1 Пачаби 20
20
Давудги Ионатанги
1Гьебмехалъ Найоталдаса лъутун Ионатанихъе щвана Давуд. Гьес Ионатанида абуна:
«ЩибгӀаги дица гьабун бугеб? Дида бугеб гӀайиб щиб? Дица дур инсуе гьабураб квешлъи щиб бугеб, дун чӀвазеян гьев дида хадув лъугьине ккани?» – ян.
2«ЦӀунаги гьелдаса! – ян жаваб гьабуна Ионатаница. – Мун хвезе гьечӀо! Дир инсуца я кӀудияб, я гьитӀинаб щибго иш гьабуларо дида дандбачӀого. Гьеб дидаса бахчилаандай гьес? Гьеб гьедин батизе кколаро!»
3Амма Давудица гьедун абуна:
«Дур инсуда лъалелъулха дур дидехун божилъи букӀин. Гьединлъидал, гьес пикру гьабун батила: „Ионатанида лъан лъикӀ гуро гьаб иш, гьесул ракӀ бакъвачӀого букӀине“, – ян. Амма БЕТӀЕРГЬАНАСУЛ цӀаралхӀа ва дур гӀумруялхӀа, – дидаги хвалдаги гьоркьоб цо гали гурони гьечӀо».
4Ионатаница Давудида абуна: «Дуе бокьараб щиб батаниги, гьеб гьабизе хӀадурав вуго дун», – ин.
5Давудица абуна: «Метер цӀияб моцӀ баккиялъул байрам#20:5 ЦӀияб моцӀ баккиялъул байрам – моцӀрол байбихьиги, цӀияб моцӀ баккиги данде ккани, гьеб къоялъ байрам тӀобитӀулаан жугьутӀаз. байбихьула; гьеб байрамалъул хӀурматалда гьабулеб гӀодорчӀеялда дур инсуда аскӀов вукӀине ккола дун. Амма сезе маркӀачӀумех щвезегӀан мегӀер-гӀалахалда вахчун чӀезе рес кье дие. 6Дур инсуда дун гьечӀевлъи бихьани, дуца гьесда абе: „Давудица цӀакъ гьарана дида жив Бет-Лехемалде рокъове щвезе виччаян, щайгурелъул гьесул тӀолабго гӀагарлъиялъ лъагӀалил къурбанал хъолеб къо бугелъул“, – ин. 7Гьес лъикӀ бугоян абуни, дие хӀинкъи гьечӀо. Амма гьев кутакалда ццидахани, квешлъиялъе ургъун вукӀин лъай дуда. 8Дуца БЕТӀЕРГЬАНАСУЛ цӀарги бахъун, диргун – дур лагъасулгун, къотӀи-къай гьабун бугелъул, гьаб дир гьари нахъ чӀваге. Дица гьабураб квешлъи батани, дуцаго чӀван рехе дун. Инсухъе дун вачун щай дуе?»
9«ЦӀунаги гьелдаса! Дир инсуца дуе квешлъи ургъун бугеблъи дида лъан букӀарабани, дица гьеб дуда бицинчӀого телаандай?» – ян абуна Ионатаница.
10Давудица Ионатанида цӀехана: «Дур инсуца хъачӀаб жаваб кьуни, гьеб дида кин лъазе бугеб?» – ин.
11Ионатаница абуна: «Рилълъа гӀалахалде», – ян.
Гьел кӀиялго гьенире рилълъана. 12Цинги Ионатаница абуна:
«ГӀизраилалъул БЕТӀЕРГЬАН Аллагьасул цӀаралхӀа, сезе гьаб гӀуж щвелалде дица инсуда киналъулго цӀех-рех гьабила! Гьесул дудехун ракӀ битӀун батани, дица духъе хабар босун чи витӀила. 13Амма БЕТӀЕРГЬАНАС балагьалъукье ккезавеги дун, дир эменги дуе квешлъиялъе ургъун ватун, дица гьеб дуда лъазабичӀони ва мун сах-саламат нахъе ине виччачӀони. Цинги, дир инсуе гьабулеб букӀараб гӀадин, БЕТӀЕРГЬАНАС дуеги кумек гьабеги! 14Амма дуцаги, БЕТӀЕРГЬАНАСЕ гӀоло, дун чӀаго вугебгӀан мехалъ дидехун ритӀухълъи цӀуне. 15Нагагь дун хвани, дуца дир хъизан-къаялдаги даимго кверчӀвай – БЕТӀЕРГЬАНАС цо течӀого Давудил тушбаби ракьалдаса тӀагӀинарураб къо бачӀиндалгицин».
16Гьедин Ионатаница Давудилгун къотӀи-къай щула гьабуна: «БЕТӀЕРГЬАНАС жавабалде ахӀаги тӀолалго Давудил тушбаби!» – янги абун.
17Ионатаница Давудги цӀидасан гьедизе тӀамуна гьезул гьудуллъи щулияб букӀиналъе, щайгурелъул Ионатание гьев жиндирго рухӀгӀанги хирияв вукӀиндал. 18Хадуб Ионатаница Давудида абуна:
«Метер цӀияб моцӀ баккиялъул байрам буго. Мун гӀодов чӀолеб бакӀ чӀобого букӀин бихьидал, мун камун вукӀин тӀатина. 19Сезе къаси мун доб цеве вахчун вукӀараб бакӀалде гӀодове вачӀа ва ганчӀил гъонода аскӀов чӀа. 20Дица лъабго чӀор речӀчӀила доб рахъалде, ишан босулев чияс гӀадин. 21Хадуб, векере, чӀорал ралагьеянги абун, цо вас витӀила. „ЧӀорал дуда нахъехун руго, гьанире росе гьел“, – ян дица абуни, БЕТӀЕРГЬАНАСУЛ цӀаралхӀаги, дуе хӀинкъи-къай гьечӀин абураб жо ккола гьеб. Мун къватӀиве вачӀа. 22Амма дица гьев васасда, дуда цере руго чӀоралин абуни, мун лъутизе ккола, щайгурелъул „БЕТӀЕРГЬАНАСУЛ амру буго мун гьаниса нахъе аян“ абураб магӀна букӀина гьелъул. 23Нилъеца гьабураб къотӀи-къаялъул хӀакъалъулъ абуни, гьелъие абадияв нугӀлъун БЕТӀЕРГЬАН вукӀина нилъеда гьоркьов».
24Давуд мегӀер-гӀалахалда вахчана. ЦӀияб моцӀ баккиялъул байрам байбихьидал, пача квана-гьекъезе гӀодов чӀана. 25Пача жиндирго гӀадатияб бакӀалда, Ионатан гьесда дандвитӀун, Авнер гьесда хьолбохъ гӀодор чӀана, амма Давудил бакӀ чӀобого хутӀана. 26Гьеб къоялъ Шаулица щибго абичӀо, щайгурелъул гьес пикру гьабуна:
«Тохлъукьего щиб-щибниги ккун хъублъун#20:26 Мусал къануналда рекъон, цо хъублъи ккарав чи диниял байрамазде вачӀине бегьулароан ва къурбаналъул гьанги кваназе бегьулароан. Хъублъиялъе батӀи-батӀиял гӀиллаби рукӀана. Масала, хварав чиясул жаназаялда квер хъварав чи анкьго къоялъ хъублъаравлъун рикӀкӀунаан. ватила Давуд. Гьайгьай, цо хъублъи ккун батила гьесие», – ян. 27Амма нахъисеб къоялъги, моцӀрол кӀиабилеб къоялъги, Давуд вачӀинчӀеб мехалъ, Шаулица Ионатанида цӀехана:
«Йишайил вас щай вачӀинчӀев кваназе сонги жакъаги?» – ян. 28Ионатаница абуна:
«Давудица цӀакъ гьарана дида жив Бет-Лехемалде ине виччаян. 29Дос абуна: „Виччай дун, дир инсул гӀагарлъиялъ къурбанал хъолел ругелъул шагьаралда; дир вацас лъазабуна дун дова вукӀине кколин. Дидехун дур божилъи батани, виччай дун вацазухъе щвезе“, – ян. Гьединлъидалин гьев пачаясда цадахъ квана-гьекъезеги вачӀинчӀев».
30Гьебмехалъ тӀури бачӀана Шаулиде:
«ГӀай, нажасалъул тӀинчӀ! Дида лъаларогойищ бугеб дуца Йишайил васасулгун хурхен гьабулеб букӀин, – дудего ва мун гьавурай эбелалда тӀаде рогьоги цӀан?! 31Йишайил вас чӀаго вугебгӀан мехалъ я хӀалхьи, я пачалъи букӀине гьечӀо дуе. Инеги ун, дов гьаниве вачун вачӀа! Дов хвезе кколев чи вуго!»
32Ионатаница абуна: «Щай дов хвезе кколев? Щиб дос гьабун бугеб?» – ин.
33Амма Шаулица бахъун хеч хьвагӀун балагьизабуна гьесул рахъалдехун, гьев чӀвазе хӀал бергьун. Гьебмехалъ бичӀчӀана Ионатанида инсуца Давуд чӀвазе хӀукму къотӀун букӀин. 34Ццидаца гъанкъулаго вахъана Ионатан кваналеб бакӀалдаса тӀаде. ЦӀияб моцӀрол кӀиабилеб къоялъ гьес кванда кӀалцин хъвачӀо, щайгурелъул инсуца Давудида хурхун гьабулеб букӀараб къабихӀлъи кутакалда рекӀелъ къан букӀана гьесда.
Давудица Ионатанилгун къо-лъикӀ гьаби
35Давудгун дандчӀвазе гьабураб къотӀи-къаялда рекъон, Ионатан радал вахъун гӀалахалде вилълъана. Цо гӀолохъанав васги вукӀана гьесда цадахъ. 36Гьес гьев васасда абуна:
«Векере, дица речӀчӀарал чӀорал ралагьизе а», – ян.
Гьев векерун индал, Ионатаница гьев унеб рахъалдехун дагьаб добегӀан балагьизабун чӀор речӀчӀана. 37Гьеб чӀор речӀчӀараб бакӀалде вас векерараб мехалъ, Ионатаница гьесда хадуб ахӀана:
«БитӀун дуда цебе цодагьаб добегӀан буго чӀор!» – ин.
38Гьес хадубги ахӀана: «Хехлъи гьабе! Векере! Воре, кивниги лъалхъуге!» – ян.
Васас чӀор босун жиндирго хважаин Ионатанихъе щвезабуна. 39Гьев васасда бичӀчӀулеб жо щибго букӀинчӀо; цохӀо Ионатанидаги Давудидаги гурони гьеб киналъулго магӀна лъалеб букӀинчӀо. 40Цинги Ионатаница гьев васасухъе жиндирги ярагъги кьун, абуна: «Шагьаралде щвезабе гьаб», – ин.
41Гьев вас нахъе аравго, Давуд, ганчӀил гъуниялъул къилбаялъул рахъалдасан вахъун вачӀана ва, гьев лъабго нухалъ кӀалагъоркье ккун, ракьда гьумерги цузабун, Ионатание къулана. Хадуб, цоцазда къвалалги ран, гьел кӀиялго цадахъ гӀодана, Давуд цӀакъго-цӀакъ гӀодулев вукӀана.
42Цинги Ионатаница Давудида абуна: «Мун парахатго нухда а. „БЕТӀЕРГЬАН вукӀа абе нилъеда ва нилъер наслабазда гьоркьов нугӀлъун“, – инги абун, БЕТӀЕРГЬАНАСУЛ цӀарги бахъун, гьудуллъиялъул къотӀи-къай гьабун бугелъул нилъеца».
43Давуд нухде вахъана, Ионатан шагьаралде тӀадвуссана.
Currently Selected:
1 Пачаби 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023