Матфей 11
11
Иоанн Кстиндайть кизефксоц Иисусти
(Лук. 7:18-35)
1Мзярда Иисус аделазе тонафтоманц кемгафтува тонафниензонды, Сон тусь тонафтома и Пара кулять кандома сяда тов лия ошева.
2Иоанн пякстамгудса кулезе Христость тевонзон колга и кучезень эсь тонафниензон кизефтемонза Сонь: 3«Тон Ся, кинди сама, али учемс тейнек киньге лиянь?» 4Иисус мярьгсь каршезост: «Арда, азондость Иоаннонди, мезе кульхтяда и няйхтяда:
5сокорхне няихть
и шаморхне якайхть,
наксафты урмаса сярядихне аруякшнихть
и пяряфне#11:5 пяряв – глухой кулихть,
кулофнень вельмафнесазь
и ашуфненди пачфневи Пара кулясь.
6Павазу ся, кие аф юмафтсы Тейне кемамать».
Иисус азонды Иоанн Кстиндайть колга
7Мзярда Иоаннонь тонафниенза тусть, Иисус кармась корхтама ломаттненди Иоаннонь колга: «Мезень ванома тинь якаде шавмодав? Нюдить#11:7 нюди – тростник, конань шерьфтьсы вармась? 8Ина мезень ванома якаде тинь? Арьседе няемс козя щамса щаф ломань? Козя щамса якайхне – оцязоронь кудсот. 9Ина мезень ванома якаде тинь? Пророконь? Виде, Мон азса тейнть, сон пророкта оцю. 10Сон ся, конань колга сёрматф:
"Тонь инголет Мон кучса кулянь кандыезень,
и сон анокласы Тейть кить"#11:10 Малахия 3:1.
11Видеста корхтан тейнть: сембе шачфнень ёткса ашель Иоанн Кстиндайда оцю ломань, но сембода ёмлась Менелень Оцязорксшиса сондедонза оцю. 12Иоанн Кстиндайть пингста сявомок тячиень шить самс Менелень Оцязорксшить лангс врьгяткшнихть, и врьгятихне сявсазь сонь. 13Вдь сембе пророкне и койсь Иоаннда инголи пророчендасть Менелень Оцязорксшить колга, 14и Иоанн, кда мяленте кемамс – тя Илиясь, конанди эрявсь самс. 15Кинь улихть пиленза, ся катк кульсы!
16Кинь лангс шарыхть тя пингонь ломаттне, Монь койсон? Синь кода шабат, конат озафт мишендема-рамсема вастова и фкя-фкянди пешкоткшнихть: 17"Минь мораме тейнть нюдиса, и тинь ашеде кшти, минь мораме тейнть явсемань морхт, и тинь ашеде аварде". 18Сась Иоанн, сон аф ярхцай, аф сими винада, и ломаттне корхтайхть: "Эсонза кяжи ваймопожф". 19Сась Ломанень Цёрась, ярхцай и сими, синь корхтайхть колганза: "Ванода, вов тетькись и симилась, каяфксонь кочкайхнень и лия пежуфнень ялгасна". Но Шкаень смузьшить видешиц няфтеви тевса».
Иисус апрякасыне Галилеянь ошнень Шкайти аф шарфтоманкса
(Лук. 10:13-15)
20Сяда меле Иисус кармась апрякамост ся ошнень, конатнень эса Сон тись сембода лама вии тевда, но конат сякокс ашесть шарфта Шкайти.
21«Кальдяв тейть, Хоразин ош! Кальдяв тейть, Вифсаида ош! Кда ся вии тефне, конат няфтьфтольхть тинь ётксонт, улельхть няфтьфт Тирса и Сидонца, ся ошэряйхне ризнамань щамса и кулуса почетфста кунаркиге ни шарфтольхть эсь пежеснон эзда. 22Сяс корхтан тейнть: Тирти и Сидонти судонь шиня ули сяда тёждя тинь корязонт.
23И тон, Капернаум, арьсят, менели кепоттядязь? Аф, тон аду улят ёрдаф. Кда Содомса улельхть тифт ся вии тефне, конат тифтольхть тонь ширесот, эста сон ванфтоволь тячиень шис. 24Корхтан тейнть: Содом масторти судонь шиня ули сяда тёждя тонь корязт».
Шкайсь панжеви ломаттненди Цёрать вельде
(Лук. 10:21-22)
25Меле Иисус мярьгсь: «Аляй, менельть и масторть Азороц! Шнате Тонь сянкса, мес Тон кяшить тянь смузюфнень и шарьхкодихнень эзда и панжить тянь ёмла иттненди. 26Виде, Аляй, вдь тяфтама ульсь Тонь пара мяльце.
27Алязе семботь максозе Монь кядялон. Кивок аф содасы Цёрать Аляда башка, и кивок аф содасы Алять Цёрада башка и сяда башка, кинди Цёрась ёрасы панжемс Сонь».
Иисус максы ваймама
28«Сада Тейне сембе, конат сизефт покамать и стака сталмонь кандомать эзда, и Мон ваймафттядязь тинь. 29Щафтость Монь ашкозень#11:29 ашка – ся, мезе повфневи кильдевить, алашать кргас; хомут, ярмо, иго эсь лангозонт и тонадода эздон, сяс мес Мон сятяван и ляпе седиян. Тяфта мутада ваймонтенди ваймама васта. 30Вдь Монь ашкозе аф стака и канксозе тёждя».
Currently Selected:
Матфей 11: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
