Luk 24
24
Jisas 'e tata'e fasi maea
(Matiu 28:1-10; Mak 16:1-8; Jon 20:1-10)
1'Ana fa thato tootolena'o 'ana wiki, laa si 'uu'usungadia 'uu bo'o, kini baa ki keka ngalia na gwai makwa le'a baa ki na kera kwaithathai 'anida ma keka lae uria kwainga'ia baa. 2Keka rikia na gwa fau maana kwainga'ia ba 'e 'idu na'a fasia 'olofolo 'eri, 3sui si manga kera kotho kau 'i laala, kesi rikia na'a se'ena tha Lord Jisas. 4Si manga manatada kai rofe bana, tona mena, roo wane 'afisia maku na 'e sinasina mala ta maanu keka takwe bada ninimada. 5Kini 'eki keka ma'u 'asia na'a ma keka gwautoli 'i tha'egano, sui ma wane 'eki keka sore'a 'i sada, “Ura taa na muka lio uria wane maruki ma'alutana to'a mae ki? 6Nia 'e a'i si too 'i se'e, nia 'e tata'e na'a fasi maea! Manatato'ona si doo ba 'e fa'arongo kamalu'a si manga 'e ni bi kamalu'a 'i Galili, 7‘Kaluwane imole keki falea 'i 'abana to'a abula ta'aa, kai mae 'ana 'airarafolo ma 'ana uula fa bongi kai tata'e la'u bana fasia maea.’ ” 8Si manga 'eri bo'o keka manatato'ona ba'elana ki.
9Si manga kera oli mai fasia na kwainga'ia, keka fa'arongo 'ana si doo 'eki sui sana taafulu disaepol ma te'e disaepol baa ki, ma tei imole ki la'u kula 'eri. 10Kini 'eki na ni Mere Magdalin, Joana, Mere thainana Demesi, ma tei kini ki la'u na kera fa'arongoa si doo 'eki sana 'aposol 'eki. 11Sui taa 'e a'i kesi fa'amamanea na kini 'eki, sulia si fa'arongoa 'eri rongolana 'e 'uria doo kera fau'aa bada. 12'Una 'eri mena, Pita ka tata'e ka fita bona'a uria kwainga'ia 'eri. 'E ika kau ka rikia na maku kwaakwao'a baa ki 'e tona teo na'a, ma nia ka oli ka manata 'i tala'ana sulia doo ki na 'e fuli neri.
Laelaa ura 'i 'Emaus
(Mak 16:12-13)
13'Ana fa thato 'eri bana, roo wane 'i ada kera lae uria te'e toaa thatana 'i 'Emaus, karangia taafulu ma te'e kilomita fasia Jerusalem. 14Keero'a keki u'unu 'adaro'a sulia si doo ki na 'e fuli neri. 15Ma si manga keki ngata 'adaro'a sulia si doo 'eki ma'alutadaro'a, Jisas ka lae mai, ma ka lae kau bi keero'a, 16sui God ka adea kesi riki thaito'omana bo'o.
17Nia ka soeto'odaro'a, “Taa na moki ngata 'amaro'a sulia si manga na moro lae mai?”
Keko takwe te'e si kula, liodaro'a 'e dila. 18Ma te'e wane 'i adaro'a thatana tha Kleopas ka soeto'ona, “Te'e 'oe na'a na 'o fula 'i Jerusalem ma a'i 'osi thaito'omana na doo ki na 'e fuli fa thato na 'i tara'ena ki.”
19Jisas ka soeto'oda, “Si taa ki?”
Keka sore'a, “Si doo ki sulia tha Jisas fasi Nasaret, nia te'e profet, 'e ngata ma ka ili doo ki 'ana suukwa'ia 'i maana God ma imole ki sui. 20Ma to'a naana'o 'ana wanenifo'a ki ma to'a ni kwaitalai kamali'a ki kera fale nia ura maea ma keka thaungi nia 'ana 'airarafolo. 21Sui manatangadolaa kamali'a, mili sosa 'amali'a nia na'a na kai falea siitathalaa fana 'Israel. Ma sui, ulu fa bongi 'e sui na'a, si manga doo 'eki 'e fuli neri. 22Ma ka safua la'u, tei kini kamali'a ki kera sore'a la'u tei si doo ki na mili kwele 'ania. Kera lae ura maana kwainga'ia 'eri, 'i laa si 'uu'usungadia tara'ena, 23ma a'i kesi rikia na'a se'edoo nia. Kera oli mai keka sore'a kera rikia na 'ensolo ki, na kera sore'a nia 'e maruki la'u. 24Sui tei wane 'i amili'a kera lae uria kwainga'ia 'eri ma keka rikia na 'e 'uria bona'a mala kini 'eki kera sore'a, sui kesi rikia tha Jisas.”
25Nia ka sore'a 'i sadaro'a, “Moro guna'a 'asia na'a, ma moka kakuta 'asia na'a ura fa'amamanelana si doo ki na profet ki kera sore'a! 26Mosi thaito'omana bo'o na Kraest kai se'efii bona'a 'ana si doo 'eki, sui fata'i ka kotho 'i laa 'inotoa nia?” 27Ma ka thafali fasia tha Mosisi ka fula 'ana 'aina Profet ki, nia ka to'olangania 'i sada taa ki na kera sore'a suli nia laa keekeda abu ki.
28Si manga na kera karangia na'a na toaa na kera lae uria, Jisas ka ade 'ana mala wane na kai lae daa. 29Sui keero'a keka suusu'u, keka sore'a, “Too na'a bii kamare'a sulia nia karangia kai tha'ulefi na'a neri, fanua kai rodo na'a.” Ma nia ka lae na kau bii keero'a.
30Si manga nia 'e reri na'a kalia tefolo bii keero'a, nia ka ngalia berete, ka si falea tangolaa, ka niia ma ka thafali falea na kau 'i fadaro'a. 31Ma maadaro'a ka bi'i 'ifi, ma keko riki thaito'omana, ma nia ka dola bona'a fasi keero'a. 32Keko soeto'odaro'a kwailiu, “Mangokaro'a 'e thalume 'asia na'a na ba, 'asi manga na kai to'olangania na Keekedaa Abu 'i sakaro'a sulia tala ba.”
33Keero'a keka tata'e ma keko oli bona'a uria 'i Jerusalem. Keko fulato'ona na taafulu ma te'e disaepol 'eki ma tei imole ki la'u kera ofu bii kera, 34ma keka sore'a, “Nia 'e mamana! Tha Lord 'e tata'e fasi maea ma ka faata'i sana tha Saemon.” 35Sui keero'a keka fa'arongo kera 'ana taa na 'e fuli si manga na kero lae sula tala, ma si manga kero riki thaito'omana tha Jisas si manga na 'e niia berete 'eri.
Jisas 'e faata'i sana disaepol ki
(Matiu 28:16-20; Mak 16:14-18; Jon 20:19-23; Aks 1:6-8)
36Si manga na keki ngata bada sulia si doo 'eki, Jisas ka takwe ma'alutada ka sore'a 'i sada, “Enenoa kai too bii kamalu'a.”
37Keka tona ma keka ma'u, keka sosa 'ada kera rikia ta ano'edoo. 38Nia ka ngata 'una 'eri 'i sada, “Uria taa muka ma'u ma muka manata ruarua? 39Rikia fasi roo 'aba nau ki ma roo 'ae nau ki. Ni nau bana ne'e! Sua nau ma muka rikia, na ano'edoo 'e a'i si too 'ana mariko ma 'oki mala na mulu rikia ku too 'ania.”
40Si manga na 'e sore'a si doo 'eki, nia ka faatania roo 'aba nia ma roo 'ae ni ki 'i sada. 41Ma sui kera kesi fa'amamanea 'uu bada sulia kera se'ethaathala ma keka kwele. Ma nia ka soeto'oda, “Mulu too 'ana ta si doo ura 'anilana?” 42Keka falea te'e ii'a na kera na'area, 43ma nia ka ngalia ma ka 'ania si manga keki lio bada.
44Nia ka sore'a 'i sada, “Ku fa'arongo kamalu'a, si manga na ku too 'uu bii kamalu'a: Si doo ki sui na kera kedaa suli nau 'i laa biibiranga ki tha Mosisi, na Profet ki ma na Saams ki kai fuli te'e fau.”
45Sui nia ka 'ifinia manatada fasi keka thaito'omana na Keekedaa Abu ki. 46Nia ka fa'arongo kera, “Si doo ne'e ki na kera kedaa, tha Kraest kai se'efii ka mae, sui ka tata'e fasia maea 'ana uula fa bongi, 47ma manata akelelaa uria manatalubelaa fasia ta'aalaa ki sui keki fa'arongo talo 'ania 'ana thatana fana kula ki sui, thafali 'i Jerusalem. 48Kamalu'a na mulu rikia si doo 'eki ma muki ngata sulia. 49Nau kwai falea mai taa na maka nau 'e alangania 'i famalu'a, sui taa muki too 'i laa toaa susu ne'e laalae ka fula 'ana si manga na muki fungu 'ana suukwa'ia fasi thalo lo.”
Tha Jisas 'e ta'e uria 'i Thalo
(Mak 16:19-20; Aks 1:9-11)
50Si manga nia 'e tole kera kau ura 'i Bethani, 'e kwaua 'abana ki 'i aa ma ka 'aratania le'alaa tha God faafi kera. 51Si manga na kai 'arata'i le'a bana 'ani kera, nia ka 'akwasi kera ma ka lae bona'a uri 'i thalo. 52Ma keka faareba'ita 'i ana, ma keka oli na'a ura Jerusalem 'ana se'ethaathalalaa ne ba'ita. 53Ma keka too si manga ki sui bana 'i laa Biu Abu tha God 'ana tangolana tha God.
Currently Selected:
Luk 24: MLU
Highlight
Share
Copy
Want to have your highlights saved across all your devices? Sign up or sign in
© 2024, SITAG
Luk 24
24
Jisas 'e tata'e fasi maea
(Matiu 28:1-10; Mak 16:1-8; Jon 20:1-10)
1'Ana fa thato tootolena'o 'ana wiki, laa si 'uu'usungadia 'uu bo'o, kini baa ki keka ngalia na gwai makwa le'a baa ki na kera kwaithathai 'anida ma keka lae uria kwainga'ia baa. 2Keka rikia na gwa fau maana kwainga'ia ba 'e 'idu na'a fasia 'olofolo 'eri, 3sui si manga kera kotho kau 'i laala, kesi rikia na'a se'ena tha Lord Jisas. 4Si manga manatada kai rofe bana, tona mena, roo wane 'afisia maku na 'e sinasina mala ta maanu keka takwe bada ninimada. 5Kini 'eki keka ma'u 'asia na'a ma keka gwautoli 'i tha'egano, sui ma wane 'eki keka sore'a 'i sada, “Ura taa na muka lio uria wane maruki ma'alutana to'a mae ki? 6Nia 'e a'i si too 'i se'e, nia 'e tata'e na'a fasi maea! Manatato'ona si doo ba 'e fa'arongo kamalu'a si manga 'e ni bi kamalu'a 'i Galili, 7‘Kaluwane imole keki falea 'i 'abana to'a abula ta'aa, kai mae 'ana 'airarafolo ma 'ana uula fa bongi kai tata'e la'u bana fasia maea.’ ” 8Si manga 'eri bo'o keka manatato'ona ba'elana ki.
9Si manga kera oli mai fasia na kwainga'ia, keka fa'arongo 'ana si doo 'eki sui sana taafulu disaepol ma te'e disaepol baa ki, ma tei imole ki la'u kula 'eri. 10Kini 'eki na ni Mere Magdalin, Joana, Mere thainana Demesi, ma tei kini ki la'u na kera fa'arongoa si doo 'eki sana 'aposol 'eki. 11Sui taa 'e a'i kesi fa'amamanea na kini 'eki, sulia si fa'arongoa 'eri rongolana 'e 'uria doo kera fau'aa bada. 12'Una 'eri mena, Pita ka tata'e ka fita bona'a uria kwainga'ia 'eri. 'E ika kau ka rikia na maku kwaakwao'a baa ki 'e tona teo na'a, ma nia ka oli ka manata 'i tala'ana sulia doo ki na 'e fuli neri.
Laelaa ura 'i 'Emaus
(Mak 16:12-13)
13'Ana fa thato 'eri bana, roo wane 'i ada kera lae uria te'e toaa thatana 'i 'Emaus, karangia taafulu ma te'e kilomita fasia Jerusalem. 14Keero'a keki u'unu 'adaro'a sulia si doo ki na 'e fuli neri. 15Ma si manga keki ngata 'adaro'a sulia si doo 'eki ma'alutadaro'a, Jisas ka lae mai, ma ka lae kau bi keero'a, 16sui God ka adea kesi riki thaito'omana bo'o.
17Nia ka soeto'odaro'a, “Taa na moki ngata 'amaro'a sulia si manga na moro lae mai?”
Keko takwe te'e si kula, liodaro'a 'e dila. 18Ma te'e wane 'i adaro'a thatana tha Kleopas ka soeto'ona, “Te'e 'oe na'a na 'o fula 'i Jerusalem ma a'i 'osi thaito'omana na doo ki na 'e fuli fa thato na 'i tara'ena ki.”
19Jisas ka soeto'oda, “Si taa ki?”
Keka sore'a, “Si doo ki sulia tha Jisas fasi Nasaret, nia te'e profet, 'e ngata ma ka ili doo ki 'ana suukwa'ia 'i maana God ma imole ki sui. 20Ma to'a naana'o 'ana wanenifo'a ki ma to'a ni kwaitalai kamali'a ki kera fale nia ura maea ma keka thaungi nia 'ana 'airarafolo. 21Sui manatangadolaa kamali'a, mili sosa 'amali'a nia na'a na kai falea siitathalaa fana 'Israel. Ma sui, ulu fa bongi 'e sui na'a, si manga doo 'eki 'e fuli neri. 22Ma ka safua la'u, tei kini kamali'a ki kera sore'a la'u tei si doo ki na mili kwele 'ania. Kera lae ura maana kwainga'ia 'eri, 'i laa si 'uu'usungadia tara'ena, 23ma a'i kesi rikia na'a se'edoo nia. Kera oli mai keka sore'a kera rikia na 'ensolo ki, na kera sore'a nia 'e maruki la'u. 24Sui tei wane 'i amili'a kera lae uria kwainga'ia 'eri ma keka rikia na 'e 'uria bona'a mala kini 'eki kera sore'a, sui kesi rikia tha Jisas.”
25Nia ka sore'a 'i sadaro'a, “Moro guna'a 'asia na'a, ma moka kakuta 'asia na'a ura fa'amamanelana si doo ki na profet ki kera sore'a! 26Mosi thaito'omana bo'o na Kraest kai se'efii bona'a 'ana si doo 'eki, sui fata'i ka kotho 'i laa 'inotoa nia?” 27Ma ka thafali fasia tha Mosisi ka fula 'ana 'aina Profet ki, nia ka to'olangania 'i sada taa ki na kera sore'a suli nia laa keekeda abu ki.
28Si manga na kera karangia na'a na toaa na kera lae uria, Jisas ka ade 'ana mala wane na kai lae daa. 29Sui keero'a keka suusu'u, keka sore'a, “Too na'a bii kamare'a sulia nia karangia kai tha'ulefi na'a neri, fanua kai rodo na'a.” Ma nia ka lae na kau bii keero'a.
30Si manga nia 'e reri na'a kalia tefolo bii keero'a, nia ka ngalia berete, ka si falea tangolaa, ka niia ma ka thafali falea na kau 'i fadaro'a. 31Ma maadaro'a ka bi'i 'ifi, ma keko riki thaito'omana, ma nia ka dola bona'a fasi keero'a. 32Keko soeto'odaro'a kwailiu, “Mangokaro'a 'e thalume 'asia na'a na ba, 'asi manga na kai to'olangania na Keekedaa Abu 'i sakaro'a sulia tala ba.”
33Keero'a keka tata'e ma keko oli bona'a uria 'i Jerusalem. Keko fulato'ona na taafulu ma te'e disaepol 'eki ma tei imole ki la'u kera ofu bii kera, 34ma keka sore'a, “Nia 'e mamana! Tha Lord 'e tata'e fasi maea ma ka faata'i sana tha Saemon.” 35Sui keero'a keka fa'arongo kera 'ana taa na 'e fuli si manga na kero lae sula tala, ma si manga kero riki thaito'omana tha Jisas si manga na 'e niia berete 'eri.
Jisas 'e faata'i sana disaepol ki
(Matiu 28:16-20; Mak 16:14-18; Jon 20:19-23; Aks 1:6-8)
36Si manga na keki ngata bada sulia si doo 'eki, Jisas ka takwe ma'alutada ka sore'a 'i sada, “Enenoa kai too bii kamalu'a.”
37Keka tona ma keka ma'u, keka sosa 'ada kera rikia ta ano'edoo. 38Nia ka ngata 'una 'eri 'i sada, “Uria taa muka ma'u ma muka manata ruarua? 39Rikia fasi roo 'aba nau ki ma roo 'ae nau ki. Ni nau bana ne'e! Sua nau ma muka rikia, na ano'edoo 'e a'i si too 'ana mariko ma 'oki mala na mulu rikia ku too 'ania.”
40Si manga na 'e sore'a si doo 'eki, nia ka faatania roo 'aba nia ma roo 'ae ni ki 'i sada. 41Ma sui kera kesi fa'amamanea 'uu bada sulia kera se'ethaathala ma keka kwele. Ma nia ka soeto'oda, “Mulu too 'ana ta si doo ura 'anilana?” 42Keka falea te'e ii'a na kera na'area, 43ma nia ka ngalia ma ka 'ania si manga keki lio bada.
44Nia ka sore'a 'i sada, “Ku fa'arongo kamalu'a, si manga na ku too 'uu bii kamalu'a: Si doo ki sui na kera kedaa suli nau 'i laa biibiranga ki tha Mosisi, na Profet ki ma na Saams ki kai fuli te'e fau.”
45Sui nia ka 'ifinia manatada fasi keka thaito'omana na Keekedaa Abu ki. 46Nia ka fa'arongo kera, “Si doo ne'e ki na kera kedaa, tha Kraest kai se'efii ka mae, sui ka tata'e fasia maea 'ana uula fa bongi, 47ma manata akelelaa uria manatalubelaa fasia ta'aalaa ki sui keki fa'arongo talo 'ania 'ana thatana fana kula ki sui, thafali 'i Jerusalem. 48Kamalu'a na mulu rikia si doo 'eki ma muki ngata sulia. 49Nau kwai falea mai taa na maka nau 'e alangania 'i famalu'a, sui taa muki too 'i laa toaa susu ne'e laalae ka fula 'ana si manga na muki fungu 'ana suukwa'ia fasi thalo lo.”
Tha Jisas 'e ta'e uria 'i Thalo
(Mak 16:19-20; Aks 1:9-11)
50Si manga nia 'e tole kera kau ura 'i Bethani, 'e kwaua 'abana ki 'i aa ma ka 'aratania le'alaa tha God faafi kera. 51Si manga na kai 'arata'i le'a bana 'ani kera, nia ka 'akwasi kera ma ka lae bona'a uri 'i thalo. 52Ma keka faareba'ita 'i ana, ma keka oli na'a ura Jerusalem 'ana se'ethaathalalaa ne ba'ita. 53Ma keka too si manga ki sui bana 'i laa Biu Abu tha God 'ana tangolana tha God.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024, SITAG