1 Пачаби 5
5
Аллагьасул гъамас асирлъуде босаралъухъ пилистимазе БетӀергьанас тамихӀ гьаби
1Пилистимаз Аллагьасул гъамас Эвен-Эзералдаса босун Ашдодалде щвезабуна. 2Цинги гьез гьеб Дагонил#5:2 Дагон – пилистимазул аслияв аллагь. Гъугъадиялъул ва хур-хералъул аллагь вукӀун ватизеги бегьула гьев. рокъобеги босун, ганчӀил гьабураб Дагонил статуялда аскӀоб лъуна. 3Нахъисеб къоялъ радалго тӀаде рахъарал Ашдодалъул гӀадамазда БЕТӀЕРГЬАНАСУЛ гъансида цебе кӀалагъоркье гӀодоб речӀчӀун батана Дагонил статуя. Гьез гьеб Дагонил статуя тӀадбуссун жиндирго бакӀалда эхетизабуна. 4Хадусеб къоялъ радалго тӀаде рахъун ралагьидал, Дагонил статуя додинго кӀалагъоркье ккун БЕТӀЕРГЬАНАСУЛ гъансида цебе гӀодоб речӀчӀун батана. Гьелъул бетӀерги квералги рек-рекун рагьумахӀуялде рехун ратана; Дагонил нахъе хутӀараб жо цохӀо къаркъала бугоан. 5Гьединлъидал, жакъа къоялде щвезегӀанги Дагонил кашишзабаз ва Ашдодалда бугеб гьесул рокъоре рачӀунел гӀадамаз гьеб рагьумахӀуялда тӀад хӀетӀе чӀоларо.
6БЕТӀЕРГЬАНАСУЛ ццин рещтӀана Ашдодалъул жамагӀаталде ва гьезул сверухълъиялдего; Ашдодги тӀолабго сверухълъиги чӀунтизабуна Гьес ва рецӀцӀ ккарал ругънал рахъана гӀадамазул черхалда. 7Гьеб кинабго бихьидал, Ашдодалъул гӀадамаз абуна:
«ГӀизраилалъул Аллагьасул гъамас нилъер гьаниб тезе бегьуларо, щайгурелъул Гьесул гӀасияб ццин буго нилъедаги нилъер аллагь Дагонидаги».
8Цинги тӀолалго пилистимазул церехъаби данде ахӀана гьез ва гьезда цӀехана: «ГӀизраилалъул Аллагьасул гъансида щибдай гьабун лъикӀ?» – ин. Гьез жаваб кьуна: «ГӀизраилалъул Аллагьасул гъамас Гаталде щвезабе», – ян.
Цинги гьез ГӀизраилалъул Аллагьасул гъамас Гаталде щвезабуна. 9Амма гьеб гьенибе щварабго, гьеб шагьаралда тӀадеги БЕТӀЕРГЬАНАСУЛ ццин рещтӀана, ва тӀолабго шагьар хӀинкъун бихха-хочана. КӀудиял-гьитӀинал батӀалъи гьечӀого, киназдаго рецӀцӀулел ругънал рахъана. 10Цинги гьез гьеб Аллагьасул гъамас Экроналде битӀана.
Гьебмехалъ Экроналъул жамагӀат чӀчӀи-чӀчӀидана: «Нилъ киналго хвезаризе ГӀизраилалъул Аллагьасул гъамас бачӀун буго нилъехъе!» – янги абун.
11Цинги пилистимазул церехъаби данделъана ва гьез лъазабуна: «ГӀизраилалъул Аллагьасул гъамас нахъе битӀе! Жиндирго бакӀалде тӀадбуссинабе гьеб, нилъ киналго хвезаричӀого рукӀине».
ХӀинкъараб хӀинкъиялъ, тӀолабго шагьаралъул рухӀ тӀун букӀана, – Аллагьасул гьалагаб ццин рещтӀун букӀиндал гьезда тӀаде. 12ЧӀаго хутӀарал гӀадамалги, рецӀцӀулел ругънал тӀад рахъун, гӀазаб-гӀакъубаялда рукӀана, ва кӀуди-кӀудиял гьаркьаздалъун зобалаздаса кумек гьарулел, гьуя-гьараялда гӀода-чӀвадиялда рукӀана.
Currently Selected:
1 Пачаби 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023