التكوين 6
6
بداية العالم
النبي نوح يستعد للطوفان
1وإلين ابداو البشر يكثارو فلارض وخلڮولهم امنات، 2شافو الملايكة اعلن امنات البشر ازوينات وڮبظوهم واتعرسو امعاهم كيف ما ابغاو. 3وڮال الله تعالى: روحي ما يبڮا فلإنسان الزمن كامل بيهلي هو إنسان فاني ومن ظرك ماهو لاهي يعيش أكثر من 120 سنة. 4ومن ذاك الوقت عاد فلارض لجبابرة بيهلي الملايكة اتعرسو امع امنات البشر وجبرو منهم أولاد. وكانو أولادهم هوما لجبابرة اللي معروفين بالحرب من ذاك الزمن.
5وعاڮب ذاك شاف الله تعالى اعلن شر لإنسان انزاد حته فلارض، واعلن رغبات لإنسان وافكار ڮلبو كاملين دائما ماهم امسڮمين. 6واتكدر الله تعالى حته فڮلبو اعلنو خلڮ لإنسان فلارض. 7وڮال الله تعالى: لاهي انفرق البشر اللي خلڮتهم من اعلى لارض، الناس امع الحيوان والمخلوقات اللي يزحفو اعلى اكروشتهم والطيور السما بيّلي اتندمت اعلني خلڮتهم. 8يغير النبي نوح ارضا اعليه الله تعالى.
9وهاذي هي قصة النبي نوح: هو كان آرڮاج صالح ومتقي مولانا من امبين أهل جيلو، ويعدل كل شي طلبو منو مولانا. 10واجبر اثلت أولاد هوما سام وحام ويافث.
11عادت لارض فاسدة عند مولانا وعاد فيها الظلم وشر لإنسان. 12وإلين شاف مولانا هاذا الفساد اللي خسر حياة كل البشر، 13ڮال مولانا للنبي نوح: جات نهاية هاذا الزمن، ولاهي انفرق البشر كاملين من الوجود بيهلي بسببهم امتلات لارض من الظلم. لاهي انبيدهم وانبيد لارض امعاهم. 14وعدل لراصك سفينة من لعمد لمتان، وابني فيها ابيوت وادهنها بالطين من الڮدام ومن النڮر اياك الما ما يدخل فيها. 15وتبينها بهاذي الطريقة: طول السفينة يعود 150 ميتر، وعرظها يعود 25 ميتر، وطولها اعلى الفوڮ يعود 15 ميتر. 16واتعدل فيها مغطاية يعود امبينها امع السفينة 50 سانتيمتر، واتعدل فيها باب، واتعدل فيها ثلاثة طوابق، التحتاني والوسطاني والفوڮاني. 17بيّلي راعيني لاهي انمشّي طوفان اعلى لارض اياك انفرق كل مخلوق حي تحت السما. وكل شي اعلى لارض لاهي يهلك. 18يغير لاهي انعدل عهدي امعاك وتدخل السفينة انتا وأولادك واعيالك واعليات أولادك امعاك. 19وتڮبظ امعاك فالسفينة 2 من كل مخلوق اذكر ونيثي اياك يسلكو امعاك: 20أثنين من كل نوع من الطيور ومن كل نوع من الحيوانات ومن كل نوع الحيوانات اللي يزحفو اعلى اكروشتهم اياك يحياو. 21واڮبظ امعاك كل شي ينتكل واتخزنو اياك يعودلهم ويعودلك الطعام. 22وعدل النبي نوح كل شي اطلب مولانا منو.
Currently Selected:
التكوين 6: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
