1 Пачаби 1
1
Элканагьил хъизан
1Ефраимил тӀалъиялда бугеб Цуфимазул Раматаималдаса#1:1 Цуфимазул Раматаим – къокъ гьабун гьелда Рама абула (бал. 1 Пач. 1:19). цо чи вукӀана Элканагьилан цӀар бугев. Гьесул инсуда цӀар Ерохам, Ерохамил инсуда цӀар Элигьу, Элигьул инсуда цӀар Тоху, Тохул инсуда цӀар Цуф букӀана, гьевги – Ефраимил къавмалъул чи. 2Элканагьил кӀиго лъади йикӀана. Цоялда цӀар Ханна, цогидалда цӀар Фенанна букӀана. Фенаннае лъимал гьаруна, Ханнае гьаричӀо.
3Щибаб соналъ жиндирго шагьаралдаса вахъун унаан гьев чи Шилоялде Гучал Аскаразул БЕТӀЕРГЬАНАСЕ#1:3 Гучал Аскаразул БЕТӀЕРГЬАН – жугьутӀазул мацӀалда ЙГЬВГЬ Цеваот. къурбан хъвезе ва Гьесие тӀагӀат-гӀибадат гьабизе. Элил васал Хофниги Пинхасги рукӀана гьенир БЕТӀЕРГЬАНАСУЛ#1:3 БЕТӀЕРГЬАН – жугьутӀазул мацӀалда ЙГЬВГЬ. Гьеб ккола Аллагьасул цӀаразда гьоркьоб бищун хирияб. кашишзабилъун. 4Къурбан хъунщинахъе Элканагьица Фенаннаеги гьелъул васал-ясазеги бутӀа кьолаан. 5Амма Ханнае гьес кӀи-кӀи бутӀа кьолаан, щайгурелъул гьелъие БЕТӀЕРГЬАНАС лъимал кьолел рукӀинчӀониги, гьесие гьей хирияй йикӀиндал. 6БЕТӀЕРГЬАНАС гьелъие лъимал кьолел рукӀинчӀелъул, Фенаннаца квешго инжит-хӀакъир гьаюлаан гьей. 7ЛъагӀалидаса лъагӀалиде гьедин кколаан. Щибаб нухалъ, БЕТӀЕРГЬАНАСУЛ Рокъое#1:7 Сулейманица жеги БетӀергьанасул Рукъ бан букӀинчӀелъул, мухӀанго абизе кӀоларо щиб гьеб букӀараб – заманаялъе бараб мукъадасаб БакӀищ, ялъуни БетӀергьанасул гъамас жаниб лъураб мукъадасаб Чадирищ. щванщинахъе, Фенаннаца хӀакъир гьаюн чараги хвезабун, гӀодулаан гьей ва кванда кӀалцин хъвалароан.
8Элканагьица гьелда абулаан: «Ханна, щай мун гӀодулей? Щай дуца квен кваналареб? Мун ракӀ бакъван щай йикӀуней? АнцӀго васасдасаги лъикӀав гьечӀищ дун дуе?» – ян. 9Цо къоялъ Шилоялда гьел квана-гьекъон хадуб Ханна тӀаде яхъана. Кашиш Элиги вукӀана БЕТӀЕРГЬАНАСУЛ Рукъалъул кӀалтӀа гӀодов чӀун. 10РакӀ бакъван, гӀек-гӀекиялда гӀодилаго, БЕТӀЕРГЬАНАСЕ дугӀа гьабизе лъугьана Ханна. 11БЕТӀЕРГЬАНАСЕ назру гьабун Ханнаца абуна:
«Вай, Гучал Аскаразул БЕТӀЕРГЬАН, гьай дур лагъалъул бугеб – дир къварилъиги бихьун, гьелде Дуца бер балагьани ва дур лагъ гьай дунги кӀочон течӀого Дуца гьелъие лъимерлъун вас кьуни, дица гьев гӀумруялъего БЕТӀЕРГЬАНАСЕ хъулухъалъе вукӀине кьела ва гьесул ботӀрода кидаго нусги хъваларо»#1:11 Ханнаца гьев вас БетӀергьанасе хъулухъалъе вукӀине кьелилан назру гьабулеб буго ва гьев гӀумруялъго назорейлъун тезе рагӀи кьолеб буго БетӀергьанасе. Назорей абураб рагӀул магӀна ккола БетӀергьанасе «тӀокӀ гьави (гьайи)», ялъуни «вацӀцӀад (яцӀцӀад) гьави (гьайи)» (бал. Тар. 6:1-21)..
12Гьедин гьоркьоса къотӀичӀого БЕТӀЕРГЬАНАСДА цее дугӀа гьабулей гьей йикӀаго, Эли вукӀана гьелъул кӀутӀбузда хадуб хал ккун чӀун. 13Ханнаца рекӀелъ жаниб щурулеб букӀана дугӀа. Гьелъул кӀутӀби рагъа-рачарулел рукӀана, амма къватӀибе рагӀи рагӀулеб букӀинчӀо. Гьединлъидал, гьей мехтарай гӀадан йигин ккана Элида. 14Элица гьелда абуна: «Мун кие щвезегӀан гьедин мехталилъ йикӀине йигей? Гьеб мехтел те дуца».
15Гьелда данде жаваб гьабун, Ханнаца абуна: «Гуро дир хӀалчӀахъаяв эмен, чара бухӀун БЕТӀЕРГЬАНАСДА цебе дирго рекӀел унти гьурщулей гӀадан йиго дун. Чагъиралда яги, цоги гьекъолеб жояллда дица кӀал хъвачӀо. 16Дун, дур лагъ, пасикъай гӀаданлъун рикӀкӀунге дуца. КӀудияб пашманлъиялъ ракӀ унтун дугӀа гьабулей йикӀарай гӀадан йиго дун гьабгощинаб мехалъ».
17Цинги Элица абуна: «Парахатго рокъое а дурго. ГӀизраилалъул Аллагьас дур гьари къабул гьабеги».
18«Мун дида, дур лагъалда, гурхӀана», – янги абун, гьей гӀадан жиндирго нухда ана; кванана-гьекъана ва тӀокӀаб гьелъул гьурмада пашманлъи загьирлъичӀо.
19Нахъисеб къоялъ радалго рахъун, БЕТӀЕРГЬАНАСЕ тӀагӀат-гӀибадатги гьабун, гьел къватӀире рахъана ва Рамаялде#1:19 Рамаялде – ялъуни Раматаималде. жидерго рокъоре тӀадруссана.
Элканагь жиндирго лъади Ханнада аскӀов вегана; БЕТӀЕРГЬАНАС гьелда цӀоб лъуна, ва 20Ханнал ургьибе лъимер ккана – хадусеб соналъ гьелъие вас гьавуна. «БЕТӀЕРГЬАНАСДАСА гьарун щвана дие гьав», – иланги абун, гьелъ гьесда Шамуил (БЕТӀЕРГЬАНАСДА рагӀарав) абураб цӀар лъуна.
Ханнаца БетӀергьанасе хъулухъалъе вукӀине Шамуил кьей
21Элканагь ва кинабго гьесул хъизан-къай БЕТӀЕРГЬАНАСЕ къурбан хъвезе ва жиндирго назраби тӀуразаризе хадусеб соналъги къватӀире рахъунелъул, 22Ханна гьезда цадахъ йилълъинчӀо.
Гьелъ росасда абуна: «БЕТӀЕРГЬАНАСДА цеве вахъун чӀезе ва миркалъго дова вукӀинелъун, карандаса тӀезавуравго, Шамуил дица Шилоялде щвезавила».
23Цинги Элканагьица абуна: «Дуда берцин бихьараб гьабе. Гьедин батани, гьев карандаса тӀезавизегӀан, рокъой чӀа. БЕТӀЕРГЬАНАС Жиндирго#1:23 Цо-цо цересел таржамабазда ва кагътазда хъван буго дур абун. рагӀи тасдикъ гьабеги», – ян.
Гьедин рокъой чӀун хьихьана гьелъ вас, карандаса тӀезавизегӀан. 24Жеги гьитӀинав лъимер вукӀаниги, карандаса тӀезавуравго, БЕТӀЕРГЬАНАСУЛ Рокъове Шилоялде гьев щвезавизе ячӀана Ханна; цадахъ къурбаналъе хъвезе лъабго сон бараб басиги, цо ефа#1:24 Цо ефа – гӀага-шагарго 22 л. ролъги, цо рахълъен чӀагӀдалги босана гьелъ.
25Баси къурбаналъе хъун хадуб, гьез вас Элихъе вачана. 26Ханнаца Элида абуна: «Я дир хӀалчӀахъаяв эмен, дуда ракӀалда йигищ дун? Дур беразда цее гьаб бакӀалда БЕТӀЕРГЬАНАСЕ дугӀа гьабулей йикӀарай гӀадан йиго дун. 27Гьале гьав васасе гӀоло гьардана дун доб къоялъ. БЕТӀЕРГЬАНАС къабул гьабуна дир гьари ва дир рекӀел мурад тӀубазабуна. 28Гьанже дицаги БЕТӀЕРГЬАНАСЕ вукӀине тӀокӀ гьавун кьолев вуго гьав миркалъго».
Цинги гьез БЕТӀЕРГЬАНАСЕ сужда гьабуна.
Currently Selected:
1 Пачаби 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023