San Marcos 10
10
Káꞌan Jesús xaꞌa naꞌa na xáꞌnda tutu xiꞌin taꞌan
(Mt. 19:1-12; Lc. 16:18)
1Saa ku̱u ke̱e Jesús ñuu Capernaum, ta ndi̱kiꞌin ra kuaꞌan ra chí ñuu ya ñúꞌu chí Judea, saa kuaꞌan tu ra inka xiyo yuꞌu nduta ita Jordán ñaꞌñu nuu kéta ñu̱ꞌu̱ va. Ikán ndi̱kitaꞌan kuaꞌa ka vi tuku naꞌa nuu ra. Saa xa̱á ra sínaꞌa tuku ra naꞌa tá kuꞌva íkan ra yachi. 2Saa ku̱yati sava nda fariseo ndi̱xaa nda nuu ra ya xíto ndoso nda ra yakan kéꞌe ñaꞌa nda, káꞌan nda xiꞌin ra án kuchiñu sindoo iin taa yá síꞌi ra, káchi nda. 3Saa ndi̱kuiin Jesús káꞌan ra xiꞌin nda, káchi ra saa:
―¿Unkua káꞌan ley ya ta̱a ra Moisés ya ndi̱ndoo ndaꞌa ndo? ―káchi ra xiꞌin nda.
4Saa ndi̱kuiin nda, káꞌan nda:
―Ya ta̱a ra Moisés ta káꞌan ya, vaꞌa va kaꞌnda ra tutu xiꞌin yá síꞌi ra sindoo ra yá, káchi ya ta̱a ra ―káchi nda xiꞌin Jesús.
5Saa ndi̱kuiin ra káꞌan ra:
―Saa ndixa íyo va ya ndi̱kaꞌan ra Moisés, xaꞌa ya soꞌo ndo, tuun nima ndo, yakan ta̱xi ra ichí ikan ndo saa. 6Sundi kivi xi̱koo ñuu ivi ta “Iindaa va taa si̱kuaꞌa Ndioxi, iindaa tu ñaꞌa va si̱kuaꞌa ra. 7Xaꞌa ya ikán kua sindoo taa iva ra xiꞌin siꞌí ra, ta tindaꞌa ra xiꞌin yá síꞌi ra. 8Ta uvi saa na nduu na iindaa”, káchi Ndioxi. Xaꞌa ya ikán kua tá tíndaꞌa na ta süvi uvi ka ku na iindaa ndúu na. 9Xaꞌa ya chi̱nduꞌu Ndioxi ya yóꞌó, si̱kitaꞌan ra iin taa xiꞌin iin ñaꞌa, ta köo ichí ya taꞌvi ñaꞌa nda iin naꞌa ya ―káchi Jesús xiꞌin nda.
10Saa tá ndi̱xaa nda veꞌe, saa ndi̱ndakan tuꞌun tuku ñaꞌa nda ítaꞌan xiꞌin ra suvi xaꞌa ya ikán. 11Saa ndi̱kuiin Jesús káꞌan ra xiꞌin nda, káchi ra saa:
―Iin taa tá tu síndoo ra yá síꞌi ra xáꞌnda ra tutu xiꞌin yá, ta tíndaꞌa ra xiꞌin inka ñaꞌa, ta kuakiꞌvi ra kuachi nuu Ndioxi xaꞌa ya síndoo ra yá nu̱ú. 12Ni iin ñaꞌa kua, tá tu xáꞌnda yá tutu xiꞌin ií yá ta tíndaꞌa yá xiꞌin inka taa, ta kuakiꞌvi tu yá ikán va kuachi nuu Ndioxi.
Chíkaa Jesús ya vaꞌa na vali
(Mt. 19:13-15; Lc. 18:15-17)
13Saa ndáka sava na na vali ndi̱xaa xiꞌin na nuu Jesús, ya ná chinuu ndaꞌa ra sata na chikaa ra ya vaꞌa na. Saa xa̱á nda ítaꞌan xiꞌin ra ndáꞌi nda xiꞌin na ndáka mií na vali ndi̱xaa ikán. 14Ñaa xi̱ni Jesús ya íkan nda, ta ndi̱saa ra xiꞌin nda, saa ndi̱kaꞌan ra xiꞌin nda, káchi ra saa:
―Taxi ndo na vali ná kixi na nuu i, ta käsi ndo nuu na, chi ndiꞌi na táxi xáꞌnda chiñu Ndioxi nima na, tá íin na vali yóꞌó saa íin na. 15Ya ndaa káꞌan i xiꞌin ndo, tá köo xíin ndo xaa ni̱nu̱ ndo mií ndo nuu Ndioxi tá kuꞌva íyo ini na vali yóꞌó, ta küchiñu ndo kiꞌvi ndo koo ndo nuu xáꞌnda chiñu Ndioxi ―káchi ra xiꞌin nda.
16Saa ti̱in ra na vali ikán ndi̱kunumi ndaa ra na, ñaa chi̱nuu ndaꞌa ra sata na, ta chi̱kaa ra ya vaꞌa na.
Káꞌan iin ra kuika xiꞌin Jesús
(Mt. 19:16-30; Lc. 18:18-30)
17Xa kee tuku Jesús kuꞌun va ra kua, ta saa ndi̱xaa iin ra taa, xínu ra ndi̱xaa ra, si̱kusiti ra nuu ra, saa ndi̱ndakan tuꞌun ñaꞌa ra, káchi ra saa:
―Tata Maestro, vaꞌa ni taa kúu mií un, ta kaꞌan loꞌo un xiꞌin i unkua xíniñuꞌu i ikan i, ya kuchiñu kutaku i xiꞌin Ndioxi ndiꞌi saa kivi ―káchi ra.
18Saa ndi̱kuiin Jesús, káꞌan ra xiꞌin ra, káchi ra saa:
―¿Ndachu káꞌan un xiꞌin i vaꞌa ni i? Köo na vaꞌa ni nuu Ndioxi, iindaa mituꞌun mií ra ku ra vaꞌa ni. 19Xa xíni mií un unkua káꞌan ley Ndioxi ya ta̱a ra Moisés xinaꞌa: ‘‘Käꞌni taꞌan ndo, ni xiꞌin inka ñaꞌa küsun ndo tá tu süvi yá síꞌi ndo ku yá, ni ñaꞌa na taꞌan ndo sïkuiꞌna ndo, ni chïkaa ndo kuachi siki nda iin naꞌa, ni sïndaꞌvi ndo na taꞌan ndo, kañuꞌu ndo iva ndo xiꞌin siꞌí ndo’’, káchi ley Ndioxi ya ta̱a ra Moisés xinaꞌa ―káchi Jesús xiꞌin ra.
20Saa ndi̱kuiin ra káꞌan ra:
―Tata Maestro, xa xíni ndiꞌi va i ya káꞌan un xiꞌin i, tá loꞌo vi xíni i ya, ta nda kivi vitin xáa súvi ndiꞌi i ya ―káchi ra.
21Saa ndi̱koto Jesús nuu ra ta ndi̱taꞌvi ni ini ra xi̱ni ñaꞌa ra, saa ndi̱kaꞌan ra xiꞌin ra, káchi ra saa:
―Vani xa íkan ndiꞌi un ya ñaa, sundi kümani ka siin ya ikan un. Kuáꞌan xiko ndiꞌi ñaꞌa ya kúu mií un, ta chindee un na ndaꞌvi. Saa kua kuchiñu ndukuika un xiꞌin Ndioxi nuu ndivi. Xaa súvi ya ñaa, ta saa kixi un kundikun un yeꞌe, vani tixuꞌvi un án nda kuvi un xaꞌa i ―káchi Jesús xiꞌin ra.
22Tá xi̱ni soꞌo ra ya ndi̱kaꞌan Jesús xiꞌin ra. Ta saa ku̱chiꞌña ni ini ra ndi̱kiꞌin ra kuaꞌan ra, chi kuika ni ra.
23Saa ndi̱koto Jesús nuu ndiꞌi nda ítaꞌan xiꞌin ra, ta ndi̱kaꞌan ra xiꞌin nda, káchi ra saa:
―Yaꞌa ni uꞌvi saa kuchiñu na kuika kiꞌvi na koo na nuu xáꞌnda chuiñu Ndioxi ―káchi ra xiꞌin nda.
24Saa ndi̱kanda ini nda xaꞌa tuꞌun ya ndi̱kaꞌan ra xiꞌin nda. Ñaa ndi̱kaꞌan tuku ra xiꞌin nda, káchi ra saa:
―Seꞌe, ya ndaa ni káꞌan i xiꞌin ndo yaꞌa ni uꞌvi saa kiꞌvi na kuika koo na nuu xáꞌnda chiñu Ndioxi, chi ya kuika va kua ndíkaa ni nima xiꞌin. 25Ni iin ti camello ta köo kúchiñu ri yaꞌa ri yavi loꞌo kaꞌa tiku. Tá tu köo kúchiñu ri ikán yaꞌa ri, ta ndisaa ka vi na kuika, ndixa ni ka uꞌvi saa taxi na kaꞌnda chiñu Ndioxi nuu na ―káchi Jesús.
26Saa tá xi̱ni soꞌo nda tuꞌun ikán ta ndi̱kanda vaꞌa ka ini nda, ñaa xa̱á ndákan tuꞌun taꞌan nda, káchi nda saa:
―Tá tu uꞌvi ni saa kiꞌvi na kuika koo na nuu xáꞌnda chiñu Ndioxi ta ¿unku na kuchiñu kaku, ta tu saa? ―káchi nda xiꞌin taꞌan nda.
27Saa ndi̱koto Jesús nuu nda, ta ndi̱kaꞌan ra xiꞌin nda, káchi ra saa:
―Yáꞌa ni va uꞌvi ya kaku na ñuu ivi yóꞌó nuu mií na, sundi nuu Ndioxi ta nda iin ya köo ndíchi, ndiꞌi ya kúchiñu ra íkan ra ―káchi ra xiꞌin nda.
28Saa ndi̱kuiin ra Pedro káꞌan ra:
―Tata, ndeꞌe ta si̱ndoo ndiꞌi nde ñaꞌa ya kúu mií nde, ta xa̱a nde ndi̱kundikun nde yóꞌo̱ ―káchi ra.
29Ñaa ndi̱kaꞌan Jesús xiꞌin ra, káchi ra saa:
―Ya ndaa káꞌan i xiꞌin ndo, ndiꞌi na síndoo na veꞌe na án kuꞌva na án kuꞌvi na, án iva siꞌí na, án ná síꞌi na, án seꞌe na án ñuꞌú na, xaꞌa ya ndíkun na yeꞌe tin xaꞌa tuꞌun vaꞌa xaꞌa i, 30na yóꞌó ta kuaꞌa ni ka ya vaꞌa niꞌi na ñuu ivi yóꞌó, niꞌi siin na veꞌe na, xiꞌin kuꞌva na, án kuꞌvi na, án siꞌí na, án seꞌe na, án ñuꞌú na. Vani tixuꞌvi ni na ikan naꞌa, tá ná kuvi na ta vaꞌa ni kee na koo na xiꞌin Ndioxi. 31Sundi kuaꞌa ni na ínuu vitin nduu na ndíkun, ta kuaꞌa ni na ndíkun, nduu na ínuu ―káchi Jesús.
Káꞌan tuku Jesús ya kuvi ra
(Mt. 20:17-19; Lc. 18:31-34)
32Ke̱e Jesús kuaꞌan ra xiꞌin nda ítaꞌan xiꞌin ra ichí ya kuaꞌan ñuu Jerusalén, saa ínuu ra nuu kuaꞌan ra, ta iin ndi̱kanda ini naꞌa kuaꞌan na xiꞌin ra, ta íꞌvi ka vi na kuaꞌan na. Saa ta̱va siin ra uxi uvi saa nda ítaꞌan xiꞌin ra, káꞌan ra xiꞌin nda unkua kundoꞌo ra kúvi ra, káchi ra saa:
33―Xíto mií ndo vitin kuandaa yo kuaꞌan yo ñuu Jerusalén, ta ikán ku nuu ndixiko na yeꞌe ra kúu Taa ra xa̱a ñuu ivi yóꞌó ndaꞌa na naꞌnu nuu sutu xiꞌin nda maestro nda sínaꞌa ley ya ta̱a ra Moisés. Saa taxi na kuachi xaꞌa i ndaꞌa na köo kúu Israel ya kaꞌni na yeꞌe. 34Kuaku ndaa na yeꞌe, saa kani ni na yeꞌe xiꞌin ñii ya ñúꞌu kàà nuu, saa koꞌni ndaa na sii nuu i, ñaa kaꞌni na yeꞌe, sundi sindiꞌi tixin kivi uni nditaku i ―káchi ra xiꞌin nda.
Ndúku ra Jacobo xiꞌin ra Juan ya mani nuu Jesús
(Mt. 20:20-28)
35Iin ichí ndi̱xaa ra Jacobo xiꞌin ra Juan ñani ra, nda seꞌe ra Zebedeo, ndi̱xaa nda nuu Jesús káꞌan nda xiꞌin ra, káchi nda saa:
―Tata Maestro, ndeꞌe ta kúni nde ikan un ya vaꞌa xiꞌin nde, taxi un ya ndúku nde nuu un ndaꞌa nde ―káchi nda xiꞌin ra.
36Saa ndi̱kuiin ra káꞌan ra xiꞌin nda:
―¿Unkua kúni ndo ikan i xiꞌin ndo? ―káchi ra xiꞌin nda.
37Saa ndi̱kuiin nda káꞌan nda:
―Ikan un ya vaꞌa xiꞌin nde, taxi un ná koo nde xiꞌin un nuu koo un kaꞌnda chiñu un nuu ndivi, iin nde ná koo ñaꞌñu kuáꞌá un, ta iin nde ná koo ñaꞌñu ítín un ―káchi nda xiꞌin ra.
38Saa ndi̱kuiin ra, káꞌan ra xiꞌin nda:
―Ni köo xíni ndo unkua ndúku ndo nuu i. ¿Án kíꞌin ndo kuenta kundee ndo ndoꞌo ndo tá kuꞌva ndoꞌo i? ―káchi ra xiꞌin nda.
39Saa ndi̱kuiin nda káꞌan nda:
―Kuchiñu va nde ―káchi nda.
Saa ndi̱kaꞌan ra xiꞌin nda, káchi ra saa:
―Ya ndaa kua ndoꞌo ni ndo tá kuꞌva ndoꞌo i, 40sundi ya koo ndo xiꞌin i ñaꞌñu kuáꞌá i xiꞌin ñaꞌñu ítín i, ta süvi ndaꞌa yeꞌe íyo ichí ya taxi i ya ndaꞌa ndo, mií Iva i Ndioxi ku ra xíni unku na chi̱tuni ra koo yati xiꞌin i ―káchi ra xiꞌin nda.
41Saa tá xi̱ni soꞌo inka uxi nda ikán, ya ndi̱kaꞌan ra Jacobo xiꞌin ra Juan xiꞌin ra, ñaa ndi̱saa ni nda xiꞌin nda. 42Saa ka̱na Jesús uxi uvi saa nda, ta ndi̱kaꞌan ra xiꞌin nda, káchi ra saa:
―Xíni mií ndo na chiñu, na köo xíni Ndioxi, ta ndee ni ndee xáꞌnda na chiñu nuu naꞌa saa chi ndaꞌa mií na íyo ichí, yakan íkan na saa. 43Sundi tañu ndóꞌo̱ ta süvi saa koo ya, tá kúu na kúni xaa chee xiꞌin mií, ta xíniñuꞌu na koo ndúvi na ya chindee taꞌan na xiꞌin inka na. 44Tá ndá ndóꞌo̱ kúni ndo kuu ndo iin ra ínuu, ta xíniñuꞌu ndo nduu ndo tá íin na xáa chiñu xiꞌin ya nduxa nuu ndiꞌi na. 45Saa chi yeꞌe, ra kúu Taa xa̱a ñuu ivi yóꞌó, ta xa̱a i ya xaa vií i xiꞌin naꞌa. Ta süvi xaꞌa ya xaa vií na xiꞌin i kua xa̱a i, sundi yeꞌe, ta xa̱a i ya taxi i mií i kuvi i xaꞌa kuaꞌa ni naꞌa kua ―káchi ra xiꞌin nda.
Síndaꞌa Jesús iin ra kuáa̱ ra náni Bartimeo
(Mt. 20:29-34; Lc. 18:35-43)
46Saa ndi̱xaa nda ñuu Jericó. Ñaa tá xa kétá Jesús ñuu ikán kuaꞌan ra xiꞌin nda ítaꞌan xiꞌin ra, saa kuaꞌan iin tiꞌvi chee naꞌa xiꞌin ra. Tá ka̱na koo na ñuu ikán kuaꞌan na, ta ndi̱taꞌan na iin ra kuáa̱ índuꞌu ra yuꞌu ichí ndákan ra ta náni ra Bartimeo seꞌe ra Timeo ku ra. 47Ñaa tá xi̱ni soꞌo ra yáꞌa Jesús ra ke̱e ñuu Nazaret kuaꞌan ra, saa xa̱á ra kána koꞌo ra, káchi ra saa:
―¡Jesús, seꞌe ra David, kundaꞌvi ini un kuni un yeꞌe, ndaꞌvi ni i! ―káchi ra.
48Saa ndáꞌi sava na xiꞌin ra ya ná kutaxin yuꞌu ra, ta ndíkundee ra ndáꞌi vaꞌa ka ra, káchi ra saa:
―¡Seꞌe ra David, kundaꞌvi ini un kuni un yeꞌe, ndaꞌvi ni i! ―káchi ra.
49Saa ndi̱kundichi Jesús, ta ndi̱kaꞌan ra xiꞌin na ya ná kuꞌun na kana na ra.
Ñaa ndi̱xaꞌan na ka̱na ñaꞌa na, káchi na saa:
―Ndikiꞌin ini un, kundichi koꞌo yo, chi kána Jesús yóꞌo̱ ―káchi na xiꞌin ra.
50Ñaa ki̱ꞌin ra chilo ra si̱kana ra, ta ndi̱kundichi ra ndi̱xaa ra nuu Jesús. 51Tá ndi̱xaa ra, saa ndi̱kaꞌan Jesús xiꞌin ra, káchi ra saa:
―¿Unkua kúni un ikan i xiꞌin un? ―káchi ra xiꞌin ra.
Saa ndi̱kuiin ra káꞌan ra:
―Nuu va i kua kúni ná kuna, Tata ―káchi ra.
52Saa ndi̱kuiin Jesús káꞌan ra:
―Vaꞌa kuánuꞌu, xa ndu̱vaꞌa nduchi nuu un, chi kándixa un yeꞌe ―káchi Jesús xiꞌin ra.
Tá ndi̱kaꞌan soꞌva ra xiꞌin ra, ta saa ndikun ndu̱vaꞌa nuu ra, ñaa ndi̱kundikun ra kuaꞌan ra xiꞌin Jesús.
Currently Selected:
San Marcos 10: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
