán. Tá ti̱in ndaa soꞌva ra nu, ñaa ndikun ndi̱kundita na xiꞌin xito nuu kánuu ra. Ta saa ndi̱kaꞌan Jesús xiꞌin ndìì ikán, káchi ra saa:
―Ta loꞌo, ¡ndikaxin ini un ndikoo un! ―káchi ra.
15Saa ndi̱taku ra ndi̱koo ra ndi̱kunduꞌu koo ra nuu itun xito ikán. Saa xa̱á ra káꞌan ra. Ñaa ndi̱taxi Jesús ra ndaꞌa siꞌí ra. 16Tá xi̱ni na ndi̱taku ra, ta ndi̱kanda ni ini na ndi̱ndiꞌvi ni na. Saa xa̱á na xáa kaꞌnu na Ndioxi, káchi na saa:
―Iin ra chee ni ra káꞌan ndoso tuꞌun yuꞌu Ndioxi ku ra ndi̱kuita tañu yo. Ti̱ꞌvi Ndioxi ra vaxi ra koto ra yoo na kúu ñuu ra ―káchi na.
17Saa ndi̱xita niꞌnu ndiꞌi tuꞌun xaꞌa Jesús ku̱ndaa ini ndiꞌi na íyo ñuu ya ñúꞌu estado Judea. Ta kuaꞌa ni ka na inka ñuu ya ñúꞌu yati xiꞌin estado Judea ku̱ndaa ini na xaꞌa ya íkan Jesús.
Ra Juan, ra síkuchi naꞌa, ti̱ꞌvi ra nda ítaꞌan xiꞌin ra kuaꞌan nda ndakan tuꞌun nda Jesús
(Mt. 11:2-19)
18Tá ndi̱tuꞌun nda ítaꞌan xiꞌin ra Juan, ra síkuchi naꞌa xaꞌa ya vaꞌa ni íkan Jesús, saa ka̱na ra Juan uvi nda ítaꞌan xiꞌin ra, 19ti̱ꞌvi ra nda kuaꞌan nda kaꞌan nda tuꞌun yóꞌó xiꞌin Jesús, káchi ra saa: “¿Án yóꞌo̱ ku ra íyo tuꞌun xaꞌa ke̱e nuu Ndioxi vaxi ñuu ivi yóꞌó, án xíniñuꞌu ka nde kundatun nde inka ra? kachi ndo xiꞌin ra”, káchi ra Juan xiꞌin tuꞌun kuaꞌan nuu Jesús.
20Saa tá ndi̱xaa nda nuu Jesús ta ndi̱kaꞌan nda xiꞌin ra, káchi nda saa:
―Ra Juan, ra síkuchi naꞌa, ku ra ti̱ꞌvi ndeꞌe vaxi nde ndakan tuꞌun nde yóꞌo̱: “¿Án yóꞌo̱ kúu ra ti̱ꞌvi Ndioxi vaxi ñuu ivi yóꞌó? ¿Án xíniñuꞌu nde kundatun nde inka ra?” che ―káchi nda xiꞌin Jesús.
21Ta mi hora ikán, si̱ndaꞌa Jesús kuaꞌa ni na kúꞌvi xiꞌin ndiꞌi nuu kueꞌe, saa si̱ndaꞌa ra na kúu mií tachi nduvaꞌa tin si̱ndaꞌa tu ra na kuáa̱ va. 22Saa ndi̱kuiin ra ndi̱kaꞌan ra xiꞌin nda, káchi ra saa:
―Kuáꞌan ndo ndituꞌun ndo xiꞌin ra Juan ya xi̱ni ndo, xiꞌin ya xi̱ni soꞌo ndo. Kaꞌan ndo xiꞌin ra na kuáa̱ ta ndíkoto na íkan i, na küvi kaka ta ndíkaka na, na kúu mií kueꞌe lepra ya táꞌi ta ndúvaꞌa na íkan i, na sóꞌo ta xúna i soꞌo na, na ndíi ta sítaku i na. Saa ndítuꞌun i tuꞌun vaꞌa xaꞌa Ndioxi xiꞌin ndiꞌi na ndaꞌvi. 23Ta vaꞌa ni kée na köo xíka uvi ini xaꞌa ñaꞌa ya íkan i ―káchi ra xiꞌin nda.
24Ta saa ndi̱ko koo nda ítaꞌan xiꞌin ra Juan kuanuꞌu nda. Tá ndi̱ꞌi kuaꞌan nda, ta saa xa̱á Jesús káꞌan ra xaꞌa ra Juan xiꞌin na ndóo ikán, káchi ra saa:
―Ta ndóꞌo̱, ¿unkua ka̱na koo ndo xi̱to ndo iku yuyu? ¿Án tá íin tun ndoó tun köo ndíta tuun saa káa taa ra ka̱na koo ndo xi̱to ndo? 25¿Unkua xi̱ni ndo tá ka̱na koo ndo xíto ndo? ¿Án iin taa ra ndíxi vaꞌa ni ku ra xi̱ni ndo? Chi taa ra kuika, ra ndíxi tikoto vaꞌa ta luvi ni va veꞌe nuu íyo ra xaꞌa ya kúu ra rey. 26¿Unkua ka̱na koo ndo xíto ndo? ¿Án iin ra káꞌan ndoso tuꞌun yuꞌu Ndioxi ku ra ka̱na koo ndo xíto ndo? Ya ndaa va kua, taa ra ka̱na koo ndo xíto ndo, ta chee ni ka ra ikán nuu ndiꞌi nda ndi̱kaꞌan ndoso tuꞌun yuꞌu Ndioxi. 27Chi xinaꞌa ta̱a iin ra ndi̱kaꞌan ndoso tuꞌun yuꞌu Ndioxi xaꞌa ra Juan, ta ya ta̱a ra káchi ya saa:
Ra yóꞌó ku ra kunuu kuꞌun nuu un,
xiꞌna ra kuꞌun xaa vií ichí saa kuꞌun un, káchi ya ta̱a ra ikán.
―káchi Jesús xiꞌin na.
28Ta saa ndi̱kaꞌan ka ra xiꞌin na, káchi ra saa.
―Ta ya ndaa kua káꞌan i xiꞌin ndo, ndiꞌi taa nda ka̱ku ndi̱kaꞌan ndoso tuꞌun yuꞌu Ndioxi, ta ra Juan ku ra chee ni nuu ndiꞌi nda. Sundi na táxi xáꞌnda chiñu Ndioxi nima na, na ikán ku na naꞌnu ni ka nuu ra Juan ―káchi Jesús xiꞌin na.
29Tá xi̱ni soꞌo ndiꞌi na ñuu xiꞌin nda ndíkaya xuꞌun kuaꞌan ndaꞌa gobierno ñuu Roma, ñaa ta̱xi na si̱kuchi ra Juan na, chi ku̱ndaa ini na ya ndaa ni kua sínaꞌa Ndioxi. 30Sundi nda sínaꞌa ley ya ta̱a ra Moisés xiꞌin nda fariseo, ta ku̱ndasi nda ya vaꞌa ku̱ni Ndioxi ikan ra xiꞌin nda, chi köo ndi̱xiin nda kuꞌun nda kuchi nda nuu ra Juan ―káchi Jesús xiꞌin na.
31Ta saa xa̱á Jesús káꞌan ra xiꞌin na ndóo ikán, káchi ra saa:
―¿Ndá ivi kúvi na ndóo tiempo vitin? ¿Unku na íin tá kuꞌva íin na yóꞌó? ―káchi ra.
32Ta saa ndi̱kaꞌan ra xiꞌin na, káchi ra saa:
―Ná kaꞌan i xiꞌin ndo ndá kuꞌva íin na. Tá íin na vali na sísiki, ta káꞌan na xiꞌin taꞌan na: “Si̱kaꞌa nde itun tilali ta köo ndi̱xiin ndo tixaꞌa ndo, saa xi̱ta nde yaa ndaꞌvi kuaꞌan, ta köo ndi̱xaku ndo”, káchi ra. 33Chi ki̱xi ra Juan, ra síkuchi naꞌa, ta ni köo ndi̱xixi vaꞌa ra, ni köo ndi̱xiꞌi ra vinu, ta káꞌan ndo xaꞌa ra tachi nduvaꞌa kúu mií ra, káchi ndo. 34Ta vitin xa̱a yeꞌe, ra vaxi ñuu ivi yóꞌó, xíxi i xiꞌin ndo nuu viko, ta káꞌan ndo xaꞌa i kini ni xíxi i ta xíꞌi ni i vino, saa ítaꞌan i xiꞌin na väꞌa, ta ítaꞌan i xiꞌin na ndíkaya xuꞌun kuaꞌan ndaꞌa gobierno ñuu Roma, káchi ndo xaꞌa i. 35Sundi na ndíkiꞌin vaꞌa ya ndíchi táxi Ndioxi ku na sínaꞌa ya kúu na seꞌe ra ―káchi Jesús xiꞌin na.
Ndi̱xaa Jesús veꞌe ra Simón ra fariseo
36Saa xa̱ku ndaꞌvi ra Simón, ra ítaꞌan xiꞌin na fariseo nuu Jesús ya ná kuꞌun ra kuxi ra xiꞌin ra. Ta saa ke̱e Jesús kuaꞌan ra xiꞌin ra. Ndi̱xaa ra ndi̱kunduꞌu ra nuu mesa veꞌe ra Simón. 37Saa íyo iin ñaꞌa yá ñuu ikán, ta ínuu väꞌa ni tuꞌun yá. Tá ku̱ndaa ini yá ndi̱xaa Jesús kuxi ra veꞌe ra Simón, ta ke̱e yá kuaꞌan yá xiꞌin nduta tami xáꞌan, chútu ndaa rá ini iin yuyu kuaꞌan xiꞌin yá. 38Ndi̱xaa yá ndi̱kunduꞌu koo yá sata Jesús, saa xa̱á yá xáku ni yá, ta kóyo ni tikuii nuu yá xaꞌa ra. Sindiꞌi ta ndi̱yakun yá xaꞌa ra xiꞌin ixi xiní yá, ñaa si̱ichi yá ya ta xa̱á yá chútu yá xaꞌa ra. Saa tá si̱ndiꞌi yá ta ki̱ꞌin yá nduta tami xaꞌan ikán si̱kuchi yá xaꞌa ra. 39Saa tá xi̱ni ra Simón ikán, ta xa̱á ndíkani ini ra, káchi ra saa: “Tá tu ndixa ra káꞌan ndoso tuꞌun yuꞌu Ndioxi ku ra yóꞌó, ta xa kundaa va ini ra süvi ñaꞌa vaꞌa ku yá yóꞌó, ta täxi ra tiin ndaa ñaꞌa yá, ndíkuu”, káꞌán ra. 40Ta saa ndi̱kaꞌan Jesús xiꞌin ra, káchi ra saa:
―Tata Simón, íyo iin ñaꞌa kúni i kaꞌan i xiꞌin un ―káchi ra xiꞌin ra.
Saa ndi̱kuiin ra Simón, káchi ra saa:
―Vaꞌa, kaꞌan xiꞌin i Tata Maestro ―káchi ra.
41Ñaa xa̱á Jesús káꞌan ra iin tuꞌun ndíchi xiꞌin ra, káchi ra saa:
―Saa ndo̱ꞌo uvi nda taa, nda níka nuu iin ra táxi too xuꞌun. Iin ra níka uꞌun ciento denario ta inka ra níka uvi xiko uxi denario. 42Saa ku̱u ta nda iin nda köo ndi̱kuchiñu cháꞌvi xuꞌun ra, ñaa ndi̱xiyo ra ya kaꞌnu ini xiꞌin uvi saa nda.
―¿Ta unku nda kúꞌvi ni ka ini xíni ñaꞌa xaꞌa ya xa̱a kaꞌnu ini ra xaꞌa uvi saa nda, túvi yóꞌo̱? ―káchi Jesús xiꞌin ra Simón.
43Saa ndi̱kuiin ra Simón káchi ra saa:
―Tuvi yeꞌe, ra kuaꞌa ni xi̱nika ku ra kúꞌvi ni ini xíni ñaꞌa ―káchi ra.
Ta saa ndi̱kuiin Jesús, káchi ra saa:
―Ya ndaa ni ndixa ku ya ndi̱kaꞌan un ―káchi ra xiꞌin ra.
44Saa ndi̱koto ra nuu yá ñaꞌa ikán, ta ndi̱kaꞌan ra xiꞌin ra Simón, káchi ra saa:
―¿Án xíto un ya íkan yá yóꞌó xiꞌin i?
―Yóꞌo̱, tá ndi̱kiꞌvi i veꞌe un ta köo ndi̱taxi un tikuii ndoo xaꞌa i. Ta yá yóꞌó xa̱á yá ndíkata yá xaꞌa i xiꞌin tikuii nuu yá, saa ndi̱yakun yá ya xiꞌin ixi xiní yá. 45Ta yóꞌo̱, ni köo ndi̱chutu un nuu i, sundi yá yóꞌó ta nda nani ndi̱kiꞌvi i veꞌe un xa̱á yá chútu yá xaꞌa i. 46Ta yóꞌo̱, ni ceite köo ndi̱chikaa un xiní i, sundi yá yóꞌó ta si̱kuchi yá nduta tami xáꞌan xaꞌa i. 47Ta vitin kúni i kaꞌan i xiꞌin un: Ndiꞌi kúu kuachi yá yóꞌó ta xa ndo̱o ndiꞌi ya, saa chi kúꞌvi ni ini yá xíni yá yeꞌe. Sundi na loꞌo ni kuachi kúu mií túvi na, ta loꞌo ni kúꞌvi ini na xíni na yeꞌe ―káchi Jesús xiꞌin ra ikán.
48Saa ndi̱kaꞌan ra xiꞌin yá ikán, káchi ra saa:
―Nana, xa xa̱a kaꞌnu ini i xaꞌa ndiꞌi kuachi un ―káchi ra xiꞌin yá.
49Saa xa̱á inka nda ndóo xíxi nuu mesa veꞌe ra Simón ikán káꞌan nda xiꞌin taꞌan nda, káchi nda saa:
―¿Unku ra yóꞌó kua yakan vaꞌa xáa kaꞌnu ini ra xaꞌa kuachi na ivi? ―káchi nda.
50Ta saa ndi̱kaꞌan ka Jesús xiꞌin yá ikán, káchi ra saa:
―Vitin ndi̱kaku un i̱kán i chi ndáa ni ini un xíni un yeꞌe. Ta kuánuꞌu veꞌe un, käka ka ini un xaꞌa kuachi un ―káchi ra xiꞌin yá.
Currently Selected:
San Lucas 7: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
