Wenía 48
48
Jacopa vana roapa netãti ivo yoã
1Askávai txipo, “Mĩ papa isĩ teneai”, iinã atõ yoãshomaĩnõ, “oĩnõ” iinã kakĩ ãwẽ vake ravé ashõ Manassés, Efraim aatii ato ewevaĩshokĩ. 2Askákaĩi ãwẽ kamaĩnõ, “mĩ vake, Josepa mia oĩi oa”, akĩ yoãshoávo. Askái José nokókaĩmaĩnõ, ãwẽ papa ãwẽ rakánamãsho, moitĩpamẽkĩ askáchtase tsaóinái.
3Tsaóinavaíki ãwẽ vake yoãshokĩ. “Yové Weeya Ivõ Luznamã, Canaã mai nakisho ea meramatachísho, vana roapa ivõ ea netãti. 4‘Minõsho miapa ivo yora revomakĩ, westíma mia ẽ shovimakatsai. Askáki, minõsho yora shoko wetsa mia ẽ shovimakatsai, askávaíki naaivo mai atonase ikatsai’, akĩ ea tanamati, Yové Koĩni. 5Askásho ramaro, mĩ vake ravévakĩ, ẽ oti vevo Egitonamãsho vakeya ivo ená keská ikatsai, Efraim, Manassés aatíi. Ená, Rúben, Simeão, aká keská ikatsai. 6Mĩ vakerasĩ wetsa txipo mĩ meraóa ivorasĩro miná ikatsai. Atovõ mĩ vopimaĩnõ, mĩ mekẽyarasĩ, vevokerasĩni vikenkeãa ivo atovõ viakekatsaivo. 7Askái Padã Arãnamã itãi ẽ iokarãmaĩnõ, Canaã mainamã, Efrata orakamasho Raquel vopimaĩnõ, chinãi ea onísmtá. Askáki, ano Efrata vai kesó, rama Belém akĩ ato aneanamã ẽ oneti”, akĩ Jacopa.
8Askáki, Josepa vakerasĩ shokoa oĩinã, “tsoarasĩrá naanã?” ãwẽ imaĩnõ, 9“Yové Koĩni nenosho ea inãchna vakerasĩ”, akĩ ãwẽ papa revíki. Ãwẽ aská akatõsho, “Ase, neno kawivarã, vana roapa ato ẽ netãnõ”, akĩ.
10Askásho aatĩa aaro sheniwetsasho veshoyasho. Askáinã Josepa ãwẽ vake venevakerasĩ ãwẽ papa taváchta ato ãwẽ shokõvaĩshómaĩnõ, ãwẽ papã ato atxivaĩsho ato mekí apáki.
11Aská avaikĩ José tanamaóki. “Txipokiri mĩ yora ea meraóma ikatsairavã ẽ ava avaina. Askámẽkĩ ramaro, Yové Koĩni mia, mĩ vakerasĩ aká ea meramaóai”, akĩ.
12Ãwẽ askámaĩnõ, Josepa ãwẽ vakerasĩ, ãwẽ papã oshkea viakevaí maĩ vetsek ipásho rakái kaí. 13Askávaíki, Josepa ãwẽ mevi mekirisho Efraim ninivarãvaíki, ãwẽ papã mevi mechmiri nitxĩi, Manassés ivo ãwẽ mevi mechmirisho ninivarãovaíki ãwẽ papã mevi mekiri nitxĩi, ato avévakĩki. 14Ato ãwẽ aská amaĩnõ ã papã, ãwẽ mevi vivévakĩki, Efraim, txipoke ivo ãwẽ mevi mekirisho mapãt akí, Manassésro vevokemẽkĩ, ãwẽ mevi mechmirisho mapãt akí, ato avévakĩki. 15Askávaíki Josémẽ vana roapa netãi vanai. “Ẽ papavo, Abraão, Isaque, aatiisho ravipaóa ivo Yovepa askatase ea vesokõvarãki, rama ea vesoki asai. 16Ãatõ, Yonótaya Yovepa raké ea pashamakõvarãya ivõ aatiisho naa vakerasĩ roapa ivorasĩ ato ashõtikĩra. Askái atomẽsho ẽ ane, ẽ papavõ ane, Abraãoná, Isaquená aatii petxĩkima ave chinãnõvo, ãtsai revosho ave maitiónõvo”, akĩ.
17Ãwẽ askámaĩnõ Josepa, ãwẽ papã, Efraim ivo mevi mekirisho, mapãt aka oĩinã, roa akáma. Askáinã, aaivo ãwẽ papã mevi viakevaikĩ Manassés ivo matxi mapãt amakatsiinã 18ãwẽ papa yoãshokĩ. “Aamarívikatá papá. Naaivorvi vevokéro, mekirisho mapãt arí”, ãwẽ akámẽkĩ, 19ãwẽ papa aví iyamai vanai. “Ẽ tanasai yomé, ẽ tanasai. Naaivo Manassésnĩ yorarasĩ westímasevi ikatsai. Askámaĩnõ, naa ãwẽ take txipoke ivoro vevoke keská ikatsai, kakáyasho, ãwẽ merávo westímasevi ikatsai”, akĩ. 20Askái aaivo shavapa Jacó vana roapa ato netãi vanai. “Israel yorarasĩni matõ anerasĩ yoãi vanai, arímamẽ vana roapa netãnanãi aí, neskái shavákatsavo. ‘Yové Koĩni Efraim, Manassés aatíi, atovo ashõtitõ, mia atikĩra’, ikatsaivo”, ato akĩ. Anosho Jacopa Efraim ivo txipokemẽkĩ, Manassés vevo kakáyamakĩ õtxikéki.
21Askáki José tanamaóki. “Ramaro ea vopikatsa, askámẽkĩ Yové Koĩ matonĩse nikatsai. Arimẽse nokẽ papavõ mainamã mato kawivaĩókatsa. 22Askámaĩnõ, miaro, mĩ takevo vevoke ivo keská akĩ, mai matóyãwa ivo,#48.22 Hebraicõ vana wicháro, wetsaro “mai matóyãwa ivo”, wetsaro, “Siquém” aká amorreu yorarasĩ, ẽ kewãa, ẽ kãti akátõ ato pakã ashõ, ato ẽ viãti ivo mai, mia ẽ inãaivere”, akĩ.
Currently Selected:
Wenía 48: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
