Улон-вылон 21
21
21-тӥ ЛЮКЕТ
1Кузё-Инмар кызьы вераз вал, озьы Со Сарраез тодаз возиз, Кузё-Инмар мар вераз, сое ик Сарралы лэсьтӥз. 2Сарра секытэн луиз но Авраамлы пересьмон даураз, Инмарлэн пусъем-ялэм нуналаз, пи нуны вайиз. 3Авраам вордӥськем пиезлы, Сарралэн ваем нуныезлы, ним сётӥз: Исаак; 4Инмарлэн курон-косонэзъя тямысэтӥ нуналаз Авраам Исаак пиезлы вандӥськон сямез ортчытӥз. 5Исаак пиез вордӥськыку, Авраамлы сю арес вал. 6Сарра шуиз: «Инмар монэ серекъятӥз, адямиос но мон сярысь кылӥзы ке, серекъялозы». 7Сарра шуиз на: «Кин Авраамлы азьло вераны быгатысал: Сарра нылпиоссэ нонтоз? Уго мон картэлэн пересьмон даураз ни солы пи нуны вайи». 8Пи будӥз, нонтэмысь дугдӥзы; Исаак [пизэ] нонтэмысь дугдон нуналэ Авраам бадӟым юондыр ортчытӥз.
9Сарра адӟиз, кызьы египет ныллэн, Агарьлэн, Авраамлы ваем пиез мыскылляськыса серекъя [солэсь Исаак пизэ]. 10Соку Сарра Авраамлы шуиз: «Та ляльчи кышномуртэз, солэсь пизэ но улля, та ляльчи кышномуртлэн пиез мынам Исаак пиеным ӵош люкет уз басьты ук». 11[Измаил] пиез пумысен таӵе вераськон Авраамлы чик ӧз кельшы. 12Соку Инмар Авраамлы шуиз: «Егит пи понна, ляльчи кышноед понна кӧттэ ӝож эн кары; Сарра мар гинэ тыныд уз вера, солэсь верамзэ кабыл басьты, уго Исаак бордысь потэмъёс тынад кидысэд-выжыед шуыса нимаськозы; 13ляльчи кышномуртлэн пиез бордысь Мон [быдӟым] калык потто, со но уго тынад кидысэд-выжыед». 14Авраам ӵукна вазь ик султӥз, нянь басьтӥз, сепысэ ву лэзиз но Агарьлы сётӥз – соосты пельпум вылаз понӥз но сое пинал пиеныз ӵош кошкыны лэзиз. Мынон сямен со Вирсавияысь луоё кыр дуннее йыромиз; 15сепысысь ву быриз, пичи пизэ одӥгаз куак улэ кельтӥз но 16палэнэ, ыбыса лэзем пукыӵ ньӧллэн вуоно кемаз, мыныса пуксиз. Со шуиз вал уго: «Пинал пиелэсь кулэмзэ адӟеме уг поты». Агарь, [палэнэ] мыныса, пиезлэн ваче бериназ пуксиз но, куараен кесяськыса, бӧрдыны кутскиз; 17пинал пилэсь [кыллён интыысьтыз] куаразэ Инмар кылӥз; Инмарлэн Кылчинэз инмысен Агарьлы вазиськыса шуиз: «Агарь, мар тонэн луиз? Эн кышка; али кыллён интыысьтыз пинал пилэсь куаразэ Инмар кылӥз; 18султы, пичи пидэ но султыты, сое китӥз кут, со бордысь Мон быдӟым калык потто». 19Инмар Агарьлэсь синзэ усьтӥз, соку со [улэп] вуэн гудӟемез (колодчаез) адӟиз, отчы мыныса, сепыссэ вуэн тырмытӥз но пичи пизэ вуэн сектаз. 20Инмар пичи пиен огазьын вал; со будӥз, луоё кыр дуннеын улӥз, пукыӵен ыбылӥськись луиз. 21Со Фаран нимо луоё кырын улӥз; анаез солы Египет музъемысь кышно вайиз.
22Со виын тазьы вал: Авимелех [ичимень вайись Ахузафэн], Фихолэн, ож ужъёсын кивалтӥсеныз, Авраамлы шуиз: «Вань ужъёстэ быдэстыкуд, Инмар тонэн огазьын; 23нош али тон татын Инмарлэн нимыныз кыл сёт, монэ но, пиме но, пиелэсь нылпизэ но уд ултӥя шуыса; кызьы мон тыныд ӟеч лэсьтӥсько, тон но озьы ик мыным ӟеч кар, музъемлы но, кытын али тон кунояськыса улӥськод». 24Авраам шуиз: «Мон кыл сётӥсько». 25Авраам гудӟем понна, ву понна Авимелехез пыкылӥз, малы ке шуоно Авимелехлэн ляльчиосыз сое киултӥзы. 26Нош Авимелех [солы] шуиз: «Уг тодӥськы, кин тае лэсьтӥз, тон но мыным ӧд вера; та сярысь мон та дырозь но ӧй на кылы». 27Авраам ыжъёссэ-кечъёссэ, скалъёссэ-ошъёссэ кутӥз но соосты Авимелехлы сётӥз, – озьы соос ваче тупаса улыны кусып кылдытӥзы. 28Авраам сюро векчи пудоосыз пӧлысь сизьымзэ пиоссэ нимаз висъяз. 29Нош Авимелех Авраамлы шуиз: «Малы тон [ыж уллёысьтыд] сизьым ыжпиосты нимазы висъяд?» 30[Авраам] шуиз: «Та сизьым ыжпиосты мон киысь басьты, соос мон понна мед тодытозы, та колодчаез мон гудӟи шуыса». 31Соин ик со та интыез Вирсавия шуыса нимаз, уго соос кыкназы но та интыын кыл сётыса веразы, 32Вирсавияысен ваче кусып кылдытӥзы. Авимелех султӥз [ичимень вайись Ахузаф но], Фихол но, солэн ож ужъёсын кивалтӥсез, собере Филистим музъеме берытскизы. 33Вирсавия вӧзы [Авраам] тыпы сурд мерттӥз но Пумтэм Вапумъёс Улӥсь Инмарлы, Кузё-Инмарлы, вазиськиз. 34Филистим музъемын Авраам лыктэм мурт кадь далай нуналъёс улӥз.
Currently Selected:
Улон-вылон 21: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
