Matiu 18
18
Galewa yai, Sai ya Hasai Wananaha?
Matiu 18:1-5
(Maleko 9:33-37; Luka 9:46-48)
1Fuyana yai tau famuli watanina sa laoma Yesu lisina, be sa fatiꞌoi, tiyen,
Galewa Aba Baꞌisa Nuꞌuna yai, sai ya hasai wananaha?
2Yofede, Yesu wawaya kiukiu hesa ya yogaiyama, be nuwanuwadi yai ya faꞌobiyo, 3na iyen,
E faliba dudulaimiu, yena ami miya bui doha wawaya kikiꞌina mate, gonowana Galewa Basileiyana ami sola. (1 Kolinto 14:20)
4Debana yai, sai ya fakiu fuyoi doha gwama kiukiu te mate haba ya laꞌi ai Galewa Basileiyana.
5Yo sai hesa hesagu yai na wawaya kiukiu laꞌi ya yoga hitin, mate ya yoga hitinigu hinaga.
Laulau Heyaheyayadi Doga Yaluwana ya Faheyaya
Matiu 18:6-9
(Maleko 9:42-48; Luka 17:1-2)
6Na yena wawaya kikiluka te, sai ya bwalafahidi, be edi kawawananaha lisigu yai ya fagogomadi, ena dudulai mate, dogana ni ai gadona umeꞌehu laꞌilaꞌi ami sofa, na ai gabogabotum ami fakapululolo. 7Kapole, tanoꞌubu, paꞌana heyaheyaya ya laꞌi wananaha lisina yai, dodoga ya ginaulidi be sa faꞌalu betibeti! Ginaulidi doha haba sa tubu. Inmoho, sai tau ginaulina, mate heyaheyaya laꞌilaꞌi haba ya fahoina.
8Yena nimam o ahem heyaheyaya ya ginauli mate, u ibo afulen be u pei! Ena dudulai mate, nimam esega o ahem esega ai mwahuli haba wa mwahuli. Hige i loholoho bena ahem luwaga yo nimam luwaga ti heyaya, be ti peim ai oyagi ala'alana ya lau ee–, hige ofina. 9Na yena matam amainiya heyaheyaya ya leyama, u limofahi, be u pei! Haba matam eseꞌesega yai wa lau mwahuli hige ana siga, tabu matam luwaluwaga be ti peim ai Gehena oyagi ala'alana.#18:9Alina Giliki yo Suau te famuli watandi, be liba te <<Gehena oyagi alaꞌalasina yai>> te fapaisowa.
Sipi Gegena Heyaheyasonna
Matiu 18:10-14
(Luka 15:3-7)
10Au ita komakoman, wawaya kiukiu doha itete tabu au ita lidilidiyen. Mata paꞌana haba E falibamiu: edi anelu Galewa yai mate, fuya ouꞌouli Tamagu Galewa yai, sadaina yai sa miyamiya.
11Doga Natuna ya laoma be safaluma sa lau asiꞌasina haba ya fofofahidi.#18:11 Uliꞌuli haisa lausoisoi 11 sa tole, na haisa higeꞌe.
12E faliba dudulaimiu mate, yena taumoho esega ena sipi 100, na esega ya asina, haba 99 ya lau afulen ai tu'a, na asi'asinana ya yo'oi ee–, ya lobahi. 13Yena ya lobahi, E falibamiu, nuwana ya amna diꞌoi sipi gegena lisina yai, habahim gegege gesadi 99.
14Gonogonowana doha, Tamamiu Galewa yai hige i fanuha bena wawaya kikiꞌuka te, laꞌi i asina.
Hidam hesa Heyayana ya Ginauli Lisim yai
Matiu 18:15-17
15Yena hidam, heyaheyaya ya ginauli lisim yai, u lau lisina be ena heyaya u faꞌita lobahi. In be um ibomiu moho, ami fadudulai. Yena alinam ya lau watan, mate nuwana haꞌa ya faloholoho. (Diyemsi 5:19)
16Ibe yena hige alinam i lau watan, doga esega o luwaga maꞌemiu ami lau, be haba emi pilipilina wa liba famahata dodogadi te ai lisidi, doha Buka Tabuna yai iyen. (Diutelonomi 19:15)
17Yena ya ꞌwaiyoꞌo be hige alinadi i lau watan, habahim, dubu tanutanuwagadi au falibadi. Na yena dubu ya moꞌa peiyen, au abi'abiyen doha tau kawawananaha gesana yo takesi tau tanotano.
Auꞌaui yo Tata
Matiu 18:18-20
18E faliba dudulaimiu, somo ami auꞌaui tanoꞌubu yai haba ai Galewa hinaga sa auꞌaui. Na somo wa tata tanoꞌubu yai haba ai Galewa hinaga sa tata.
19E faliba fuyo'imiu hinaga mate, yena dodogami luwaga emi nuwatuhu esega be somo ami anꞌetai, haba emi nuwatuhuna tamagu Galewa yai ya ginauli, enehemiu.#18:19 Au italau, 1 Diyon 5:14. Be haba nuwada sa adidili yena ena nuwatuhu te lau watanidi, mate somo te anꞌetaidi lisina yai haba ya feleda. 20Paꞌana luwaga e faihona sa faꞌoigogo hesagu yai, Yau amainiya maꞌedi.
Doga ena Heyaheyaya Hige i Nuwa Afulen Heyaheyasonna
Matiu 18:21-35
21Habahim Pita ya laoma be Yesu ya fatiꞌoi, iyen,
Guyau, ibe hidagu laulau heyaheyayana lisigu yai ya ginauli, ma fisa haba ena heyaheyaya E nuwa afuledi? ma faligigi-luwaga ye?
22Alinana Yesu ya bui, iyen,
Higeꞌe! Hige ma faligigi-luwaga! Ma fuya 70 x 7.#18:22 Haisa tiyen aniyona mate: 70 x 7 = 490, na haisa tiyen 70 + 7 = 77. Aniyona wananahana mate: Ma peidi! o ma nuwa ofi fahim.
23Galewa Basileiyana nenena doha ite: Kin hudoꞌi ena tau paisowa sidohana ena moni edi fafapaisowadi mate maidana ena tau paisowa sa pei gogonidi. 24Bena haba ya ita sipoidi fatubu, taumohona hesa, ana hagahaga K10,000.00 sa leyama lisina.#18:24 Giliki alinadi yai mate <<talenti 10,000.>> Na fuya yai te aniyona mate Kina 3 miliyon, yo ya hasai yee–, ya diꞌoi wananaha. 25Dogana mate hige gonowana moni ni i famaisa. Ena baꞌisa ya liba be in, yo lahuna, yo nanatudi yo edi gogo mahudo'idi sa uneꞌune afuledi be haba adi hagahaga sa famaisa.
26Ena tau paisowa wa ya guli lidi ahena yai, na ya anꞌeta gadogadola. Iyen,
<<U nuwatalu lisigu yai! Haba agu hagahaga E famaisa!>>
27Baꞌisa ya ita nuwatohatohaen, yofede ana hagahaga ya tomo afuledi.
28Taumoho wa ya lau be falena tau paisowa ya lobahi. In ya anhagahaga hidana te lisina yai - kina fisa moho. Yofede, ya tohai be gadona ya mwakamwakai na iyen,
<<Am hagahaga lisigu yai u maisadi!>>
29Falena tau paisowa ya guli lidi, na ya anꞌetai, iyen,
<<U nuwatalu lisigu yai! Haba E famaisa fuyoꞌidi!>>
30Na hige i fanuha. Hidana moho ya lawen, ya falau deli yee–, bena ya famaisadi, habahim sa soꞌefahi. 31Falena tau paisowa haisa sa ita, be nuwadi sa heyaya, yofede, sa lau, ginauli mahudoꞌina edi Baꞌisa ena sa liba.
32Yofede, baꞌisa wa na tau paisowa ya yogai lawen lisina be iyen,
<<Em laulau haꞌa ti heyaya! Am hagahaga lisigu yai E tomo afuledi, paꞌana wa anꞌetaigu, be doha E ginauli. 33Um hinaga bena falem tau paisowa em abiꞌabina doha, gonogonowana doha somo lisim yai E ginauli.>>
34Baꞌisa, manana ya bala wananaha. Ena tau paisowa ya panisi deli yai ee–, ana siga ana hagahaga mahudoꞌidi ya famaisa ofinidi.
35Habahim, Yesu ena liba ofiꞌofina ya libaen, iyen,
Yena nuwamiu ganahewana yai, hidamiu ena heyaheyaya hige au nuwa afulen, haba Tamagu Galewa yai ai lisimiu ya ginauli doha.
Currently Selected:
Matiu 18: Buhutu
Highlight
Share
Copy
Want to have your highlights saved across all your devices? Sign up or sign in
© 2024, SIL Global. All Rights Reserved.
