Улон-вылон 44
44
44-тӥ ЛЮКЕТ
1[Иосиф] аслаз юртэныз кивалтӥсьлы таӵе косон сётӥз: «Кӧня нуыны кужымзы тырмоз, сомында сиён пуйыосазы тыр, азвесьсэс пуйы пушказы пон; 2нош мынэсьтым чашаме, азвесь чашаме, нянь басьтэм азвесеныз ӵош братъёс пӧлысь покчиезлэн пуйы пушказ пон». Соиз Иосифлэн верам кылызъя лэсьтӥз. 3Ӵукна, куазь сактэм бере, та адямиосты ишакъёсынызы валче кошкыны лэзизы. 4Городлэн сьӧраз кыдёке ик кошкыса ӧз на вуэ вал, Иосиф юртэныз кивалтӥсьлы шуиз: «Мын, сут со адямиосыз, доразы вуид ке, шу: ”Малы ӟеч уж понна уродэн берыктӥды: [малы тӥ мынэсьтым азвесь чашаме лушкады?] 5Та мынам кузёелэн юоно чашаез ук, со вылын со тунаське; урод уж тӥ лэсьтӥды”». 6Со соосты сутӥз но та кылъёсты соослы вераз. 7Соос солы шуизы: «Малы меда кузёмы таӵе кылъёсты вера? Ӧвӧл, тынад ляльчиосыд сыӵе ужез ноку но ӧй лэсьтысалзы; 8тани, пуйыосмы пушкысь шедьтэм азвесьмес ми тыныд берен Ханаан музъемысь вайимы: тынад кузёедлэн коркасьтыз зарниез, азвесез малы ми лушкаломы? 9Ляльчиосыд пӧлысь кудзылэн ке киысьтыз [чаша] шедьтэмын луиз ке, сое виёно, нош ми кузёмылы ляльчиос луомы». 10Со шуиз: «Умой, кызьы тӥ шуиды, озьы ик мед луоз: кин киысь [чаша] сюроз, со мыным ляльчи луоз, нош тӥ янгыше уськытэмын уд луэ». 11Соос ваньзы дыртыса пуйыоссэс музъем вылэ пуктылӥзы но ваньзы пуйыоссэс усьтылӥзы. 12Со утчаськыны кутскиз арлыдын бадӟымъёсыз бордысен, вуиз самой покчиез доры; чашаез Вениаминлэн пуйыысьтыз шедьтӥз. 13Ваньзы соос дӥськутсэс кесязы, ишакъёссы вылэ тыриськизы но городэ берытскизы. 14Иуда агай-вынъёсыныз ӵош Иосифлэн корказ мынӥзы, со дораз вал, со азе музъем вылэ уськытскыса йыбырттӥзы. 15Иосиф соослы шуиз: «Мар тӥ лэсьтӥды? Тӥ ӧд тодэ шат, мон кадь адями одно ик ваньзэ тунаса тодоз?» 16Иуда шуиз: «Кузёмылы мар шуыны ми быгатомы? Мар верано? Кызьы шонере потоно? Инмар тынад ляльчиосыд пӧлысь шонертэм ужез шедьтӥз; тани, ми кузёмылы ляльчи луэмъёс, ми но, со но – кинлэн киысьтыз чаша сюриз». 17Нош [Иосиф] шуиз: «Уг, мон сое уг лэсьты: со, кинлэн киысьтыз чаша шедьтэмын вал, мыным ляльчи луоз, нош тӥ каньылэн атайды доры берытске». 18Иуда со доры лыктыса шуиз: «Кузёе, ляльчидэ лэзь кузёелэн пеляз мар ке но вераны, ляльчиедлы вождэ эн потты; уго тон фараонэн одӥг кадь. 19Кузёе аслаз ляльчиосызлэсь юаз: ”Вань-а тӥляд атайды я вынды?” 20Ми кузёмылы шуимы: ”Милям пересьмем атаймы вань, [солэн] покчи пиез вань, пересь даураз вордскем пиез, солэн агаез кулӥз, нош со анаезлэн нылпиосыз пӧлысь огназ кылиз, атае сое яратэ”. 21Аслад ляльчиосыдлы тон шуид ук: ”Сое мон доры вае, солэн шораз учкыны мед быгатом”. 22Ми кузёмылы шуимы: ”Пинал пи, атайзэ кельтыса, кошкыны уг быгаты, со атайзэ кельтӥз ке, атаез кулоз”. 23Нош тон ляльчиосыдлы шуид: ”Тӥледын ӵош покчи вынды ӧз ке лыкты, мон азе эн ик возьматске”. 24Тынад ляльчиед, милям атаймы, азе вуэммы бере кузёмылэсь верам кылъёссэ ми солы верамы. 25Соку атаймы шуиз: ”Нош ик отчы мыныса, асьмелы кӧня ке но сиён басьтэ”. 26Ми шуимы: ”Милемлы мыныны уг яра, нош милемын ӵош покчи вынмы луиз ке, соку мыномы, уго милемын ӵош покчи вынмы ӧз ке луы, со адямилэн син азяз милемлы возьматскыны уг яра”. 27Тынад ляльчиед, милям атаймы, шуиз: ”Тӥ тодӥськоды, мынам кышное мыным кык пи вайиз; 28одӥгез мон дорысь кошкиз, соку мон ”Зэм ик, дыр, сое пӧйшуръёс кесяллям” шуыса малпай; та дырозь мон сое ӧй ни адӟы; 29тазэ но мон азьысь басьтӥды ке, соин кыӵе ке шудтэм учыр луиз ке, монэ, пурысьтамез, куректон-кайгу пыр шайгуэ пыртоды”. 30Табере мон, тынад ляльчиед, атаймы доры берытско но, нош милемын ӵош пинал пи ӧз ке луы, – со борды уго атаймы вань лулыныз-сюлмыныз люконтэм герӟаськемын, 31соку атаймы адӟиз ке, пинал пи ми пӧлын ӧвӧл шуыса, со кулоз; тынад ляльчиосыд тынэсьтыд пурысьтам ляльчидэ, милесьтым атаймес, куректон-кайгу пыр шайгуэ пыртозы. 32Эшшо ке мон, тынад ляльчиед, та пинал пи понна, сое утён пумысен атае азьын кыл сётыса шуи: ”Сое мон тон доры ӧй ке вутты [тон азе ӧй ке султыты], соку мон вань улоно нуналъёсы ӵожелы атае азьын янгыше кылисько”. 33Озьыен, мон, тынад ляльчиед, эсьмаса кузёе доры ляльчилы мед кылём, нош пинал пи агайёсыныз ӵош мед бертоз: 34уго кызьы мон атае доры мыном, пинал пи монэн ӵош ӧз ке луы? Соку мон адӟысал атае доры вуэм туж секыт куректон-кайгуэз».
Currently Selected:
Улон-вылон 44: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
