मर्कुस 5
5
लानइ ङाःयो मान्ताकाय येसुइ स्याक्ताक्सास्यावो
(मति ८:२८-३४; लुका ८:२६-३९)
1येसु र ओउको चेलालम दोङगाहाङ लह्न्ति गालिल समुन्द्रको पारि गेरासेनसलम याको छेत्रहाङ दाहाकाय। 2येसु दोङगासय बाहिर ग्ल्युह्ङ्तोक बेलाहाङ, यातचाक दुस्त ग्वालामइ ङाःयो मान्ता तेसराङसय येसुकाय क्रुस्लाङ वाङा। 3ओउ मान्ताखे तेसराङको ल्युमपुकलमगन याक्तो, र ओउकाय सुइमा अधिनहाङ गम्सा खायाक्निलि र साङ्लाइ पाःन्ति समेत गम्सा खायाक्निलि। 4ओउको दोम-क्रुतहाङ नाःतो पल्तले फालामको साङ्लाइ पाःन्ति गमो खेतो, तर लयको दोम-क्रुतहाङ पाःनो साङ्लाकाय ओउइ तेत्ति वायुतो। ओउ आन जोक्तो बल्यो स्यावोझ्यान्ते ओउकाय सुइमा अधिनहाङ गम्सा खायाक्निलि। 5ओउ मान्ता लयइ लयकायले बाङइ आप्सतो, र दिन-याह्दिङ सधय तेसराङ र वार तोम्ति हिह्ति र्याधय वाह्तो।
6येसु मइतोकाय लोक्तोले मुतोकहाङ ओउइ येसुकाय च्यवाकान, अनि ओउ तन्ति आल्ति येसुको दोमहाङ खुःङा, 7अनि ताह्ङो हाउनयहाङ एतदाह्य्ति बिन्ति जाह्ङाकान, “अ येसु, जुदासय ताह्ङो प्रभु परमेस्वरको चोः, नाङको ङाकुस दोह काम र? ङाइ नाङकाय परमेस्वरको मय्ङहाङ सेवनेनाङ, ङाकाय दन्द बइजेलाम!” 8ओउ मान्ताइ एतदाह्य्ति तोओखे येसुइ ङ्हाखाले दुस्त ग्वालामकाय “अ दुस्त ग्वालाम, नाङ इ मान्ताकसय बाहिर ग्ल्युह्ङ्ति वाङ” त दाह्य्ति तोसास्यावोझ्यान्ते खेतो।
9ओहाङसयको येसुइ ओउकाय ह्वत्सास्यावा, “नाङको मय्ङ दोह?”
ओउ त्याङा, “ङाको मय्ङ ‘फउज’ खेना, धइतिदाह्य्सा इ मान्ताभित्र नि नाःतो मुनाङ्सु।” 10दुस्त ग्वालामलमकाय ओउ छेत्रसय बाहिर रुःन्ति ल्होक्जेलाम त दाह्य्ति ओउ मान्ताइ येसुकाय बिन्ति जाह्ङ्तिले मुआ।
11ओहाङ द्याङ्तो दान्दाको ध्यापहाङ नाःतो प्याकको बथानलम ह्राम्तिमुओ खेइतो। 12ओहाङसयको ओउ दुस्त ग्वालामलमइ “निकाय ओउ प्याकलमकहाङ आल्ति ओउमयकहाङ पोक्सा बइसास्याउपाना” त दाह्य्ति येसुकाय बिन्ति जाह्ङाकानि। 13ओउतझ्यान्ते येसुइ ओउमयकाय अनुमति बइसास्यावा, अनि ओउ दुस्त ग्वालामलम मान्ताकसय ग्ल्युह्ङाक्तिको प्याकलमकहाङ पोक्लाङ आलाकाय। अनि लगभग निस हजारच्युक प्याकलमको ओउ बथान वारसय स्युह्र्ति आल्ति दुह्मान तिःहाङ ज्युप्ति सिआकाय।
14एत स्यावो च्यउति ओउ प्याक ह्राःमो मान्तालम तन्ति पाह्याकाय र ओउ कुरा गेरासेनस सहरको वरिपरिको गाउ-सहरको मान्तालमकाय ल्हाक्ति छ्यानाकानि। अनि मान्तालम ओहाङ स्यावो कुराकाय योलाङ वाङाकाय। 15अनि जब ओउमय येसुकहाङ दाहाकाय, ओउमयइ ओउ लानलमइ ङाःयो मान्ताकाय च्यवाकानि। ओउ मान्ता पेतो स्याकाक्तिको नाय लावति च्युःङ्तिमुओ च्यउति ओउमय माहा जोक्तो रयाकाय। 16ओउ लानलमइ ङाःयो मान्ताकाय येसुइ गतहाइति स्याक्ताक्सास्यावा र प्याकलमकाय दोह स्यावा त दाह्यो कुरा लयको मिकइ च्यवो मान्तालमइ, लोन्हे गाउ-सहरसय वाङो अरु मान्तालमकाय जुदा कुरा ल्हाक्ति छ्यानाकानि। 17ओहाङसयको ओउ गेरासेनसको मान्तालमइ येसुकाय लयमयको थाउसय पाह्य्सास्याउपाना त दाह्य्ति बिन्ति जाह्ङाकानि।
18येसु दोङगाहाङ लह्न्ति पाह्य्साले लागओ बेलाहाङ, ओउ लानइ ङाःयोसय स्याको मान्ताइ “ङाकायमा नाङकुस वाङ्सा बइसास्याउपाना” त दाह्य्ति येसुकाय बिन्ति जाह्ङाथय।
19तर येसुइ ओउ मान्ताकाय लयकुस वाङ्सा अनुमति बइसास्याउल। बरु येसुइ ओउकाय “नाङ लयको किमताङ पाह्य्ति प्रभुइ नाङको लागि जाह्ङ्ति बइसास्यावो महान् काम र नाङको लागि छ्यान्सास्यावो योःन्मयको बारेहाङ नाङको माचरलमकाय तोति बयु” त दाह्य्ति तोसास्यावा।
20ओउतझ्यान्ते ओउ मान्ता ओहाङसय पाह्या, र ओउ देकापोलिस#५:२० देकापोलिस देकापोलिस त तोओखे यातज्यो छेत्र खेना, र ओउको मानेखे दस गोता सहरलम स्याउना। ओउ सहरलमखे गालिल समुन्द्र र यर्दन खोलाको दाहन्यामसयको छेत्रहाङ परना। केहि यहुदिलम ओउ छेत्रहाङ याकितो, तर बिसेस जाह्ङ्ति यहुदि खेमालो अरु जातिको नाःतो मान्तालमखे ओहाङ याकितो। त तोओ छेत्रहाङ आलाक्तिको येसुइ लयको लागि जाह्ङ्सास्यावो कामको बारेहाङ ल्हाक्ति छ्यानाकान। अनि इ कुरा सायो जुदाले माहा जोक्तो ग्याह्ङाकाय।
येसुइ याइरसको चोःद्याङ र अर्को बिरामि मोम्चोकाय स्याक्ताक्सास्यावो
(मति ९:१८-२६; लुका ८:४०-५६)
21येसु फेरि दोङगाहाङ लह्न्ति गालिल समुन्द्रको वारिताङ द्याह्न्सास्यावा। येसु समुन्द्रको किनारहाङ दाह्सास्यावापछि येसुको वरिपरि नाःतो मान्तालमको हुल हुमाकाय। 22ओहाङको रइथाने सभाकिमको हाकिमि याइरस ओहाङ दाह्तिवाङा, र येसुकाय च्यउनातासले ओउ येसुको दोमहाङ खुङा, 23र एतदाह्य्ति बिन्ति जाह्ङ्सा फाःङाकान, “ङाको मयो चोःद्याङ माहा जोक्तो बिरामि स्याउति सिसाले लागओ मुना, यदि हजुर वाङ्ति ओउकहाङ क्रुत झाम्ति बइसास्याउना त खेयापाय ओउ दोङ्सिले स्याक्लेचा खेतो।” 24ओहाङसयको येसु ओउकुस आल्सास्यावा।
मान्तालमको हुल येसुको वरिपरिसय न्हेङ्काइतोसम्म येसुको लोन्हे गुह्ल्ति आलाकाय। 25अनि ओउ मान्तालमको हुलहाङ बाह्र बर्सहाङसय वुइ होओ बेथाइ दुख च्यवो यातचाक मोम्चोमा खेतो। 26ओउ मोम्चो नाःतो बइदाङ्गिलमकहाङ आल्ति उपचार जाह्ङाकास, र लयकुस नाःओ थेपोमा ओखति जेःति द्योकाकान, तर स्याक्साको होन्त बिरामिको हालत झन् पेमातो स्यावो खेतो। 27येसुइ जाह्ङ्सास्यावो कामलमको बारेहाङ ओउ मोम्चोइ ङ्हाखाले सायो खेतो, ओउतझ्यान्ते ओउ मान्तालमको हुलको माझहाङ पोका र येसुको लोन्हेसय आलाक्तिको येसुको लावनायकाय धिनाकान। 28धइतिदाह्य्सा “यदि ङाइ येसुको लावनाय धिन्सा मात्र खाइनाङ त खेयाकायमा, ङाखे लयको रोगसय स्याक्लेनाङ” त दाह्य्ति ओउ मोम्चोइ लयको मनहाङ म्हरो खेतो।
29ओउ मोम्चोइ येसुको लावनाय धिन्नातासले ओउको वुइ थपका, र ओउतताह्ङो माहा दुख च्यवो रोगसय लय स्याको कुरा ओउ मोम्चोइ चिःआकान। 30अनि ओउच्युक खेरले लयकसय स्याक्ताको जिःङ ग्ल्युह्ङ्ति आलो कुरा येसुइ चिःसास्यावा। ओहाङसयको मान्तालमको हुलकताङ द्याह्न्ति येसुइ ह्वत्सास्यावा, “सुइ ङाको नाय धिनाकान?”
31चेलालमइ येसुकाय तोआथय, “नाङइ च्यउसास्यावोले मुना, नाङको वेःताङ-ङोइताङ न्हेङ्काइतोसम्म मान्तालमको हुल मुनय, अनि ‘ङाकाय सुइ धिनाताङ’ त दाह्य्ति नाङइ गतहाइति ह्वत्सा खाइसास्याउना?”
32तर ङाकाय सुखेइ धिनाताङ त दाह्य्ति येसुइ लयको वरिपरि योसास्यावा। 33तर ओउ मोम्चोइ लयकाय दोह स्यावा त दाह्यो कुरा चिःआकान। ओउतझ्यान्ते ओउ माहा जोक्तो रया र ङ्हा वाङाक्तिको येसुको दोमहाङ खुःङ्ति येसुको नायकाय धिन्नातासले लय गतहाइति स्याकालाङ त दाह्यो जुदा सत्य कुरा ल्हाक्ति छ्यानाकान। 34अनि येसुइ ओउ मोम्चोकाय तोसास्यावा, “ङाको चोःद्याङ, नाङको बिस्वासइ नाङकाय स्याक्ताको मुना। द्याह ल्हुङ धोमाइति पाह्य, धइतिदाह्य्सा नाङको दुख-कस्त द्योक्तिभ्याओ मुना।”
35येसुइ एतदाह्य्ति तोसास्याउधय मुतोकहाङ सभाकिमको हाकिमि याइरसको किमसय खबर लात्ति वाङो केहि मान्तालमइ याइरसकाय तोआथय, “नाङको चोःद्याङ सितिखाया, ओउतझ्यान्ते द्याह गुरुकाय दुख बइमालोले पेतो स्याउना खेचा।”
36तर ओउमयइ तोओ कुराकाय दोह वास्तामा जाह्ङ्मात येसुइ सभाकिमको हाकिमि याइरसकाय तोसास्यावा, “रइलाम, बिस्वास मात्र जाह्ङु।” 37अनि येसुइ पत्रुस, याकुब र ओउको हउ युहन्नाकाय बाहेक सुकायमा लयकुस आल्सा अनुमति बइसास्याउल। 38ओउमय सभाकिमको हाकिमि याइरसको किमहाङ दाहाकाय, अनि ओहाङ मान्तालम सोक जाह्ङ्धय हिह्ति र्यातिमुओ येसुइ च्यउसास्यावा। 39अनि येसु किमभित्र पोक्ति ओउमयकाय तोसास्यावा, “निङ धइति सोक जाह्ङ्धय हिह्ति र्याति मुतेनय? बालाख नानि सिओ नाःल, ओउपाय एःनो मात्र खेना।”
40एतताह्ङो कुरा साइति ओउमयइ येसुकाय निःति थ्याउसा फाःङाकानि, ओउतझ्यान्ते येसुइ ओउमय जुदाकाय बाहिरताङ रुःन्ति ल्होक्सास्यावा। ओहाङसयको येसु बालाख नानिको आपा-आमा र लयको सुम जना चेलालमकाय लाताक्तिको बालाख नानि मुओ कोथाहाङ पोक्सास्यावा। 41अनि येसुइ ओउ बालाख नानिको क्रुत चुम्ति ओउमयको लयको भासाहाङ#५:४१ ओउमयको लयको भासा येसुको पालाहाङ, गालिलि छेत्रको मान्तालम आर्मेइक भासाहाङ नोःइतो। ओउतझ्यान्ते येसुइ ओउ मयो बालाख नानिकाय लयको भासाहाङ तोओ खेना। “तालिथा, कुम” त दाह्य्ति तोसास्यावा। ओउको मानेखे “मयो बालाख नानि, च्योक।” त तोओ खेना।
42ओउत तोनातासले बालाख नानि चिङा। बालाख नानि बाह्र बर्सको खेओझ्यान्ते ओउइ इताङ-उताङ वाह्सा फाःङाकान। ओउतहाइति ओउ सिओ बालाख नानि स्याको च्यउति ओहाङ मुओ मान्तालम माहा जोक्तो ग्याह्ङाकाय। 43तर येसुइ ओउमयकाय इ कुरा सुकायमा तोलाम त दाह्य्ति जोक्तो दर्कति आग्या जाह्ङ्सास्यावा, र ओउ बालाख नानिकाय केहि जेःगा जेःसा बइनु त दाह्य्ति तोसास्यावा।
Currently Selected:
मर्कुस 5: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
मर्कुस 5
5
लानइ ङाःयो मान्ताकाय येसुइ स्याक्ताक्सास्यावो
(मति ८:२८-३४; लुका ८:२६-३९)
1येसु र ओउको चेलालम दोङगाहाङ लह्न्ति गालिल समुन्द्रको पारि गेरासेनसलम याको छेत्रहाङ दाहाकाय। 2येसु दोङगासय बाहिर ग्ल्युह्ङ्तोक बेलाहाङ, यातचाक दुस्त ग्वालामइ ङाःयो मान्ता तेसराङसय येसुकाय क्रुस्लाङ वाङा। 3ओउ मान्ताखे तेसराङको ल्युमपुकलमगन याक्तो, र ओउकाय सुइमा अधिनहाङ गम्सा खायाक्निलि र साङ्लाइ पाःन्ति समेत गम्सा खायाक्निलि। 4ओउको दोम-क्रुतहाङ नाःतो पल्तले फालामको साङ्लाइ पाःन्ति गमो खेतो, तर लयको दोम-क्रुतहाङ पाःनो साङ्लाकाय ओउइ तेत्ति वायुतो। ओउ आन जोक्तो बल्यो स्यावोझ्यान्ते ओउकाय सुइमा अधिनहाङ गम्सा खायाक्निलि। 5ओउ मान्ता लयइ लयकायले बाङइ आप्सतो, र दिन-याह्दिङ सधय तेसराङ र वार तोम्ति हिह्ति र्याधय वाह्तो।
6येसु मइतोकाय लोक्तोले मुतोकहाङ ओउइ येसुकाय च्यवाकान, अनि ओउ तन्ति आल्ति येसुको दोमहाङ खुःङा, 7अनि ताह्ङो हाउनयहाङ एतदाह्य्ति बिन्ति जाह्ङाकान, “अ येसु, जुदासय ताह्ङो प्रभु परमेस्वरको चोः, नाङको ङाकुस दोह काम र? ङाइ नाङकाय परमेस्वरको मय्ङहाङ सेवनेनाङ, ङाकाय दन्द बइजेलाम!” 8ओउ मान्ताइ एतदाह्य्ति तोओखे येसुइ ङ्हाखाले दुस्त ग्वालामकाय “अ दुस्त ग्वालाम, नाङ इ मान्ताकसय बाहिर ग्ल्युह्ङ्ति वाङ” त दाह्य्ति तोसास्यावोझ्यान्ते खेतो।
9ओहाङसयको येसुइ ओउकाय ह्वत्सास्यावा, “नाङको मय्ङ दोह?”
ओउ त्याङा, “ङाको मय्ङ ‘फउज’ खेना, धइतिदाह्य्सा इ मान्ताभित्र नि नाःतो मुनाङ्सु।” 10दुस्त ग्वालामलमकाय ओउ छेत्रसय बाहिर रुःन्ति ल्होक्जेलाम त दाह्य्ति ओउ मान्ताइ येसुकाय बिन्ति जाह्ङ्तिले मुआ।
11ओहाङ द्याङ्तो दान्दाको ध्यापहाङ नाःतो प्याकको बथानलम ह्राम्तिमुओ खेइतो। 12ओहाङसयको ओउ दुस्त ग्वालामलमइ “निकाय ओउ प्याकलमकहाङ आल्ति ओउमयकहाङ पोक्सा बइसास्याउपाना” त दाह्य्ति येसुकाय बिन्ति जाह्ङाकानि। 13ओउतझ्यान्ते येसुइ ओउमयकाय अनुमति बइसास्यावा, अनि ओउ दुस्त ग्वालामलम मान्ताकसय ग्ल्युह्ङाक्तिको प्याकलमकहाङ पोक्लाङ आलाकाय। अनि लगभग निस हजारच्युक प्याकलमको ओउ बथान वारसय स्युह्र्ति आल्ति दुह्मान तिःहाङ ज्युप्ति सिआकाय।
14एत स्यावो च्यउति ओउ प्याक ह्राःमो मान्तालम तन्ति पाह्याकाय र ओउ कुरा गेरासेनस सहरको वरिपरिको गाउ-सहरको मान्तालमकाय ल्हाक्ति छ्यानाकानि। अनि मान्तालम ओहाङ स्यावो कुराकाय योलाङ वाङाकाय। 15अनि जब ओउमय येसुकहाङ दाहाकाय, ओउमयइ ओउ लानलमइ ङाःयो मान्ताकाय च्यवाकानि। ओउ मान्ता पेतो स्याकाक्तिको नाय लावति च्युःङ्तिमुओ च्यउति ओउमय माहा जोक्तो रयाकाय। 16ओउ लानलमइ ङाःयो मान्ताकाय येसुइ गतहाइति स्याक्ताक्सास्यावा र प्याकलमकाय दोह स्यावा त दाह्यो कुरा लयको मिकइ च्यवो मान्तालमइ, लोन्हे गाउ-सहरसय वाङो अरु मान्तालमकाय जुदा कुरा ल्हाक्ति छ्यानाकानि। 17ओहाङसयको ओउ गेरासेनसको मान्तालमइ येसुकाय लयमयको थाउसय पाह्य्सास्याउपाना त दाह्य्ति बिन्ति जाह्ङाकानि।
18येसु दोङगाहाङ लह्न्ति पाह्य्साले लागओ बेलाहाङ, ओउ लानइ ङाःयोसय स्याको मान्ताइ “ङाकायमा नाङकुस वाङ्सा बइसास्याउपाना” त दाह्य्ति येसुकाय बिन्ति जाह्ङाथय।
19तर येसुइ ओउ मान्ताकाय लयकुस वाङ्सा अनुमति बइसास्याउल। बरु येसुइ ओउकाय “नाङ लयको किमताङ पाह्य्ति प्रभुइ नाङको लागि जाह्ङ्ति बइसास्यावो महान् काम र नाङको लागि छ्यान्सास्यावो योःन्मयको बारेहाङ नाङको माचरलमकाय तोति बयु” त दाह्य्ति तोसास्यावा।
20ओउतझ्यान्ते ओउ मान्ता ओहाङसय पाह्या, र ओउ देकापोलिस#५:२० देकापोलिस देकापोलिस त तोओखे यातज्यो छेत्र खेना, र ओउको मानेखे दस गोता सहरलम स्याउना। ओउ सहरलमखे गालिल समुन्द्र र यर्दन खोलाको दाहन्यामसयको छेत्रहाङ परना। केहि यहुदिलम ओउ छेत्रहाङ याकितो, तर बिसेस जाह्ङ्ति यहुदि खेमालो अरु जातिको नाःतो मान्तालमखे ओहाङ याकितो। त तोओ छेत्रहाङ आलाक्तिको येसुइ लयको लागि जाह्ङ्सास्यावो कामको बारेहाङ ल्हाक्ति छ्यानाकान। अनि इ कुरा सायो जुदाले माहा जोक्तो ग्याह्ङाकाय।
येसुइ याइरसको चोःद्याङ र अर्को बिरामि मोम्चोकाय स्याक्ताक्सास्यावो
(मति ९:१८-२६; लुका ८:४०-५६)
21येसु फेरि दोङगाहाङ लह्न्ति गालिल समुन्द्रको वारिताङ द्याह्न्सास्यावा। येसु समुन्द्रको किनारहाङ दाह्सास्यावापछि येसुको वरिपरि नाःतो मान्तालमको हुल हुमाकाय। 22ओहाङको रइथाने सभाकिमको हाकिमि याइरस ओहाङ दाह्तिवाङा, र येसुकाय च्यउनातासले ओउ येसुको दोमहाङ खुङा, 23र एतदाह्य्ति बिन्ति जाह्ङ्सा फाःङाकान, “ङाको मयो चोःद्याङ माहा जोक्तो बिरामि स्याउति सिसाले लागओ मुना, यदि हजुर वाङ्ति ओउकहाङ क्रुत झाम्ति बइसास्याउना त खेयापाय ओउ दोङ्सिले स्याक्लेचा खेतो।” 24ओहाङसयको येसु ओउकुस आल्सास्यावा।
मान्तालमको हुल येसुको वरिपरिसय न्हेङ्काइतोसम्म येसुको लोन्हे गुह्ल्ति आलाकाय। 25अनि ओउ मान्तालमको हुलहाङ बाह्र बर्सहाङसय वुइ होओ बेथाइ दुख च्यवो यातचाक मोम्चोमा खेतो। 26ओउ मोम्चो नाःतो बइदाङ्गिलमकहाङ आल्ति उपचार जाह्ङाकास, र लयकुस नाःओ थेपोमा ओखति जेःति द्योकाकान, तर स्याक्साको होन्त बिरामिको हालत झन् पेमातो स्यावो खेतो। 27येसुइ जाह्ङ्सास्यावो कामलमको बारेहाङ ओउ मोम्चोइ ङ्हाखाले सायो खेतो, ओउतझ्यान्ते ओउ मान्तालमको हुलको माझहाङ पोका र येसुको लोन्हेसय आलाक्तिको येसुको लावनायकाय धिनाकान। 28धइतिदाह्य्सा “यदि ङाइ येसुको लावनाय धिन्सा मात्र खाइनाङ त खेयाकायमा, ङाखे लयको रोगसय स्याक्लेनाङ” त दाह्य्ति ओउ मोम्चोइ लयको मनहाङ म्हरो खेतो।
29ओउ मोम्चोइ येसुको लावनाय धिन्नातासले ओउको वुइ थपका, र ओउतताह्ङो माहा दुख च्यवो रोगसय लय स्याको कुरा ओउ मोम्चोइ चिःआकान। 30अनि ओउच्युक खेरले लयकसय स्याक्ताको जिःङ ग्ल्युह्ङ्ति आलो कुरा येसुइ चिःसास्यावा। ओहाङसयको मान्तालमको हुलकताङ द्याह्न्ति येसुइ ह्वत्सास्यावा, “सुइ ङाको नाय धिनाकान?”
31चेलालमइ येसुकाय तोआथय, “नाङइ च्यउसास्यावोले मुना, नाङको वेःताङ-ङोइताङ न्हेङ्काइतोसम्म मान्तालमको हुल मुनय, अनि ‘ङाकाय सुइ धिनाताङ’ त दाह्य्ति नाङइ गतहाइति ह्वत्सा खाइसास्याउना?”
32तर ङाकाय सुखेइ धिनाताङ त दाह्य्ति येसुइ लयको वरिपरि योसास्यावा। 33तर ओउ मोम्चोइ लयकाय दोह स्यावा त दाह्यो कुरा चिःआकान। ओउतझ्यान्ते ओउ माहा जोक्तो रया र ङ्हा वाङाक्तिको येसुको दोमहाङ खुःङ्ति येसुको नायकाय धिन्नातासले लय गतहाइति स्याकालाङ त दाह्यो जुदा सत्य कुरा ल्हाक्ति छ्यानाकान। 34अनि येसुइ ओउ मोम्चोकाय तोसास्यावा, “ङाको चोःद्याङ, नाङको बिस्वासइ नाङकाय स्याक्ताको मुना। द्याह ल्हुङ धोमाइति पाह्य, धइतिदाह्य्सा नाङको दुख-कस्त द्योक्तिभ्याओ मुना।”
35येसुइ एतदाह्य्ति तोसास्याउधय मुतोकहाङ सभाकिमको हाकिमि याइरसको किमसय खबर लात्ति वाङो केहि मान्तालमइ याइरसकाय तोआथय, “नाङको चोःद्याङ सितिखाया, ओउतझ्यान्ते द्याह गुरुकाय दुख बइमालोले पेतो स्याउना खेचा।”
36तर ओउमयइ तोओ कुराकाय दोह वास्तामा जाह्ङ्मात येसुइ सभाकिमको हाकिमि याइरसकाय तोसास्यावा, “रइलाम, बिस्वास मात्र जाह्ङु।” 37अनि येसुइ पत्रुस, याकुब र ओउको हउ युहन्नाकाय बाहेक सुकायमा लयकुस आल्सा अनुमति बइसास्याउल। 38ओउमय सभाकिमको हाकिमि याइरसको किमहाङ दाहाकाय, अनि ओहाङ मान्तालम सोक जाह्ङ्धय हिह्ति र्यातिमुओ येसुइ च्यउसास्यावा। 39अनि येसु किमभित्र पोक्ति ओउमयकाय तोसास्यावा, “निङ धइति सोक जाह्ङ्धय हिह्ति र्याति मुतेनय? बालाख नानि सिओ नाःल, ओउपाय एःनो मात्र खेना।”
40एतताह्ङो कुरा साइति ओउमयइ येसुकाय निःति थ्याउसा फाःङाकानि, ओउतझ्यान्ते येसुइ ओउमय जुदाकाय बाहिरताङ रुःन्ति ल्होक्सास्यावा। ओहाङसयको येसु बालाख नानिको आपा-आमा र लयको सुम जना चेलालमकाय लाताक्तिको बालाख नानि मुओ कोथाहाङ पोक्सास्यावा। 41अनि येसुइ ओउ बालाख नानिको क्रुत चुम्ति ओउमयको लयको भासाहाङ#५:४१ ओउमयको लयको भासा येसुको पालाहाङ, गालिलि छेत्रको मान्तालम आर्मेइक भासाहाङ नोःइतो। ओउतझ्यान्ते येसुइ ओउ मयो बालाख नानिकाय लयको भासाहाङ तोओ खेना। “तालिथा, कुम” त दाह्य्ति तोसास्यावा। ओउको मानेखे “मयो बालाख नानि, च्योक।” त तोओ खेना।
42ओउत तोनातासले बालाख नानि चिङा। बालाख नानि बाह्र बर्सको खेओझ्यान्ते ओउइ इताङ-उताङ वाह्सा फाःङाकान। ओउतहाइति ओउ सिओ बालाख नानि स्याको च्यउति ओहाङ मुओ मान्तालम माहा जोक्तो ग्याह्ङाकाय। 43तर येसुइ ओउमयकाय इ कुरा सुकायमा तोलाम त दाह्य्ति जोक्तो दर्कति आग्या जाह्ङ्सास्यावा, र ओउ बालाख नानिकाय केहि जेःगा जेःसा बइनु त दाह्य्ति तोसास्यावा।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.