Matiu 24

Dubu Tabuna ena Heyaya Yesu ya Libalibaen

Matiu 24:1-2

(Maleko 13:1-2; Luka 21:5-6)

1Dubu Tabuna Yesu ya lau afulen na ana hewahewali sa laoma lisina be Dubu Tabudi lumadi sa faꞌita. Yesu ya fatiꞌo lau lebedi iyebom,

2Ginauli mahudoꞌidi ni ami itadi? E liba dudulai lisimiu yai mate umeꞌehudi ni ibege laꞌi i otaꞌota. Hidana ai hewana, haba sa faibeꞌuidi.

Yesu ena Laoma Fafaꞌilalana Doha Somo?

Matiu 24:3-14

(Maleko 13:3-13; Luka 21:7-19)

3Yesu mate Oliwe Uduhulina yai ya taꞌataꞌai, na ana hewahewali sa lau modimodi gafuma lisina, be tiyen,

U falibamai, atasi somo haba sa tubu, yo em laoma fafaꞌilalana haba doha somo yo tanoꞌubu ena ofi atasi?

4Alinadi Yesu ya bui, iyen,

Au ita komakomaꞌi. Tabu sai i bwalafahimiu. 5Paꞌana dodoga boludi haba hesagu sa fapaisowa tiyen, <<Yau mate Keliso,>>#24:5 <<Keliso>> aniyona mate, <<Tau Fasinabo,>> e <<Mesaiya.>> be haba sa bwalafahimiu. 6Hiyala dagugudi haba sadaimiu yai ami atahiyedi, yo tefa hesa yai haba wasadi hinaga ami atahiyedi. Inmoho tabu aluwamiu ti potifahi. Ginauli hudoꞌi-hudoꞌi haba sa tubu. Inmoho, fuyana hola ya laolaoma. 7Tefa hesa haba maꞌedi tefa hesa sa hiyala, yo nuꞌu hesa haba maꞌedi nuꞌu hesa sa hiyala. Galamo wesawesasa yo mwanuꞌunuꞌu haba sa tubu ai nuꞌu haisa. 8Itete mate kamkamna fatufatubuna.

9Lahaidi ni haba sa fakamkamnamiu yo sa wunuimiu. Tefa mahudoꞌidi haba sa ꞌwaiyoꞌoemiu Yau debagu yai. 10Boludi haba edi kawawananaha sa gogoma. Maihalana yai na haidadi adi sa wewe yo sa fatole muli.

11Peloweta bwalabwaladi boludi haba sa laoma be sa bwalafahimiu. 12Paꞌana heyaheyaya ya laꞌi wananaha, dodoga boludi haba edi gadosisi haba sa welo.

13Inmoho, sai ya nuwa adidili bee–, ana siga yai mate, mwahuli hige ofina haba ya abi.#24:13 Au italau Matiu 10:22b hinaga.

14Yaubada ena Aba Baꞌisa wasana loholohona mate haba ai tanoꞌubu mahudoꞌina sa lauguguyaꞌen. Ai mulina habahim tanoꞌubu ya ofi. (Liba Famahata 5:9; 7:9)

ꞌWasabu Laꞌilaꞌi

Matiu 24:15-28

(Maleko 13:14-23; Luka 21:20-24; Daniyela 9:27)

15Be yena tau anfaheyaya in nuꞌu tau faꞌasi tau faꞌasi wolewolena ami ita ya obiꞌobiyo Dubu Tabuna yai. In, Peloweta Daniyela beyabeyana ya libaen mate, yena tau fatifatili dogana haba aniyona ya fadosi lobahi.

16Salumadi Diudeya yai tau miya ti gela ti lau tuꞌa. 17Yena sai ena luma hewana yai,#24:17 Isalaela, edi luma, hige hato ti fapaisowadi. Luma hewadi mate sa tabataba, na fuya haisa ainiya sa laulau bawa. tabu i lau leta, be ena ginauli luma ganahewana yai i tano gogo.

18Sai gabu yai tabu i fuyo, be ana luhuluhu i abi. 19Lahaidi yai te mate, wawahin nanatudi sa fafanomdi yo boga ganahewadi yai mate kamkamna laꞌilaꞌi haba sa fahoina. 20Inmoho, bena Yaubada ami anꞌetai be tabu ai fuya gogoma o ai Sabati au gela. 21Paꞌana lahaidi yai te kamkamna lalaꞌi haba sa tubu. Yaubada tanoꞌubu ya falasa fuyandi yai, kamkamna nenedi doha itete te fahoinadi ya laoma, be ahoꞌite, ai muli ibege doha ite hinaga i tubu fuyo.

22Ibe lahaidi ni hige ti noꞌudima, ibege sai i mwahuli, Inmoho, Yaubada ena fasinabo dodogadi debadi yai lahaidi haba sa tupo.

23Lahaidi yai yena sai iyen,

<<Yaubada ena Fasinabo Dogana,#24:23 <<Yaubada ena Fasinabo Dogana>> aniyona mate <<Keliso,>> e <<Mesaiya.>> ma! Hola u ita!>> ye iyen <<Ma, ne'i!>>

Tabu u kawawananahaꞌedi.

24Paꞌana Keliso bwalabwala#24:24Uliꞌuli haisa tiyen <<Mesaiya bwalabwala.>> yo peloweta bwalabwala haba sa taumahata be fafaꞌilala yo noꞌo abiꞌabidi sa lau fatubu, be yena gonowanadi haba Yaubada hineli dodogadi sa bwalafahidi.

25Logena E faliba bwaꞌiyemiu.

26Be yena sai ya falibamiu, iyen, <<Logena au–, nuꞌu pitapitalina yai!>> tabu au lau; o iyen, <<Logena ma, luma bilina ganahewana yai!>> tabu au kawawananaha. 27Gonogonowana doha namali ya tili tefa hasahasa yai, na ya lau tefa lidilidi yai, Doga Natuna ena laolaoma haba doha.

28Somo yai somo peꞌipeꞌina, mate gigiya haba ainiya sa faꞌoigogo.

Doga Natuna ena Taumahata Fafaꞌilalana

Matiu 24:29-31

(Maleko 13:24-27; Luka 21:25-28)

29<<Lahaidi yai ni, na heyaheyaya ni mulidi yai,

maihala haba ya fakamumu,

yo nawalahi ibege i sina;

kipwala galewa yai haba sa beꞌu,

yo somo gigigibwalina galewa yai haba sa tilele.>> (Isaiya 13:10; Isaiya 34:4)

30Maihalana yai, Doga Natuna fafaꞌilalana haba ya taumahata ai galewa, na tefa ouꞌouli haba sa tan. Doga Natuna haba sa ita, ya laolaoma ai yada hewadi, ma namanamalina yo ma gigibwalina.

31Hilimoya sa yufi falaꞌi na anelu ya fatamali bwaꞌiyedi sa lau galewa yo tanoꞌubu adi dan yai ena fasinabo dodogadi sa tanogogoꞌidi.

Oyagi Kuhou Heyaheyasonna

Matiu 24:32-35

(Maleko 13:28-31; Luka 21:29-33)

32Oyagi kuhou heyaheyasonna hola ya falibamiu; yena ya in be luguna sa tutuli ami sibai mate haiꞌin fuyana.

33Yena fafaꞌilala mahudoꞌina te ami itadi, ami sibai Yesu ena laoma ya hanahanauma emi papeꞌo gwalugwaluna yai. 34E faliba dudulaimiu, mate hiti te ibege ti peꞌi ana sigana ginauli mahudoꞌidi te sa tubu. 35Galewa yo tanoꞌubu haba sa ofi, inmoho egu liba ibege ti ofi.

Ana Maihala yo ana Lahai Hige Sai i Sibai

Matiu 24:36-44

(Maleko 13:32-37; Luka 17:6-30; Luka 17:34-36)

36Ana lahai yo maihalana hige sai i sibai, hige Galewa aneludi, o Tau Natunatu. Tamana iyabona moho ya sibai.

37Doga Natuna ena laolaoma nenena doha somo mate haꞌa doha Nowa ena fuya yai. 38Bolowada hola hige i wewe fatubu, na lahaidi yai, dodoga sa nom yo sa kalahe, yo fafanahi, ya laulau ee–, Nowa ya awalau waga yai. 39Inmoho, hige begana edi ita lobahi somo ana sigana bolowada ya laoma be ya aleleidi. Doga Natuna ena laolaoma haba gonogonowana doha. 40Maihalana yai, tatau luwaga haba gabu yai sa paipaisowa. Yaubada haba esega ya lawen, na hesa haba ya lau afulen. 41Wawahin luwaga hinaga haba witi sa bibibin, be fwalawa sa ginauli. Yaubada haba hesa ya lawen, na hesa haba ya lau afulen.

42Lisina yai bena ami nononoha, paꞌana emi Guyau, lahai somo haba ya laoma mate hige emi siba. 43Ibe luma tanuwagana ya sibai fuyana somo tau angafu ya laoma haba ya tuhutuhuli. Be tau angafu ibege i angafu. 44Be logena, umi hinaga fuya ouꞌouli bena ami nononoha, paꞌana Doga Natuna ena laolaoma, doha fafatauhiti, hige au sibai.

Fayofayo Tau Abina Loholohona yo Heyaheyayana

Matiu 24:45-51

(Luka 12:41-48)

45Sai haba fayofayo tau abina loholohona? Logena, in haba ena tau paisowa ya ita wata komakomaniꞌidi, yo haba maihala dudulaidi yai ya fakalahedi. 46Yena ena baꞌisa ya lau fuyofuyoma na ya ita haba ya kawa loholohoen. 47E liba dudulai matamiu yai, mate haba ya tole be ena ginauli mahudoꞌina ya ita watanidi. 48Na yena fayofayo tau abina ni ya heyaya be nuwana yai iyen,

<<Egu baꞌisa ya miya hudoꞌi fuya lofalofa.>>

49Yofede, ya fatubu be falena fayofayo tau abidi ya antalaidi, ya kalahe yo ya nom maidana tau nom peledi.

50Fayofayo tau abina ena ba'isa ena laoma lahaina yo maihalana hige i sibai. 51Haba ya lau fabubui na ya fatamali lawen, maidana tau lau bwalabwala sa miya. Amainiya mate tan yo moꞌa aba nalididinidi.

Currently Selected:

Matiu 24: Buhutu

Highlight

Copy