1 Пачаби 2
2
Ханнал дугӀа
1Хадуб Ханнаца гьадинаб дугӀа гьабуна:
«Я дир БЕТӀЕРГЬАН, Дуца дир ракӀ бохизабуна.
Дуца дие къуватги кьуна.
Тушбабазда цее кӀодо гьаюна,
Дуца тархъан гьаюн аваданлъана.
2БЕТӀЕРГЬАН гӀадин вацӀцӀадав щивго гьечӀо;
гьечӀо тӀокӀав Мун гӀадав;
Нижер Аллагь – борхатаб кьуру, Дуда бащадаб жо щибниги гьечӀо.
3Нуж тӀокӀалъ чӀухӀадго кӀалъаге,
хъачӀаб калам кӀалдиса къватӀибе ине биччаге.
БЕТӀЕРГЬАН Аллагь вуго кинабго лъалев –
гӀадамазул ишал цӀадирабазда тӀад лъунин ругел.
4Гучал рагъухъаби гӀодор речӀчӀула,
гучдакъал абуни къуваталъ цӀола.
5ГӀорцӀун рукӀарал кванихъ хӀалтӀула,
ракъуца холел рукӀаразда ракъи кӀочона.
Лъимал гьарулей йикӀинчӀелъе анкьго лъимер гьабула,
амма гӀемерал васазул эбел янгъизлъула.
6БЕТӀЕРГЬАНАС рухӀ бахъула, ва Гьесго гӀумруги кьола;
Гьес жагьандаманалъул кӀкӀалахъе рехула, ва гьениса рорчӀизеги гьарула.
7БЕТӀЕРГЬАНАС мискинлъизеги гьарула, ва Гьесго бечедги гьарула;
гӀодорегӀан ккезарула ва тӀадегӀанлъизеги гьарула.
8ХӀурулъа рахъун рорхизе гьарула мискинал
ва рахъулъа – пакъирал;
хӀурматиял тахбакӀазде рахинарула ва къадру-къиматги насиблъизабула гьезие.
Гьаб ракьалъе кьучӀги БЕТӀЕРГЬАНАС лъедал
ва гьеб кьучӀалда тӀад гьаб дунялги Гьес рекъезабидал.
9Жиндие ритӀухъазул нухал Гьес цӀунула,
амма квешал чагӀи бецӀлъиялъул тӀинда кӀалал рукъун ккезарула,
щайгурелъул, инсан жиндирго къуваталдалъун бергьунарелъул.
10БЕТӀЕРГЬАНАСДА данде чӀарал щущахъ разарила;
Гьев зобалаздаса гъугъадила гьезде.
Цояб рагӀалдаса цогидаб рагӀалде щвезегӀан, тӀолабго дунял диваналде ахӀизе буго БЕТӀЕРГЬАНАС.
Жиндирго пачаясе къуват Гьес кьола,
Жиндирго тӀаса вищарасе гучги Гьесго кьола».
11Цинги Элканагь Раматалде рокъове тӀадвуссана, васги кашиш Элида аскӀов БЕТӀЕРГЬАНАСЕ хъулухъалъе тана.
Элил васазул къабихӀлъи
12Элил васал хӀалихьатал жал рукӀана; гьез я БЕТӀЕРГЬАНАСУЛ милат гьабулароан, 13я халкъалда хурхун кашишзабазда тӀадал ишал тӀуразарулароан. Цо пуланав чияс къурбан хъолеб мехалъ, гьан белъине барабго, кашишзабазул цеветел вачӀунаан лъабгӀусилаб кӀудияб гӀучӀги кодоб ккун, 14ва бегьулаан гьеб хьагинибе, ялъуни къоноялде, ялъуни болхьагинибе, ялъуни хъабинибе жанибе ва гӀочӀода къазе щвараб жо жиндиего босулаан. Гьедин гьабулаан гьез киналго Шилоялде рачӀарал гӀизраилазе. 15Гьебги гӀечӀого, жеги тӀатӀи бухӀилалда цебе, кашишасул цеветел вачӀунаан ва къурбаналъул хважаинасда абулаан: «Кашишасе бежизе гьан кье. Белъараб гьан босизе гьечӀо гьес, гӀатӀгояб гурони», – ян. 16Гьев чияс, цин тӀатӀи бухӀизегӀан чӀа, хадуб босе дуего бокьараб жоян абуни, чӀеларин, гьабсагӀатго кье, кьечӀони, хӀал гьабун бахъилилан абулаан.
17Гьедин БЕТӀЕРГЬАНАСУЛ къурбанал хӀакъир гьаруралъухъ кӀудияб хӀакъ букӀана гьел гӀолохъанал кашишзабазе.
18Шамуил абуни, БЕТӀЕРГЬАНАСЕ хъулухъалъе эхетун вукӀана. Гьев вукӀана мукъадасаб эфод ретӀунев вас. 19Щибаб соналъ эбелалъ гьитӀинаб гӀаба букъулаан гьесие ва, росгун цадахъ лъагӀалил къурбан хъвезе ячӀарайго, цадахъ гьебги босун бачӀунаан. 20Элица Элканагьил ва гьесул лъадул рахъалдасан дугӀа гьабулаан:
«БЕТӀЕРГЬАНАС баракат лъеги ва дуе гьай гӀаданалдаса лъимал кьеги, гьелъ гьарун щварав ва БЕТӀЕРГЬАНАСЕ тӀокӀ гьавун кьурав васасул бакӀалда», – ян.
Хадур гьел рокъоре тӀадруссунаан. 21БЕТӀЕРГЬАНАСУЛ рахӀму рещтӀана Ханнаде, ва гьелъул ургьибе лъимер ккана. Жеги лъабго васги кӀиго ясги гьаруна гьелъие. Шамуилин абуни, БЕТӀЕРГЬАНАСЕ хъулухъги гьабулаго кӀудияв гӀолев вукӀана.
22Эли тӀуван херлъана. Гьесда рагӀулеб букӀана гьесул васаз гӀизраилазе гьарулелщинал тӀекълъабазул хӀакъалъулъ, ва мажлисалъул Чодрода цере хъулухъ гьабулел руччабазда аскӀор гьел регулеблъиги.
23Гьев васазда кӀалъана: «Щай нужеца гьединал жал гьарулел?! ТӀолабго халкъалъ бицунеб буго нужер къабихӀал ишазул. 24Йохъ, дир лъимал, лъикӀаб хабар гьечӀо гьаб дида рагӀулеб ва БЕТӀЕРГЬАНАСУЛ халкъалдаго гьоркьоб тӀобитӀулеб бугеб хабар. 25Цо чияс цоги чиясе квешлъи гьабуни, гьесие дугӀа гьабила, ва Аллагь тӀаса лъугьина, амма инсанас БЕТӀЕРГЬАНАСДА данде чӀараб квешлъи гьабулеб бугони, лъица гьесул рахъ кквезе бугеб?»
Амма гьесул васаз инсул рагӀухъ гӀин бачӀо, БЕТӀЕРГЬАНАС хвалил хӀукму къотӀун букӀиндал гьезие.
26Шамуилин абуни, кӀудияв гӀолев вукӀана, ва БЕТӀЕРГЬАНАСЕГИ гӀадамазеги хирияв вукӀана гьев.
Аварагас кашиш Элие Аллагьасул калима загьир гьаби
27Цо къоялъ Аллагьасул авараг вачӀана кашиш Элихъе гьадинаб калимагун:
«Гьадин абулеб буго БЕТӀЕРГЬАНАС: „Дун вачӀинчӀищ дур анкьумумузухъе, гьел жеги Мисриялда пиргӀавнасул лагъзаллъун ругеб мехалдаго? 28Киналго ГӀизраилалъул къавмазда гьоркьоса тӀаса рищана Дица гьел, Диего кашишзабилъун рукӀине: къурбан хъолеб бакӀалде тӀаде рахине, кьеккенал рухӀизе, ва Дида цебе эфод босизе. Дур умумузул ихтияралде кьуна Дица тӀолалго ГӀизраилазул рухӀулел къурбаналги. 29Аб щай Дир Рокъор тӀуразареян Дица тӀад лъурал къурбаналги сайгъаталги хӀатӀикь мерхьулел дуца? Дир гӀизраил халкъалъ босун бачӀарабщинаб сайгъаталъул бищун лъикӀаб бутӀаги кванан, гарбалги риццат гьарун, Дидасаги цере дурго васал щай гьарулел?“
30Гьединлъидал, БЕТӀЕРГЬАНАС абулеб буго: „Дур хъизан-агьлу ва дур инсул тӀолабго гӀагарлъи абадиялъего Дие хъулухъалъе рукӀине ругилан гьедун вукӀана Дун“. Амма БЕТӀЕРГЬАНАС гьанже гьадин лъазабулеб буго: „Гьедин букӀинаро! Дун кӀодо гьарурал Дицаги кӀодо гьарила, амма Дир цӀар инжит гьабурал Дицаги басра гьарила. 31Дица дур наслу ва дур гӀагарлъи рухӀдакълъизабураб заман бачӀунеб буго; Дур наслуялъул цониги чи херлъизегӀан хутӀизе гьечӀо. 32Дуда тӀаде балагь бачӀина, ва цогидал гӀизраилазул рикъзи-гьарзалъи бихьарабго, бахиллъун хутӀила мун – дур наслуялда жанив тӀокӀалъ киданиги вукӀине гьечӀелъул гӀумру халатав чи. 33Нагагьлъун Дир къурбан хъолеб бакӀалдаса нахъе къотӀичӀого дур наслуялъул чи хутӀани, гьевги дур берал магӀил цӀезаризе ва ракӀ унтизабизе таравлъун вукӀина, ва дур наслуялъул щивав чи битӀун гӀумру тӀегьараб завалалда холевлъун вукӀина.
34Дур кӀиявго вас Хофниги Пинхасги цо къоялда жанир хвезе руго – гьеле гьеб дуе гӀаламатлъун букӀина. 35Цинги Дица Диего вахъинавила Дие бокьухъе хьвадулев кашиш. Дица гьесул агьлу щулалъизабила, ва Дица тӀаса вищарав пачаясда цадахъ кидаго гьесул наслу букӀина. 36Гьебмехалъ дур агьлу-хъизамалъул чӀаго хутӀаравщинав чи гӀарцул гералъе#2:36 Гера – гӀизраилазул некӀсияб цӀайидул къадар, гӀага-шагарго 1 гр. ва чадил мочӀуялъе гӀоло, хӀалтӀи гьарун, гьесда цеве бетӀер къулизе вачӀина ва гьардела: ‘Рес кье дие, диего чед-хинкӀалъухъ цо кинаб букӀаниги кашишзабазул хӀалтӀи гьабизе’, – ян“».
Currently Selected:
1 Пачаби 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023