Лука 14
14
Иисус пчкафтсы сяряди алять ваймамань шиня
1Весть, ваймамань шиня Иисус сась фарисейхнень оцюняснон пяли ярхцама. Сембе, кит ульсть тоса, ванцть мельганза. 2Иисусонь каршеса озафоль сяряди ломань, конань марнек ронгоц ульсь таргозьф. 3Иисус шарфтсь фарисейхненди и койти тонафтыхненди и кизефтезень: «Мярьгондеви пчкафнемс ваймамань шиня али аф?» 4Синь ашесть кашторда. Эста Иисус токафтозень кядензон сярядити, пчкафтозе и нолдазе сонь. 5Сяльде Сон мярьгсь тостотненди: «Ёткстонт киньге цёрац али букац прандяряй эшис, кали аф эстокиге таргасы, улендяряза тя шись ваймамань ши?» 6Тянь каршес синь ашесть му валхт.
Тяк оцюлгофне пряцень
7Иисусонь сельмопрязонза повсь, кода инжикс тертьфне кочксесть эстейст шра ваксса сембода цебярь васттнень. И Сон азондсь тейст валвеляфкс: 8«Мзярда тонь терттядязь рьвяямань илас, тят озсе сембода цебярь вастс. Кда кивок тертьфнень ёткста лувови тондедот оцю инжикс, 9эста кудазорсь, кона тердедязь тоньге и соньге, малады и мярьги тейть: "Шамтк тейнза тя вастть"; и эста визьксонь марязь, тейть сави озамс сембода кальдяв вастти. 10Мзярда тонь терттядязь инжикс, сак и озак мекольце вастти, катк серьгядице малады и мярьги: "Ялгай, озак сяда инголи"; эста кеподеват лядыкс инжихнень сельминголе. 11Эрсь, кие оцюлгофнесы эсь прянц, ёмлалгофтови, а кие ёмлалгофнесы эсь прянц, ся оцюлгофтови».
12Иисус мярьгсь кудазорти: «Мзярда срхкафнят шиньгучкань али илядень ярхцама, тят терне аф ялгат, аф братт, аф эсь юромоннет, аф козя шабрат, сяс мес тяда меле синьге терттядязь тонь и тяфта пандсазь пароцень. 13Мзярда тият оцю ила, тертть ашуфт, кядьфтомот-пилькфтомот, шаморхт, сокорхт, 14эста улят павазу, сяс мес тейст аф пандови пароце. Тя пандови тейть, мзярда видексшинь ломаттне вельмафтовихть кулофста».
Валвеляфкс оцю каванямань колга
(Матф. 22:1-10)
15Тянь кулемста инжихнень ёткста фкясь мярьгсь Иисусонди: «Павазу ся, кие Шкаень Оцязорксшиса суски кшида!»
16Иисус мярьгсь тейнза: «Фкя ломанць тись оцю каваняма и тердсь лама инжи. 17Мзярда сась шра ваксс озама пингсь, сон кучезе покодиенц тертьфненди азомонза: "Сада, сембось ни анок". 18И тяса синь сембе фкя лаца кармасть вешендема аф молеманди туфталхт. Васенцесь мярьгсь тейнза: "Рамань мода, эряви молемс ваномонза; эняльдян, тят кяжия". 19Омбоцесь мярьгсь: "Рамань кемонь букат и молян тевса варжамост; эняльдян, тят кяжия". 20Колмоцесь мярьгсь: "Мон рьвяянь, сяс аф молеван".
21Мрдамста покодиец тянь азондозе азоронцты. Эста азорсь кяжиясь и мярьгсь покодиенцты: "Архт куроконе ётак ошень ульцятнень и курнятнень ланга, и вятить сей ашуфнень, кядьфтопнень-пилькфтопнень, шаморхнень и сокорхнень". 22Покодиец мрдась и мярьгсь: "Азор, тиф кода мярьготь, и нинге лядсть вастт". 23Азорсь мярьгсь покодити: "Архт, ётак кигава и перяфкснень кувалма, кошардыть сембонь самс, пяшкодеза кудозе. 24Корхтан тейнть: кивок инголи тертьфнень эзда аф озай шразень ваксс! Вдь лама тертьфта, но кржа кочкафта"».
Иисусонь мельге молемать питнец
(Матф. 10:37,38; 5:13; Марк 9:50)
25Иисусонь мархта мольсь лама ломань. Сон шарфтсь тейст и мярьгсь: 26«Кие сашенды Тейне, а Мондедон пяк кельгсыне алянц и тядянц, рьванц и идензон, брадонзон и сазоронзон, нльне эсь эряфонцка, ся аф улеви Тейне тонафникс; 27кие аф кандсы эсь крёзонц и аф моли Монь мельган, ся аф улеви Тейне тонафникс.
28Кие эздонт, ёрамок путомс башня, васенда аф озай и аф лувсыне карьхцнень, саты али аф ярмакоц сонь аделамс. 29Афток, путондяряй кудъюр, а башнясь аф стяфтови, эста тянь няиенза ушедыхть рахсемонза 30и корхтама: "Вов ломань, ушедсь тев и аделамонза ашезь машта".
31Оцязорське, кона срхкась лия оцязоронь каршес тюрема, улема, васенда озай и арьсесы: кирди сон али аф кемонь тёжянь ушманонзон мархта сянь каршес, кие сай лангозонза комсь тёжяньца. 32Кда аф кирди, эста кучи тейнза ломатть ётконь ладяма, мзярс ся нинге ичкозе. 33Тяфта эрсь эздонтка, кда аф аерды сембонц эзда, мезец ули, аф улеви Тейне тонафникс.
34Салсь – цебярь парши, аньцек юмафтондярясы таньфонц, кода тисак меки сонь салукс? 35Эста сон мезендинге аф эряви, нльне модань петемска аф ладяй. Сонь ёрдасазь ушу. Кинь улихть кули пиленза, ся катк кульсы!»
Currently Selected:
Лука 14: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
