San Lucas 8
8
Nä̧tü̧ Jesú-ru ppättädinü̧ wȩnȩ
1Jua̧u̧ o'ka'a Jesú-mä̧ ütawiyä ppo̧ü̧nä̧'i̧nä̧, bäreu ütawiyänä'i̧nä̧ o'kajuiyünä̧tä̧, Dio weü adiwä wȩnȩ ji'äu kue'ächinü̧. Kueächa'a, doce-nü̧ wotü umüwäyotü apótore'i̧nä̧ kue'ächinä̧tü̧. 2Ja̧'wa̧ta̧nü̧ nä̧tü̧ ttumä̧richeittü aditü ikuinä̧u̧'i̧nä̧, epíritu suropätürü rä'epä'chü ikuinä̧u̧'i̧nä̧ yotukunä̧ ji̧na̧'a̧: María ja̧'a̧nä̧ Madarena pä'ü ottinä̧kua̧'i̧nä̧, epíritu-tu̧ suropätürü kko̧ro̧mü̧ttü̧nü̧ ta̧ju̧ jo̧mȩnä̧ rä'epü'ikuinä̧kua̧'i̧nä̧ ji̧na̧'a̧; 3Ja̧'wa̧ta̧nü̧ Herode iare pärätä tta̧wä̧rä̧kuä̧wä̧ i̧sa̧, Chuza irekua Juana'i̧nä̧ ji̧na̧'a̧; ja̧'wa̧ta̧nü̧ Susana'i̧nä̧; ja̧'wa̧ta̧nü̧ kkorotü nä̧tü̧'i̧nä̧ rekuinä̧tü̧ ttu̧ju̧nä̧rü̧nä̧ Jesú-ru iyü ppä'ädä̧rä̧tü̧mä̧.
Kku̧nä̧wä̧ i̧sa̧ u̧ju̧ni̧nü̧ wȩnȩtü̧ ji'äwinü̧
(Mt 13.1-9; Mc 4.1-9)
4Ttü̧ja̧ rekuätü ttidepiyu jü̧'a̧kuä̧ ra'opü Jesú-ru totta pä'ü ttü̧ka̧ka̧kuä̧ja̧'a̧. Pi̧yȩnä̧ wȩnȩtü̧ jiäwinä̧u̧: 5Ya̧tȩ kku̧nä̧wä̧ ru̧wa̧ kku̧nu̧ i̧'chä̧ja̧'a̧, ji̧yȩtȩ u̧wä̧ju̧mä̧ mä̧nä̧nä̧ ma̧ä̧chi̧na̧'a̧ ja̧'wa̧nü̧ ja̧'a̧ 'kuȩ'ku̧ ttikuinü̧ ja̧'wa̧ta̧nü̧ ppi̧yu̧'i̧nä̧ ichi'ü ttukui'inü̧. 6Ja̧'wa̧ta̧nü̧ kkoromä̧ i̧nä̧dü jo̧mȩ wä̧mȩ ma̧ä̧chi̧na̧'a̧; ja̧'wa̧nü̧ ja̧'a̧ bawi'a'anä̧ joi'inü̧ ajiya jomȩja̧'a̧. 7Ja̧'wa̧ta̧nü̧ kkoro u̧wä̧ju̧mä̧ so̧ä̧'kua 'kä̧tȩ jo̧mȩ ma̧ä̧chi̧na̧'a̧; ja̧'wa̧nü̧ ja̧'a̧ yo̧mȩtȩnä̧ so̧ä̧'kua'i̧nä̧ bawi'omȩnä̧; jua̧u̧ jä̧ji̧mä̧ bau juiyünä̧tä̧ kkȩnü̧ ikuina̧'a̧. 8Ja̧'wa̧ta̧nü̧ kkoromä̧ rȩjȩ adiwomȩ ma̧ä̧chi̧na̧'a̧; ja̧'wa̧nü̧ ja̧'a̧ jua̧u̧mä̧ bä'ipü rü̧ä̧chi̧nü̧ o'ka'a, jíkunä̧ u̧wä̧ju̧mä̧ ciȩnü̧ pünä̧ wȩji̧na̧'a̧.
Pi̧yȩ ji'äu kkä̧nü̧ Jesú-mä̧ yabonü̧ pä'inü̧: «¡Ä̧ju̧kua̧ pä'ü, ä̧ju̧kuä̧kuä̧wä̧ kku̧nä̧rü̧mä̧ ä̧ju̧kui̧!»
¿Tta̧'a̧nü̧ pä'ü wȩnȩtä̧rü̧ jiäwina̧'a̧jä̧ttü̧?
(Mt 13.10-17; Mc 4.10-12)
9Wȩnȩtü̧ jiäwäji, toku pä'ü ja̧ pä'ü u̧wo̧juȩtä̧u̧ Jesú-ru jä'epü ä̧ju̧kui̧nä̧tü̧. 10Juätürü pä'inü̧: Ukuturumä̧, Dio weü wo̧juä̧wo̧kü̧mä̧ ku̧wo̧juä̧tu̧ku̧nä̧ iyinä̧u̧jä̧; ja̧'wa̧nü̧ ja̧'a̧nä̧ kkorotürümä̧ wȩnȩtä̧rü̧tä̧ ukuokusä, jua'amä̧ topätürümä̧, totta'anä̧'i̧nä̧ tottü juiya pä'ü ja̧'wa̧ta̧nü̧ ttä̧ju̧kua̧'a̧nä̧'i̧nä̧, ttu̧wo̧jui̧pü̧ juiya pä'ü.
Wȩnȩtü̧ jiäwäji, Jesú-mä̧ rä'epü iku ji'äwinü̧
(Mt 13.18-23; Mc 4.13-20)
11Wȩnȩtü̧ jidäwäjimä̧, pi̧yȩ ja̧'a̧: U̧wä̧ju̧ jä̧ji̧mä̧, Dio i̧wȩnȩ ja̧'a̧; 12Ja̧'wa̧ta̧nü̧ mä̧nä̧nä̧ ma̧ä̧chi̧nü̧ jä̧ji̧mä̧, Dio i̧wȩnȩmä̧ ä̧ju̧kua̧'a̧nä̧, esetü surojüttü ü̧ji̧pü̧ juiya pä'ü, äwettä ichi'ü a̧mi̧so'kittü 'choipä̧u̧ru̧ wȩnȩkuä̧cha̧'a̧. 13Ja̧'wa̧ta̧nü̧ i̧nä̧sa wä̧mȩ jo̧mȩ ma̧ä̧chi̧nü̧ jä̧ji̧mä̧, Dio i̧wȩnȩ ä̧ju̧ku̧ eseunu̧ tteseta'anä̧, 'chu̧ä̧ra̧jü̧ juitta'a ja̧'a̧; a̧'u̧kua̧'a̧tä̧ eseti'ü, kka̧kuä̧mü̧ toäkuäwä ichomȩnä̧, kä'ädi'ätürü wȩnȩkuä̧cha̧'a̧. 14Ja̧'wa̧ta̧nü̧ so̧ä̧'kua 'kä̧tȩ jo̧mȩ ma̧ä̧chi̧nü̧ jä̧ji̧mä̧, Dio i̧wȩnȩmä̧ ttä̧ju̧kua̧'a̧nä̧, ji̧yȩnä̧tä̧ ttü̧jo̧mȩnä̧, 'kuo̧pa̧ja̧'a̧nä̧ tta̧'kua̧ roekuäkuäwänä̧, pärätänä̧, pi̧jä̧ üadiwänä̧, u̧wä̧ju̧ ttiyü juiyünä̧tä̧ ma̧'ä̧mä̧tü̧rü̧ wȩnȩkuä̧cha̧'a̧. 15Ja̧'wa̧ta̧nü̧ rȩjȩ adiwomȩ ma̧ä̧chi̧nü̧ jä̧ji̧mä̧, Dio i̧wȩnȩ tta̧mi̧so'kinä̧ adiu 'chu'ädü ä̧ju̧ku̧, ji̧yȩnä̧tä̧ ukuotü kkä̧nü̧, u̧wä̧ju̧ kku̧nä̧rä̧tü̧rü̧ wȩnȩkuä̧cha̧'a̧.
Ra̧pa̧ra̧nä̧ wȩnȩtü̧ ji'äwinü̧
(Mc 4.21-25)
16Ra̧pa̧ra̧ rȩdȩti̧'i̧pü̧mä̧ 'kä̧nä̧ri̧yu̧ jakuä mü̧'ȩpü̧mä̧ ya̧tȩ'i̧nä̧ kku̧nä̧wo̧kü̧ ja̧'a̧. Ja̧'wa̧ta̧nü̧ cama-ppä̧ dȩa̧'a̧'i̧nä̧ kku̧nä̧wo̧kü̧ ja̧'a̧, ji̧nä̧somä̧ ju'toju jo̧mȩ kku̧nä̧wä̧ dodepätürü tȩya̧u̧ kkȩdȩpü̧nä̧. 17Ja̧'wa̧nü̧ jü̧ta̧'a̧nü̧, ttu̧wo̧jui̧pü̧ juiyünä̧ da̧jä̧rä̧kuä̧wä̧mä̧ juiya'a; ja̧'wa̧ta̧nü̧ i̧jȩkuä̧chü̧ juiyünä̧ ä̧ppü̧tä̧rä̧kuä̧wä̧'i̧nä̧ juiya'a. 18«Ja̧'wa̧nü̧ ja̧'a̧ttü̧, kuä̧ju̧kuä̧tu̧ku̧mä̧ adiu ä̧ju̧kuä̧tu̧kui̧; isopäi'ünä̧ kku̧nä̧rü̧rü̧mä̧ yabonü̧ iyäwäkua'a; ja̧'wa̧ta̧nü̧ jui̧'a̧rü̧mä̧, suro a̧'u̧ku̧nä̧ u̧ju̧nä̧rü̧'i̧nä̧ 'choikuäkua'a.»
Ja̧ju̧'i̧nä̧, i̧jä̧wa̧tü̧'i̧nä̧ Jesú-ru usinä̧tü̧
(Mt 12.46-50; Mc 3.31-35)
19Jesú-ru ü̧jä̧wa̧tü̧'i̧nä̧, ja̧ju̧'i̧nä̧ topü tti̧'chä̧ja̧'a̧; ttü̧ja̧ rü̧ȩnä̧ ttirekua'a ja̧'a̧, churutä tü'künä̧nü̧ topü tti̧'chi̧'ü̧ juiyünä̧ ji̧nä̧u̧. 20Ja̧'wa̧nü̧ ja̧'a̧, ya̧tȩ Jesú-ru ji'äwinü̧:
—Kua̧ju̧'i̧nä̧, kui̧jä̧wa̧tü̧'i̧nä̧ u̧mi̧nä̧ kka̧ku̧ ukuru totta pä'ätü.
21Päku Jesú ädätinü̧:
—Isopäi'ünä̧ Dio i̧wȩnȩ ä̧ju̧ku̧ ukuotätütä ja̧'a̧, cha̧ju̧tü̧mä̧ ja̧'wa̧ta̧nü̧ chü̧jä̧wa̧tü̧mä̧,
Jesú kkä̧rü̧'koppa wirodinü̧
(Mt 8.23-27; Lc 8.22-25)
22Ji̧yȩtȩ mo̧ro̧ Jesú-mä̧ woi'kanä̧ 'cha'ächi'ü pä̧mä̧dü̧ u̧wo̧juȩtä̧u̧rü pä'inü̧:
—Rü̧ä̧ dubora ji̧jä̧ku̧ ti̧'chä̧tu̧kua̧.
Pä̧u̧, kkä'koraku kki'okuächü 'chi̧nä̧tü̧. 23Ja̧'wa̧nü̧ ja̧'a̧ ttüjäwomȩ kkä'kottü Jesú-mä̧ ä'i'äji o'ka'a. Kkä̧rü̧'koppa tawipomȩnä̧, aje rü̧ȩnä̧ ppawina̧'a̧, ttuwe'ka'i̧nä̧ ma̧ä̧chü̧'a̧nü̧tä̧ päi'ünä̧. 24Ja̧'wa̧nü̧ ji̧yä̧u̧ 'chä̧wi̧'ü̧ porädü iku pättinä̧ku̧:
—¡Chu̧ru̧wa̧, Chu̧ru̧wa̧! ¡ma̧'ä̧chä̧tü̧jä̧! pättäku, Jesú-mä̧ ä̧rä̧mi̧'ü̧ kkä̧mä̧dü̧ woäkuäwi'omȩnä̧, kkä̧rü̧'koppamä̧ kkä̧mä̧da̧'a̧ttü̧, aje ppawäja'a'i̧nä̧ o'kajuiyünä̧tä̧ wirochi'ina̧'a̧. 25Ja̧'wa̧nü̧ jä̧ji̧ o'ka'a päinä̧u̧:
—¿Kua̧'kua̧ ku̧wȩnä̧rä̧tu̧ku̧mä̧, toku päi'äjätukuäkuttü?
Pä'anä̧, ye'äjä'kotü, yotukunä̧ pä'äwinä̧tü̧.
—¿Pidemä̧ díjä̧ttü̧, kkä̧rü̧'koppa'i̧nä̧, rü̧ä̧ dubora'i̧nä̧ ukuotäkumä̧?
Gadara rȩjȩ ttü̧ja̧sa̧rü̧ epíritu-tu̧ suropätü kka̧kui̧nä̧tü̧
(Mt 8.28-34; Mc 5.1-20)
26Rü̧ä̧ dubora ji̧jä̧ku̧, Gerasa ttü̧ja̧ tti̧rȩjä̧nä̧, Galirea-tä pä̧tȩkuä̧nü̧ kki̧'o̧mȩ tti̧rȩbȩwi̧'o̧mȩnä̧. 27Jesú-mä̧ woi'kattü rȩjȩra̧'a̧ u̧wä̧mi̧'i̧'o̧mȩnä̧, ya̧tȩ epíritu-tu̧ ttü̧jä̧ku̧, ütawiyäkuttü, ü̧'ka̧tä̧wä̧ta̧'i̧nä̧ jui̧'a̧, isodenä̧'i̧nä̧ kko̧kü̧, wa'are idoriyänä̧tä̧ ä'ä'chü kkä̧'i̧jü̧ ichi'inä̧ku̧. 28Jua̧u̧mä̧, Jesú-ru topo'ü, ä'ka jo̧mȩ iwe'kiyunä̧, pä̧mä̧dü̧, wopinü̧:
—¿Däjé jȩchä̧'i̧jä̧ku̧ttü̧ ukú, mo̧ro̧jä̧ Ru̧wa̧ Dio i̧tti̧rü̧mä̧? Ukuru jä'epüsä, usurä chȩmä̧u̧nä̧ jȩ'ku̧ juiyattü̧ pä'ü. 29Jua'amä̧ epíritu su̧ro̧pa̧rü̧mä̧, jua̧u̧ ku̧jä̧ku̧ttü̧ rä'opächi, pä'ü weäku woäkuäwina̧'a̧. Täkü kko̧ro̧nü̧ jü̧ta̧'a̧nü̧ epíritu su̧ro̧pa̧mä̧, jȩä̧'chi̧nä̧ku̧, ttü̧ja̧mä̧ kärenä̧känä̧, kärenä̧sa̧nä̧'i̧nä̧ ti̧ttä̧dä̧'cho̧mȩnä̧'i̧nä̧ jua̧ro̧kuä̧rü̧ iku, rȩbi̧yu̧ dȩ'a̧ra̧'a̧ku̧ tüipächä̧rü̧nä̧tä̧. 30Ja̧'wa̧nü̧ ja̧'a̧ Jesú-mä̧ jä'epü ä̧ju̧kui̧nä̧ku̧:
—¿Toku mi̧kua̧jä̧ttü̧?
Päku, ädätinü̧:
—Ttümä̧ Legión pä'ü mi̧kua̧sä̧. Jua'amä̧ epíritu suropätü, jua̧u̧nä̧ rekuätü ttü̧ja̧kua̧'a̧ttü̧ pä'inü̧. 31Ja̧'wa̧ta̧nü̧ rü̧ȩnä̧, Jesú-ru ajuäkuäwinü̧, dȩa̧'a̧ku̧ 'kuȩya̧ppa̧ jä̧ju rejura̧'a̧ we'ü iku juiyatü pä'ü. 32Ja̧'wa̧nü̧ ja̧'a̧nä̧, juȩnȩ mü̧ä̧'kanä̧ ku̧chi̧tü̧ rekuätü ttu̧kuȩ kuä̧nü̧ kka̧kui̧nä̧tü̧. Ja̧'wa̧nü̧ ja̧'a̧ epíritu-tu̧ suropätümä̧, juätünä̧ dodettächünä̧ weatü pä'ü rü̧ȩnä̧ jä̧'ȩpä̧ri̧nä̧tü̧. Jä̧ttȩpä̧rä̧ku̧, a̧ pä'ü weinä̧u̧ Jesú-mä̧. 33Weomȩnä̧, epíritu-tu̧ suropätümä̧, jua̧u̧ ttü̧ja̧sa̧ttü̧ rä'opächü ku̧chi̧tü̧nä̧ dodepächinä̧tü̧. Ja̧'wa̧nü̧ pä̧i̧'ä̧u̧, juätü ku̧chi̧tü̧mä̧, mü̧ä̧'ka dȩa̧'a̧ku̧ ma̧'o̧po̧'ä̧chü̧, rü̧ä̧ duboranä̧ a̧'ä̧kuä̧u̧ ikuinä̧tü̧. 34Ja̧'wa̧nü̧ päi'omȩnä̧, ku̧chi̧tü̧rü̧ tta̧'a̧rä̧jä̧tü̧mä̧, juorü tü'ipächü, ütawiyä a̧'u̧ku̧ o̧mȩ'i̧nä̧, rü̧o̧mȩ'i̧nä̧ ji'äwä'chinä̧tü̧. 35Ja̧'wa̧nü̧ ji̧ttä̧wä̧u̧, ttü̧ja̧mä̧ däjé päi'äja pä'ü topü tti̧'chä̧ja̧'a̧mä̧, Jesú ü̧jo̧mȩ tti̧'chi̧'o̧mȩnä̧. Jua̧u̧, epíritu-tu̧ ttü̧jä̧jä̧ku̧ päjimä̧, adiwächäjitä, ü̧'ka̧tä̧wä̧ta̧ 'ka̧tü̧ rü̧tä̧wa̧tä̧, Jesú ü̧jä̧pü̧ jo̧mȩ ü̧'a̧'a̧ topü, rü̧ȩnä̧ ye'inä̧tü̧. 36Ja̧'wa̧nü̧ ja̧'a̧, jua̧u̧ ttü̧ja̧sa̧rü̧, juätü epíritu-tu̧ttü̧ ü̧ji̧pü̧nä̧ 'kuäopa'a tottäji, ttü̧ja̧rü̧ ji'äwinä̧tü̧. 37Ja̧'wa̧nü̧ jȩä̧ji̧yä̧u̧, ye'i'äjä'kotü, Gerasa rȩjȩ jäyänä̧ kka̧kuä̧tü̧'i̧nä̧, ttü̧ja̧mä̧ o'katoi'ünä̧tä̧ Jesú-ru tti̧rȩjä̧ttü̧ räopächünä̧ pättinä̧ku̧. Ja̧'wa̧nü̧ we'ü ttikuäku Jesú-mä̧ woi'kanä̧ pä̧mä̧dü̧ ppa̧'ä̧chi̧nü̧. 38Ja̧'wa̧nü̧ i̧wi̧'a̧'a̧, epíritu-tu̧ suropätü ttü̧ja̧kuä̧jä̧ku̧ päjimä̧, Jesú-ku kueächa pä'ü, oiparü pä'ü ajuäkuäwinü̧, ja̧'wa̧nü̧ ajuäkuäwa'anä̧, Jesú-mä̧ o'ipü jui'ü, we'ü iku päinä̧ku̧: 39—Kuojusodera̧'a̧tä̧ ppa̧'ä̧chi̧, O'kajuiyünä̧ Dio ukuru jȩä̧ji̧mä̧ jikuäwäkua'anü̧.
We'ü ikuäjäkumä̧ i̧wi̧'ä̧ji̧'ka̧ ütawiyä o'kajuiyünä̧ ji'äwä'chinü̧, Jesú jȩä̧ji̧mä̧.
Na̧'ä̧chä̧ju̧ru̧'i̧nä̧, Jairo ittijuru'i̧nä̧ aditü ikuinü̧
(Mt 9.18-26; Mc 5.21-43)
40Ja̧'wa̧nü̧ jä̧ja̧'a̧ Jesú-mä̧ Galirea-ra̧'a̧ ppa̧wä̧'chi̧'o̧mȩnä̧ ttü̧ja̧ rekuätü eseäkuäwinä̧tü̧ o'katoi'ünä̧ jua̧u̧ru̧ tta̧ttä̧ra̧ja̧'a̧ ja̧'a̧ttü̧. 41Ja̧'wa̧nü̧ ja̧'a̧, Jairo pä'ü mi̧kua̧, sinagoga isode u̧ru̧wa̧ ichi'ü, Jesú ü̧jä̧pü̧ jo̧mȩ ma̧'ä̧mü̧ ojusodenä̧ doächiyarü pä'ü ajuäkuäwinä̧ku̧. 42Jua'amä̧ ittiju yaju äkuaju, a̧'ȩmä̧ doce-nü̧ a̧'ȩtä̧ waju, 'korupäji'ü'anü̧ ji̧yä̧ku̧. Jua'a i̧'cho̧mȩnä̧, ttü̧ja̧ ttirekua'a ppi̧ä̧chä̧rü̧nä̧ jȩtti̧nä̧ku̧. 43Ja̧'wa̧nü̧ jo̧mȩ 'kä̧tȩnä̧, yajute doce-nü̧ años jo̧mȩnä̧ ppü'ottü usurä ȩmä̧wä̧'i̧ju̧, jawapü adikuä isotürü, kkiäre pärätä mitäu o'katoi'ünä̧rü̧tä̧ wȩjä̧rä̧kuä̧wa̧'a̧nä̧'i̧nä̧, yabokutä juoächä'ijäkua'i̧nä̧ kki̧nä̧ju̧. 44Juajumä̧, Jesú aboja̧'a̧ku̧nä̧ ichi'ü, wä̧mȩnä̧ ü̧'ka̧tä̧wä̧ta̧ ä'ko̧ta̧ mȩjo̧mȩnä̧ kkukuojamä̧ ojuchi'inä̧kua̧. 45Ja̧'wa̧nü̧ ja̧'a̧, Jesú-mä̧ pä'inü̧:
—¿Díjä̧ttü̧ ttürü mȩ'ä̧ji̧mä̧? päomȩnä̧, ya̧tȩ'i̧nä̧ ttädätiyokoku, Peduru-mä̧ pä'inü̧, ja̧'wa̧ta̧nü̧ kkorotü'i̧nä̧ pä'inä̧tü̧:
—Chu̧ru̧wa̧ ttü̧ja̧ ttirekua'a, ppi̧kuä̧chä̧rü̧nä̧, jȩtta̧'a̧mä̧, toku pä'ü: ¿Díjä̧ttü̧ ttürü mȩ'ä̧ji̧mä̧ päkua'ajä̧ttü̧?, 46Ja̧'wa̧nü̧ pätta'anä̧, Jesú-mä̧ yabonü̧ pä'inü̧:
—Ya̧tȩ mȩä̧jä̧ku̧sä̧, chu̧wo̧juä̧u̧nä̧ ttüttü chujuru räopächäja'a. 47Ja̧'wa̧nü̧ ja̧'a̧, kkä̧ppü̧tä̧rü̧ juiyäkua, ä'ka jo̧mȩ tti̧'ä̧wäyaju 'chä̧wi̧'ü̧ kkiwe'kiyunä̧ pä̧mä̧dü̧, ttü̧ja̧ o'katoi'ünä̧ ttä'ka jo̧mȩttü̧ ji'äwinä̧ju̧ ja̧'wa̧nü̧ jä̧kua̧sä̧ jȩpä̧jä̧ju̧ pä'ü ja̧'wa̧ta̧nü̧ yotäku kku̧'i̧pä̧ja̧'a̧'i̧nä̧ ji'äwinä̧ju̧. 48Juäjuru, Jesú-mä̧, pä'inü̧:
—Chittiju, kua̧'kua̧ ku̧wȩnä̧ra̧'a̧ttü̧ pi̧'ä̧ju̧jä̧; wȩnȩ juiyünä̧tä̧ täi.
49Jesú-mä̧ ja̧'wa̧nü̧ ukuoku ü̧ja̧'a̧nä̧, ya̧tȩ Jairo-rü ojusodera̧'a̧ttü̧ ichi'ü ji'äwinü̧:
—Kuittijumä̧, täkü 'koru pä'i'äjäju; täkü wo̧juȩkuä̧ i̧sa̧rü̧mä̧ icha pä'ümä̧ jȩ'kuä̧. 50Ja̧'wa̧nü̧ jiäwa'a ä̧ju̧ku̧ Jesú-mä̧ pä'inü̧:
—Yekuekuä; suro esetütä eseti, kueseta'anä̧tä̧'i̧nä̧ kkü̧'i̧pi̧yä̧kua̧jä̧. 51Isodera̧'a̧ tti̧'chi̧'o̧mȩnä̧, kkorotümä̧ dottächüjuiyünä̧, suro Peduru-kutä, Sa̧ti̧a̧ku̧ku̧tä̧, Ju̧a̧-kutä ja̧'wa̧ta̧nü̧ ji̧'ki̧chawaju kka̧ju̧ku̧tä̧, kkä'okutä do'ädinü̧. 52Ja̧'wa̧nü̧ ja̧'a̧ o'katoi'ünä̧ juäjuru rettü ajuäkuäwinä̧tü̧. Ja̧'wa̧nü̧ ji̧yä̧ku̧, Jesú päinä̧u̧:
—Kuajuäkuäwätukuä; ji̧'ki̧chawajumä̧, 'korujuo'ächokoju päjäju ja̧'a̧, suro ä'ütä ä'äju. 53Päomȩnä̧, ttü̧ja̧mä̧ ya̧ttä̧wä̧'chi̧nä̧ku̧, jua'amä̧ 'korujuo'ächäjäju pä'ü ttu̧wo̧jua̧'a̧ttü̧. 54Ja̧'wa̧nü̧ ja̧'a̧nä̧, Jesú-mä̧ kku̧mü̧nä̧ äräbe'ü, wopi'ünä̧nü̧ päinä̧kua̧:
—¡Mü̧ä̧yaju, ä̧rä̧mi̧'i̧! 55Päomȩnä̧, kka̧'kua̧rü̧ ppa̧wä̧chi̧'a̧'a̧ttü̧, yotäku ä̧rä̧mi̧'ä̧ju̧ru̧, Jesú-mä̧ kku̧kuȩ ttiyaju pä'ü weinä̧kua̧. 56Ja̧'wa̧nü̧ päia'a topü kkä'o'i̧nä̧, kka̧ju̧'i̧nä̧, too to̧pä̧ri̧nä̧tü̧; ja̧'wa̧nü̧ ja̧'a̧nä̧ Jesú-mä̧ ya̧tȩrü̧'i̧nä̧, jua̧u̧ 'kuäopäjimä̧ jittäu juiyünä̧tä̧ we'ü u̧ju̧ni̧nä̧u̧.
Currently Selected:
San Lucas 8: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
San Lucas 8
8
Nä̧tü̧ Jesú-ru ppättädinü̧ wȩnȩ
1Jua̧u̧ o'ka'a Jesú-mä̧ ütawiyä ppo̧ü̧nä̧'i̧nä̧, bäreu ütawiyänä'i̧nä̧ o'kajuiyünä̧tä̧, Dio weü adiwä wȩnȩ ji'äu kue'ächinü̧. Kueächa'a, doce-nü̧ wotü umüwäyotü apótore'i̧nä̧ kue'ächinä̧tü̧. 2Ja̧'wa̧ta̧nü̧ nä̧tü̧ ttumä̧richeittü aditü ikuinä̧u̧'i̧nä̧, epíritu suropätürü rä'epä'chü ikuinä̧u̧'i̧nä̧ yotukunä̧ ji̧na̧'a̧: María ja̧'a̧nä̧ Madarena pä'ü ottinä̧kua̧'i̧nä̧, epíritu-tu̧ suropätürü kko̧ro̧mü̧ttü̧nü̧ ta̧ju̧ jo̧mȩnä̧ rä'epü'ikuinä̧kua̧'i̧nä̧ ji̧na̧'a̧; 3Ja̧'wa̧ta̧nü̧ Herode iare pärätä tta̧wä̧rä̧kuä̧wä̧ i̧sa̧, Chuza irekua Juana'i̧nä̧ ji̧na̧'a̧; ja̧'wa̧ta̧nü̧ Susana'i̧nä̧; ja̧'wa̧ta̧nü̧ kkorotü nä̧tü̧'i̧nä̧ rekuinä̧tü̧ ttu̧ju̧nä̧rü̧nä̧ Jesú-ru iyü ppä'ädä̧rä̧tü̧mä̧.
Kku̧nä̧wä̧ i̧sa̧ u̧ju̧ni̧nü̧ wȩnȩtü̧ ji'äwinü̧
(Mt 13.1-9; Mc 4.1-9)
4Ttü̧ja̧ rekuätü ttidepiyu jü̧'a̧kuä̧ ra'opü Jesú-ru totta pä'ü ttü̧ka̧ka̧kuä̧ja̧'a̧. Pi̧yȩnä̧ wȩnȩtü̧ jiäwinä̧u̧: 5Ya̧tȩ kku̧nä̧wä̧ ru̧wa̧ kku̧nu̧ i̧'chä̧ja̧'a̧, ji̧yȩtȩ u̧wä̧ju̧mä̧ mä̧nä̧nä̧ ma̧ä̧chi̧na̧'a̧ ja̧'wa̧nü̧ ja̧'a̧ 'kuȩ'ku̧ ttikuinü̧ ja̧'wa̧ta̧nü̧ ppi̧yu̧'i̧nä̧ ichi'ü ttukui'inü̧. 6Ja̧'wa̧ta̧nü̧ kkoromä̧ i̧nä̧dü jo̧mȩ wä̧mȩ ma̧ä̧chi̧na̧'a̧; ja̧'wa̧nü̧ ja̧'a̧ bawi'a'anä̧ joi'inü̧ ajiya jomȩja̧'a̧. 7Ja̧'wa̧ta̧nü̧ kkoro u̧wä̧ju̧mä̧ so̧ä̧'kua 'kä̧tȩ jo̧mȩ ma̧ä̧chi̧na̧'a̧; ja̧'wa̧nü̧ ja̧'a̧ yo̧mȩtȩnä̧ so̧ä̧'kua'i̧nä̧ bawi'omȩnä̧; jua̧u̧ jä̧ji̧mä̧ bau juiyünä̧tä̧ kkȩnü̧ ikuina̧'a̧. 8Ja̧'wa̧ta̧nü̧ kkoromä̧ rȩjȩ adiwomȩ ma̧ä̧chi̧na̧'a̧; ja̧'wa̧nü̧ ja̧'a̧ jua̧u̧mä̧ bä'ipü rü̧ä̧chi̧nü̧ o'ka'a, jíkunä̧ u̧wä̧ju̧mä̧ ciȩnü̧ pünä̧ wȩji̧na̧'a̧.
Pi̧yȩ ji'äu kkä̧nü̧ Jesú-mä̧ yabonü̧ pä'inü̧: «¡Ä̧ju̧kua̧ pä'ü, ä̧ju̧kuä̧kuä̧wä̧ kku̧nä̧rü̧mä̧ ä̧ju̧kui̧!»
¿Tta̧'a̧nü̧ pä'ü wȩnȩtä̧rü̧ jiäwina̧'a̧jä̧ttü̧?
(Mt 13.10-17; Mc 4.10-12)
9Wȩnȩtü̧ jiäwäji, toku pä'ü ja̧ pä'ü u̧wo̧juȩtä̧u̧ Jesú-ru jä'epü ä̧ju̧kui̧nä̧tü̧. 10Juätürü pä'inü̧: Ukuturumä̧, Dio weü wo̧juä̧wo̧kü̧mä̧ ku̧wo̧juä̧tu̧ku̧nä̧ iyinä̧u̧jä̧; ja̧'wa̧nü̧ ja̧'a̧nä̧ kkorotürümä̧ wȩnȩtä̧rü̧tä̧ ukuokusä, jua'amä̧ topätürümä̧, totta'anä̧'i̧nä̧ tottü juiya pä'ü ja̧'wa̧ta̧nü̧ ttä̧ju̧kua̧'a̧nä̧'i̧nä̧, ttu̧wo̧jui̧pü̧ juiya pä'ü.
Wȩnȩtü̧ jiäwäji, Jesú-mä̧ rä'epü iku ji'äwinü̧
(Mt 13.18-23; Mc 4.13-20)
11Wȩnȩtü̧ jidäwäjimä̧, pi̧yȩ ja̧'a̧: U̧wä̧ju̧ jä̧ji̧mä̧, Dio i̧wȩnȩ ja̧'a̧; 12Ja̧'wa̧ta̧nü̧ mä̧nä̧nä̧ ma̧ä̧chi̧nü̧ jä̧ji̧mä̧, Dio i̧wȩnȩmä̧ ä̧ju̧kua̧'a̧nä̧, esetü surojüttü ü̧ji̧pü̧ juiya pä'ü, äwettä ichi'ü a̧mi̧so'kittü 'choipä̧u̧ru̧ wȩnȩkuä̧cha̧'a̧. 13Ja̧'wa̧ta̧nü̧ i̧nä̧sa wä̧mȩ jo̧mȩ ma̧ä̧chi̧nü̧ jä̧ji̧mä̧, Dio i̧wȩnȩ ä̧ju̧ku̧ eseunu̧ tteseta'anä̧, 'chu̧ä̧ra̧jü̧ juitta'a ja̧'a̧; a̧'u̧kua̧'a̧tä̧ eseti'ü, kka̧kuä̧mü̧ toäkuäwä ichomȩnä̧, kä'ädi'ätürü wȩnȩkuä̧cha̧'a̧. 14Ja̧'wa̧ta̧nü̧ so̧ä̧'kua 'kä̧tȩ jo̧mȩ ma̧ä̧chi̧nü̧ jä̧ji̧mä̧, Dio i̧wȩnȩmä̧ ttä̧ju̧kua̧'a̧nä̧, ji̧yȩnä̧tä̧ ttü̧jo̧mȩnä̧, 'kuo̧pa̧ja̧'a̧nä̧ tta̧'kua̧ roekuäkuäwänä̧, pärätänä̧, pi̧jä̧ üadiwänä̧, u̧wä̧ju̧ ttiyü juiyünä̧tä̧ ma̧'ä̧mä̧tü̧rü̧ wȩnȩkuä̧cha̧'a̧. 15Ja̧'wa̧ta̧nü̧ rȩjȩ adiwomȩ ma̧ä̧chi̧nü̧ jä̧ji̧mä̧, Dio i̧wȩnȩ tta̧mi̧so'kinä̧ adiu 'chu'ädü ä̧ju̧ku̧, ji̧yȩnä̧tä̧ ukuotü kkä̧nü̧, u̧wä̧ju̧ kku̧nä̧rä̧tü̧rü̧ wȩnȩkuä̧cha̧'a̧.
Ra̧pa̧ra̧nä̧ wȩnȩtü̧ ji'äwinü̧
(Mc 4.21-25)
16Ra̧pa̧ra̧ rȩdȩti̧'i̧pü̧mä̧ 'kä̧nä̧ri̧yu̧ jakuä mü̧'ȩpü̧mä̧ ya̧tȩ'i̧nä̧ kku̧nä̧wo̧kü̧ ja̧'a̧. Ja̧'wa̧ta̧nü̧ cama-ppä̧ dȩa̧'a̧'i̧nä̧ kku̧nä̧wo̧kü̧ ja̧'a̧, ji̧nä̧somä̧ ju'toju jo̧mȩ kku̧nä̧wä̧ dodepätürü tȩya̧u̧ kkȩdȩpü̧nä̧. 17Ja̧'wa̧nü̧ jü̧ta̧'a̧nü̧, ttu̧wo̧jui̧pü̧ juiyünä̧ da̧jä̧rä̧kuä̧wä̧mä̧ juiya'a; ja̧'wa̧ta̧nü̧ i̧jȩkuä̧chü̧ juiyünä̧ ä̧ppü̧tä̧rä̧kuä̧wä̧'i̧nä̧ juiya'a. 18«Ja̧'wa̧nü̧ ja̧'a̧ttü̧, kuä̧ju̧kuä̧tu̧ku̧mä̧ adiu ä̧ju̧kuä̧tu̧kui̧; isopäi'ünä̧ kku̧nä̧rü̧rü̧mä̧ yabonü̧ iyäwäkua'a; ja̧'wa̧ta̧nü̧ jui̧'a̧rü̧mä̧, suro a̧'u̧ku̧nä̧ u̧ju̧nä̧rü̧'i̧nä̧ 'choikuäkua'a.»
Ja̧ju̧'i̧nä̧, i̧jä̧wa̧tü̧'i̧nä̧ Jesú-ru usinä̧tü̧
(Mt 12.46-50; Mc 3.31-35)
19Jesú-ru ü̧jä̧wa̧tü̧'i̧nä̧, ja̧ju̧'i̧nä̧ topü tti̧'chä̧ja̧'a̧; ttü̧ja̧ rü̧ȩnä̧ ttirekua'a ja̧'a̧, churutä tü'künä̧nü̧ topü tti̧'chi̧'ü̧ juiyünä̧ ji̧nä̧u̧. 20Ja̧'wa̧nü̧ ja̧'a̧, ya̧tȩ Jesú-ru ji'äwinü̧:
—Kua̧ju̧'i̧nä̧, kui̧jä̧wa̧tü̧'i̧nä̧ u̧mi̧nä̧ kka̧ku̧ ukuru totta pä'ätü.
21Päku Jesú ädätinü̧:
—Isopäi'ünä̧ Dio i̧wȩnȩ ä̧ju̧ku̧ ukuotätütä ja̧'a̧, cha̧ju̧tü̧mä̧ ja̧'wa̧ta̧nü̧ chü̧jä̧wa̧tü̧mä̧,
Jesú kkä̧rü̧'koppa wirodinü̧
(Mt 8.23-27; Lc 8.22-25)
22Ji̧yȩtȩ mo̧ro̧ Jesú-mä̧ woi'kanä̧ 'cha'ächi'ü pä̧mä̧dü̧ u̧wo̧juȩtä̧u̧rü pä'inü̧:
—Rü̧ä̧ dubora ji̧jä̧ku̧ ti̧'chä̧tu̧kua̧.
Pä̧u̧, kkä'koraku kki'okuächü 'chi̧nä̧tü̧. 23Ja̧'wa̧nü̧ ja̧'a̧ ttüjäwomȩ kkä'kottü Jesú-mä̧ ä'i'äji o'ka'a. Kkä̧rü̧'koppa tawipomȩnä̧, aje rü̧ȩnä̧ ppawina̧'a̧, ttuwe'ka'i̧nä̧ ma̧ä̧chü̧'a̧nü̧tä̧ päi'ünä̧. 24Ja̧'wa̧nü̧ ji̧yä̧u̧ 'chä̧wi̧'ü̧ porädü iku pättinä̧ku̧:
—¡Chu̧ru̧wa̧, Chu̧ru̧wa̧! ¡ma̧'ä̧chä̧tü̧jä̧! pättäku, Jesú-mä̧ ä̧rä̧mi̧'ü̧ kkä̧mä̧dü̧ woäkuäwi'omȩnä̧, kkä̧rü̧'koppamä̧ kkä̧mä̧da̧'a̧ttü̧, aje ppawäja'a'i̧nä̧ o'kajuiyünä̧tä̧ wirochi'ina̧'a̧. 25Ja̧'wa̧nü̧ jä̧ji̧ o'ka'a päinä̧u̧:
—¿Kua̧'kua̧ ku̧wȩnä̧rä̧tu̧ku̧mä̧, toku päi'äjätukuäkuttü?
Pä'anä̧, ye'äjä'kotü, yotukunä̧ pä'äwinä̧tü̧.
—¿Pidemä̧ díjä̧ttü̧, kkä̧rü̧'koppa'i̧nä̧, rü̧ä̧ dubora'i̧nä̧ ukuotäkumä̧?
Gadara rȩjȩ ttü̧ja̧sa̧rü̧ epíritu-tu̧ suropätü kka̧kui̧nä̧tü̧
(Mt 8.28-34; Mc 5.1-20)
26Rü̧ä̧ dubora ji̧jä̧ku̧, Gerasa ttü̧ja̧ tti̧rȩjä̧nä̧, Galirea-tä pä̧tȩkuä̧nü̧ kki̧'o̧mȩ tti̧rȩbȩwi̧'o̧mȩnä̧. 27Jesú-mä̧ woi'kattü rȩjȩra̧'a̧ u̧wä̧mi̧'i̧'o̧mȩnä̧, ya̧tȩ epíritu-tu̧ ttü̧jä̧ku̧, ütawiyäkuttü, ü̧'ka̧tä̧wä̧ta̧'i̧nä̧ jui̧'a̧, isodenä̧'i̧nä̧ kko̧kü̧, wa'are idoriyänä̧tä̧ ä'ä'chü kkä̧'i̧jü̧ ichi'inä̧ku̧. 28Jua̧u̧mä̧, Jesú-ru topo'ü, ä'ka jo̧mȩ iwe'kiyunä̧, pä̧mä̧dü̧, wopinü̧:
—¿Däjé jȩchä̧'i̧jä̧ku̧ttü̧ ukú, mo̧ro̧jä̧ Ru̧wa̧ Dio i̧tti̧rü̧mä̧? Ukuru jä'epüsä, usurä chȩmä̧u̧nä̧ jȩ'ku̧ juiyattü̧ pä'ü. 29Jua'amä̧ epíritu su̧ro̧pa̧rü̧mä̧, jua̧u̧ ku̧jä̧ku̧ttü̧ rä'opächi, pä'ü weäku woäkuäwina̧'a̧. Täkü kko̧ro̧nü̧ jü̧ta̧'a̧nü̧ epíritu su̧ro̧pa̧mä̧, jȩä̧'chi̧nä̧ku̧, ttü̧ja̧mä̧ kärenä̧känä̧, kärenä̧sa̧nä̧'i̧nä̧ ti̧ttä̧dä̧'cho̧mȩnä̧'i̧nä̧ jua̧ro̧kuä̧rü̧ iku, rȩbi̧yu̧ dȩ'a̧ra̧'a̧ku̧ tüipächä̧rü̧nä̧tä̧. 30Ja̧'wa̧nü̧ ja̧'a̧ Jesú-mä̧ jä'epü ä̧ju̧kui̧nä̧ku̧:
—¿Toku mi̧kua̧jä̧ttü̧?
Päku, ädätinü̧:
—Ttümä̧ Legión pä'ü mi̧kua̧sä̧. Jua'amä̧ epíritu suropätü, jua̧u̧nä̧ rekuätü ttü̧ja̧kua̧'a̧ttü̧ pä'inü̧. 31Ja̧'wa̧ta̧nü̧ rü̧ȩnä̧, Jesú-ru ajuäkuäwinü̧, dȩa̧'a̧ku̧ 'kuȩya̧ppa̧ jä̧ju rejura̧'a̧ we'ü iku juiyatü pä'ü. 32Ja̧'wa̧nü̧ ja̧'a̧nä̧, juȩnȩ mü̧ä̧'kanä̧ ku̧chi̧tü̧ rekuätü ttu̧kuȩ kuä̧nü̧ kka̧kui̧nä̧tü̧. Ja̧'wa̧nü̧ ja̧'a̧ epíritu-tu̧ suropätümä̧, juätünä̧ dodettächünä̧ weatü pä'ü rü̧ȩnä̧ jä̧'ȩpä̧ri̧nä̧tü̧. Jä̧ttȩpä̧rä̧ku̧, a̧ pä'ü weinä̧u̧ Jesú-mä̧. 33Weomȩnä̧, epíritu-tu̧ suropätümä̧, jua̧u̧ ttü̧ja̧sa̧ttü̧ rä'opächü ku̧chi̧tü̧nä̧ dodepächinä̧tü̧. Ja̧'wa̧nü̧ pä̧i̧'ä̧u̧, juätü ku̧chi̧tü̧mä̧, mü̧ä̧'ka dȩa̧'a̧ku̧ ma̧'o̧po̧'ä̧chü̧, rü̧ä̧ duboranä̧ a̧'ä̧kuä̧u̧ ikuinä̧tü̧. 34Ja̧'wa̧nü̧ päi'omȩnä̧, ku̧chi̧tü̧rü̧ tta̧'a̧rä̧jä̧tü̧mä̧, juorü tü'ipächü, ütawiyä a̧'u̧ku̧ o̧mȩ'i̧nä̧, rü̧o̧mȩ'i̧nä̧ ji'äwä'chinä̧tü̧. 35Ja̧'wa̧nü̧ ji̧ttä̧wä̧u̧, ttü̧ja̧mä̧ däjé päi'äja pä'ü topü tti̧'chä̧ja̧'a̧mä̧, Jesú ü̧jo̧mȩ tti̧'chi̧'o̧mȩnä̧. Jua̧u̧, epíritu-tu̧ ttü̧jä̧jä̧ku̧ päjimä̧, adiwächäjitä, ü̧'ka̧tä̧wä̧ta̧ 'ka̧tü̧ rü̧tä̧wa̧tä̧, Jesú ü̧jä̧pü̧ jo̧mȩ ü̧'a̧'a̧ topü, rü̧ȩnä̧ ye'inä̧tü̧. 36Ja̧'wa̧nü̧ ja̧'a̧, jua̧u̧ ttü̧ja̧sa̧rü̧, juätü epíritu-tu̧ttü̧ ü̧ji̧pü̧nä̧ 'kuäopa'a tottäji, ttü̧ja̧rü̧ ji'äwinä̧tü̧. 37Ja̧'wa̧nü̧ jȩä̧ji̧yä̧u̧, ye'i'äjä'kotü, Gerasa rȩjȩ jäyänä̧ kka̧kuä̧tü̧'i̧nä̧, ttü̧ja̧mä̧ o'katoi'ünä̧tä̧ Jesú-ru tti̧rȩjä̧ttü̧ räopächünä̧ pättinä̧ku̧. Ja̧'wa̧nü̧ we'ü ttikuäku Jesú-mä̧ woi'kanä̧ pä̧mä̧dü̧ ppa̧'ä̧chi̧nü̧. 38Ja̧'wa̧nü̧ i̧wi̧'a̧'a̧, epíritu-tu̧ suropätü ttü̧ja̧kuä̧jä̧ku̧ päjimä̧, Jesú-ku kueächa pä'ü, oiparü pä'ü ajuäkuäwinü̧, ja̧'wa̧nü̧ ajuäkuäwa'anä̧, Jesú-mä̧ o'ipü jui'ü, we'ü iku päinä̧ku̧: 39—Kuojusodera̧'a̧tä̧ ppa̧'ä̧chi̧, O'kajuiyünä̧ Dio ukuru jȩä̧ji̧mä̧ jikuäwäkua'anü̧.
We'ü ikuäjäkumä̧ i̧wi̧'ä̧ji̧'ka̧ ütawiyä o'kajuiyünä̧ ji'äwä'chinü̧, Jesú jȩä̧ji̧mä̧.
Na̧'ä̧chä̧ju̧ru̧'i̧nä̧, Jairo ittijuru'i̧nä̧ aditü ikuinü̧
(Mt 9.18-26; Mc 5.21-43)
40Ja̧'wa̧nü̧ jä̧ja̧'a̧ Jesú-mä̧ Galirea-ra̧'a̧ ppa̧wä̧'chi̧'o̧mȩnä̧ ttü̧ja̧ rekuätü eseäkuäwinä̧tü̧ o'katoi'ünä̧ jua̧u̧ru̧ tta̧ttä̧ra̧ja̧'a̧ ja̧'a̧ttü̧. 41Ja̧'wa̧nü̧ ja̧'a̧, Jairo pä'ü mi̧kua̧, sinagoga isode u̧ru̧wa̧ ichi'ü, Jesú ü̧jä̧pü̧ jo̧mȩ ma̧'ä̧mü̧ ojusodenä̧ doächiyarü pä'ü ajuäkuäwinä̧ku̧. 42Jua'amä̧ ittiju yaju äkuaju, a̧'ȩmä̧ doce-nü̧ a̧'ȩtä̧ waju, 'korupäji'ü'anü̧ ji̧yä̧ku̧. Jua'a i̧'cho̧mȩnä̧, ttü̧ja̧ ttirekua'a ppi̧ä̧chä̧rü̧nä̧ jȩtti̧nä̧ku̧. 43Ja̧'wa̧nü̧ jo̧mȩ 'kä̧tȩnä̧, yajute doce-nü̧ años jo̧mȩnä̧ ppü'ottü usurä ȩmä̧wä̧'i̧ju̧, jawapü adikuä isotürü, kkiäre pärätä mitäu o'katoi'ünä̧rü̧tä̧ wȩjä̧rä̧kuä̧wa̧'a̧nä̧'i̧nä̧, yabokutä juoächä'ijäkua'i̧nä̧ kki̧nä̧ju̧. 44Juajumä̧, Jesú aboja̧'a̧ku̧nä̧ ichi'ü, wä̧mȩnä̧ ü̧'ka̧tä̧wä̧ta̧ ä'ko̧ta̧ mȩjo̧mȩnä̧ kkukuojamä̧ ojuchi'inä̧kua̧. 45Ja̧'wa̧nü̧ ja̧'a̧, Jesú-mä̧ pä'inü̧:
—¿Díjä̧ttü̧ ttürü mȩ'ä̧ji̧mä̧? päomȩnä̧, ya̧tȩ'i̧nä̧ ttädätiyokoku, Peduru-mä̧ pä'inü̧, ja̧'wa̧ta̧nü̧ kkorotü'i̧nä̧ pä'inä̧tü̧:
—Chu̧ru̧wa̧ ttü̧ja̧ ttirekua'a, ppi̧kuä̧chä̧rü̧nä̧, jȩtta̧'a̧mä̧, toku pä'ü: ¿Díjä̧ttü̧ ttürü mȩ'ä̧ji̧mä̧ päkua'ajä̧ttü̧?, 46Ja̧'wa̧nü̧ pätta'anä̧, Jesú-mä̧ yabonü̧ pä'inü̧:
—Ya̧tȩ mȩä̧jä̧ku̧sä̧, chu̧wo̧juä̧u̧nä̧ ttüttü chujuru räopächäja'a. 47Ja̧'wa̧nü̧ ja̧'a̧, kkä̧ppü̧tä̧rü̧ juiyäkua, ä'ka jo̧mȩ tti̧'ä̧wäyaju 'chä̧wi̧'ü̧ kkiwe'kiyunä̧ pä̧mä̧dü̧, ttü̧ja̧ o'katoi'ünä̧ ttä'ka jo̧mȩttü̧ ji'äwinä̧ju̧ ja̧'wa̧nü̧ jä̧kua̧sä̧ jȩpä̧jä̧ju̧ pä'ü ja̧'wa̧ta̧nü̧ yotäku kku̧'i̧pä̧ja̧'a̧'i̧nä̧ ji'äwinä̧ju̧. 48Juäjuru, Jesú-mä̧, pä'inü̧:
—Chittiju, kua̧'kua̧ ku̧wȩnä̧ra̧'a̧ttü̧ pi̧'ä̧ju̧jä̧; wȩnȩ juiyünä̧tä̧ täi.
49Jesú-mä̧ ja̧'wa̧nü̧ ukuoku ü̧ja̧'a̧nä̧, ya̧tȩ Jairo-rü ojusodera̧'a̧ttü̧ ichi'ü ji'äwinü̧:
—Kuittijumä̧, täkü 'koru pä'i'äjäju; täkü wo̧juȩkuä̧ i̧sa̧rü̧mä̧ icha pä'ümä̧ jȩ'kuä̧. 50Ja̧'wa̧nü̧ jiäwa'a ä̧ju̧ku̧ Jesú-mä̧ pä'inü̧:
—Yekuekuä; suro esetütä eseti, kueseta'anä̧tä̧'i̧nä̧ kkü̧'i̧pi̧yä̧kua̧jä̧. 51Isodera̧'a̧ tti̧'chi̧'o̧mȩnä̧, kkorotümä̧ dottächüjuiyünä̧, suro Peduru-kutä, Sa̧ti̧a̧ku̧ku̧tä̧, Ju̧a̧-kutä ja̧'wa̧ta̧nü̧ ji̧'ki̧chawaju kka̧ju̧ku̧tä̧, kkä'okutä do'ädinü̧. 52Ja̧'wa̧nü̧ ja̧'a̧ o'katoi'ünä̧ juäjuru rettü ajuäkuäwinä̧tü̧. Ja̧'wa̧nü̧ ji̧yä̧ku̧, Jesú päinä̧u̧:
—Kuajuäkuäwätukuä; ji̧'ki̧chawajumä̧, 'korujuo'ächokoju päjäju ja̧'a̧, suro ä'ütä ä'äju. 53Päomȩnä̧, ttü̧ja̧mä̧ ya̧ttä̧wä̧'chi̧nä̧ku̧, jua'amä̧ 'korujuo'ächäjäju pä'ü ttu̧wo̧jua̧'a̧ttü̧. 54Ja̧'wa̧nü̧ ja̧'a̧nä̧, Jesú-mä̧ kku̧mü̧nä̧ äräbe'ü, wopi'ünä̧nü̧ päinä̧kua̧:
—¡Mü̧ä̧yaju, ä̧rä̧mi̧'i̧! 55Päomȩnä̧, kka̧'kua̧rü̧ ppa̧wä̧chi̧'a̧'a̧ttü̧, yotäku ä̧rä̧mi̧'ä̧ju̧ru̧, Jesú-mä̧ kku̧kuȩ ttiyaju pä'ü weinä̧kua̧. 56Ja̧'wa̧nü̧ päia'a topü kkä'o'i̧nä̧, kka̧ju̧'i̧nä̧, too to̧pä̧ri̧nä̧tü̧; ja̧'wa̧nü̧ ja̧'a̧nä̧ Jesú-mä̧ ya̧tȩrü̧'i̧nä̧, jua̧u̧ 'kuäopäjimä̧ jittäu juiyünä̧tä̧ we'ü u̧ju̧ni̧nä̧u̧.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela