Улон-вылон 42
42
42-тӥ ЛЮКЕТ
1Иаков тодӥз, Египетын нянь вань шуыса, соку со пиосызлы шуиз: «Мар шоры учкыса сылӥськоды?» 2Шуиз на: «Тани мон кылӥ, Египетын нянь вань, пе; мынэлэ отчы, басьтэлэ отысь асьмелы нянь, улэп мед кылёмы, сютэм медам кулэ». 3Иосифлэн дас агайёсыз Египетэ нянь басьтыны мынӥзы, 4нош Иосифлэсь вынзэ, Вениаминэз, агайёсыз сьӧры мыныны Иаков ӧз лэзьы, со шуиз: «Урод учыре сюроно медаз луэ мар-а». 5Трос калыкъёсын ӵош Израиль пиос нянь басьтыны мынӥзы, Ханаан музъемын сютэм ар вал уго. 6Нош Иосиф та музъемын кивалтӥсь адями вал: со ик нянь вузалляз дунне вылысь калыклы. Иосифлэн агайёсыз со доры лыктӥзы но со азе пыдесъяськыса йыбырттӥзы. 7Иосиф агайёссэ адӟем бераз ик тодмаз; нош аслэсьтыз тодмамзэ шарае ӧз поты, соосын чурыт вераськыса шуиз: «Кытысь тӥ вуиды?» Соос шуизы: «Ханаан музъемысь, сиён басьтыны лыктӥмы». 8Иосиф агайёссэ тодмаз, нош соос сое ӧз тодмалэ. 9Соку Иосиф тодаз вайиз соос сярысь адӟем уйвӧтъёссэ; соослы шуиз: «Тӥ утчаськыса ветлыны лыктэмъёс, тӥ та музъемлэсь ляб интыоссэ эскерыны-чакланы лыктӥды». 10Таос солы шуизы: «Ӧвӧл озьы, кузёмы, та ляльчиосыд сиён басьтыны лыктӥзы; 11ми ваньмы одӥг муртлэн нылпиосыз, ми шонер улӥсь муртъёс; та ляльчиосыд утчаськыса-чакласькыса ветлыны ӧз лыктэ». 12Иосиф соослы шуиз: «Ӧвӧл, тӥ та музъемлэсь ляб интыоссэ учкыны-чакланы лыктӥды». 13Соос шуизы: «Ми, тынад ляльчиосыд, дас кык агай-вынъёс луиськомы; ми Ханаан музъемысь одӥг муртлэн пиосыз: покчиез вынмы атаенымы огазе кылиз, нош одӥгез асьме пӧлын ӧвӧл ини». 14Иосиф соослы шуиз: «Мон тӥледлы верай ук: тӥ утчаськыса-чакласькыса ветлӥсьёс; 15тани тӥ кызьы эскеремын-чакламын луоды: фараонлэн улонэныз кыл сётӥсько – покчи вынды татчы ӧз ке лыкты, тӥ татысь уд потэ; 16тӥ пӧлысь одӥгез мыныса вындэс мед ваёз, со дырозь пытсэтын пукоды; соку тодмо луоз: ӧрекчаськиськоды-а, уд-а; ӧрекчаськиськоды ке, соку фараонлэн улонэныз кыл сётӥсько: тӥ утчаськыса-чакласькыса ветлӥсьёс луиськоды». 17Соосты куинь нуналлы пытсэт сьӧры келятӥз. 18Куинетӥ нуналаз Иосиф соослы шуиз: «Тани, мар ке косӥ ке, сое быдэстэ, соку улэп кылёды, уго мон Инмарлэсь кышкасько: 19тӥ пӧяськисьтэм адямиос ке, одӥгез братты та пытсэт коркан мед улоз, нош мукет братъёс, мынэлэ, сютэм улӥсь семьяостылы нянь нуэ. 20Покчи вындэс мон доры вае, вайиды ке, тодмо луоз, уд ӧрекчаськиське шуыса, – соку тӥ виемын уд луэ». Соос озьы ик лэсьтӥзы. 21Куспазы соос тазьы вераськизы: «Зэм ик, братмылы пумит сьӧлыкаммы понна курадӟон чидано луиськомы ни; асьмеос адӟимы ук солэсь курадӟемзэ, куке со асьмемыз сюлворыса куриз, нош асьмеос [сое] санэ ӧм понэ; табере со понна асьме доры шугадӟон вуиз». 22Рувим, ответ сётыса, соослы шуиз: «Мон тӥледлы ӧй вера-а: пинал пилы урод лэсьтыса эн сьӧлыкалэ? Нош тӥ ӧд кылзӥське, нош табере солэн вирыз понна кыл кутон дыр вуиз». 23Соос ӧз тодэ, Иосиф соосты вала шуыса, уго Иосифен соос куспын вераськемез кылысь кылэ берыктӥсь вал. 24[Иосиф] соос дорысь палэнэ кошкыса бӧрдыны кутскиз. Берен доразы лыктыса, соосын вераськыса улӥз, пӧлысьтызы Симеонэз басьтӥз но син азязы думылытӥз. 25Иосиф таослэсь пуйыоссэс юэн тырмытъяны косӥз, нош ваем азвесьсэс котькудзылэн пуйыязы берен поныны, сюрес вылэ сиён сётыны косӥз. Косон быдэстэмын вал. 26Юзэс ишакъёс вылэ тыризы но татысь кошкизы. 27Изьыны дугдэм интыязы соос пӧлысь одӥгез ишакезлы сиён сётон понна пуйызэ усьтӥз но пуйыезлэн пасьысьтыз азвесьсэ адӟиз. 28Агай-вынъёсызлы со шуиз: «Азвесе мынам берыктӥськем, тани, со пуйыям кылле». Ваньзылэн сюлэмзы куалектӥз, кышкаса ог-огзылы шуизы: «Мар таӵе та, Инмар асьмелы мар тазьы кариз». 29Агай-вынъёс Ханаан музъеме Иаков атайзы доры вуизы но солы ваньзэ веразы, мар соосын луиз: 30«Со музъемлэн кузёез милемын чурыт вераськиз, милемыз со музъемтӥ утчаськыса-чакласькыса ветлӥсьёс, кожаз. 31Ми солы шуимы: ”Ми пӧяськись муртъёс ӧвӧл; утчаськыса-чакласькыса ум ветлӥське; 32ми дас кык агай-вынъёс, атаймылэн пиосыз; одӥгез асьме пӧлын ӧвӧл ини, нош покчи вынмы атаймы доры Ханаан музъеме кылиз”. 33Та музъемен кивалтӥсь мурт милемлы шуиз: ”Тани, кызьы мон тӥлесьтыд пӧяськись-а, пӧяськисьтэм-а луэмдэс тодо: пӧлысьтыды одӥгзэ браттэс мон доры кельтэ, нош тӥ, семьяосты сютэм медаз курадӟе шуыса, ю басьтэ но дорады бертэ, 34мон доры покчи вындэс вае, соку мон тодо, тӥ утчаськыса-чакласькыса ветлӥсьёс ӧвӧл, шонер улӥсь адямиос вылӥллямды; соку мон браттэс тӥ кие сёто, соку тӥ та музъемтӥ кышкатэк ветлыны быгатоды”». 35Пуйыоссэс бушатыкузы, ваньзы пуйы пушкысьтызы кышетэ думем азвесьсэс шедьтӥзы. Асьсэос но, атайзы но думылэм азвесьсэс адӟизы но кышкатскизы. 36Атайзы, Иаков, соослы шуиз: «Тӥ монэ нылпитэк кельтӥськоды ни: Иосифе ӧвӧл ни, Симеонэ но ӧвӧл ни, нош табере Вениаминэз басьтыны турттӥськоды, ваньмыз мыным пумит берытскиз!» 37Соку Рувим атаезлы тазьы шуиз: «Мынэсьтым кык пиосме ви, Вениаминэз берен ӧй ке вайы тон доры; сое мон кие сёт, мон сое берен тон доры вутто». 38Иаков шуиз: «Мынам пие тӥ сьӧры уз мыны, малы ке шуоно солэн агаез кулӥз, со огназ кылиз; сюрес кузя мынонды дыръя соин кыӵе ке шудтэм учыр луиз ке, соку тӥ монэ, пурысьтам йырез, куректон-кайгу пыр шайгуэ пыртоды».
Currently Selected:
Улон-вылон 42: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
