Johannes 1
1
ONTOPORUA 1.
Jesus a za ku Karunga, he Karunga.
1Poshimbi opua ri Ohapu, hOhapu oha ri pu Karunga, he Karunga ohe a ri Ohapu.#1:1 Poshimbi opua ri: nokutja petshito rjuujuni Ohapu oha ri, ho ho inahi tshitua. Ohapu ndjika, Ohapu kahi shi ohapu houara mokana kuaantu, aaue, oJesus Kristus tuu. Edina ndika Ohapu orja kucua merongo rjonare rjaakreki, tari ti: Uunongo uunene.
2Ndjika oha ri poshimbi pu Karunga.
3Ajishe oja tshitua ku ho, po kapu na tsha tsha tshitirue, shi inatshi tshitua ku he.
4Mu he omua ri mu nomuenjo, go omuenjo ogua ri uujerere uaantu.
5Uujerere mbu hau jerere mo meemurema, ndere eemurema inadi u kuata.
6Tapu ja omuntu, a hundurua ku Karunga, edina rje Johannes.
7Nguka okua ri e ja okuokorora, a hokorore uujerere, opo ajeshe ji iteericue ku he.
8Ka he a ri uujerere, okua ri ike omuokorori guujerere.
9Uujerere uotshiri, mbu tau minikire omuntu keshe, ngu te ja muujuni.
10Omuujuni a ri, uo uujuni ohe e u tshita, ndere uujuni inau mu dimburura.
11Okui ire maandje, nde mbo jaandje inaa mu tuumba.
12Ndere ajeshe, mba je mu tuumba, okue ka pe eenkondo, ja ningi aanona ja Karunga, nokutja ombeja, mba taj’iteere medina rje.
13Mb’inaa za mombinzi no meharo rjonjama no meharo rjomurumentu, ndere oja varua mu Karunga.#1:13 Mba ja varururua momeja no mOmbepo mOdjapuki mesakramente rjetshatsho.
14Ho Ohapu oha ninga omuntu, ho ha kara mokati ketu; ss’otua mona ehadimo rje, ehadimo rjOnakuvaru’oh’ike gua She, a huda oshenda notshiri.
15Johannes okue mu okorora, sho ti igida ta ti: Ohe ngu nde mu tire: Ngu ta randura ndje, okua ri komesho gandje, oshoka okua ri ko, manka ngaje nda ri kandi po.
16Merooro rje otua peua mo atushe oshenda noshenda.
17Oshoka ku Moses ompango oha gandjua, ndere ku Kristus Jesus oshenda notshiri oje tu etua po.
18Kakuna ngu a mona Karunga, nandoodiro. Onakuvaru’oh’ike, ngu e ri mekoro rja She, okue mu orora.
Ehokororo rja Johannes.
19Ehokororo rja Johannes orjo tuu ndika: Aajuda jo mu Jerusalem sho ju unzire ku he aapristeri naaleviti je mu pure ja tje: Onguee re?
20Nde he te epurura, h’ina patana, ta ti: Ngaje kandi shi Kristus.
21Jo taa mu pura itshee: Onguee re ano? Shira Elias? He ta ti: Aaue, ha ngaje. Onguee nani omuprofeti? Ta jamukura: Aaje.
22Jo taa ti nduno ku he: Onguee re, tu ka fare ejamukuro ku mbeja, mba je tu tumine? Otu itire ngiini nguee muene?
23H’oti i mo ta ti: Ongaje eui rjomuigidi mombuga. Parereni Muene ondjira, ngashi omuprofeti Isaias a tire.
24Aatumua oja zire maafariseji.
25Jo taa mu pura itshee: Otshike nduno to tshatsha, nge ku shi Kristus nenge Elias nenge omuprofeti?
26Johannes te ja jamukura, ta ti: Andi tshatsha nomeja, ndere mokati keni omua cikama gumue, ngu kamu mu tshi.
27Ohe tuu, ngu ta randura ndje, ohe ngu a ri komesho gandje, ngaje inande ereka okuditura nand’omunja guorukaku rue.
28Mbika oja ningirue ku Betania, haandija ha Jordan, hu Johannes a ri ta tshatsha.
29Esiku rja nofu Johannes sho a mono Jesus te ja ku he, okua ti: Tareni Onzigona ha Karunga, ndji tahi kuca po eendjo duujuni.
30Ohe ngoo, ngu kua te rombora, te ti: Otaku ja omuntu, ta randura ndje, ngu a za tango. Okua ri ko, manka nda ri kandi ko.
31Kanda ri ndi mu tshi, ndere onde ja okutshatsha nomeja, opo he a horoke mu Israel.
32Johannes h’oto okorora ta ti: Onda mona Ombepo ha zi meguru ha fa onguti, nde tahi mu tenene.
33Kanda ri ndi mu tshi; ndere ngu a tuma ndje okutshatsha nomeja, ohe a rombuera ndje: One ka mona Ombepo ahi zi meguru, ho tahi mu tenene, ohe ngu ta tshatsha nOmbepo Ondjapuki.
34Onde tshi mona, ngaje nde tshi tshiuica, nokutja nguka Omumua Karunga.
Aarongua jotango.
35Ngaangura Johannes okui ire ko itshee, ta cikama naarongua jaari.
36Sho a mono Jesus te ende po, okua ti: Tareni, Onzigona ha Karunga.
37Aarongua jaari mba, hera je tshu uvu, jo taa randura Jesus.
38Nde Jesus ta pungurukire ku jo. Sho a mono, nokutja oje mu randura, okua ti ku jo: Otamu kongo tshee? Jo taa ti: Rabbi, otaku ti: Muongi, kaandjohe okuni?
39He ta jamukura, ta ti ku jo: Ireni, mu tare! Jo taa hi na he, taa mono uo mpo tu uhara, nde taa huhara na he. Okua ri kouiri ontimurongo.
40Andreas, mumuahina ha Simon Petrus, gumue gua mba jaari, mba je tshu uva ku Johannes, na mba kua taa mu randura.
41H’ota tsakaneke tango mumuahina Simon, nde ta ti ku he: Ss’otua mona Messias-otaku ti Kristus.
42H’ote mu fara ku Jesus. Jesus te mu tara, nde ta ti: Onguee Simon, omumua Jonas, kongashiingika oto rukua Kefas nokutja Emanja.
43Ngaangura Jesus okua ara okuza po mpo a huke ku Galilea; he ta tsakanene na Filipus. Jesus h’ote mu rombuere: Randura ndje!
44Filipus okua zi ku Betsaida, komukunda gua Andreas na Petrus.
45Nde Filipus itshee ti itsu mu Nathanael, ta ti ku he: Ss’otue mu mona, ngu a tshangerue ku Moses mompango no kaaprofeti: Jesus Omumua Josef omunazareta.
46Natanael te mu pura: Mu Nazaret otamu zi otshaanaua ngaano? Filipus ta jamukura: Ira u tare!
47Jesus sho a mono Natanael te je, okua ti: Tara, nguka omuisraelita tshiri, mu kamu neruado.
48Natanael h’ote mu pura: Oua tshiua ndje peni? Jesus te mu jamukura: Filipus sho e ku icana, onda adikua nde ku mona nare u ri momukuju.
49Natanael h’oti i mo ta ti: Rabbi, ngueje Omumua Karunga, ongueje omukuaniirua gua Israel.
50Jesus ta ti: Osho nda ti, onde ku monene momukuju, opo nduno ui iteera. Oto ka mona iinima iinene ja pitirira mbika.
51Ta ti ku he: Tshiri, tshiri, andi mu rombuere, onamu ka mona eguru rje eguruka naajengeli taa zi mo, jo taa tenene kombanda hOmuna guOmuntu.
Currently Selected:
Johannes 1: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
