التكوين 16
16
بركة أبرام
أعيال أبرام اتلود للوريث من خلال هاجر
اخلاڮة إسماعيل لأبرام
1وساراي أعيال أبرام كانت امرة عاڮر. وكانت عندها خادم مصرية أسمها هاجر. 2وڮالت ساراي لأبرام: الله تعالى ما اعطاني الذرية. ڮوم اصا اتكي امع هاجر. يكان الله تعالى يعطيني ذرية منها. وعدل أبرام ذا اللي ڮالتلو ساراي أعيالو. 3وڮامت ساراي واعطاتو خادمها وعاشرها. وهاذا اخلڮ عاڮب ما قضاو 10 سنوات فارض كنعان. 4وعاشر أبرام هاجر وحملت منو . وإلين عرفت أنها حملت، عادت تحڮر عربيتها ساراي. 5وفذا ڮالت ساراي لأبرام: الله تعالى يحاسبك اعلى ذا اللي اخلڮلي. عاڮب ما اعطيتك خادمي وحملت منك، عادت تحڮرني. الله تعالى يقضي بيني وبينك. 6وجاوبها أبرام وڮالها: هاذي خادمك ڮدامك وعدليلها اللي اتدوري. وعذبت ساراي هاجر يلين هربت اعليها.
7واجبرها ملاك الله تعالى اڮريب من ظاية الماء فطريڮ اللي واعدة مدينة أسمها شور. 8وڮالها ملاك الله تعالى: يا هاجر يا خادم ساراي، من امنين جاية؟ وامنين واعدة؟ وڮالتلو هاجر: آنا اهربت من عربيتي ساراي. 9وڮالها ملاك الله تعالى: رجعي شور عربيتك وسمعيلها. 10وڮالها املي: لاهي انكثر نسلك يلين يعود ما يڮد ينعد.
11وڮالها املي: انتي موجوعة ظرك ولاهي تبراي اعلى اطفيل، ولاهي اتسميه إسماعيل اللي معناه الله تعالى يسمع. بيهلي الله تعالى حس بألامك. 12واطفيلك لاهي يعود آراڮاج امتين وامعادي الناس كاملة والناس كاملة امعاديتو. ولاهي يعود آراڮاج مستحرش ومتكبر اعلى اخوتو كاملين.
13وحمدت هاجر الله تعالى اللي شافها وحس بألامها وڮالت: آنا شفت ظرك اللي يراعي فيَّ . 14ولذاك اسمات هاذي الحاسي بأسم: حاسي الحي اللي يراعي فيَّ. وهاذي الحاسي هي موجودة امبين قادش وبَاردَ. 15وعاڮب ذا خلات هاجر لأبرام ولو. وسما أبرام اطفيلو اللي من هاجر بأسم إسماعيل. 16وكان أبرام فذا الوقت عندو 86 سنة.
Currently Selected:
التكوين 16: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
