Лука 23

23-тӥ ЛЮКЕТ

1Соос ваньзы султӥзы но Иисусэз Пилат доры нуизы. 2Сое янгыше уськытыны кутскыса шуизы: «Ми адӟимы, кызьы Со калыкмес сура-пожа, кесарьлы выт тырыны уг лэзьы, Ассэ Христос Эксэй шуэ». 3Пилат Солэсь юаз: «Тон иудейёслэн Эксэйзы-а?» Иисус солы ответ сётыса шуиз: «Тон шуиськод». 4Пилат архиерейёслы но, калыклы но шуиз: «Та Адямилэсь мон нокыӵе но шексэ уг шедьтӥськы». 5Нош соос асьсэлэн кыл вылазы эшшо но зол сылыса веразы, быдэс Иудеяетӥ, Галилеяысен кутскыса та интыозь, дышетыса ветлэ, Со калыкез огыр-бугыр каре шуыса. 6Галилея сярысь кылыса, Пилат юаз: «Со Галилеяысь мурт шат?» 7Иисус Иродлэн ёросысьтыз шуыса тодӥз но Сое Ирод доры ыстӥз, со но та нуналъёсы Иерусалимын вал. 8Иисусэз адӟыса, Ирод туж шумпотӥз, уго кема дыр ӵоже ини Сое адӟемез потыса улэ вал, малы ке шуоно Со сярысь трос кылэмез вал ини, нош озьы ик Солэсь кыӵе ке но паймымон ужзэ адӟыны оскиськиз. 9Иисуслы трос юанъёс сётъяз, нош Со юанэзлы чик но ответ ӧз сёты. 10Архиерейёс, книга тодӥсьёс сылӥзы но кужмысь Сое янгыше уськытыны выризы. 11Нош Ирод аслаз солдатъёсыныз Сое сантэмамзы, ултӥямзы бере, Со вылэ югыт чилясь дӥськут дӥсяса, берен Пилат доры келятӥз. 12Та нуналэ Пилат но Ирод куспазы эшъёс луизы, нош азьвыл тушмонъяськыса улӥзы вал. 13Пилат архиерейёсты, кузёйыръёсты, калыкез ӧтьыса, 14соослы шуиз: «Тӥ мон доры Та Адямиез калыкез сура-пожа шуыса вайиды. Тани, мон тӥ азьын чаклай-эскери но, Та Адямилэсь нокыӵе но уродзэ-шексэ, кудӥныз тӥ Сое янгыше уськытӥськоды, мон ӧй шедьты. 15Ирод но озьы ик: со доры мон Сое ыстылӥ, но Сое виыны ярамонэз номыр но ӧз сюры. 16Озьыен, Сое вӧсь каро но лэзё». 17Праздник понна солы кулэ вал одӥгзэ жильыетын пукись муртэ лэзьыны. 18Но вань калык черекъяны кутскиз: «Кулон Солы! Милемлы Варавваез лэзь». 19Варавва пытсэтэ сюремын вал городын бугыръяськон ӝутэмез понна, адями виемез понна. 20Иисусэз лэзьыны турттыса, Пилат нош ик куаразэ будэтӥз. 21Нош соос кесяськизы: «Кортӵога, кортӵога Сое!» 22Пилат куинетӥ ползэ соослы шуиз: «Кыӵе урод уж Со лэсьтӥз? Мон Солэсь нокыӵе но виыны ярамон мугзэ ӧй шедьты; соин ик Сое вӧсь каро но лэзё». 23Нош соос бадӟым куараен дугдылытэк, Иисус кортӵогамын мед луоз шуыса, черекъязы. Архиерейёсын ӵош кесяськыса, соос вормизы. 24Пилат соослэсь куронзэс быдэстыны малпаз. 25Бугыръяськон ӝутэм но адями виемез понна пытсэтэ пуктэм муртэ, кудзэ соос куризы, лэзиз, нош Иисусэз соослэн киулазы сётӥз.

26Иисусэз нуыкузы, бусыысь бертӥсь Киринеяысь кыӵе ке но Симонэз кутӥзы но, Иисус бӧрсьы мед нуоз шуыса, вылаз кирос понӥзы. 27Со бӧрсьы туж трос калык мынӥз, кышномуртъёс но, соос Со понна бӧрдӥзы, викышъязы. 28Нош Иисус соос пала берыктӥськыса шуиз: «Иерусалимлэн нылъёсыз! Мон понна эн бӧрдэ, асьтэос понна, асьтэлэн нылпиосты понна бӧрдэ; 29уго вуо сыӵе нуналъёс, куке шуозы: ”Шудоесь нылпи вайыны быгатӥсьтэмъёс, нылпи вайымтэ пушъёс, нылпи сюдымтэ ноныос!” 30Соку гурезьёслы шуозы: ”Ми вылэ уселэ!” Мувыръёслы: ”Шобыртэлэ милемыз!” 31Вожектӥсь писпуэн озьы каро ке, нош кӧсэныз мар луоз?!»

32Соин ӵош кык йыруж лэсьтӥсьёсты виыны нуизы. 33«Кымес» шуон интые вуэм беразы отын Сое кортӵогазы, йыруж лэсьтӥсьёсты – одӥгзэ бурпалаз, нош мукетсэ – паллян палаз. 34Иисус шуиз: «Атае! Соосты простить кар, мар лэсьтэмзэс соос уг тодо уго». Пус чӧлтыса, Солэсь дӥськутсэ люкылӥзы. 35Калык учкыса сылӥз. Соосын валче кузёйыръёс мыскылляськыса сылӥзы но веразы: «Мукетъёссэ мозмытылӥз, Ассэ Ачиз мед мозмытоз, Инмарлэн быръем муртэз Христос ке Со». 36Солдатъёс но Сое исамес карылӥзы, дораз лыктыса, Солы уксус сётыса 37веразы: «Иудейёслэн Эксэйзы ке Тон, уть Астэ Ачид». 38Солэн вылӥяз грек, рим но еврей кылын гожтэмын вал: «Та иудейёслэн Эксэйзы». 39Йыруж лэсьтэм понна ошемъёс пӧлысь одӥгез, Сое урод кылъёсын куаретыса, шуиз: «Тон Христос ке, уть Астэ, милемыз но». 40Нош мукетыз, сое буйгатыны вырыса, шуиз: «Тон Инмарлэсь уд курдаськы шат, куке ачид но таӵелы ик судить каремын? 41Асьмеос шонер судить каремын, малы ке шуоно урод ужъёсмылэсь емышсэс бичаськомы, нош Со номыр но уродзэ ӧз лэсьты». 42Иисуслы шуиз: «Аслад Эксэйлыкад вуид ке, монэ буре вай, Кузё-Инмаре!» 43Иисус солы шуиз: «Зэм ик тыныд верасько, туннэ ик Монэн огазьын райын тон луод».

44Нуназе, куатетӥ час вадес вал, укмысэтӥ час котырозь быдэс дунне вылын пеймыт улӥз: 45шунды кысӥз, храмысь катанчи шортӥз ик кесиськиз. 46Иисус бадӟым куараен вазиськыса шуиз: «Атай! Тынад кияд Аслэсьтым лулме сётӥсько». Тае верам бераз лулыз потӥз. 47Та ортчем ужъёсыз адӟем бераз сю солдатэн кивалтӥсь Инмарез данъяса шуиз: «Зэм ик, та Адями шонер улӥсь вал». 48Та возьматонэ люкаськем вань калык, мар луэмез адӟыса, гадязы шуккылыса-шуккылыса бертӥзы. 49Нош ваньмыз Иисусэз тодэмъёс но Галилеяысь Со бӧрсьы лыктэм кышномуртъёс, палэнын сылыса, тае учкыса улӥзы.

50Соку кыӵе ке но Иосиф, иудей кенешлэн муртэз, лякыт сямо, шонер улӥсь адями, 51кенешлэн кутэм пуктон-косонъёсыныз, ужъёсыныз соглаш ӧз луы. Иосиф Иудеялэн Аримафея карысьтыз вал. Со Инмар Эксэйлыкез витьыса улӥз, 52Пилат доры лыктыса, со Иисуслэсь Мугорзэ куриз. 53Иисуслэсь Мугорзэ, кирос бордысь басьтыса, тӧдьы дэраен биняз, собере шайгуэ понӥз. Со гурезьысь из пушкы гудӟыса лэсьтэмын вал, отчы нокин но ватэмын ӧй на вал. 54Со пятница нунал вал, суббота вуэ вал ни. 55Иисусэн ӵош Галилеяысь лыктэм кышномуртъёс мыныса шайгуэз учкизы но адӟизы, кызьы Солэн Мугорыз понэмын вал. 56Гуртазы бертӥзы но ческыт зыно макеос, зыран вӧйёс дасязы. Моисей законлэсь курон-косонъёссэ быдэсъяса, суббота нуналэ номыр но ужатэк улӥзы.

Currently Selected:

Лука 23: УДМБИБ

Highlight

Copy