Улон-вылон 34
34
34-тӥ ЛЮКЕТ
1Лиялэн Иаковлэсь ваем Дина нылыз та музъемын улӥсь нылъёсты учкыны потӥз. 2Та музъемлэн кузёйырызлэн Евей пилэн Емморлэн Сӥхем пиез Динаез адӟиз, сое кутӥз но соин кӧлӥз, эриктэмаз сое. 3Сӥхемлэн лулыз Иаковлэн Дина нылыз борды лякиськиз, со нылашез яратӥз, солэн сюлмызлы кельшымонэсь кылъёс вералляз. 4Сӥхем аслаз атаезлы, Емморлы, шуиз: «Та нылашез мыным кышнолы басьты». 5Иаков кылӥз, [Емморлэн пиез] солэсь Дина нылзэ эриктэмаз шуыса; пиосыз пудо уллёосыныз бусыын дыръя, отысь бертытозязы, Иаков чус улӥз. 6Сӥхемлэн атаез Еммор Иаков доры вераськыны лыктӥз. 7Иаковлэн пиосыз бусыысь берытскизы но, мар луэм сярысь кылэм беразы, та пиосмуртъёс ӝоже усизы, соослэн туж йырзы кур вал, – Иаковлэн нылыныз изьыса, со Израилез сантэмаз ук, – нош тазьы лэсьтыны уг яра вал. 8Еммор тазьы соослы шуиз: «Сӥхем, мынам пие, нылды борды лулыныз-сюлмыныз лякиськиз; сётэ нылдэс солы кышнолы; 9милемын ӵыжы-выжы кариське, милемлы нылъёстэс кышнолы сётъялэ, нош милесьтым нылъёсмес [пиостылы] кышнолы басьтылэ; 10милемын уртче-валче улэ: та [эркын] музъем, татчы лыктыса улэ, ужалэ-тырше, асьтэлы музъем люкет басьтэ». 11Нош Сӥхем Диналэн атаезлы, агай-вынъёсызлы шуиз: «Ӟеч мылкыддэс гинэ тӥ мыным возьматэ вал, соку мон ваньзэ сёто, мар гинэ уд куре; 12котькыӵе бадӟым йырдон, кузьымъёс куре, мон ваньзэ тыро, нылдэс мыным кышнолы сётэ гинэ». 13Соку Иаковлэн пиосыз Сӥхемлы но солэн Еммор атаезлы кескич амалын ответ сётӥзы, уго со таослэсь Дина сузэрзэс мыскылляз. 14[Лиялэн пиосыз, Диналэн агай-вынъёсыз Симеон но Левий] соослы шуизы: «Та курондэс быдэстыны ум быгатӥське – вандӥськон сямез ортчытымтэ пилы сузэрмес сётыны ум быгатӥське, со ми понна сӥтэм-сантэме улэ сюрон луэ; 15соку гинэ ми тӥледын огкыл шедьтомы, [тӥ доры улыны интыяськомы]: тӥ но ми кадесь ке луиды, вань пиостылы-воргоронъёстылы вандӥськон сямез ортчытӥды ке. 16Соку ми нылъёсмес тӥледлы кышнолы сётъяломы, нош тӥлесьтыд нылъёстэс асьмелы кышнолы басьяломы, тӥледын уртче-валче уломы, тӥледын одӥг калык луомы; 17нош вандӥськон сямез ортчытыны куронмес кабыл ӧд ке басьтэ, ми нылмес кутомы но кошкомы». 18Та кылъёс Емморлы но, Емморлэн Сӥхем пиезлы но кельшизы. 19Пияш та куронэз быдэстонэн ӝегаса ӧз улы, уго со Иаковлэн нылызлы синмаськиз. Нош со атаезлэн юртаз-семьяяз тужгес яратоно мурт вал. 20Соку Еммор Сӥхем пиеныз кар капка доры лыктӥзы но городын улӥсь калыклы тазьы вераны кутскизы: 21«Та адямиос асьмемын тупаса уло; асьмелэн музъемамы мед улозы, татын мед ужалозы-тыршозы; та музъем вылын соослы но тырмыт инты вань. Соослэсь нылъёссэс кышно басьтомы, асьмелэсь нылъёсмес соослы кышнолы сётыломы. 22Таӵе курон-косонзэс быдэсъямы ке гинэ, соос соглаш асьмемын огазьын улыны но одӥг калык луыны: соослэн кадь ик асьмелэн но вань пиосмылы-воргоронъёсмылы вандӥськон сямез ортчытоно. 23Соослэн уллёоссы, ваньбурзы, вань пудозы асьмелы уз луы-а? Ваелэ соослэн куронэнызы, соосын соглаш кариськоме, соку соос асьме пӧлы улыны интыяськозы». 24Емморлэсь но, солэн Сӥхем пиезлэсь но верамзэс кар капка пыр потӥсь вань адямиос санэ понӥзы: вань пиослы-воргоронъёслы вандӥськон сям ортчытэмын вал – кар капка пыр вань потӥсь калыклы. 25Куинетӥяз нуналэ, соос висьыса улыку, Иаковлэн кык пиосыз, Симонэн Левий, Диналэн агайёсыз, кыкназы ик меч басьтӥзы но кышкатэк город вылэ урдскизы, отысь вань пиосмуртъёсты виылӥзы; 26ассэ Емморез но, солэсь Сӥхем пизэ но мечен виизы, Сӥхемлэн коркасьтыз Динаез сьӧразы нуизы, собере городысь кошкизы. 27Иаковлэн пиосыз виылэмъёс доры лыктӥзы но [Дина] сузэрзэс мыскыллям понна городэз тарказы. 28Ыжъёссэс, кечъёссэс, ошъёссэс, скалъёссэс, ишакъёссэс талазы, ваньзэ, мар вал городын, мар вал бусыосын; 29вань узырлыксэс но, вань нылпиоссэс, кышнооссэс пленэ нуизы, [городын,] коркаосын мар вал, ваньзэ таласа нуизы. 30Соку Иаков Симеонэн Левийлы шуиз: «Тӥ монэ куректон-кайгуэ уськытӥды, та музъемын [вань] улӥсьёслы, хананейёслы, ферезейёслы монэ синазькыльлы пӧрмытӥды. Мынам адямиосы ӧжыт; мыным пумит огазеяськозы, погыртозы монэ, монэ но, семьяме но быдтозы». 31Нош соос шуизы: «Нош яра вал шат милям сузэренымы калгись-юмшась нылын кадь дауртыны?!»
Currently Selected:
Улон-вылон 34: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
