San Juan 12

Jesú-ru a̧mȩwoya tu'epinä̧ju̧

(Mt 26.6-13; Mc 14.3-9)

1Pacua pä'käri kkä̧mä̧dä̧kua̧'a̧, kko̧ro̧mü̧ttü̧nü̧ ya'ute mo̧ro̧ ä'kanä̧, Jesú-mä̧ Betania ütawiyära̧'a̧, Chutä ttoädinä̧ku̧ Rázaru ü̧jo̧mȩku̧ ichinü̧. 2Juorü Jesú-ru eseu ttu̧kuȩ kuinä̧tü̧; Marta-mä̧ ttu̧kuȩ iyä'chinä̧ju̧ ja̧'wa̧nü̧ ja̧'a̧ Rázaru'i̧nä̧ juätütäku mesa isodänä̧ pä̧nü̧ u̧kuȩ kuinü̧. 3Ja̧'wa̧nü̧ ja̧'a̧ María-mä̧ nardo pä'ü mikuoya a̧mȩwoya päkuoya, rü̧ȩnä̧ mikuäwoya, i̧sä̧yu̧nä̧ akua'a i'kächipü Jesú ü̧jä̧pi̧yä̧nä̧ tu'epinä̧ju̧; kkuwo'chenä̧ 'ka̧'ü̧nü̧, ja̧'wa̧nü̧ jȩjo̧mȩnä̧ isode jättäjode yü̧i̧pü̧nä̧ a̧mȩwi̧na̧'a̧. 4Ja̧'wa̧nü̧ jȩji̧yä̧ku̧ u̧wo̧juȩtä̧u̧ttü̧, ya̧tȩ Juda Icariote, Simón i̧tti̧, Jesú-ru iyü i̧kuä̧kua̧mä̧ pä'inü̧:

5—¿Tta̧'a̧nü̧ pä'ü, tresciento-nü̧ mo̧ro̧ aditätürü mitäwome jä̧'i̧jo̧mȩnä̧, mikuä pä'ü iyü ttikuoka'a jä̧ja̧'a̧ttü̧ usurä isotürü ppätäda pä'ümä̧?

6Ja̧'wa̧nü̧ ja̧'a̧nä̧, Juda pa̧'a̧nü̧ pä'amä̧, isopäi'ünä̧ usurä isotürü ppäda pä'ümä̧ pä'okü pinü̧; ü̧nä̧u̧kuä̧rä̧'i̧ja̧'a̧, pärätä ttenä̧yu 'chu̧'ä̧rü̧ ȩmo̧pä̧rä̧'i̧jü̧'ka̧ pä'inü̧. 7Jesú-mä̧ päinä̧ku̧:

—Ja̧'a̧tä̧ topiju, ttürü wa'are rejunä̧ ttütomȩnä̧, jä̧kuȩ jäwä jȩjä̧ku̧sä̧. 8Usurä isotürümä̧ 'kuäopünä̧tä̧, ukututäku ku̧ju̧nä̧rä̧kuo̧tü̧jä̧ ja̧'wa̧nü̧ ja̧'a̧nä̧ ttürümä̧, 'kuäopünä̧mä̧ kku̧nä̧ro̧ko̧tü̧ kuäkuotüjä̧.

Rázaru-rü kuä'ü ttikua pä'ü ukuoku kku̧ni̧nä̧tü̧

9Rekuätü judío, Jesú-mä̧ Betania ütawiyänä̧ kkü̧ pätta'a wo̧jui̧'ü̧, jua'atä topü 'chi̧nä̧tü̧. Suro Jesú-ru ja̧'a̧tȩ'ü̧tä̧mä̧kü̧, ji̧nä̧somä̧ Rázaru-rü, Jesú ttoädäkuru totta pä'ü. 10Ja̧'wa̧nü̧ ji̧yä̧u̧mä̧, sacerdote tturuwotümä̧ Rázaru-rü kuä'ü ttikua pä'ü'i̧nä̧ amükuädinä̧tü̧. 11Jua'amä̧, rekuätü judío, jua̧u̧ru̧ topü judío-ttü 'kȩ'i̧pä̧chü̧, Jesú-ru tteseti̧yä̧u̧.

Jesú, Jerusarȩ́-nä̧ doächi'inü̧ wȩnȩ

(Mt 21.1-11; Mc 11.1-11; Lc 19.28-40)

12Kkoro mo̧ro̧, Jerusarȩ́-ra̧'a̧ ttü̧ja̧ rekuätü, Pacua pä'käri kka̧'a̧ ichäjätümä̧; Jesú-mä̧ ütawiyära̧'a̧ ichüdo pätta'a ä̧ju̧kui̧pü̧, 13Jesú icha'aku, eseumä̧ ojiyä, ppä'ü rütü wopinä̧tü̧:

—¡Dio ppä'äditü! ¡Tu̧ru̧wa̧ i̧mi̧nä̧ ichümä̧ adiwäjuei i̧yä̧wä̧kua̧, Irae ttu̧ru̧wa̧ Rey-mä̧!

14Ja̧'wa̧nü̧ ja̧'a̧ Jesú-mä̧, Buro-nä̧ wä̧mä̧dü̧ 'chi̧nü̧, wȩyu̧kuä̧ wȩnȩ päü'anü̧:

15«Sión i̧tti̧mü̧mä̧, yekuekuätukuä;

ku̧ru̧wa̧tu̧ku̧ Rey-mä̧

Buro isaju kki̧tti̧, Buro-nä̧ wä̧nü̧ ichü ja̧'a̧.»

16Ja̧'wa̧nü̧ ja̧'a̧ u̧wo̧juȩtä̧u̧mä̧, ä̧kuo̧mȩnä̧mä̧, pi̧yȩ wȩnȩmä̧ wo̧jui̧'o̧ko̧tü̧ pinä̧tü̧; ja̧'wa̧nü̧ ja̧'a̧nä̧, 'korujuo'ächäji̧'ka̧ ttoächomȩnä̧tä̧ o'kajuiyünä̧ jua̧u̧ru̧ jȩtti̧nü̧'i̧nä̧ ja̧'wa̧ta̧nü̧ chutä jȩi̧nü̧'i̧nä̧ wȩyu̧kua̧'a̧ pȩjü̧mä̧ wo̧jui̧'i̧nä̧tü̧.

17Ja̧'wa̧nü̧ ja̧'a̧, ttü̧ja̧mä̧: Jesú, Rázaru-rü woomȩnä̧ wa'are idorättü ttoächa'a tottäji ji'äwinä̧tü̧. 18Ja̧'wa̧nü̧ jä̧jo̧mȩttü̧, ttü̧ja̧mä̧ Jesú-ru eseu ichinä̧tü̧ ja̧'wa̧nü̧ jȩtto̧kü̧ juei jȩä̧ja̧'a̧ ä̧ju̧kuä̧jä̧'kotü. 19Ja̧'wa̧nü̧ ji̧yä̧u̧ fariseo wotümä̧ pä'äkuäwinä̧tü̧:

Täkü topätukui, jȩ'kuä̧tu̧ku̧ juiyünä̧ wotüjä̧. Ttü̧ja̧mä̧ jua̧u̧ru̧tä̧ rü̧ȩnä̧ esetätü.

Grecia ttü̧ja̧ Jesú-ru usinä̧tü̧

20Pacua pä'käri kka̧'a̧ eseu 'chä̧jä̧tü̧mä̧ griego'i̧nä̧ ji̧na̧'a̧. 21Juätümä̧ Galirea rȩjȩ, Betsaida ütawiyä ttü̧ja̧sa̧ Felipe-rü ichi'ü jä'epü pä'inä̧tü̧:

—Chu̧ru̧wa̧, Jesú-ru tota pä'ätüjä̧.

22Pättäku, Felipe-mä̧, André-rü ji'äwinü̧; ja̧'wa̧nü̧ ja̧'a̧ Felipe'i̧nä̧, André'i̧nä̧ Jesú-ru ji'äu 'chi̧nä̧tü̧. 23Jesú-mä̧ ädätinä̧u̧:

—Ubo I̧tti̧ wa'arettü ttoächä̧kuȩ mo̧ro̧ rȩbȩä̧kuä̧wa̧'a̧. 24Isopäi'ünä̧ pädäu̧jä̧, trigo u̧wä̧ju̧ isäte rȩjȩ ma̧ä̧chü̧ wa'ü iku juiyüttümä̧, jitetätä ja̧'a̧; ja̧'wa̧nü̧ ja̧'a̧nä̧ wa'ü ikuttümä̧ rü̧ȩnä̧ u̧wä̧ju̧ wȩjä̧kua̧'a̧. 25A̧'kua̧rü̧ repe'äkuäumä̧, toe'ächä̧kua̧; ja̧'wa̧nü̧ ja̧'a̧nä̧, pi̧jä̧ttü̧ a̧'kua̧rü̧ repe'äkuäwokümä̧, kkä̧kuä̧wä̧ i'kora̧'a̧ wa'adü kku̧nu̧. 26Ya̧tȩ ttü wedü jȩpü̧mä̧, cho'ka'anä̧ ichi; jua̧u̧mä̧ ttü chi̧'cho̧mȩmä̧ i̧'chä̧kua̧. Ttü wedü jȩpü̧rü̧mä̧, Chä'o'i̧nä̧ esewä̧kua̧.

Jesú 'korujuoächä̧kuȩ jiäwinü̧ wȩnȩ

27¡Jitämä̧ cha̧'kua̧ tta̧wȩpä̧ku̧sä̧! ¿däjetä päda'ajä̧ttü̧?: ¿Chä'o cha̧'kua̧ tta̧wȩpü̧mä̧ jȩpü̧ ikuittü pädäkua'a? ¡Ja̧'wa̧nü̧ ja̧'a̧nä̧, ä̧tȩkuä̧nä̧ pi̧yȩtä̧ ja̧'a̧tȩ'ü̧ ichinü̧sä̧! 28«Chä'o, kui̧mi̧ ukuo i̧jȩpi̧»

Päomȩnä̧ mo̧ro̧jä̧ra̧'a̧ttü̧, rȩmi̧pi̧na̧'a̧: «Täkü chi̧mi̧ ukuomä̧ i̧jȩpä̧'i̧jü̧sä̧ ja̧'wa̧nü̧ ja̧'a̧nä̧ pä'äjita'anü̧ chukuomä̧ chi̧jȩpä̧kua̧sä̧.» 29Ja̧'wa̧nü̧ ja̧'a̧ juȩnȩ kka̧kuä̧tü̧mä̧, jua̧u̧ ä̧ju̧ku̧, ku'upä kürüächa'a pätta'anä̧; kkorotümä̧ pä'inä̧tü̧: Ya̧tȩ á̧gȩ ukuokuäjäku, jü̧nä̧.

30Jesú-mä̧ päinä̧u̧:

—Pi̧yȩ rä̧mi̧pa̧'a̧ kuä̧ju̧kuä̧jä̧tu̧ku̧mä̧, ttürü ja̧'a̧tȩ'ü̧mä̧ rä̧mi̧po̧kü̧ jä̧jí̧, ji̧nä̧somä̧ ukuturu ja̧'a̧tȩ'ü̧ rä̧mi̧pä̧ji̧. 31Jitä porü kkä̧mä̧dü̧ pi̧jä̧ ttü̧ja̧rü̧ adiu jȩtta̧ja̧ pä'ü'i̧nä̧, surojü jȩtta̧ja̧ pä'ü'i̧nä̧ päwi'äkua'a; jitä kkä̧mä̧dü̧ pi̧jä̧nä̧ we'ä'ijürü rä'epü ikuäwächa'a. 32Ja̧'wa̧nü̧ ja̧'a̧nä̧, pi̧jä̧ rȩjȩttü̧ ttodächi'omȩnä̧, o'katoi'ünä̧rü̧ ttüku ttichünä̧ jȩchä̧kua̧sä̧.

33Ja̧'wa̧nü̧, jiäwa'amä̧, uwapäre wa'ü i̧kuä̧kuȩ tü'kü ukuokuinü̧. 34Pä̧i̧yä̧u̧, ttü̧ja̧mä̧ ttädätinä̧ku̧: Weäwä wȩnȩnä̧mä̧, Crito-mä̧ 'kuäopünä̧ ü̧jä̧kua̧ pä'ija'atä wo̧juä̧tü̧jä̧. ¿Toku pä'ü, Ubo I̧tti̧mä̧ rȩjȩttü̧ tto̧ä̧chä̧kua̧ päkua'ajä̧ttü̧? ¿Díjä̧ttü̧ Ubo I̧tti̧mä̧?

35Pättäku Jesú-mä̧ päinä̧u̧:

—Tȩya̧u̧mä̧ ukutu ku̧'kä̧tȩtu̧ku̧nä̧mä̧ a̧'u̧kua̧'a̧tä̧ kkä̧kua̧'a̧. Ja̧'wa̧nü̧ ja̧'a̧ttü̧ tȩya̧u̧ kkä̧i̧tä̧, jua̧u̧ tȩya̧u̧nä̧mä̧ kue'ächätukui, yo̧ü̧ kuieruwätukua'anä̧ rȩbȩä̧kuä̧wä̧tu̧kuä̧ku̧; isopäi'ünä̧ yo̧ü̧nä̧ kue'ächümä̧, i̧'cho̧mȩ'i̧nä̧ jȩru̧pa̧. 36Tȩya̧u̧nä̧ esetätukui, ji̧nä̧ tȩya̧u̧ ku̧ju̧nä̧rä̧tu̧kuä̧i̧tä̧, jua̧u̧ tȩya̧u̧ i̧tti̧mü̧ kuätukuäkua'anü̧.

Pi̧yȩ pä'ü kä'ädi'ipütä, Jesú-mä̧ rä'opächü, juätürü dajawächinü̧.

Judío-mä̧ Jesú-ru esetokotü pinä̧tü̧

37Juätü ttä'kattü, rü̧ȩnä̧ jȩtto̧kü̧ jü̧ juei, Jesú-mä̧ jȩä̧'i̧ja̧'a̧nä̧ ttesetokoku pinü̧. 38Jua'amä̧, profeta Isaía pa̧'a̧nü̧ ukuokuinü̧ 'kuäopa'a ji̧na̧'a̧:

Chu̧ru̧wa̧, ¿Dítä jä̧ttü̧, ujutu jitäu esetümä̧?

¿Ja̧'wa̧ta̧nü̧ dirü i̧jȩkuä̧cha̧'a̧jä̧ttü̧, Tu̧ru̧wa̧ re ü̧jü̧mä̧?

39Ja̧'wa̧ta̧nü̧, Isaía pa̧'a̧nü̧ päinü̧'a̧kuä̧ esetokotü pinä̧tü̧:

40Tti'äriyä ä̧to̧dü̧ iku.

Ja̧'wa̧ta̧nü̧ tta̧mi̧ 'kittädäkuäunä̧ jȩi̧nä̧u̧,

Tti'ärenä̧ tottü juiya pä'ü,

ja̧'wa̧ta̧nü̧ tta̧mi̧so'kinä̧ ttu̧wo̧jui̧pü̧ juiya pä'ü.

Ttü'ärowächomȩnä̧, ttü aditü chiku juiyatü pä'ü.

41Isaía-mä̧ Jesú ütü'kü ukuokuinü̧, jua̧u̧ ukuo jäwä topü.

42Ja̧'wa̧nü̧ ja̧'a̧nä̧'i̧nä̧, ruwotümä̧ rekuätü Jesú-ru esetinä̧tü̧; ja̧'wa̧nü̧ tteseta'anä̧, fariseo wotü sinagoga-ttü rä'epü ttikuätü pä'ü, wäjuönä̧mä̧ ji'äwokotü pinä̧tü̧. 43Jua'amä̧ Dio ujuru jäwä ttüjü'koka'a, pi̧jä̧ ttü̧ja̧ jäwätä ttesewa'attü̧.

Jesú i̧wȩnȩmä̧, adiunä̧'i̧nä̧ suronä̧'i̧nä̧ jȩpä̧tü̧rü̧ päwi'äkua'a

44Jesú-mä̧ pä̧i̧ku̧nä̧ pä'inü̧: Ttürü esetümä̧, ttürütämä̧ esetokü; Chä'o ttürü we'inü̧rü̧'i̧nä̧ esetü. 45Ja̧'wa̧ta̧nü̧ ttürü topümä̧, ttürü we'inü̧rü̧'i̧nä̧ topü. 46Ttü, tȩya̧u̧mä̧ pi̧jä̧ra̧'a̧ ichinü̧sä̧; Ttürü esetätümä̧ yo̧ü̧nä̧ ttü̧jü̧ juiya pä'ü. 47Ja̧'wa̧ta̧nü̧ Ttü chi̧wȩnȩ ä̧ju̧kua̧'a̧nä̧, ukuotokürümä̧; ttümä̧ jua̧u̧ru̧ usurä ȩmä̧u̧nä̧ päda pä'ümä̧ ichokü pinü̧sä̧; pärokua'aku pi̧jä̧ ttü̧ja̧rü̧ ra̧wä̧pi̧jü̧ttü̧ ttü̧ji̧pü̧nä̧ ppä'ädü ichinü̧sä̧. 48Ttürü kkü'kü jui'ü, chi̧wȩnȩ esetokürü, usurä ȩmä̧u̧nä̧ ro̧ȩpä̧kuȩmä̧ täkü kka̧'a̧: Ji̧yȩtä̧ chi̧wȩnȩ chukuokutä jä̧kua̧'a̧, usurä ttȩmä̧u̧nä̧ ro̧ȩpä̧kuȩmä̧, rüjí mo̧ro̧ päi'omȩnä̧. 49Jua'amä̧ ttütä chüjü'komȩnä̧mä̧, chukuokuoka'attü̧; Chä'o ttürü we'inütä̧, iyinütä̧ chukuokua'attü̧. 50Ja̧'wa̧nü̧ ja̧'a̧ttü̧, Chä'o weinü̧mä̧ kkä̧kuä̧wä̧ i'ko pä'ü wo̧jua̧sä̧. Ja̧'wa̧nü̧ jo̧mȩnä̧, ttü chukuokumä̧, Chä'o weinüta̧'a̧nü̧tä̧ ukuokusä.

Currently Selected:

San Juan 12: PNT13

Highlight

Copy