1 Пачаби 21
21
Давуд Нов шагьаралде кашишасухъе вачӀин
1Давуд щвана Нов абураб шагьаралде кашиш Ахимелехихъе. Давуд вихьидал гьев квешго хӀинкъана, ва гьес цӀехана: «Щай мун мунго цохӀо вугев? Цадахъ цогӀаги чи гьечӀого кин мун хутӀарав?» – ин.
2Давудица кашиш Ахимелехида абуна: «Пачаяс дида тӀад къараб жо буго ва гьес лъазабун буго: „Гьаб дица дуда тӀад къараб иш лъидаго лъазе бегьуларо“, – ян. Дирго чагӀазда дица цо пуланаб бакӀалда чӀайилан абуна. 3ЩибгӀаги бугищ дур гьаниб? Щуго чед кье дие, ялъуни цоги щиб батаниги дур гьаниб батараб жо кье».
4Кашишас абуна Давудида: «ГӀадатияб чед гьечӀоха дир гьаниб, мукъадасаб чед#21:4 Мукъадасаб чед – щибаб шамат къоялъ БетӀергьанасул Рокъоб лъолеб анцӀила кӀиго чед букӀунаан. Гьел хисун нахъе росарал чадал кашишзабаз кваналаан. буго; дица гьеб кьела дуе, руччабазда дур чагӀи хъван ратичӀони», – ян.
5Давудица жаваб кьуна: «Гьайгьай, ниж руччабазда хъвачӀо! Дир чагӀаз гӀадатияб сапаралде унагоцин черх бацӀцӀад цӀунула. Гьадинаб къоялъ кигӀанги цӀикӀкӀун цӀунизе ккеларищ гьез рацӀцӀалъи!» – ян.
6Цинги кашишас мукъадасал чадал кьуна гьесие, гьеб къоялъ тӀокӀаб батӀияб чед букӀинчӀелъул гьесда кодоб. Гьес БЕТӀЕРГЬАНАСУЛ мукъадасаб бакӀалда жаниса, чед лъолеб бакӀалдаса, нахъе росун рукӀана гьел гьеб къоялъ, гьезул бакӀалда хинал чадалги лъун.
7Гьебго къоялъ БЕТӀЕРГЬАНАСДА цеве, диниял хӀажалъаби тӀуразаризе вачӀарав, жеги нахъе инчӀого хутӀарав цо Шаулил чиги вукӀана гьенив. Гьев вукӀана Шаулил гӀухьбузул бетӀер, эдомияв Доэк.
8Давудица Ахимелехида цӀехана: «Цо хеч, ялъуни хвалчен гьечӀищ дур гьаниб? Пачаясул къваригӀел хехаб букӀун я дирго хеч, я хвалчен босичӀого вахъана дун къватӀиве», – ян.
9Кашишас абуна: «Дуца Эла расалъиялда чӀварав пилистимав Голиафил хвалчен буго гьаниб, ратӀлилъги жемун эфодалда нахъа лъун, бокьани гьеб босе. Гьеб тун батӀияб хвалчен гьаниб гьечӀо», – ян.
Давудица абуна: «Гьелда бащадаб щибниги батуларо, босе гьанибе», – ян.
Давуд Гаталде пилистимазул пача Ахишихъе лъути
10Гьеб къоялъ Шауликьа хӀинкъун, Давуд гьениса лъутана ва Гаталъул пача Ахишихъе щвана. 11Амма Ахишил чагӀаз гьесда абуна:
«ГӀизраилалъул пача Давудцин гурищ гьав? „Азаразда тӀад бергьенлъи босарав – Шаул, анцӀазаразда тӀад бергьенлъи босарав – Давуд!“ – инги абун, гьасие гурелдай доз кьурди-кӀанцӀиялда кучӀдул ахӀулел рукӀарал?»
12Гьел рагӀаби рагӀидал, Давуд Гаталъул пача Ахишикьа кутакалда хӀинкъана. 13Цинги гьев бетӀер сверарав чилъун хӀазе лъугьана ва, гьезул гьенив вугебгӀан мехалъ, Давуд гӀабдаллъун хӀана. Магжиде чвахизе хӀацӀуги биччан, нуцӀбузда викӀардизе, накъишал рахъизе лъугьана гьев.
14Ахишица жиндирго чукъбузда абуна:
«Балагьун рихье гьав чиясухъ! БетӀер сверарав гӀабдал вугогури гьав! Ав дихъе щай вачарав чи? 15Дир гьанир гӀабдалзаби дагьал рукӀунищ, тохалщинал жал рихьизаризе гьавги вачун вачӀун вугев? Дир къавулъ къваригӀарав чи гуро гьав!» – ин.
Currently Selected:
1 Пачаби 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023