Улон-вылон 13
13
13-тӥ ЛЮКЕТ
1Аврам кышноеныз, Лотэн ӵош ваньбурзэ бордаз кутӥз но, Египетысь потыса, Иудеялэн лымшор палаз мынӥз. 2Пудоен, азвесен, зарниен туж узыр вал Аврам. 3Лымшорысен Вефилёзь со сюрессэ азинтӥз, Вефилен Гай вискын балаганэзлэн азьвыл сылон интыозяз мынӥз, – 4кутсконаз ик лэсьтэм-пуктэм курбон сётъян интыез дорозь; отысен Аврам Кузё-Инмарлэн нимызлы вазиськиз.
5Аврам сьӧрын ветлӥсь Лотлэн но ыжъёсыз, кечъёсыз, скалъёсыз, ошъёсыз вал, солэн балаганъёсыз но вал. 6Огазьын улон понна соослы музъем ӧз тырмы, уго сокем но сокем трос вал соослэн ваньбурзы, соос огазьын улыны ӧз быгатэ. 7Аврамлэн пудо возьмасьёсыз но Лотлэн пудо возьмасьёсыз куспын ченгешон потӥз; хананей но ферезей калыкъёс со виын та музъем вылын улӥзы. 8Соку Аврам Лотлы шуиз: «Тон куспын но мон куспын тэрытэк улон медаз луы, мынам пудо возьмасьёсы но тынад пудо возьмасьёсыд куспын ченгешон медаз луы, асьмеос выжы-кумыос луиськомы ук. 9Быдэс музъем тынад азяд ӧвӧл-а? Люкиськы ук мон бордысь: тон паллян пала мынӥд ке, мон бурпала кожытско; тон бурпала ке, мон паллян пала мыно». 10Лот, синзэ ӝутыса, учкиз но быдэс Иордан котырез адӟиз, Кузё-Инмарлэн Содомен Гоморраез быдтытозяз, Кузё-Инмарлэн садэз кадь, Египет музъем кадь, вань та ёрос дунне Сӥгор дорозь вуэн мускытатэмын вал. 11Лот быдэс Иордан ёросысь музъемез аслыз улыны бырйиз; Лот шундыӝужан пала вырӟиз. Соос ог-огзылэсь висъяськизы. 12Аврам Ханаан музъемын улыны кутскиз, нош Лот Иордан ёросысь городъёсын улыны кутскиз, Содомозь балаганъёссэ пуктылӥз. 13Нош Содомын улӥсьёс лекесь но Кузё-Инмар азьын туж сьӧлыкоесь вал.
14Лот Аврамлэсь люкиськем бере ини Кузё-Инмар Аврамлы шуиз: «Али сылон интыысеныд, синъёстэ ӝутыса, учкы уйпала но, лымшор пала но, шундыӝужан пала но, шундыпуксён пала но; 15быдэссэ та адӟоно музъемдэ тыныд, тынад кидысэдлы-выжыедлы пумтэм вапумъёс ӵожелы сёто, 16тынэсьтыд выжыдэ йылэто, музъем вылысь луо мында каро; музъем вылысь луоез лыдъяны быгатӥзы ке, соку тынад выжыед лыдъямын луоз. 17Султы, та музъем пыр кузянатӥз но, пасьталатӥз но ортчы, уго Мон сое тыныд сёто, [тынад выжыедлы но пумтэм вапумъёс ӵожелы]». 18Аврам балаганзэ вырӟытӥз, азьпала вамыштӥз но улыны интыяськиз Хевронысь Мамре тыпы сурд вӧзы; отын со Кузё-Инмарлы курбон сётон инты лэсьтӥз.
Currently Selected:
Улон-вылон 13: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
