Иоанн 19

19 бетӀер

БагӀараб гӀабаги зазил хьухьун гьабураб тажги

1Пилатица амру гьабуна, гьениса нахъе вачун, ГӀиса цӀалаца вухейилан. 2Рагъухъабаз зазил хьухьун таж лъуна ГӀисал ботӀрода. БецӀбагӀараб ххамил гӀабаги рехана гьесул мугъзаде. 3Цинги аскӀоре рачӀун: «ЖугьутӀазул парччахӀ чӀахъаги!» – ян ахӀулаго, ГӀисал гьумер бухулеб букӀана гьез.

4Пилатица, нахъеги къватӀиве вачӀун, ягьудиязда абуна:

– ГӀенеккея, дица дов къватӀиве вачунев вуго, досда тӀад гӀайиб чӀезабизе дида кӀвечӀеблъи нужеда лъан букӀине.

5Зазил тажги ботӀрода лъун, багӀараб гӀабаги мугъзаде рехун, вачун вачӀана ГӀиса.

– Гьале гьев чи! – ян абуна Пилатица.

6Гьев вихьаравго чӀахӀиял кашишзабиги Мукъадасаб Рукъалъул хъаравулзабиги ахӀдезе лъугьана:

– Хъанчида вазе витӀе! Хъанчида вазе витӀе!

Пилатица абуна:

– Нужецаго вай гьав хъанчида. Дида кӀоларо гьасда гӀайиб чӀезабизе.

7Ягьудияз гьесда абуна:

– Нижерги нижерго къанун буго. Нижер къануналда рекъон гьев чӀвазе ккола, гьес жив Аллагьасул Вас вугилан абулеб бугелъул.

8Гьедин гьез абулеб рагӀидал, Пилат дагьавги цӀакъ хӀинкъана. 9ГӀисаги вачун, кӀалгӀаялъуве лъугьун, гьикъана гьесда:

– Мун киса? – ян.

ГӀисаца жаваб кьечӀо. 10Пилатица гьесда абуна:

– Дида кӀалъаларилан чӀунищ мун вугев? Дуда лъаларищ, дие бокьани, мун хъанчида вазе яги нахъе виччазе дир ихтияр букӀин?

11ГӀисаца жаваб кьуна:

– Аллагьасул къадар гьединаб букӀинчӀебани, дие щибниги гьабизе ихтияр букӀинароан дур. Дуеялдаса цӀикӀкӀараб мунагь букӀина дун духъе кьуразе.

12ГӀисаца гьедин абидал, Пилатица хӀаракат бахъулеб букӀана гьев нахъе виччазе. Амма ягьудиял ахӀдолел рукӀана:

– Дуца гьев нахъе виччани, къайсарасул гьудул вукӀинароха мун. Живго парччахӀлъун рикӀкӀунев чи – гьев ккола къайсарасда дандечӀарав чи!

13Ягьудияз гьедин абидал, Пилатица ГӀиса къватӀиве вачана. ГамачӀ ккураб къотӀнов (жугьутӀ мацӀалда гьелда цӀар букӀана «Габбата») суд гьабизе вахунеб тахида тӀад гӀодов чӀана Пилат. 14Гьеб букӀана Пасхаялда цебесеб къоялъул къалъул гӀуж.

Пилатица ягьудиязда абуна:

– Гьале нужер парччахӀ!

15Гьез ахӀулеб букӀана:

– ВитӀе, витӀе, хъанчида вазе витӀе!

Пилатица абуна:

– Нужер ПарччахӀ хъанчида вазе витӀизе бегьилищ дица?

ЧӀахӀиял кашишзабаз ахӀана:

– Къайсар тун батӀияв парччахӀ гьечӀо нижер!

16Ахирги Пилатица ГӀиса хъанчида вазе гьезухъе кьуна.

ГӀиса хъанчида вала

Гьевги вачун рагъухъабиги ана. 17Жиндирго хъанчги баччун, «Гвангвара» абулеб бакӀалде (жугьутӀазул мацӀалда гьеб бакӀалда цӀар букӀана «Голгота») вачана ГӀиса. 18Гьенив гьев хъанчида вана. КӀиго чиги вана ГӀисада цадахъ хъанчида: цо кваранаб рахъалда, цояв квегӀаб рахъалда. ГӀиса бакьулъе ккана. 19Пилатица амру гьабун букӀана: «Назареталдаса ГӀиса – жугьутӀазул парччахӀ» абун хъвараб хъарщи чӀвайин ГӀисал хъанчида. 20ЖугьутӀазул, греказул ва латиназул мацӀалда хъван букӀиндал, гӀемерал ягьудияз цӀалана гьеб. Гьеб бакӀ шагьаралде гӀагардаго букӀиндал, гӀемерав чи вачӀун вукӀана гьениве. 21Ягьудиязул чӀухӀби-хӀакимзабаз Пилатида абуна:

– «ЖугьутӀазул парччахӀ» – абун хъвазе бегьулароан букӀараб. Гьелда хъвазе ккола «Гьас абулеб букӀана жив жугьутӀазул парччахӀ вугилан».

22– Дица хъвавухъе те, – ян абуна Пилатица.

23ГӀисаги хъанчида ван, рагъухъабаз гьесул ретӀел жидеего босана ва ункъасдаго гьоркьоб бикьана. Къвалалгун цадахъ бессун гьабураб, букъараб бакӀго гьечӀеб халатаб сугърал гурдеги щвана гьезие. 24Гьез хӀукму гьабуна тӀутӀун хвезабичӀого, можоро бахъун бергьарасе тезе. Гьедин гьабизеги гьабуна рагъухъабаз, ва ТӀехьалда хъван букӀараб гьадинаб калима ритӀухълъана:

«Дир ретӀел гьез жидедаго гьоркьоб бикьана.

Дир гурде лъие щвелебали можоро тӀамуна гьез».

25ГӀисал хъанчида цере рахъун чӀун рукӀана гьесул эбелги, гьесул эбелалъул яцги, Клеопал чӀужу Марямги, Магдалаялдаса Марямги. 26Эбелги жиндие вокьулев муридги гьенир чӀун рихьидал, жиндирго эбелалда ГӀисаца абуна:

– Я, дир эбел! Гьалеха дур вас! – ан.

27Цинги гьес гьев муридасда абуна гьанже гьей дур эбел кколилан. Гьев муридас нахъа ГӀисал эбел жиндаго аскӀое ячана.

ГӀисал рухӀ босун уна

28Гьелдаса хадубги ГӀисада лъана кинабго ТӀухьдуз бицухъе кколеб букӀин. ТӀехьалда бугеб ритӀухълъизе гьес абуна жив къечон вугилан. 29ЦӀекӀаб чогърол цӀураб парччи букӀана рагъухъабазухъ. Гьеб чогъролъ чӀортоги ччун, иссоп абулеб цо гъотӀодаса къотӀараб гӀералда бухьун, гьеб ГӀисал кӀутӀбузда хъвазабуна. 30Чогърол тӀагӀам мацӀалде бачӀиндал: «ТӀубана!» – ян абуна ГӀисаца.

Гьесул бетӀер каранде далана ва рухӀ босун ана.

ГӀисал хьолболъ хеч тункула

31Гьеб букӀана рузман къо. Ягьудиязе бокьичӀо гьезул къаркъалаби шамат къоялъги хъанчазда равухъе тезе. (Гьеб шамат къо кӀудияб байрамалъул къо букӀана.) Гьединлъидал гьез Пилатида гьарана бохдул рекун хвезеги гьарун, гьезул жаназаби хъанчаздаса рахъизе изну кьейилан. 32РачӀун рагъухъабаз бохдул рекана ГӀисада цадахъ хъанчида ван вукӀарав дов кӀиявго чиясул. 33ГӀисаде ирга щведал, гьев хун ватана гьезда. Гьединлъидал гьесул бохдулги рекичӀо. 34Амма цояс гьесул хьолболъ хеч тункана. Ругънадасан гьулчун бачӀана биги лъимги.

35Гьелъул хӀакъалъулъ бицана жиндир беразда гьеб бихьарав чияс. Гьес гьеб бицана нуж божизе бокьун. Гьес бицарабги битӀараб буго. Гьесда лъала жинца битӀараб бицунеб бугеблъи!

36Гьеб гьедин ккана ТӀехьалда бугеб гьадинаб калима ритӀухълъизе: «Гьесул ракьа бекизе къотӀи гьечӀо». 37Цоги ТӀехьалда хъван буго: «Хечалъ черх борлъарасухъ ралагьун рукӀина гьел».

ГӀиса хабалъ вукъула

38Ягьудиязул заралалдаса хӀинкъун балъгого ГӀисае муридлъи гьабулев вукӀарав Ариматеялдаса Юсупин абулев цо чи ана Пилатихъе, ГӀисал жаназа букъизе изну кьейилан гьарун. Пилатица изну кьуна. ВачӀун гьев чияс ГӀисал жаназа хъанчидаса бахъана. 39Доб цо сордоялъ ГӀисахъе ун вукӀарав Никодемги вачӀана нусго гелавка нахулги босун. БатӀи-батӀиял хурдузул бахъараб нах букӀана гьеб. 40ЖугьутӀазул гӀадаталда рекъон, махӀ берцинаб нахулъ ччун мусралги ран, къачӀана гьез ГӀисал жаназа. 41Гьев хъанчида вараб бакӀалда аскӀоб цо ах букӀана. Гьеб ахикь букӀана нохъода бикӀун къачӀараб, жанив чи лъечӀеб хоб. 42Метер шамат къоялде жугьутӀал хӀадурлъулеб къо букӀиндал, хобги гӀагардаго букӀиндал, хехго гьенив вукъана гьез ГӀиса.

Currently Selected:

Иоанн 19: АварАК

Highlight

Copy