Матфей 19
19
Кизефкс полада явомать колга
(Марк 10:1-12)
1Мзярда Иисус шумордазе корхтаманц, Сон кадозе Галилеять и тусь Иорданть фтала ащи Иудеянь мастору. 2Мельганза мольсь лама ломаньда, и Сон синь тоса пчкафтозень.
3Нажядсть Тейнза фарисейхне. Синь ёразь кундамс Сонь кизефкс вельде, мярьгсть: «Мярьгондеви-аф аляти койть коряс кодамовок туфталонкса явомс эсь рьванц мархта?» 4Иисус мярьгсь каршезост: «Дяряй тинь ашесть лувонда Сёрматфксста: Ся, кона семботь тиезе, ушетксста тиезень алять и авать, 5и мярьгсь: "Сяс кадсы ломанць алянц мархта тядянц и педи эсь рьванцты, и кафттне арайхть фкя ронгокс". 6Лисенди, синь эздост ни аф кафта, а фкя. Стане, мезе Шкайсь сотсь марс, сянь ломанць тязазе явфне».
7Фарисейхне тага корхтайхть Тейнза: «Мес эста Моисеень коенц коряс мирдти мярьгондеви явомс рьванц эзда, кда максы рьванцты явомать колга кагод?» 8Иисус тейст корхтай: «Моисей мярьгсь тейнть явондомс рьвантень эзда сяс, мес тинь седиенте пяк калготт. А васенда тяфта ашель. 9Мон мярьган тейнть: ся, кие яви рьванц мархта аф полань полафтоманкса, а лия кодамовок туфталонкса, и рьвяяй лиянь лангс, ся ули полань полафтыкс, тяконь лаца явф авань лангс рьвяяйське – полань полафты».
10Тонафниенза корхтайхть Тейнза: «Кда алясь тяфта сотф рьванц мархта, эста сяда цебярь улель аляти ёфси аф рьвяйсемс». 11Иисус каршезост корхтай: «Аф сембонди ладяйхть ня валне, аньцек сятненди, кинди тя максф. 12Кой-кона алятне шачсть аф рьвяяйкс; лиятнень, кепотьксонди, евнухнень#19:12 евнух – петьф аля, кона покодсь оцязоронь кудса; кастрат, скопец, тяфтамкс тиезь ломаттне; а улихть стаптка, конат аф рьвяяйхть Менелень Оцязорксшити покодеманкса. Кинди тя тиеви, ся катк тяфта тии».
Иисус бславасыне шабатнень
(Марк 10:13-16; Лук. 18:15-17)
13Вятсть Иисусти шабат и эняльдсть Тейнза путомс лангозост кядензон и озондомс инксост, но тонафнихне карнезь шабань вятихнень. 14Эста Иисус тонафнихненди мярьгсь: «Нолдасть шабатнень и тяда шорсе тейст сашендомс Тейне, сяс мес тяфтамста ащи Менелень Оцязорксшись». 15И бславаманди путозень шабатнень лангс кядензон. Сяльде тусь тоста.
Козя од ломань
(Марк 10:17-31; Лук. 18:18-30)
16Весть Иисусти сась фкя ломань и кизефтезе: «Тонафты! Кодама пара тев тейне эряви тиемс пефтома эряфонь сатоманкса?» 17Иисус корхтай тейнза: «Мес Монь кизефнесамак пара тевонь колга? Шкайсь ськамонза цебярь. Кда ули мяльце сувамс пефтома пингонь эряфти, эста ванфтыть кошардомвалхнень». 18Ся кизефтезе: «Конатнень?» Иисус мярьгсь каршезонза: «Тят шавонда; тят полафне пола; тят салсе; тят васькафне лиянь лангс; 19ванк аляцень и тядяцень мяльснон; и кельк маластоцень, кода эсь пряцень». 20«Мон сембонь тянь ванфтса одкс пингстонкиге, – мярьгсь каршезонза од ломанць, – мезе нинге аф сатни тейне?» 21Иисус мярьгсь тейнза: «Кда мяльце улемс сембе ширде цебярькс, эста архт, мик сембе уликс-пароцень и ярмакть явк ашуфненди. Эста козяшице кармай улема менельса. Сяльде сак и мольхть Монь мельган». 22Мзярда од цёрась кулезе тянь, сон пичедезевсь и тусь, сяс мес ульсь пяк козя.
23Эста Иисус мярьгсь Эсь тонафниензонды: «Видеста корхтан тейнть: стака козяти сувамс Менелень Оцязорксшити. 24И нинге мярьган тейнть: сяда тёждя ишимти ётамс салмокс пиленява, а аф козяти сувамс Шкаень Оцязорксшити». 25Тянь кулемста тонафниенза пяк дивандазевсть и кизефтезь: «Кие ина эста идеви?» 26Иисус варжакстсь лангозост и мярьгсь тейст: «Ломанти тя аф тиеви, а Шкайти тиеви сембось».
Мезе максови Иисусонь мельге молеманкса?
27Эста Пётр мярьгсь Иисусти: «Кулхцонтт, минь семботь кадоськ и туме мельгат, мезе тейнек тянкса максови?» 28«Видеста корхтан тейнть, – мярьгсь Иисус, – мзярда одкстоми марнек масторлангсь и Ломанень Цёрась озай оцязоронь иневалда вастозонза, эста тиньге, кит туде Монь мельган, озатада оцязоронь кемгафтува васттненди судендамс Израильть кемгафтува юромонзон. 29Эрти, кие кадсы Монь инксон эсь кудонц, али брадонзон, али сазоронзон, али алянц, али тядянц, али рьванц, али шабанзон, али паксянзон, максови сядоксть сяда лама и сон сувафтови пефтома пингонь эряфс. 30Но ламотне, конат ульсть васенцет, арайхть мекольцекс, и мекольцетне – васенцекс».
Currently Selected:
Матфей 19: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
