Лука 12

12-тӥ ЛЮКЕТ

1Сюрсъёсын калык люкаськыса, огзэс огзы ӝиптыса улон дыръя нырысь ик Со Аслаз дышетскисьёсызлы вераны кутскиз: «Чаклаське фарисейёслэн шӧмзылэсь – чеберъяськонлэсь. 2Нокыӵе но ватӥськемлэн усьтӥськытэк кылемез уг луы, лушкемлыклэн но шарае потытэк кылемез уг луы. 3Соин ик, мае тӥ пеймытын верады, югытын кылӥськоз; мар верады пеле корка пушкын, со липет йылъёсысен ялэмын луоз. 4Тӥледлы, Аслам эшъёсылы, верасько: эн кышкалэ мугорез виисьёслэсь, нош бӧрысь номыр но мукетсэ лэсьтыны быгатымтэослэсь. 5Но верало тӥледлы, кинлэсь кулэ кышканы: кышкалэ Солэсь, Кин вием бераз кысылӥсьтэм тыл пӧлы куштыны быгатэ. Зэм, тӥледлы верасько: Солэсь кышкалэ. 6Вить пичиесь тылобурдоос уг-а вузасько кык ассариен? Одӥгез но соос пӧлысь Инмар дорын вунэтэмын ӧвӧл. 7Нош тӥляд йырысьтыды йырсиосты но ваньмыз лыдъямын. Озьыен, эн кышкалэ: тӥ тросэзлэсь векчи тылобурдоослэсь дуноесьгес. 8Тӥледлы верасько: Монэ тодэмзэ адямиос азьын ватытэк верась котькуд муртэ Адями Пи но Инмарлэн Кылчинъёсыз азьын тодэмзэ ватытэк вералоз; 9нош кин калык азьын Мынэсьтым куштӥськиз ке, со но Инмарлэн Кылчинъёсыз азьын куштэмын луоз. 10Кин Адями Пи вылэ урод кыл вераз ке, солэн сьӧлыкез куштӥськоз; нош кин Святой Дух вылэ урод кыл вераз ке, солы уз куштӥськы. 11Тӥледыз сӥнагогаосы, кузёйыръёс, властьёс азе вайизы ке, эн сюлмаське, кызьы ответ сётом яке мар вералом шуыса. 12Уго соку ик тӥледыз Святой Дух дышетоз, мар вераны кулэ».

13Калык пӧлысь кин ке но Солы шуиз: «Дышетӥсь! Вера мынам братэлы, ваньбурез монэн шори мед люкоз шуыса». 14Нош Иисус шуиз: «Адями! Кин Монэ тӥледыз судить карыны яке люкыны пуктӥз?» 15Соку соослы шуиз: «Чаклаське, утиське мылкыддэс узырлык люканлы сётонлэсь, уго адямилэн улонэз ваньбурезлэн пачылэз бордысь уг поты ук». 16Соослы мадён вераз: «Одӥг узыр муртлэн бусыяз удалтэм ю-нянез вылэм. 17Ас понназ ачиз малпаськем: ”Мар мыным кароно? Нокытчы ни мыным емышъёсме тырыны”. 18Соку со шуэм: ”Тани мар каро: кеносъёсме сэртто но бадӟымесьёссэгес пукто, отчы вань ю-няньме, ваньзэ ваньбурме люкало. 19Но лулылы шуо: ”Лулы! Трос аръёслы тырмымон трос ваньбуред кылле: шутэтскы, си, ю, шулдыръяськы”. 20Нош Инмар солы шуэм: ”Эй, нодтэм! Та уе тынэсьтыд лулдэ басьтозы; кинлы бен кылёз тынад та дасямед?” 21Инмар азьын узырлык люкатэк аслыз узырлык люкасен озьы луэ». 22Аслаз дышетскисьёсызлы вераз: «Соин ик тӥледлы шуисько: эн сюлмаське, лулды понна мар сиём, мугорды понна мар дӥсялом шуыса: 23лул бадӟымгес сиёнлэсь, нош мугор – дӥськутлэсь. 24Кырныжъёс шоры учке ай: соос уг но кизё, уг но арало; ӧвӧл соослэн ваньбур возёнзы но, кеносъёссы но, нош Инмар соосты сюдэ. Кӧнялы тӥ умоесьгес тылобурдоослэсь? 25Сюлмаськыса но кин тӥ пӧлысь быгатоз одӥг гырпумлы ке но мугорзэ будэтыны? 26Озьыен, таӵе пичизэ но лэсьтыны уд быгатӥське ке, мар мукетыз сярысь сюлмаськиськоды? 27Учке ай лилия сяськаос шоры, кызьы соос будо: уг но ужало, уг но черсо. Но тӥледлы верасько, Соломон туж дано дыръяз но таос пӧлысь одӥгзы кадь но ӧз дӥсяськылы. 28Бусыысь турынэз но, кудӥз туннэ вань, нош ӵуказе гуре куштэмын луоз, Инмар озьы дӥся ке, эшшо но умойгес уз-а дӥся тӥледыз, ӧжыт оскисьёс? 29Мар тӥледлы сиёно, мар тӥледлы юоно шуыса эн утчалэ, эн но сюлмаське, 30малы ке шуоно ваньзэ тае та дунне адямиос утчало. Нош тӥляд Атайды тодэ, тӥледлы со кулэ шуыса. 31Тужгес но Инмар Эксэйлыкез утчалэ, соку ваньмыз таос но тӥледлы сётэмын луозы. 32Пичи уллё, эн кышка! Уго тӥляд Атайды мылкыд кариз тӥледлы Эксэйлык сётыны. 33Юртъеръёстэс вузалэ но кураськисьёслы сёткалэ. Асьтэлы пӧсьтӥсьтэм пуйыос, кулэсмисьтэм ваньбур Инме дасялэ, кытчы лушкаськись но матаз уг мыны, кей но уг сиы. 34Уго кытын тӥляд ваньбурды, отын ик луоз сюлэмды но.

35Кусъёсты еэн керттэмын медло, югыт сётӥсьёсты – ӝуасесь. 36Тӥ но сюанысь ас кузёзылэсь бертэмзэ возьмась адямиос кадесь луэлэ: бертыса йыгаськиз ке, со куспын ик солы мед усьтоды. 37Кузёзы бертыкуз ляльчиоссэ сак улыкузы учыртылӥз ке, шудоесь соос. Зэм ик тӥледлы верасько, со путозэ думоз но соосты ӝӧк сьӧры пуктылоз, доразы лыктоз но соосты утялтыны кутскоз. 38Уйшоре яке ӵук ӟардон азьын лыктыса, та сямен ик соосты шедьтӥз ке, шудоесь со ляльчиос. 39Тӥ тодӥськоды ук, юртлэн кузёез лушкаськисьлэсь кыӵе часын лыктэмзэ тодысал ке, сак улысал, юртаз гудӟиськыса пырыны ӧй лэзьысал. 40Тӥ но дась луэ, Адями Пи малпамтэ часады лыктоз уго». 41Соку Солы Петр шуиз: «Кузё-Инмаре! Милемлы-а та мадёнэз вераськод яке ваньмызлы-а?» 42Кузё-Инмар шуиз: «Кин оскиськымон но визьмо юртэн кивалтӥсь, кудзэ кузё медоосызлы нянь пайзэс ас дыраз мед сётъялоз шуыса пуктӥз? 43Тазьы ужаса улон дыръяз кузёез ас ляльчизэ учыртӥз ке, шудо со ляльчи. 44Зэм ик тӥледлы верасько: быдэс юртъерезлы сое йыр карыса пуктоз. 45Нош со ляльчи аслаз сюлмаз шуиз ке: ”Ӝоген уз берты ай мынам кузёе” но кутскоз медоосты, медо нылкышноосты жугыны, сиыса-юыса, кудӟытозяз вина юыса улыны. 46Соку та ляльчилэн кузёез солэн возьмамтэ нуналаз, малпамтэ часаз вуоз но сое ӵогыса куштоз, осконтэк улӥсь муртъёсын огкадь курадӟон интые куштоз. 47Ас кузёезлэсь эриксэ тодӥсь но солэсь эриксэ быдэсъясьтэм ляльчи, кудӥз дась ӧй вал, зол жугемын луоз. 48Нош кудӥз тодытэк жугымон уж лэсьтӥз, ӧжытгес жугемын луоз. Котькинлэсь но, кинлы трос сётэмын, трос ик куриськоз но; кинлы трос оскемын, солэсь тросгес юаськоз но. 49Музъем вылэ тыл ӝуатыны Мон лыктӥ, кыӵе Мынам потэ, со тыл мед ӝуатскысал ни шуыса! 50Пылатонэн Мон кулэ пылатӥськыны. Та быдэсмытозь кыӵе Мон курадӟисько! 51Малпаськоды, Мон музъем вылэ тупаса улон сётыны лыктӥ? Ӧй. Тӥледлы верасько: люкиськыса улон вайыны лыктӥ. 52Табере одӥг коркась вить муртъёс люкиськыны кутскозы: куинез кыкезлы пумит, нош кыкез куинезлы пумит. 53Атаез пиезлы пумит луоз, нош пиез – атаезлы; анаез – нылызлы, нылыз – анаезлы; анайзы – кенэзлы, нош кензы анайзылы пумит луоз». 54Калыклы тазьы вераз: «Шундыпуксёнысь ӝутскись пилемез адӟиськоды ке, соку ик шуиськоды: ”Зор луоз” – озьы ик луэ но. 55Лымшорысь тӧл пельтэ ке, шуиськоды: ”Пӧсь луоз”. Озьы ик луэ но. 56Чеберъяськисьёс! Музъемлэсь но инлэсь ымнырзэс тодманы быгатӥськоды, нош та вадесэз кызьы уд тодмаське? 57Малы тӥ асьтэя но уд чаклаське мар луыны кулэез? 58Сюрес кузя кузёйыр доры вожвылъяськись муртэныд мыныкуд, тыршы солэсь мозмытскыны: со тонэ судья доры медаз вайы, нош судья тонэ курадӟытӥсь кие медаз сёты, нош курадӟытӥсь тонэ пытсэтэ медаз кушты шуыса. 59Тыныд верасько: берпум копейкадэ сётытэк, отысь уд поты».

Currently Selected:

Лука 12: УДМБИБ

Highlight

Copy