التكوين 18
18
بركة النبي إبراهيم
النبي إبراهيم يتشفع لسدوم وعمورة
1وعاڮب ذاك اظهر الله تعالى للنبي إبراهيم عند صدراية ممرا، وقت اللي كان ڮاعد ڮدام فم خيمتو لڮايلة. 2وفذا رڮب وجهو وشاف اثلت رجالة ماشين اعلى جيهتو، وادفع شورهم اياك يرحب بيهم. وإلين لحڮهم، ڮام واسجد اعلى التراب إحترام لهم. 3وڮال: يا شيخي إلى عدت شايف عن عبدك يستحق الشرف عنك تستراح عندو، لا تتخطاه. 4وخليني انجيب لكم شي من الماء تغسلو بيه كرعيكم وتڮعدو تحت ظل الصدراية. 5وانجيب لكم شي من امبورو توكلوه ومن فم تواصلو مشيكم واتعودو خظتو اعلى خيمة عبدكم. وڮالولو: ما فم مشكلة، عدل ذا اللي ڮلت. 6وادفع النبي إبراهيم واعد خيمتو اللي فيها سارة وڮالها: ڮومي بالعجلة وعجني 3 كيلات اكبار من الدڮيڮ الزين وخبزيهم. 7وڮام النبي إبراهيم وادفع شور امراحو واڮبظ اعجل اسمين واعطاه لجديع عندو ينصبو. 8وعاڮب ذاك اڮبظ النبي إبراهيم شي من الزبدة وللبن ولعجل اللي انطبخ، واطرح ذا ڮدامهم، وابڮا واڮف ڮدامهم يخدمهم تحت الصدراية وهوما يوكلو. 9وڮالولو: وينهي أعيالك؟ ڮالّهم النبي إبراهيم: اراعيها فالخيمة. 10وڮال واحد منهم للنبي إبراهيم: لاهي نرجعلك فهاذا الوقت من السنة الجاية ولاهي اتعود سارة عادت باطفيلها منك. وذا الوقت كانت سارة واڮفة اوراه عند فم الخيمة وسمعت اكلامهم. 11وكان النبي إبراهيم وسارة اكهولة اكبار فالسن واتخطات سارة سن لحمل. 12وظحكت سارة امبينها امع راصها وڮالت: عاڮب ما استكهلت وعاد راجلي شيباني نجبر العيال؟ 13فذا ڮال الله تعالى للنبي إبراهيم: اشواسا سارة تظحك واتڮول: انڮد نبرا اعلى اطفيل وآنا كهلة؟ 14الله تعالى اثرو يڮلبو شي؟ لاهي نرجعلك فهاذا الوقت من السنة الجاية واتعود سارة عادت باطفيلها منك. 15وانخلعت سارة ونكرت اعلنها ظحكت. وڮالها الله تعالى: ماهي حڮ انتي اظحكتي اڮبال!
16وعاڮب ذاك ڮامو الرجالة الثلاثة ماشين اعلى جيهة سدوم، وامشا امعاهم النبي إبراهيم يسيفطهم. 17وڮال الله تعالى اللي هو واحد من الرجالة الثلاثة : ما انڮد نجحد عن إبراهيم اللي ناوي انعدل لسدوم. 18وإبراهيم لابد من يعود بو شعب اكبير وامتين وتتبارك شعوب لارض كاملها بسببو . 19بيلي آنا هو اللي اخترتو اياك يوصي أولادو وأهلو من بعدو اياك يحفظو الطريڮ الله تعالى، امعدلين البر والعدل يلين يعدل الله تعالى اللي اتعهد بيه للنبي إبراهيم. 20وڮال الله تعالى: اكثارة الشكوى والظلم اعلى أهل سدوم وعمورة وشرهم زاد اعلى حدو. 21لاهي انڮيسهم وانشوف إلى عاد ذا حڮ ونتأكد بنفسي.
22وامشاو الرجالة اللي كانو امع الله تعالى واعدين سدوم ، وابڮا النبي إبراهيم واڮف امع الله تعالى. 23وڮرب النبي إبراهيم منو وڮالّو: لاهي تهلك الصالح امع الشرير؟ 24يلين تجبر فذي لمدينة 50 آرڮاج صالحة لاهي تهلكها وللا لاهي اتسامحها اعلى أساس هاذو الخمسين الصالحين؟ 25انتا اعظم من اللي اتخلط امبين الصالح والشرير، ويعود الصالح كيف الشرير حشاك. ما يصح اعلنك انتا الديان ما تَعْدل؟ 26وڮال الله تعالى للنبي إبراهيم : يلين نجبر فسدوم الا 50 آرڮاج صالحة انسامح الباڮين. 27وڮال النبي إبراهيم: آنا كثرت من لكلام امع الرب امع اعلني مخلوق من التراب والرماد. 28وفحالتهم نقصو 5 ارواڮيج صالحين لاهي تهلك لمدينة اعلى أساس 45؟ وڮالّو : يلين نجبر فيها 45 صالحين ما نهلكها. 29وڮالّو النبي إبراهيم مرة ثانية: وفحالتك اجبرت الا 40 آرڮاج صالحة؟ وڮالّو : ماني لاهي نهلكهم اعلى أساس 40 الصالحين. 30وڮال النبي إبراهيم: لا تنفڮع اعليَّ واسمحلي نتكلم، وفحالتك اجبرت الا 30 صالحين؟ وڮالّو: ماني لاهي نهلكها إلى اجبرت فيها 30 صالحين. 31وڮال النبي إبراهيم: آنا نعرف اعلني كثرت لكلام امعاك، يغير فحالتك اجبرت الا 20 صالحين؟ وڮالّو : ماني لاهي نهلكها يلين نجبر فيها 20. 32وڮال النبي إبراهيم: لا تغضب اعليَّ يا رب إلى اتكلمت وڮلتلك إلى اجبرت فلمدينة الا 10 صالحين؟ وڮالّو : ماني لاهي نهلكها إلى اجبرت فيها 10. 33وعاڮب ما اوفا الله تعالى من لكلام امع النبي إبراهيم، امشا وارجع النبي إبراهيم شور بلو.
Currently Selected:
التكوين 18: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
