Luka 10
10
Shüraw mroĝü ná kiw
1He ñu nafum sa a Tawgyew i nüna mroĝü lapyo, sünda ha ha ñetrü ge i jijoma, süge ksü, ksü dañe uvro kibraĝitsü. 2Sünda i ná che, “Rhamu ñu añe dume, séŝo chiĝa daw mesame duba sündada vi gow ubrow i chejodawe, i í vi í tcholajo vi daw kiwe. 3Jewe; howe no djó fugulu dañe fumsu namko kijome. 4Sündada kapüĝasa je djulawe, kapüĝa je, seyo shita je; sünda ĝabo ge je nüna ná gaga djudawe. 5Ha ñe ge jimyoima, uvromashü, ‘He ñe ge ĝüdzüw djuwe chewe.’ 6Süge djuma ĝüdzü pajo übadzü dumeje, ba ĝüdzüw djüdaw ye üdra dusajome, momeje bachi ge kakutchojome. 7Se ñe ge ĝyowe, sünda ichi go ha paima, se í tsa-tuwe, hado chemeje chiĝa daw nüna na ná shishü patsüw; ñe ñe djukahijodawe. 8Sünda ha ñetrü ge jiima, sügow nüna na hutrovowñe, bavro ge ha vedama se i tsajodabuwe. 9Sügow sonaw duw ná dagyojodawe: sünda ná chewe, ‘Tawgyew í ñe batrü iñiñisa ge kakudamme.’ 10Sé ba ha ñetrü ge jimyoima, seyo sügo nüna na bá mahutrovolaime, ná bodzaĝ ge jeñe ana chewe, 11‘Djo ñetrü yo ñelümo naje, ñishi ge güdrüsadaw na, ñi djovro sa a pafiangkoimme, sedamje he í danghujodawe, Tawgyew i ñe djotrü iñiñsa ge kakulaimme.’ 12No djo trungkoime, se ñeto se ñetrü ye Sadom ñetrü i ufow lyajome.”
Lalowe, dju üdrü-ulu mavegudoma
13“He Kurajiña! He Betseda! Se chiĝa dyew dadaw ye djo Sorñe sidon ge dameje, na ke ge gyedrüĝiw seyo küsesüpu veduw vegudowjobya. 14Seŝo, ĝadzü melye balai sehu ba fo Sorñe Sidon naksü veksüfifojome. 15Seyo Kagarnam, bá ñedzü ge kuw lalyijoma? Ba noĝu üla ge kuw kalyajome.” 16“Dju ba chew dzüima, se ye no chew je dzüjo; sünda ba dju mauw daima, noje mauw dajome; seyo dju no mauw daima, se ye no kiadaw i je mauw dajome.”
Shürhaw mroĝü na kakuw
17Se mro ĝü na lüshüw yo kakutchoñe che, “He Tawgyewwa, se ĝulo mauw na bañiñ yo ñí psüĝa ge dume.” 18I ná che, “No mütü í ñedzü lüĝaw veduw ñedzü go gaahu hohudame.” 19No djó byu yo seyo mütü güdzü ge dügrüdzagofijo djüwme, seyo veñiw na udru yo lyitsoñe seyo hayo je djo naw madafijomme. 20Sedamje ĝulo djola ge du cheñe djulüshüwe, seŝo djoñiñ ñedzü ge ĝidaw yo lüshüjo dawe.
Usaw udru yo uyow í truhuaw
21Sa yo sa a í ĝulo güdraw yo lüshüw pañe che, “He Awa, ñedzüñe no gow Tawgyew, no ba ulu yo uw cheime, ba he ñu na danghu-kinghuw nüna na yo müŝüñe veda, sünda angasa na truhuada. Am, he Tawgyewa, hado chemeje ba he í uw veda. 22No awu i vyow nodru ge traadamme; seyo saw djuma djuje madanghu, awu aka danghuba seyo awu djujema se je dju madanghu, saw aka danghuba, seyo se na djú üsaw ye truhuaĝoñdama.” 23Sünda í shürhaw nachi ge tchoñe akasa ge che, “nülvowe se iñi í, ha gañ ná ba hohuima, 24Hado chemeje no djo trungkoime, ŝüpo ñihow truw na seyo nugo na tsüdaw ye, ba ha gañ í hohuima naje hohuwe; se na mahohu seyo ha ñu í ba dzühuima naje dzühuwe, sé na madzühu.”
Nüna uw a í veduw
25Sündawñe nüna a gudzulyi; sünda ana cheñe í küna daima hopüñew che, “He dadrüwa, no shüwa shüw shüjo ubo ha dameje ujowa?” 26I í che, “shotuko-kunu ge ha ĝida? Ba kündañe ngüwwa?” 27He cheñ, “djo djó Tawgyew i vyow drü-lu seyo ĝulo yo seyo vyow gow yo seyo vyow nudzo ükye-ümüñi yo nülvo dawe; seyo nudzo ñeŝü djo djo nudzo í küna nülvo dawma süna nülvo dajo dawe.” 28I í che, “Ba umso chejemme, he ana dameje ba shüwa shüw shüjome.” 29Sé i í nudzo í usu dajoñe veñe Jisu í dzü, “Nameje nó ñeŝü na djuwa?” 30Jisu i che, “Nüna a ye Jerusalem yo Jeriko ge jingkoi ye tsaksütchüw na djeshiĝiaña i gye í shalüga, sünda güñe atrü gümoalye tralye djetrükralye. 31Sünda ana da, se ĝabo ge mügaw a jingkoi, sé i holye ĝeaglyeñe djetrükralye. 32Ana vedumbo Lewi a je se jaga ge djeku, ije í holyeñe ĝeaglye djetrükralye. 33Sé Samari a ye kahiw jihuada, sünda í hohulyeñe nülvo veida. 34Ütrü iñisa ge jikuñe seyo í tsadu ge tel seyo tsü prüñe gyeka yo pyogo, seyo í fu ge gyodügyelyeñe ñe ĝyow ge lajikye sünda í uwyo hoivo. 35Se draha í bosüñ ksü lahuañe se ñe ĝyow go na djüñe che, ‘I uwyo hoivojodawe, seyo bachi go küña kapyoima, se ye no kakuwñe doajome.’ 36Hesalu nadzüngko a ba djú í ñeŝüñe veiya dju se tsaksutchüw ügzü ge gamyoadama.” 37I che, “Se ye dju í hodama.” Jisu i í che, “Kai, baje kañe dajodawe.”
Martañe Mariyam
38Sünda i jingkoi ye, ñetrü a ulung ge jimyoa, seyo Marta cheñe mim a ye í iñe ge balada. 39Seyo Mariam cheñe uñum a duw, i Tawgyew ishitrü ge ĝyoñe i shi-ñu dzüw. 40Sé Marta chiĝa da dañe mavenghuañe seyo ütrü iñisa ge jikuñe che, “He Tawgyewwa, ba haje je mavema, noñum í no akasa chiĝa daw traadaw ye? Sündada í no chiĝa datunowe chejodawe.” 41Tawgyew i í che, “Marta O Marta; ba ŝüpo ha vejema venglyeñe seyo mavenghu lyaha. 42Séŝo ñu a ye umsome, seyo se uw chiĝa í Mariyam i ladame: ichi go se í malaĝafijomme.”
Currently Selected:
Luka 10: HBe
Highlight
Share
Copy
Want to have your highlights saved across all your devices? Sign up or sign in
